Te ’itera’a i te ’ōpuara’a hanahana i roto i tō tātou ’utuāfare « e ’ere i te mea maita’i roa »

’Ei vahine ’ōtahi tei hina’aro i te fa’aipoipora’a ’e te mau tamari’i e rave rahi matahiti te maoro, ’ua hina’aro vau ’e ’ua ti’aturi au ē, hō’ē ’ōpuara’a tumu o tō’u orara’a, ’o te fa’atupura’a ïa i te mau mana’o teitei nō te orara’a ’utuāfare tei vauvauhia i roto i te poro’i nō ni’a i te ’utuāfare. Noa atu rā tā’u mau tauto’ora’a mau, e au ra ē, ’aita i ti’a iā’u ’ia fa’atupu i te reira mai tā’u i ti’aturi. E mea māuiui taua ’arora’a ra.

I taua taime ra, ’aita i ti’a iā’u ’ia ’ite i te ’ohipa temeio tā te Fatu e fa’atupu ra i roto i tō’u ’ā’au nā roto i taua ’arora’a ra.

’Ia hi’o ana’e au i muri, e ’ohipa mo’a tā tō’u mau hina’aro manuia ’ore i rave nō te fa’afāriu i tō’u ’ā’au i tō’u Fa’aora nō te ’imi i te hau ’e i te arata’ira’a ’o tāna ana’e e nehenehe e hōro’a ’e e fa’ahōhonu i tō’u ti’aturi i tōna here maita’i roa ’e te mana fa’atupu. ’Ua riro mai te pure ’e te tuatāpapara’a pāpa’ira’a mo’a i te mau mahana ato’a, ’e te mau parau iho ā rā o te ’āmuira’a rahi, ’ei taura fa’aora nō te ti’aturira’a ’e te arata’ira’a. ’Ua tupu mai te mana’o e fāriu i ni’a i te mau parau o tō’u ha’amaita’ira’a pātereāreha—’e te tahi atu mau ha’amaita’ira’a autahu’ara’a—nō te ’ite i te here ’e te arata’ira’a nō’u iho nō ’ō mai i tō’u Metua Mure ’Ore ra.

’A nīni’i ai au i tō’u ’ā’au i mua i te Fatu, noa atu ē, ’ua fa’ahemahia vau ’ia fāriu ’ē i roto i te ’ino’ino, ’ua tupu mai ra te mau mana’o mo’a i roto i tō’u ferurira’a ’e i roto i tō’u ’ā’au tei ha’apāpū mai iā’u ē, ’ua ’ite ’oia ē, tei hea vau, ’e e fa’anahora’a nehenehe tō tō’u orara’a, ’e e nehenehe ho’i tā’u e ti’aturi iāna. ’Ua riro mai te fafaura’a a³ tō’u Tāra’ehara ’ei niu nō te hau ’e te ’oa’oa rahi hau atu i te tahi atu mau rāve’a nō te tupu-maita’i-ra’a ’aore rā nō te ’oa’oa.

’Ite a’era vau ē, noa atu ’ua ti’aturi au ē, te ’ōpuara’a o tō’u orara’a o te fa’atupura’a ïa i tō’u mau moemoeā nō te ’utuāfare maita’i roa, ’ua fa’atupu te Fatu i te mea tā Elder Jeffrey R. Holland nō te pupu nō te Tino ’Ahuru Ma Piti ’āpōsetolo i pi’i te ’ōpuara’a tumu o te tahuti nei. Ma te fa’ahiti i te ari’i Beniamina, ’ua fa’ata’a mai ’oia : « Penei a’e te ’ōpuara’a tumu… ’o te rirora’a ïa ’ei ‘ta’ata mo’a nā roto i te tāra’ehara a te Mesia ra te Fatu’, ’o tē tītau ia tātou ’ia riro ‘mai te tamari’i ra te huru, te auraro, te marū, te haeha’a, te fa’a’oroma’i, te ’ī i te here, te hina’aro ’ia auraro i te mau mea ato’a tā te Fatu e hina’aro e tu’u i ni’a iāna, mai te tamari’i e auraro ho’i i tōna ra metua’ ».⁴

Nā tō’u hina’aro i te tauturu ’e te pūai o te Fa’aora i arata’i iā’u ’ia ’imi ’e ’ia ’ite i tōna ’ā’au auraro, te marū, te haeha’a, te fa’a’oroma’i ’e te here. I roto i taua ’ohipa ra, ’ua tauihia vau nā roto i tōna mana fa’atupu. ’E te parau mau, ’o te mea ïa tā’u i hina’aro rahi roa. Te mea ho’i i mana’ohia « e ’ere i te mea maita’i roa » nā te reira ïa i ’īriti i te ’ē’a nō te « maita’i roa » nehenehe a’e.

’Ua fa’ata’a mai tō’u hoa ’o Ty Mansfield i te hō’ē parau mau mai te reira te huru. ’Ei ta’ata tei ’ite i te fa’ahina’arora’a i te ta’ata o tōna iho ’āpeni, ’ua ’ite ’o Ty i te tupura’a pae vārua ’o tē nehenehe e tupu mai ’a tūtau ai tātou i tō tātou orara’a i roto ia Iesu Mesia ’e ’ia tu’u i tō tātou ’ā’au ato’a i mua iāna, ma te fa’ati’a iāna ’ia ha’amo’a i te mau ’itera’a fifi ato’a ’ei maita’i nō tātou. Nō Ty, ’ua ha’amata te reira i te taime ’a ha’api’i ai te Vārua iāna ē, « noa atu e fa’aipoipo vau, ’ua here-mau-hia vau ’e ’ua fāri’ihia e te Atua. Tā’u hōpoi’a ’o te tāmau-noa-ra’a ïa i te ora i te hō’ē mahana i te taime hō’ē ma te ’imi ’e ma te pe’e i te arata’ira’a a te Vārua ».⁵ ’E i te hope’a, nā roto i te ti’aturira’a i te Atua, ’ua arata’i te reira ia Ty ’ia tomo i roto i te hō’ē fa’aipoipora’a mure ’ore ’oa’oa, ’e te nehenehe, i tāna vahine.

I te pae hope’a ’ua fa’aipoipo-ato’a-hia vau i muri a’e i tō’u uiuira’a ē, e nā reira ānei au. Terā rā, ’ua vai tāmau noa te tītaura’a ’ia vai tūtau-hōhonu-noa-hia i ni’a ia Iesu Mesia, ’aore rā, ’ua mara’a, i te roara’a o te mau matahiti mai te taime a tā’atihia ai au i tā’u tāne fa’aipoipo. ’Ua ha’amata fa’ahou vau i te ’imi iāna nō te hau ’a ’aro ai au nō te ’orera’a e fānau. ’Aita vau i ’ite nāhea e nehenehe ai iā’u ’ia fāri’i i te ’oa’oa tā’u i ti’aturi i roto i te orara’a ’utuāfare ’aita e tamari’i. Terā rā, noa atu i muri a’e i te ha’amaita’i-ra’a-hia māua tā’u tāne nā roto i te fāri’ira’a e piti tamari’i, pinepine au i te rōtahi i ni’a i tō’u mau paruparu ’ei metua vahine. Noa atu ē, i te pae hope’a ’ua fāri’i au i te mea tā’u i hina’aro noa na i te mau taime ato’a, mai te huru ra ē, ’ua rahi fa’ahou atu te ārea i rōpū i te « maita’i roa » ’e « te ti’ara’a mau ».

’Ua tītau teie mau huru o te orara’a iā’u ’ia feruri fa’ahou i te mau ’ōpuara’a o te tāhuti nei ’e i te mau fa’anahora’a tei fa’ata’a-hanahana-hia nā roto ho’i i te reira tātou e tupu ai i te rahi. Penei a’e e ’ere te fā o te orara’a te noa’ara’a te ’utuāfare maita’i roa. Penei a’e ’aita ato’a te fāito maita’i roa e vai ra i te tāhuti nei. Penei a’e te ’utuāfare paha te hō’ē rāve’a nō te haerera’a i mua.

Inaha, pēnei a’e te ’ohipa mau tei riro ho’i ma te ’oto rahi, « ’ei mea iti a’e i te maita’i roa », tē fa’atupu nei te reira i te ’ōpuara’a mo’a nō te tītaura’a i te tupura’a i te rahi e tītauhia nō tātou, nō te ora i te mau tā’amura’a « maita’i ». Penei a’e tei roto te mana i te mea ē, te ārea rahi i rōpū i te mea mau ’e i te mea maita’i roa, tē ani mai nei te reira ia tātou ’ia tomo i roto i te hō’ē tā’amura’a hōhonu a’e ’e ’o Iesu Mesia, i reira ’oia e fa’aora ai ’e e ha’amo’a ai i te mea tei pararī, ma te ha’apuai fa’ahou i te pa’ari, te pūai ’e te here i roto i teie fa’anahora’a. Nā roto i tōna aroha ’e tāna fa’aorara’a, ’e tāna ana’e, e nehenehe tātou e riro mai i te huru ta’ata ma te tā’amura’a tā tātou e ’imi nei ’ia fāri’i i te ra’i.

Tē ti’aturi nei au ē e’ita te « maita’i-roa-ra’a » e tupu i roto i tō tātou mau tā’amura’a ’utuāfare, noa atu te ta’ata—i roto i teie orara’a. Terā rā, te ha’avare ’ore, te parau ti’a, ’e te fātatara’a mau, e tupu ïa te reira. ’Oia mau, te fa’ahuara’a ’aore rā te tīa’ira’a i te maita’i-roa-ra’a, e ha’afifi te reira i te ha’afātatara’a mau i te Atua, i tō tātou ’utuāfare ’e ia vetahi ’ē. Terā rā, mai te mea e fa’ati’a tātou ia tātou iho ’ia hi’ohia mai te au i tō tātou huru mau nā te Mesia, nā tō tātou mau ’utuāfare ’e nā vetahi ’ē, tae noa atu i roto i te mau mea ato’a « e ’ere i te mea maita’i roa », e nehenehe ïa tātou e ani i tōna mana ha’amo’a i roto i tō tātou orara’a. E nehenehe tātou e ’ite i tōna mana semeio nō te fa’afaite i te mau mea e ’ore e ti’a ’ia fa’a’āfaro, nō te fa’a’ī ia tātou i tōna here, ’e nō te taui ia tātou ’ei ta’ata e tā’amura’a hōhonu atu ā i ni’a iāna ’e i ni’a i tei herehia e tātou.

Penei a’e te ’ōpuara’a mo’a roa a’e o te poro’i nō ni’a i te ’utuāfare, ’o te ha’apāpūra’a ïa ia tātou ē, maoti Iesu Mesia, e nehenehe te ’utuāfare « maita’i roa » e riro ’ei hope’ara’a mure ’ore nō tātou tāta’itahi.

’Ei mau tamaiti ’e ’ei mau tamāhine here nā te mau metua i te ra’i ra, e ’utuāfare mure ’ore tātou pā’āto’a. E tuha’a faufa’a roa tō tātou ’itera’a fāito ’ore i te tāhuti nei nō te fa’anahora’a a tō tātou Metua nō te tauturu ia tātou ’ia haere i mua ’e « ’ia fa’atupu ho’i i [tō tātou] hope’a hanahana ’ei mau ta’ata ’āi’a nō te ora mure ’ore »⁶—te hō’ē ā orara’a ’utuāfare nehenehe tāna e ora nei, noa atu ē, mai te huru ē, e mea ta’a’ē te reira i te maita’i i tā tō tātou ’utuāfare e ora nei i teie nei. Mai tā Elder D. Todd Christofferson nō te pupu nō te Tino ’Ahuru Ma Piti ’āpōsetolo i parau ra : « ʼUa ʼite ātea, ’e i te pae hopeʼa, e fa’a’ore te tāraʼehara a Iesu Mesia i te mea tei ʼerehia ’e tei mo’ehia i te feiā tei fāriu atu iāna. ’Aore e ta’ata i fa’ata’a-ātea-hia ’ia fāri’i iti a’e i te mea ato’a tā te Metua i fa’aineine nō tāna mau tamari’i ».⁷

Mai tā te Fatu i fafau ia Iakoba i rotopū i te mau tāmatara’a o tōna ’utuāfare « tei iti mai te maita’i », te tāmarū mai nei tōna autā’atira’a fafau ia tātou, « tei pīha’i-ato’a-iho vau ia ’oe, ’e nā’u ’oe e tīa’i i tō ’oe nā mau haere’a ato’a, ’e e fa’aho’i mai ā vau ia ’oe i [te fare] ; e ’ore ho’i au e fa’aru’e ia ’oe e ’ia hope roa tā’u i parau ia ’oe i te fa’atupuhia e au ra » (Genese 28:15). ’Ia pe’e ana’e tātou iāna, noa atu te huru ti’a ’ore o tō tātou vaira’a mau ’e te tae ’ore i te fāito maita’i roa, e’ita ’oia « e vaiiho ia tātou ’ia haere ’ē », ē tae noa atu ’ua riro tātou i te mau mea ato’a ’o tā tātou e hina’aro ’ia riro, ma te tā’atihia i roto i te mau tā’amura’a ’utuāfare nō te ’oa’oa rahi ē a muri noa atu.