“Bwebwenato ko Raorōk an Baam̧le,” Liaona, Jān. 2023.
Bwebwenato ko Raorōk an Baam̧le
Bwebwenato ko raorōk remaron̄ jipan̄ ajri ro nejid jeļā ta ko rej tōmak ie im etke rej tōmaki.
Kōmeļeļe ko jān Noah Regan
Juon ļaddik ej kajjitōk ippān jemen n̄an katakin e kōn tallōn̄ tōļ. Jemen ekar katakin e aolepān men ko raorōk, ekoba kōm̧m̧an karōk, bun̄tōn kōjparok, kōppopo, im kein tallōn̄ ko. Ļaddik eo nejin ekar kajjitōk n̄āāt eo renej ekkōnono kōn ta eo n̄an kōm̧m̧āne n̄e ewōr idin̄. Jemen ekar ba ekar jab kōņaan kamijak e im bwe ekkōnono eo emaron̄ kōttar n̄ane elukkuun aorōk.
Rekar kadedeļo̧k aolep katak ko aer im kar etal ilo iien tallōn̄ eo aer jinointata n̄an kāām ilo Tōļ Rainier itūrin Seattle, Washington. En̄jake eo im jekjek ko rekar em̧m̧an ilo aer kar ijjino ak ke lan̄ eo ekar oktak im nana, ejjab to rekar tokālik loe ke lan̄ eo ej itok wōt.
Rekar jab jeļā ta eo n̄an kōm̧m̧ane kōnke rekar jab ekkōnono kake. Ļaddik eo ekar kajjitōk ippān jemen, “Ipojak ke kiiō n̄an ekkōnono eo kōn ta eo n̄an kōm̧m̧ane ilo iien idin̄, baba?”
Bwebwenato ko Raorōk—Ilo kōjparok eo an m̧oko im̧ōd—jemaron̄ jipan̄ kōpooj kōj n̄an lan̄ ko renana ilo mour in.
“M̧ool eo m̧oktata ilo aolepān laļ in ej bwe Anij ej iakwe kōj,” Elder Jeffrey R. Holland jān Doulul eo an Jon̄oulruo Rijilōk ro ekar ba.1 Naan ko an rej kakeememej kōj bwe iakwe ej pedped eo n̄an indeeo im n̄an mour ko ad kajjojo raan. Kōn iakwe in āinwōt pedped eo, ekkōnono ko im ekkeijel ko jej kōm̧m̧ani ippān baam̧le ko ad rej aorōk.
Āinwōt ļāeo pālele, jemen, rikakpilōklōk ilo jikin jikuuļ, im rikakpilōklōk an jikin taktō n̄an ro ewōr jorrāān in kōmālij, em̧ōj aō loe bwe bwebwenato ko ilo baam̧le rej aorōk im rejjab aikuj karūmwiji. Joy D. Jones, kar Būreejtōn eo Eutijetata an Būraimere, ekar ba: “Jejjab maron̄ kōttar an ajri ro jide im make oktaktok. … Bwebwenato ko an baam̧le kōn gospel eo an Jisōs Kraist bwebwenato ko raorōk, … remaron̄ karuwaineneik Jetōb eo.”2
Ta bwebwenato ko raorōk?
Sister Jones ej kōmeļeļeik bwebwenato ko raorōk āinwōt “ekkōnono ko repidodo, im rej kalikkar kea [me remaron̄ tōl ajri ro [im kajjojo iaad] n̄an jeļā ejjab wōt ta eo rej tōmak, ak aorōktata etke rej tōmak e.”3 Juon naan ij iakwe jān meļeļe in ej pidodo. Kajin eo ad ejjab aikuj m̧wilaļ ak kapokpok ak karōke. Ilo m̧ool, jet bwebwenato ko rem̧m̧antata jenij iooni rej ko rekar jab karōki n̄an kōm̧māni, ijjeļo̧kin kōppopo n̄an aolep iien bōk Jetōb ippād n̄an jipan̄ kōj.
Sister Jones ekar wōnm̧aanļo̧k ilo an katakin: “Oktaktok ilo jide ej jab juon pedped in katak an gospel eo an Jisōs Kraist. Erom̧ āinwōt Rilo̧mo̧o̧r eo ej jāmin bōk jikin ilo jide.”4 Ej bōk jikin ļain ioon ļain, ippān iien im kijejeto ko kar ļōmņaki.
Ewi emakijkij in an aikuj waļo̧k bwebwenato ko raorōk?
Jej aikuj ekkōnono ippān ajri ro nejid kajjojo raan. Jon̄an ļap in ad kōm̧mani iien bwebwenato ko raorōk, renaaj normal, ilo iminene, im ļaplo̧k aer katak.
Jekjek eo enanatata n̄an kōm̧m̧ani bwebwenato ko raorōk ej n̄an jab kōm̧m̧ani n̄an jidik. Emakijkij ad ļōmņak bwe ejjab jim̧we iien, eļap an kapokpok, ak ajri ro nejid reban meļeļe. Jejjab kōņaan kōmetak ak ba naan eo ebōd ak kōm̧m̧an an juon jakoņ. Ijoke, kajjeon̄ kōm̧m̧an iien bwebwenato em̧m̧anļo̧k jān jab ba jabdewōt men.
Ekōjkan ad kōm̧m̧ani iien bwebwenato ko raorōk ippān ajri ro nejid?
Juon iiōk eo epidodo ikar loe kōn wāween kōm̧mani bwebwenato ko raorōk an baam̧le ej iakwe, ron̄jak, im oktak. Men̄e jejjab wāppen jet iien ilo aolepeer, jemaron̄ kajjeon̄ kōmakijkij ad ļoore jon̄o̧k in.
Iakwe: N̄e ejjeļo̧k pedped im kwaļo̧k iakwe, jejjab maron̄ kōm̧m̧ani iien bwebwenato ko raorōk. Iakwe ej ta eo, n̄eet, im etke, im wāween ad kōm̧m̧ane men otemjej ilo baam̧le ko ad. Ajri ro nejid rej aikuj en̄jake kōjparok n̄e rej ekkeijel ippād, im iakwe ej kwaļo̧k mejatoto in aorōk. Jemaron̄ iien otemjej kwaļo̧k iakwe. Jisōs Kraist ekar kwaļo̧k iakwe n̄an kōj.
Sister Jones ekar ba: “Ilo ad kōkaajririki im kōpooj ajri ro nejid, jej kōtļo̧k anemkwoj in kālet ko aer, jej iakwe er kōn aolepān buruōd, jej katakin er kien ko an Anij im menin letok eo an ukweļo̧k, im jej jāmin, bar, ebweer jān er. Ālkin aolep men kein, ejjab ke wāween eo an Irooj epād ippādwōj kajjojo?”5
Ron̄jake: Ikar ekktak jān bōd ko aō make bwe lukkuun ekkeijel ilo ron̄jake ej m̧ōttan eo aorōk ilo bwebwenato ko raorōk. Ron̄jake ej aikuj emakijkij an itok m̧okta im kein karuo. Jisōs Kraist is waanjon̄o̧k eo em̧m̧antata kōn wāween kōm̧m̧ani bwebwenato ko raorōk im lukkuun ron̄jake. Jej ekkatak ilo Jon 8 bwe ke Riparisee ro rekar boktok E n̄an kōrā eo kar jibwe an ko̧kkure kien erreo, men ko m̧oktata ekar ba n̄an kōrā eo ej kajjitōk kein: “Kōrā, ewi ro raar kinaakļo̧k eok? Ejjeļo̧k juon ear liaakļo̧k eok ke?” (eoon 10). N̄an jipan̄ an ekkatak ko raorōk bōk jikier, E ekar kajjitōk kajjitōk k im kar ron̄jak m̧okta jān an katakin.
Oktak: Ālkin ad kar iakwe, ron̄jak, im ekkeijel, ta eo jej kōm̧m̧ane jān ijin? Jej ke aikuj ukweļo̧k, katakin, ron̄jak eļapļo̧k, jerbal, ba jeorļo̧k bōd, jeorļo̧k bōd? Bwebwenato ko raorōk rej aikuj letok n̄an kōj juon iien em̧m̧an n̄an oktak. Kōjatdikdik bwe jej aolep iien kajjeon̄ n̄an erom, āinwōt an Būreejtōn Russell M. Nelson kar ba, “em̧m̧anļo̧k jidik kajjojo raan.”6
Ekōjkan ad maron̄ kōmakijkijļo̧k iien bwebwenato ko raorōk?
Naaj tōl eo jān revelesōn n̄an ta eo enaaj jerbal em̧m̧antata n̄an baam̧le eo am̧? Ļōmņak kōn elmakot kein jān en̄jake ko an baam̧le eo aō:
Ekkatak jān jeje ko rekwojarjar an baam̧le: Ke ikar kajjitōk ippān ajri ro nejimim kōn ta eo eļaptata an jipan̄ er n̄an kōm̧m̧ani ekkōnono ko kōn gospel, rekar ba ej ekkatak jeje ko rekwojarjar ippān doon kajjojo jota ilo kōjerbal Itok, Ļoor Eō.
Kweilo̧k in naan in kam̧ool an baam̧le kajjojo Jabōt in Jitlo̧k: Ejjab lukkuun kweilo̧k in kwaļo̧k naan in kam̧ool ako ej juon iien n̄an kajjojo armej ilo baam̧le eo am n̄an kwaļo̧k aer en̄jake ko, tōmak ko, apan̄ ko, im tōprak ko. Kom̧ro kōrā eo pāleeo ej aolep iien kajjeon̄ n̄an kwaļo̧k kam̧ool kōn Jisōs Kraist. Kweilo̧k in ekar erom̧ juon iaan en̄jake ko eļap aer jelōt kōm ilo m̧weo im̧ōm.
Kejota an baam̧le: N̄e jej ba, “Jete awa kiiō?” ilo iien kejota, ajri ro rejeļā bwe ej kiiō iien n̄an an kajjojo armej kwalo̧k juon men ekar em̧m̧an im juon men rekōņaan bwe en kar em̧m̧an ilo raan eo. Menin ekkā an tōl n̄an en̄jake in kam̧m̧oolol, iakwe, jet iien ekallulu, im ekkā n̄an bwebwenato ko robrak kōn gospel me remaron̄ ban kar waļo̧k ilo bar jet wāween.
Bwebwenato juon-ippān-juon: Ij kaorōk iien eo kajjojo allōn̄ ilo Jabōt in jitlo̧k n̄an jijet ippān kajjojo iaan ajri ro nejimim juon-ippān-juon, jar kōn etāer, kalimjōk mejāer, im kajjitōk ippāer kajjitōk ko. Ij kajjeon̄ ron̄jake im ekkeijel ippān en̄jake im aikuj ko aer. Emaron̄ kar jab juon men ekoņ n̄an er kar m̧okta, ak kiiō rej emeemļo̧kjeņ kake n̄e jejjab kōm̧m̧ane. Ij kōjatdikdik bwe rejeļā be iien eo aō ippāer eļapļo̧k an aorōk jān men ko jet im bwe ij kōņaan kōm̧m̧ani iien bwebwenato ko raorōk ippāer aolep raan.
Etale kōttōpar ko: Kōm ekar kōm̧m̧ane kōttōpar ko an juon make, an ripalele, im an baam̧le kajjojo Janwōde. Innem kōmij ekkōnono kōn eddōkļo̧k eo am im am wōnm̧aanļo̧k kaki aolep allōn̄ ilo iien ekkatak jān jeje ko rekwojarjar ak ilo iien nokon in jota an baam̧le. Menin ej tōl n̄an iien bwebwenato ko raorōk.
Ripālele ak jerbal ippān doon an jinen im jemen: Aolep bon̄ ilo raan in Jabōt, ilo an kōrā eo pāleeo im n̄a jerbale kōļanta ko an juon wiik, kom̧ro ej kajjitōk ippān doon kōn ad en̄jake im ta eo jej apan̄ kake ak aikuj jipan̄ ie. Kom̧ro ekar kōm̧m̧ani iien bwebwenato ko raorōk kōn mour in pālele eo am im kōn kajjojo iaan ajri ro nejūm̧ro im ta eo jej aikuj kōm̧m̧ane n̄an wōnm̧aanļo̧k im dāpij gospel eo an Jisōs Kraist ilo būruom kajjojo.
Kōrā eo ippa eļapļo̧k an jeļā ron̄jake jān n̄an im eļapļo̧k an jipan̄ kōm kōm̧m̧an bwe en jokkin wōt juon am pād im mijeļo̧k iaļ in bujen eo. Ikar ekkatak eļap jān e im ij jeram̧m̧an bwe ekar kālet eō n̄an indeeo.
Baam̧le eo am ejjab wānōk ilo kōm̧m̧āne aolepān men kein, ak jej kōm̧mane kijejeto eo ad em̧m̧antata im kōmij wōnm̧aanļo̧k wōt ilo kajjeon̄.
Pojak m̧okta jān an itok lan̄ enana.
Jab kōttar m̧ae lan̄ ko renana an mour in rej itok n̄an mour in pālele eo am̧, ajri ro, ak jemjerā ko jet. Ejjab kōn aorōk in ta eo ak kōn n̄eet eo. Gospel im bwebwenato ko jet raorōk rej em̧m̧antata aer kōjpooj kōj n̄e rej kōm̧m̧an ilo kōņaan im aolep iien.
Pād ippen kōrā eo pāleeo, ajri ro, im baam̧le n̄an indeeo ej kōttōpar eo eļaptata aō im ej uin aō kōm̧m̧ane aolep men, ekoba kajjojo bwebwenato ko raorōk.
Ij likjab, āinwōt aolep kōj, ak kōn kajoor an Jisōs Kraist im ukweļo̧k, em̧ōj ļōn̄aj eō. Rilo̧mo̧o̧r eo ekar kallim̧ur n̄an kōkajoorļo̧k kōj kōn kajoor eo An im meram in kōjatdikdik ewāppen Ej letok n̄an kōj kōn Pinmuur eo An. Jejjab aikuj n̄an wānōk, ak ej aikuj kate kōj n̄an em̧m̧anļo̧k! Kajjojo iaad ewōr ippād kajoor eppeļo̧k n̄an kōj. Kojjāmin jab tōprak. Tōprak ej iien otemjej ped ilo kijejeto.
Būreejtōn Nelson ekar kallim̧ur bwe “ilo am̧ kōtļo̧k an Anij anjo̧ ilo mour ko am̧, konaaj en̄jake ilo eok make bwe Anij ej ‘juon Anij in kabwilōn̄lōn̄’ [Mormon 9:11].”7 Men eo emaron̄ koba kōtļo̧k be Anij en anjo̧ ilo iien bwebwenato ko raorōk. Aolep men rej tōprak kōn Rilo̧mo̧o̧r, Jisōs Kraist, ekoba bwebwenato kein raorōk. Iakwe ej iien otemjej uwaak eo An!
Rijeje eo ej jokwe ilo Washington, USA.