Kajoor in Waanjon̄o̧k

Pija

ļeo im lio pālele rej jar

Pija jān Cody Bell

Juon raan ilo jikin jerbal ikar loe ruo likao ro rej kwaļo̧k naan an Anij ilo iaļ eo. Rekar kabōjrak eō im kajjitōk eļan̄n̄e ikōņaan jeļā eļapļo̧k kōn Kabun̄ eo an Jisōs Kraist im Armej ro Rekwojarjar ilo Raan Ko Āliktata. Ilo iien eo, ikar jab jeļā ia eo baam̧le eo aō rej jibadōk. Ekar ejjeļo̧k amim kam̧bōj ilo jetōb n̄an pukot iaļ eo am̧.

Ikar draak drenin kadōk jibbon̄in eo, kōn menin ikar jab keememej eļap kōn ta eo mijinede ro rekar ba n̄an eō. Ak rekar letok juon Bok in Mormon im juon bok jidikdik kōn Josep Smith, ippānļo̧k nōm̧ba in taļeboon eo aer. Tokālik ilo raan eo, ikar jinoe riit. Juon men ekar un̄ur jetōb eo aō ke ikar riiti Bok in Mormon eo, im ikar bwilōn̄ kōn wāween an ļaddik eo 14 an iiō kar bōk juon maden̄ļo̧k eļap.

Ikar kappukot m̧ool eo, kōn menin ikar jinoe ioone mijinede ro. Ālkin aō kar bōk eiten aolepān katak ko, ikar jeļā bwe ikar aikuj peptaij. Ak ke raan in peptaij eo aō ekar epaaktok, kōm ekar ekkatak kōn juon katak me ekar pen n̄an aō ron̄. Katak eo ekar kōn Kien Māletlet

Katak eo ekar pen n̄an eō kōnke ekar ļap aō draak drenin kadōk. Mejatoto in jikin jerbal eo aō ekar pen. Aolep ro ij jerbal ippāer rej kadōk, im barāinwōt n̄a. Ikōn ikutkut aō etal im kadōk ālkin jerbal im bōn̄ e aō ro̧o̧l n̄an m̧weo.

Ak mijinede ro rekar kōm̧m̧ane juon jerbal eļap an em̧m̧an. Ikar iakwe er kake menin. Rekar katakin eō bwe Anij ekōņaan bwe jen kajoor im bwe E ekar letok Naan in Māletlet n̄an kōjeram̧m̧an kōj. Pokake kien in ekar kanooj in pen n̄an eō, ak jidik kōn jidik, ikar jinoe kōjparok e. Ij keememej aō kar ko̧o̧ļe mijinede ro aolep raan, kwaļo̧k n̄an er ennaan ko rekāāl kōn wōnm̧aanļo̧k eo ilo n̄a, im ba n̄an er bwe ikar jab kadōk raan eo. Rekar kanooj in m̧ōņōņō ilo aō eddōkļo̧k.

Kōn jipan̄ eo aer, ikar peptaij im dreļon̄e oror eo an Jisōs Kraist. Ikar en̄jake Jetōb ilo raan eo aiboojoj! Ak ikar make iaaō ke ikar kobatok ilo Kabun̄ in. Ikar kōņaan bwe baam̧le eo aō ren pād ippa.

Ke ikar ekōnono ippān kōrā eo ippa, Clirime, kōn Kabun̄ in, ekar jab kōņaan ron̄jake kar jinoin. Jim̧m̧aan ekar pād ilo bar juon kabun̄ oktak, im ekar ļōmņak etke Kabun̄ eo an Jisōs Kraist im Armej ro Rekwojarjar ilo Raan ko Āliktata ekar tōn itok n̄an Albania. Ikar jeļā bwe wāween eo de eo imaron̄ kar boktok e n̄an gospel in ej ilo waanjon̄o̧k ko aō. Ilo kōm̧m̧an ko ad, armej remaron̄ loe wōn lukkuun kōj.

Clirime ekar loe oktak ko ilo n̄a ilo aō kar bōjrak jān drenin kadōk im jinoe m̧okaj aō ro̧o̧l n̄an m̧weo ālkin jerbal. Kōn oktak ko ikar kōm̧m̧ani, ekar jinoe en̄jake Jetōb in Anij ilo aō kar ba n̄ane kōn Kabun̄ in. Ikar jab maron̄ kōmeļeļeik m̧ōņōņō eo ilo n̄a ke ekar ba n̄an eō bwe juon raan enaaj bar peptaij. Ejjab to ekar jinoe bōke katak ko an mijinede, ko ikar jipan̄ mijinede ro katakin. Ekar ļaptata aō em̧ōņōņō ke ekar karōk raan eo n̄an an peptaij, jiljilijno allōn̄ ālkin aō kar peptaij.

Ippān peptaij eo an, im peptaij an ajri ro ruo nejimro ke rekar ruwalitōk aer iiō, ikar en̄jake bwe kōm maron̄ erom̧ juon baam̧le indeeo. Bōtaab peptaij ekar ijjino eo. N̄an kōppopo n̄an etal n̄an tampeļ, kōm ekar jeļā bwe kōm aikuj ļoor Anij n̄an jem̧ļokin mour ko am, kōjparok kien ko an, etal n̄an jar, bōk kwojkwoj eo, kōm̧m̧ane kūr ko am̧, riiti jeje ko rekwojarjar, im ekkatak eļapļo̧k kōn bujen ko im karōk in lo̧mo̧o̧r eo.

Raan eo kōm ekar liāp āinwōt baam̧le ilo Frankfurt Germany Tampeļ ekar bar juon raan aiboojoj. Ilo tampeļ eo, ikar bōk meļeļe eļapļo̧k kōn karōk in m̧ōņōņō an Anij n̄an kōj, im ikar en̄jake iakwe eo An.

Ij ememej wōt kallim̧ur ko Clirime im n̄a kar kōm̧m̧ane ilo tampeļ. Jabdewōt iien juon men ej bōd ak jej ioon juon iien epen, kōlmenļo̧kjeņ eo aō ej ro̧o̧l likļo̧k n̄an kallim̧ur ko.

Āinwōt juon baam̧le kōm ej kajjeon̄ mour ilo aeņōm̧m̧an ippān doon kōnke men eo in kōm kar en̄jake ilo tampeļ eo. Aolep iien n̄aij ļōmņak kōn tampeļ, ij en̄jake m̧ōņōņō im jeram̧m̧an. Ijeļā bwe Anij ej m̧ool im bwe E ej iakwe kōj im ekōņaan bwe jen em̧ōņōņō.