Jerbal in Karejar kōn Eļapļo̧k Jeļā

Ilo an Rilo̧mo̧o̧r eo kar rūttoļo̧k, E ekar “eddek im kajoorļo̧k, im E obrak kōn mālōtlōt; im jouj in Anij ej pād Ioon” (Luk 2:40). Naan eo eddek ej meļeļein n̄an eddek jidik jidik, āinwōt an allōn̄ eo kilepļo̧k an doulul ilo lowaan juon allōn̄ (month). Luk ekar kōmeļeļeik bwe “Jisōs ej lapļo̧k ilo An mālōtlōt im rūtto, im ilo jouj ippān armej im Anij” (Luk 2:52 Jisōs ekar jab kajju wōr an jeļāļo̧kjeņ kōn aolep men—E ekar bōke ium̧win iien (lale Katak im Bujen Ko 93:12–14).

Ke Jisōs ekar 12 an iiō, jinen im jemen rekar loe E ilo tampeļ eo—jikin kabun̄ jar eo eļap an ri Jeruselem—“jijet ilubwiljin takto ro, im rej ron̄jake e, im kajjitōkin e kajjitōk ko” (Ukook eo an Josep Smith, Luk 2:46 [ilo Luk 2:46, footnote c]). Kōnke ekkatak ekar juon m̧ōttan aorōk ilo an kar Eddōkļo̧k, ke iien eo em̧m̧an ekar itok n̄an an katakin ro ilo tampeļ, E ekar pojak. Wāween An ekkatak ekar kabwilōn̄ er im jinen im jemen.

Erkein ej jilu wāween ko me ejaake m̧wil eo m̧wilin Kraist in jeļāļo̧keņ emaron̄ jipan̄ kōj ilo ad jerbal in karejar.

1. Ilo ad itok n̄an jeļā Rilo̧mo̧o̧r im ekkatak kōn m̧wil ko m̧wilin, enaaj emmanļo̧k ad jeļā ta eo E enkar kōm̧m̧ane n̄an jerbal in karejar ilo ijo jej pād ie.

2. Ilo an ļapļo̧k jeļālo̧kjeņ eo ad im meļeļe eo ad ilo gospel in, enaaj em̧m̧anļo̧k an Jetōb Kwojarjar boktok n̄an ememļo̧kjeņ eo ad ta eo jej aikuji n̄e jej aikuji (lale Jon 14:26). Menin emaron̄ jipan̄ kōj meļeļe aikuj ko an ro jej jerbal in karejar n̄an im uwaake kajjitōk im inepata ko aer.

3. Ilo ad eddōkļo̧k ilo maron̄ eo ad n̄an ekkatak, enaaj em̧m̧anļo̧k ad ekkeijel ippān ak jerbal n̄an ro jet. Jemaron̄ ekkatak eļapļo̧k kōn juon unin kōnono n̄an ekkeijel ippān juon m̧ōttad eo ewōr an ikdeelel ie. Ak jemaron̄ ekkatak kapeel ko rekkar me remaron̄ jerbal n̄an jipan̄ aikuj eo.

Bōk jeļāļo̧kjeņ emaron̄ jipan̄ kōj jerbal in karejar ilo elōn̄ wāween ko. N̄an kōmeļeļeiki ļo̧k, “jabdewōt jon̄an mālōtlōt eo jej tōpare ilo mour in, enaaj wanlōn̄ļo̧k ipped ilo jerkakpeje eo.” (Katak im Bujen Ko 130:18).

Pija

jodikdik ro rej ekkatak jān jeje ko rekwojarjar

Ejaak Jeļāļo̧kjeņ

Ekōjkan ad ejaak m̧wil eo m̧wilin Kraist in jeļāļo̧kjeņ? Erkein rej jet ļōmņak ko:

1. Kemeemej bwe em̧ool Jisōs ekar ekkatak ium̧win iien. Kwon tiljek, im kijenmej ippam̧ make. Ekkatak ej waļo̧k ilo “lain im bar lain, naan in kain̄i im bar naan in kain̄i,” (2 Nipai 28:30).

2. Ekkatak n̄an kile jikin bōk meļeļe ko lōki. (Lale “Finding Truth in the Misinformation Age” ilo October 2022 digital Liahona.)

3. Kwon kōņaan jeļā. Ekkatak jān ta eo ej waļo̧k ipeļaakim kajjojo raan. Kajjitōk kajjitōk ko. Riiti bok ko rem̧m̧an im ekkōl wōt. (Lale Katak im Bujen Ko 88:79, 118; 90:15.)

4. Ekkatak jān katak im jān tōmak (lale Katak im Bujen Ko 88:118). Maron̄ eo am̧ n̄an meļeļe m̧ool eo ilo aolep unin kōnono enaaj em̧m̧anļo̧k ilo am̧ kobaiki kijejeto in jeļā eo am̧ em̧m̧antata ippān kijejeto eo am̧ ilo jetōb. Mour ekkar bwe kwon bōk jipan̄ an Jetōb Kwojarjar.