Kōpooj Bwidej in Jetōb eo Am̧

Ilo pārabōļ in, jemaron̄ ekkatak āinwōt an riekkat ine eo ekkatak.

• Jet ine renaaj wōtlo̧k, im bao ko renaaj kan̄i.

• Jet raar wōtlo̧k ilo jikin ko redekāke. Rej jebar leen ak rej aemedļo̧k kōn aļ.

• Jet re bun̄ut ilo kālōklōk ko, im kālōklōk ko rej lukwoj er.

• Jet rej wōtļo̧k ioon bwidej em̧m̧an im jebar leen.

Irooj ej kōmeļeļeik:

“Ke jabdewōt ej ron̄jake naan in aelōn̄ eo im ej jaje kake, ej itok eo ri nana im bōkļo̧k men eo ar ekkat ņa ilo būruon.” E in em̧ōj ekkatak ņa itūrin iaļ.

“A eo em̧ōj ekkat e ijo re dekāke,, e in eo ej ron̄ naan, im e m̧ōkaj an bōk kōn an bun̄būruon;

“Im ejjeļo̧k okran ilowaan, a ej pād n̄an jidik iien, im ke en̄taan ak matōrtōr ej waļo̧k kōn naan eo, e emōkaj an bun̄.

“A eo em̧ōj ekkat e ilo kalōklōk ko e in eo ej ron̄jake; im ļōmņak ko kōn laļ in im m̧oņ kōn m̧weiuk ko rej koutam̧weik naan, im e jab jebar im le.

“A eo em̧ōj ekkatak e ņa ilo bwidej em̧m̧an, e in eo ej ron̄jake, im jeļā kake; im ej jebar im le, jet jibukwi kōn juon, jet jiljinon̄oul kōn juon, jet jiln̄uul kōn juon” (Matu 13:19–23; kar kakkobaba).

Jen lale kajjojo iaan bwidej kein roktak jān doon im lale ta eo jemaron̄ kōm̧m̧ane n̄an kōkm̧anm̧anļo̧k.

Pija

ine ko im bao ko

Kōmeļeļe ko jān David Green

Bwidej Itōrerein Iaļ

Būreejtōn Dallin H. Oaks, Rikakpilōklōk eo Kein Kajuon ilo Būreejtōnji eo Kein Kajuon, ekar ba: “Ine ko me rekar ‘’bun̄ut itūrin iaļ (Mark 4:4) rejjan̄in tōpar bwidej eo aer ilo mour in ijo me remaron̄ kar eddōkļo̧k ie. Rej āinwōt katak ko me rej wōtlo̧k ilo juon bōro eo epen ak ejjan̄in pojak.”¹

N̄an kōmeļeļeiki, jet iien jejjab meļeļe ta eo jej ron̄ ak riiti ilo jeje ko rekwojarjar kōnke buruōd rejjab pojak. N̄e jekjek eo in, ta eo jej aikuj kōm̧m̧ane?

Jemaron̄ kappukot juon kōmeļeļe eo jān ro rej meļeļe. Jemaron̄ kajjitōk ippān mijinede ro, rikaki in Jabōt Jikuuļ eo ad, priesthood ro ak ritōl ro ad, rikaki in seminary ak institute eo ad, ro rej jerbal in karejar n̄an kōj, ak ro jinen im jemed retiljek im ro uwaan baam̧le ko ad. Jemaron̄ ekkatak jān katak ko ilo kweilo̧k eo eļap. Gospel Library app eo ej letok elōn̄ kein jipan̄ ko me remaron̄ jipan̄ kōj kappukot eļapļo̧k meļeļe.

Jej aikuj bar jar im kajjitōk ippān Anij kōn eļapļo̧k meram. Eļan̄n̄e buruōd ej m̧ool, ad kōttar ej m̧ool, im ewōr ippād tōmak ilo Kraist, jenaaj bōk jeļāļo̧kjeņ kōn m̧ool ko an gospel (lale Moroni 10:4–5). Irooj ekar ba:

“Kajjitōk, im naaj lewōj e n̄an kom̧; kappukot, im kom̧ naaj lo; kaļļaļļaļ, im naaj kōpeļļo̧k e n̄an kom̧.

“Bwe eo ej kajjitōk ej bōk, im eo ej kappukot ej lo, im eo ej kaļļaļlaļ naaj kapeļļo̧k n̄an e” (3 Nipai 14:7–8).

Pija

ine ko im drekā ko

Bwidej ilo Jikin ko Redekāke

Jet armej rej ron̄ gospel eo em̧ōj an jepļaaktok ippān mijinede ro, rej en̄jake iakwe an Kraist, im kobaļo̧k im m̧ōņōņō ilo kweilo̧k ko an Kabun̄ in. Ijoke, ālkin jet iien, men ko reppen ilo mour in rej wōnm̧aanļo̧k wōt. Rej loe bwe mour in ejjan̄in oktak n̄an juon reba in kōjeram̧m̧an ko rejjab bōjrak. Tōmak eo aer ej jakoļo̧k im rej makunļo̧k.

Jet rej loe “jikin ko re dekāke” n̄e rej kobatok n̄an juon iien kweilo̧k ak juon kweilo̧k eļap im en̄jake im̧we n̄an kōm̧m̧ane jabdewōt men ilo jim̧we ilo iien eo. Ak kiiō ilo M̧ande rej jepļaak n̄an jerbal ko aer make. Apan̄ kein ilo jikin jerbal rej pād wōt. Kapo ko ilo laleļo̧k relukkun kaitoktok limo. Im ikdeelel eo aer n̄an em̧m̧anļo̧k ilo jetōb ej dikļo̧k ak jakoļo̧k.

Rej ekkatak iaļ eo epen bwe n̄e ejjab okar ko ilo jetōb n̄an dāpij kōj ilo kōto, naajdik kōj n̄e jej kwole, ak kam̧oļoļo̧ik kōj n̄e ej bwij aļ, jemaron̄ jako ilo jetōb.

Ewi wāween ad maron̄ kōkm̧anm̧anļo̧k bwidej in edekāke? Joļo̧k drekā ko im kam̧wilaļļo̧k okar in jetōb ko ad.

Joļo̧k drekā ko emaron̄ juon jerbal epen. Emaron̄ aikuj n̄an ijjinoe juon mejatoto ijo rej rojan̄ tōmak ie. Emaron̄ aikuj kalōk jemjerā ko rekāāl im bōjrak jān wāween ko renana (lale 1 Tessalonika 5:22).

Pija

pā ko rej jibwe drekā ko

N̄an bōk kajoor n̄an joļo̧k drekā ko, jej aikuji jipan̄ eo an Rilo̧mo̧o̧r. Menin ej itok jān ad bōk bujen ko E ej letoki. Menin ej ijjinoe ilo ad bōk kūr eo n̄an peptaij. Ej meļeļein kappen im bōk menin letok eo an Jetōb Kwojarjar. Ej meļeļein bōk jabdewōt bujen ko ejjeļo̧k ippād, ko āinwōt bōk priesthood eo ak etal n̄an tampeļ eo. Ej meļelein etal im jar im kōkāāl bujen ko ilo am̧ bōk kwojkwoj eo kajjojo wiik.

N̄e mallijon̄ im kapo ko rej itok, jej aikuj ben ad dāpij bujen ko em̧ōj ad kōm̧m̧ani ippān Irooj. “Jej ekkejel ilo ineem̧m̧an n̄an im ippān Rilo̧mo̧o̧r ilo ad keememej ilo tōmak im kōm̧m̧ane ijo em̧m̧an tata ippād n̄an mour ekkar n̄an eddo ko jaar būki,” Elder David A. Bednar jān Doulul eo an Jon̄oulruo Rijilōk ro ekar ba. “Im jem̧jerā in Ippān ej un eo an kajoor ilo jetōb im dim eo ilo aolep jekjek ko an mour ko ad.”²

Pija

ine ko im kalōklōk ko

Bwidej ilo Kalōklōk ko

Bwidej in ej kōtļo̧k an menin eddōk ko eddōk, ekoba kalōklōk ko. Kalōklōk ko rej “ḷōmṇak ko, im ṃweiuk ko, im ṃōṇōṇō ko an mour in” me remaron̄ kōm̧m̧an menin ad “jab jebar leen eṃṃan.” (Luk 8:14).

Ta eo ej waļo̧k n̄e jej bōk bujen ko ak jejjab etetal ilo iaļ in bujen eo? Ak jej bōk kwojkwoj eo ak jejjab kajjitōk n̄an jeorļo̧k ad bōd, kōnke jejjab kiiō ļōmņak kōn bōd ko ad? Ak jemaron̄ bōk jeorļo̧k bwōd ak jejjab jeorļo̧k an ro jet bōd. Jej bōk bujen ko an tampeļ ak jej likjab n̄an jerbal in karejar n̄an ro jet. Jej likūt ālik iien ko rem̧m̧an n̄an kwaļo̧k kōn gospel eo kōnke jej mijak n̄e ejjab juon men ekkar im ekajookok, ak kōnke ejako ad jeļā ta eo n̄an ba.

Uwaak eo ej n̄an mour bujen ko jekar kōm̧mani ke jekar peptaij, “jan̄ ippān ro rej jan̄; … [n̄an] kaenōm̧m̧an ro rej pād ilo aikuj in aenōm̧m̧an, im n̄an jutak āinwōt rikam̧ool ro an Anij ilo aolep iien ko im ilo aolep men otemjeļo̧k, im aolep jikin ko [jej] maron̄ pād ie, em̧ool m̧ae mej” (Mosaia 18:9).

Jej joļo̧k ujooj ko renana n̄e jej ukweļo̧k kajjojo raan, kōm̧mane oktak ko reddik ak reļļap, im jepļaak n̄an iaļ in bujen eo erānin̄ im eaidik.

Jej jab kōtļo̧k an ujooj ko renana lukwoj buruōd. Jej kōm̧m̧ane menin ilo ad ukot m̧oko im̧ōd n̄an jikin tōmak ko rekwojarjar. Jej kappukot ta eo ej karuwaineneik im̧we eo an Jetōb. Jej karmejete jabdewōt men ko rej kakoik im̧we eo. Im jej jerbal ilo aelōn̄ eo an Anij—ilo kūr ko ad, tampeļ eo, ilo jerbal in mijenede, ilo baam̧le ko ad.

Elōn̄ ro rej ron̄ naan eo, meļeļe kake, im rej kōtlo̧k an eddōk ilo buruweer. N̄an er Irooj ej ba, “Kom̧ ar jab kāālōt Eō, a N̄a Iar kāālōt kom̧, im likūt kom̧ bwe kom̧win ilo̧k im jebar leen, im bwe leen eo ami en pād wōt” (Jon 15:16). N̄an kain armej rōt in, uwaak eo ej n̄an wōnm̧aanļo̧k kōn tōmak im niknik ilo jerbal ko rem̧m̧an.

Būreejtōn Oaks ekar kajjitōk, “Ta eo jej kōm̧m̧ane kōn katak ko an Rilo̧mo̧o̧r ilo ad mour ilo mour ko ad?”³ Ilo iiō, ilo ad kōppopo n̄an ekkatak Kallim̧ur Ekāāl, jemaron̄ epaakeļo̧k Rilo̧mo̧o̧r eo im kōkm̧anm̧anļo̧k bwidej in jetōb eo ad bwe jen maron̄ bōk naan eo. Innem jemaron̄ kiiō bōk m̧aantak leen ko E ekar kajjitōk bwe jen boktok ilo ad bōk im kōkāāl bujen ko me rej lukoj kōj Ippān, ilo ad jerbal n̄an Anij im iakwe ro ritūrid, im jān ad wōnm̧aanļo̧k ilo iaļ in bujen eo me juon raan enaaj bar kōjepļaak kōj n̄an m̧weo im̧ōd ilo aelōn̄ in lan̄.