“Kajin eo an Jetōb,” Liaona, Jān. 2023.
Ainikien Armej ro Rekwojarjar ilo Raan Ko Āliktata
Kajin eo an Jetōb
Ikar ekkatak bwe Jetōb emaron̄ jipan̄ kōj meļeļe im en̄jake iakwe eo an Jemedwōj ilan̄, men̄e edik an en̄jake.
Pija in rijeje eo; kōmeļeļe jān Jennifer M. Potter
Kōmeļeļe ko jān Jennifer M. Potter
Ikōn em̧akūtkūt ilo aolepān Europe ippān juon tiim in tuuj ilo jam̧m̧ar. Rialooj ro amim, ikkure ko, im jon̄an maron̄ ko am rekar oktak jān doon, bōtaab ekar wōr juon amim imminene me enaaj baj wōt pād ilo wāween in: kōmij kilōk aolep iien kalojooj ko ilo amim al “Anij Ippam̧ M̧ae Iien Jen bar Lo Doon”1 ilo kajin eo an laļ eo kōmij lo ļo̧k. Kōnke eiten aolepān tiim eo aō rej pād ilo Kabun̄ eo an Jisōs Kraist im Armej ro Rekwojarjar ilo Raan Ko Āliktata, ekar em̧m̧an imminene in ippemim. Ekar juon wāween eo eļap an em̧m̧an n̄an ekkeijel ippān rialooj ro amim im kwaļo̧k iakwe eo an Jemedwōj Ilan̄.
Itūrin tok ālkin juon iaan tūreep kein, kōm ej kab m̧ōj amim eļļā jān border eo n̄an lowaan Germany im kōm ekar ekkatak al eo ilo kajin German n̄an iien ikkure ko rej pedo tok. Ak ke kōm ekar tōpar, kōm ekar ekkatak bwe jikin eo ilo m̧ōttan Germany ekar kajin Sorbian, juon kajin eo me eiten āinwōt al eo kōm ekar tiljek ilo amim kōmālmel e.
Ilo tūreep eo ilowaan baj eo n̄an jikin ikkure eo, ikar lukkuun m̧ōk im ikar wōt kōņaan kiki ilo aolepen iien ettōr eo. Ak director ro amim ekar wōr aer jet ļōmņak. Rekar kajjitōk ippān ro rej guide n̄an kōm n̄an ukote al eo n̄an kajin Sorbian. Kiiō rekar kōņaan bwe aolep ro ilowaan bus eo me rej mejki wōt n̄an ekkatak al eo jejjo wōt awa m̧okta jān iien ikkure eo.
Kōm ekar kate kōm. Ilo jem̧ļo̧kin ikkure eo amim, kōm ekar jutak ippān doon ilo m̧aan in stage eo im jino al. Ij en̄jake juon en̄jake ekailibōkbōk ke naan ko ikar jab likun jeļā kaki im ikar kajidedeiki jejjo awa m̧oktaļo̧k rekar pidodo aer itok n̄an kōlm̧enļo̧kjeņ eo aō. Ikar en̄jake an jako aō bere kōn amim kar jab pojak m̧oktaļok n̄an al ilo aō pedped ioon Jetōb Kwojarjar n̄an kakeemejmej eō naan ko.
Ilo amim kadedelo̧k amim tuuj im jino al, Jetōb ekar boktok naan ko n̄an kōļmenļo̧kjeņ eo aō.
Pijaan rijeje eo
Rialooj ro rekar bwilōn̄ im m̧ōņōņō. Ke al eo ej jem̧ļo̧k, ekar ejjeļo̧k ainikien ekar waļo̧k jān rialooj ro. Innem rekar jutak im jino al juon al tok n̄an kōm, eo im tokālik rekar kōmeļeļeik bwe ekar juon al in kam̧m̧oolol rekōn dāpiji n̄an iien ko reļļap im aorōk.
Ikar en̄jake an Jetōb lukkuun kajoor ilo iien eo, men̄e ikar jab meļeļe aer al. Ikar lukkuun kam̧m̧oolol bwe Irooj ekar jipan̄ eō meļeļe im en̄jake iakwe eo An men̄e ekar wōr en̄jake ko rejabwe. Kar kakeememej eō bwe iakwe eo an Jemedwōj Ilan̄ ej juon enaan n̄an aolepān laļin. Jekdoon ta oktak ko ewōr ippād, aoleped jemaron̄ meļeļe kajin eo an Jetōb.