Uso ma Tuafafine i le Alii

Ina ia mulimuli i le faataitaiga atoatoa a lo tatou Faaola ma avea e pei o Ia, ua tatou taliaina Lana valaaulia e savavali faatasi ma Ia i Luga o Lana ala o feagaiga (tagai Mose 6:34). O nisi taimi tatou te faailoa ai le ala o feagaiga e ala i sauniga o le faaolataga ma le faaeaga lea e faailogaina ai—papatisoga ma le faamauga e maua ai le meaalofa o le Agaga Paia ma avea ai ma se tasi O Le Ekalesia a Iesu Keriso o le Au Paia o Aso e Gata Ai; Faauuga i le Perisitua Mekisateko (mo uso); faaeega paia i le maota o le Alii (mo i tatou taitoatasi o ni tagata taitoatasi); ma le faamauga i le malumalu.

O se sauniga e tatau ai mo le faaolataga ma le faaeaga o se faatinoga paia e faatinoina e ala i le pule faatagaina o le perisitua lea e aoaoina i tatou i le feagaiga lea e fesootai i ai le sauniga. I nisi o itu, e mafai ona tatou mafaufau i se sauniga o le faaolataga ma le faaeaga o se faatinoga i fafo lea e aumaia ai se sootaga tuufaatasi ma le Atua ma Lona Alo paia i o tatou olaga e ala i feagaiga.

O i tatou taitoatasi, i le avea ai ma se atalii po o se afafine faapelepele o le Atua, ua osia a tatou lava feagaiga paia ma le Atua. Tatou te faia mo i tatou lava, i o tatou lava igoa, taitoatasi. O lenei sootaga faalefeagaiga ma le Atua ua tuuina mai ai ia i tatou taitoatasi le mana, faamoemoe, ma le folafolaga. O nei feagaiga e mafai ona suia ai o tatou lava natura, faapaiaina ai o tatou manaoga ma faatinoga, ma fesoasoani ai ia i tatou e tuu ese le tagata natura po o le tamaitai natura a o tatou gauai atu i uunaiga a le Agaga Paia. E ala i le feagaiga, e ala i le Togiola a Keriso le Alii, e mafai ai e i tatou taitoatasi ona avea e pei o se atalii/afafine o le Atua—“usiusitai, agamalu, lotomaualalo, onosai, ma tumu i le alofa” (Mosaea 3:19).

“Ua faapea lava ona alofa mai o le Atua i le lalolagi, ua ia au mai ai lona Atalii e toatasi” (Ioane 3:16)—ma sa Ia tuuina mai ia i tatou le tasi ma le isi. O le i ai i se feagaiga—ina ia fesootai ma le Atua ma le tasi ma le isi e ala i feagaiga—e valaaulia ai i tatou e faataunuu lo tatou faasinomaga paia ma le faamoemoega e ala i le fesootai atu i le lagi ma e ala i le fesootai ma le fatuina o se nuu o le Au Paia a o tatou alolofa ma auauna atu i le tasi ma le isi ma i latou o siomia i tatou. I le tuuina atu o avanoa mo tautinoga o feagaiga ma le i ai i se feagaiga, e lē faailoga tagata le Atua. Ua Ia valaaulia i tatou taitoatasi, tamaitai ma alii, faaipoipo pe le’i faaipoipo, po o a lava o tatou talaaga ma tulaga, ia o mai ia te Ia ma le tasi ma le isi e ala i feagaiga.

Pe a tatou auai e ala i feagaiga i le Alii, tatou te auai fo’i e ala i feagaiga i le tasi ma le isi. E tutupu mea ofoofogia pe a tatou alolofa i le Alii ma galulue faatasi, fefautuaa’i faatasi, ma auauna atu le tasi i le isi. O le auauna atu i feagaiga e faamalosia ai o tatou sootaga ma le Alii ma le tasi ma le isi. E aofia ai i lenei mea la tatou sootaga patino ma lo tatou Tama Faalelagi, aiga, aulotu a le Ekalesia, nuu, ma augatupulaga faaleaiga. A o tatou ola ai i a tatou feagaiga, e aveesea o tatou tagata e faatotonugalemu ia i tatou lava ma maua o tatou tagata sili ona lelei e faatotonugalemu ia Keriso.

I le fuafuaga paia o le fiafia a le Atua, na saunoa ai Peresitene Russell M. Nelson, “e tutusa lava le matala o le lagi i tamaitai ua maua faaeega paia i le mana o le Atua e tafe mai ia latou feagaiga faaleperisitua e pei ona matala foi i alii o loo umiaina le perisitua.”⁴

Na ta’ua e Peresitene Camille N. Johnson, Peresitene Aoao o le Aualofa, “Ua ia i tatou le aia tatau e maua ai le mana o le perisitua e ala i le agavaa faaletagata lava ia.”⁵ I le sii mai o ni upu a Peresitene Nelson, na ia saunoa ai, “Tatou te manaomia ni tamaitai o ē e iloa pe faapefea ona maua le mana o le Atua ua faaavanoa mai i ē e tausi feagaiga.”⁶ O tagata tausi feagaiga o ē saili ma ola i le faatuatua, lotomaualalo, ma le filiga, na aoao mai Peresitene Johnson, e mafai ona maua le taitaiga, musumusuga, meaalofa a le Agaga, faaaliga, ma le “fesoasoani ma le malosi ia avea atili ai e faapei o Iesu Keriso ma le Tama Faalelagi.”⁷ A o tofu ofoina atu e i tatou taitoatasi a tatou meaalofa tulaga ese i le faipaaga ma le Alii ma le tasi ma le isi, ua tatou fatuina le “tino e tasi” (1 Korinito 12:13).

I le fuafuaga a le Atua, o tinā ma tamā o ni soa ma ni fesoasoani. Tatou te fesoasoani le tasi i le isi o se paaga tutusa i le alofa ma le amiotonu e faafailele ma tausia e le tasi le isi ma o tatou aiga. O le mama a’ia’i o mafaufauga ma amioga o se tulaga manaomia lea i faaaliga ma musumusuga e manaomia e tamaitai ma alii. I o latou aiga, e tatau i tamā ma tane ona pulefaamalumalu ma le agamalu, agamaulalo, ma le alofa faamaoni—o uiga auaumama amiotonu e manaomia e alii ma tamaitai i a tatou sootaga uma.⁸

E tagi le lagi pe a, i soo se sootaga, e i ai le sauāina, puleaga, po o le faamalosia o soo se ituaiga e alii po o tamaitai. O le faatauanau, tali-tiga, agalelei, ma le malamalama mama o uiga faaKeriso ia tatou te sailia taitoatasi—pe ua tatou faaipoipo, nofofua, maliu le toalua, pe ua tatala faaipoipoga (tagai Mataupu Faavae ma Feagaiga 121:41–42). E mafua lenei mea ona o lo tatou tulaga i luma o le Alii ma i totonu o Lana Ekalesia e fuaina i o tatou uiga faaletagata ma le amiotonu i le tausiga o feagaiga.

Ata

o alii ma tamaitai o loo potopoto i se fonotaga a le aufono

Fefautuaa’i i le Aufono

I lenei lava agaga e tasi, i le Ekalesia a le Alii tatou te fefautuaa’i ai i aufono a o tatou auauna atu faatasi. I a tatou aufono, e sailia e taitai malamalama’aga ma manatu mai tagata uma. Ou te faafetai mo tamaitai ma alii tulaga ese taitoatasi o e ua ou maua le avanoa e auauna atu ai, faatasi, i aufono faapitoa a le Ekalesia. O nei tuafafine ma tuagane tamalii e fesoasoani e faapotopoto Isaraelu e ala i le galuega faafaifeautalai, saunia i tatou e feiloai ma le Atua e ala i auaunaga faaleperisitua ma faaleaiga, tuufaatasia aiga mo le faavavau e ala i auaunaga faalemalumalu ma talafaasolopito o aiga, ma auauna atu ia i latou e manaomia le fesoasoani e ala i auaunaga faaleuelefea ma le ola tutoatasi.

I tulaga taitasi, tatou te ausia ni faaiuga sili atu ma maua le manuia sili atu i le galuega a le Alii a o tatou faatauaina saofaga a le tasi ma le isi ma galulue faatasi, o ni uso ma tuafafine i Lana galuega.

E faapena foi, ou te faafetai ona, i a tatou siteki ma uarota, ua tuufaatasia ia taitai alii ma tuafafine ma tagata o le ekalesia i le galuega o le faaolataga ma le faaeaga. I le salafa o le Ekalesia, i lalo o le taitaiga a taitai misiona tuuto, o aufono a taitai misiona e aofia ai taitai o aoaoga a toeaina ma tuafafine o e taitaia a tatou faifeautalai, o a latou galuega ma tiutetauave taitasi e aogā ma taua. I le militeli a le Iunaite Setete, o failotu o le Au Paia o Aso e Gata Ai, o taitai alii ma tamaitai ua faamaonia e le Ekalesia, e faamanuiaina i latou o loo auauna atu i paranesi eseese o auaunaga.⁹ I le auaunaga, e maua e o tatou alii talavou ma tamaitai talavou le avanoa ma le manaomia ona auauna atu. I la tatou auaunaga, tatou te tutū faatasi uma.

O se tasi o auala tatou te tutū ai o ni molimau a le Atua o le auauna atu lea o ni molimau o sauniga o le talalelei toefuataiina. O tuafafine ma tuagane e tutū o ni molimau mo papatisoga, mo ē o soifua ma ē ua maliliu. O uso ma tuafafine e tutū o ni molimau mo sauniga faaopoopo i le maota o le Alii. O iina, i lalo o ki o le peresitene o le malumalu, e faatino ai e tuafafine ia sauniga paia mo tuafafine ma uso e faatinoina ia sauniga paia mo uso.

I le fuafuaga paia o le fiafia a le Atua, na saunoa ai Peresitene Dallin H. Oaks, Fesoasoani Muamua i le Au Peresitene Sili, “o le mana o le perisitua e faamanuiaina ai i tatou uma. E taitaia e ki o le perisitua tamaitai faapea foi ma alii, ma o sauniga o le perisitua ma le pule o le perisitua e faatatau foi i tamaitai e pei foi o alii. Po o ai lava e galue i se tofi po o se valaauga na maua mai se tasi o loo umiaina ki o le perisitua ua ia faaaogaina le pule o le perisitua i le faatinoina o ona tiute atofaina.”¹⁰

A o tatou taumafai ia “tasi,” e pei lava ona tasi Iesu Keriso ma le Tama (Ioane 17:21), e tatau ona tatou “oofu … i le Alii o Iesu Keriso” (Roma 13:14).

E mafai ona faapaiaina i tatou e pei, o le alofa tunoa e ala i le alofa tunoa, tatou te aoao ai ma faia ia avea ma tatou ia uiga auaumamā o Iesu Keriso—ia alofa atoatoa atili, ia sili atu ona faigofie ona faamagalo atu, ia lē faigofie ona faamasino atu, auauna atu ma ositaulaga atili ma le naunautai, faaalia le agaalofa loloto atili ma faifai pea.

Ia tatou faalagolago i aoaoga faavae ma faataitaiga a Keriso, fiafia i le upumoni ma avea ma Ona soo lotomaualalo (tagai 2 Nifae 28:14)—i tatou taitoatasi o ni uso ma ni tuafafine i le Alii.¹¹