Lotofaafetai e “Faalogo ia te Ia”

Ata

o se alii o loo tu i le pulelaa

Sa tele ina leaga la’u faalogo i le tele o lo’u olaga ma ua na o le 20 pasene o mea e ta’ua i le pulelaa i le taimi o le tele o sauniga a le Ekalesia e mafai ona [ou] malamalama ai. Mai lea taimi i lea taimi, o lo’u logonoa ou te lagona ai le tuuatoatasi ma le tuuesea, e pei o le taimi e taliē ai le potopotoga i se faamatalaga mālie a se failauga ae ou te lē ata ai ona ou te le’i lagonaina. Ma sa lē na o a’u. Sa ta’u mai e tagata matutua o le uarota ia te a’u sa faigata foi ona latou logonaina.

O nisi taimi, i le mavae ai o le tauivi ia malamalama i se failauga leo itiiti i le sauniga faamanatuga po o le taimi foi e tautino mai ai e se faiaoga o le Aoga Sa e lē manaomia ona faaaoga le faaleotele leo auā e mafai e tagata uma ona faalogo, ou te mafaufau pe aisea ou te alu ai i le lotu pe a laitiiti se mea e mafai ona ou faalogo i ai. Pe lē sili atu ea le faaalu o lo’u taimi i le fale e faitau ai lesona o le Sau, Mulimuli Mai ia te A’u po o le suesueina o tusitusiga paia?

Ae, sa ou manao lava ia usiusitai ma faaauau pea ona auai faatasi ma lo’u aiga e faafou a’u feagaiga o le papatisoga ma manatua le Faaola e ala i le ’ai ma inu i le faamanatuga. O se faamanuiaga i taimi uma le lagonaina o le Agaga, ma sa ou lagona i taimi uma le faagaeetiaina e na mea sa mafai ona ou logonaina.

Ata

O Iesu Keriso ma le fafine o i ai se puna toto

I se tasi Aso Sa, o le fautua maualuga sa lauga i le sauniga faamanatuga sa i ai se tasi o nā leo manino ma fuafuaina na faigofie ai ona faalogo i ai. Sa ia talanoaina le tala o le Feagaiga Fou e uiga i le fafine sa mafatia mai se puna toto mo le 12 tausaga ma sa i ai le faatuatua e mafai ona faamaloloina o ia pe afai e mafai ona ia aapa atu ma pa’i atu i le ofu talaloa o Iesu a o ia savali ane (tagai Luka 8:43–48).

Ona ofoina mai lea e le failauga se malamalamaaga loloto na taia loloto ai au, ma faamalamalama mai ona o lona tulaga, semanu e manatu lenei tamaitai e lē mamā ma atonu o le a lē faatagaina ona auai i le lotu. Mo le 12 tausaga!

O aafiaga o lenei mea na ou matuai maofa ai. E ui ina ma’i, ae atonu sa le’i malosi tele lenei fafine ma sa lē mafai ai ona alu i le lotu, i nisi taimi. Ae ona o fegalegaleaiga o na taimi, sa lē faatagaina ai o ia e auai. Oka se tofotofoga maoae mo se tagata o le faatuatua!

A o o’u mafaufau loloto i le lototiga atonu na ia lagonaina i le faasaina o ia mai le tapuai atu i le Atua ma uso a tagata talitonu ona o lona tulaga faaletino—o se mea sa lē mafai ona ia taulimaina—sa faapupula o’u mata e le Agaga i le ala na faatusatusa ai lona tulaga i o’u lava mata. Sa tuuina mai ia te au ia malamalama e ui lava e lē mafai ona avea au ma se tagata auai atoatoa, ae sa ou maua le avanoa e auai ai i le lotu ma faalogo i mea sa ou mafaia ona faalogo i ai. Sa leai se filifiliga faapena a lenei fafine. Sa ou lagona le maasiasi mo taimi sa ou mafaufau puupuu ai e nofo i le fale.

O le taimi lava lena, na fetalai mai ai le Atua i lo’u loto, ma faailoa mai ia te au e le’i finagalo o Ia ou te lagona le tausalaina. Sa manao o Ia ia ou lagona le lotofaafetai—faafetai mo le avanoa e auai ai i le lotu ma le faamalosia e ala i le auai faatasi ma soo faamaoni o Keriso. E ui ina sa lē mafai ona ou faalogo i mea uma, ae sa mafai ona ou malamalama i nisi o mea—ma na faamanuiaina e mea taitasi lo’u olaga. Sa i ai foi taimi faapitoa na fesoasoani mai ai le Agaga ia te au ia malamalama i na mea sa lē mafai ona ou faalogo i ai.

Sa ou lagona le faafetai mo le saolotoga e tapuai ai i le Atua ma olioli i faamanuiaga o le alu i Lona maota. Sa molimau mai le Agaga ia te au e faapea, sa sili lava, e sili atu ona lelei mo au le i ai i sauniga Lotu, ai ma inu i le faamanatuga, ma aoao mea ou te mafaia nai lo le lē auai.

O lena aso na suia ai o’u uiga faaalia. Nai lo le lagonaina o le faanoanoa i o’u tapulaa, sa faatumulia lo’u loto i le filemu, ma sa tonu ia te au e taulai atu i faamanuiaga o le auai i le lotu. Sa tonu ia te au e faia se taumafaiga faamaoni e faafetai ai mo mea e mafai ona ou lagonaina nai lo o le lotovaivai i mea sa lē mafai ona ou faalogo i ai.

Na saunoa Elder Dieter F. Uchtdorf o le Korama a Aposetolo e Toasefululua: “O le lotofaafetai i taimi o mafatiaga e le faapea ai ua tatou fiafia i o tatou tulaga. O lona uiga e ala i mata o le faatuatua e faapasi ai la tatou vaai i o tatou luitau o loo i ai i lenei taimi.”¹ O le fafine sa aapa atu e pa’i atu i le ofu talaloa o Iesu o se faamanatu matagofie lea mo au ina ia lava lo’u faatuatua i le Alii e vaai ai i tua atu o o’u tapulaa ma lava le faalagolago i le Atua e iloa ai o le a Ia faamanuiaina au e tulai a’e ai i luga atu o o’u tapulaa faaletino.

E oo mai le olaga ma ituaiga uma o luitau e lofituina ai i tatou faaleagaga, faalelagona, pe faaletino, ae e oo lava i taimi o mafatiaga, ua uunaia i tatou ia lotofaafetai mo faamanuiaga o loo tatou olioli ai. Na fetalai le Alii:

“A’u uo, aua le matatau, ia faamafanafanaina o outou loto; ioe, ia saga olioli pea, ma ia avatu le faafetai i mea uma. …

“… Ma o mea uma sa outou puapuagatia ai o le a galulue faatasi mo lo outou lelei, ma le mamalu o loʼu igoa” (Mataupu Faavae ma Feagaiga 98:1, 3).