Mauaina ma le Faasafuaina Atu o le Agaga Malamalama

I la tatou vaogagana faaonapo nei, o lenei vavega e i ai sona igoa: agaga malamalama. O le agaga malamalama, i lona faauigaina, o le faatinoga nofouta lea o le aafia ai e ala i mafaufauga, lagona, po o aafiaga o se isi tagata. O le agaga malamalama o se faaupuga faaonaponei; o le a e lē mauaina i soo se mea i tusitusiga paia. Ae ua iloa e le au fai gagana o le agaga malamalama e fesootai lelei lava ma le agaalofa. Ma e pei o se faaupuga faatusi paia, e anoanoai le agaalofa.

O le agaga malamalama o le tomai lea e fesootai ai i tiga o se isi tagata, ma o le agaalofa o le faatinoga alofa lea e maua mai i lena tomai. Sa faaalia e Iesu Keriso le agaga malamalama ma le agaalofa a o Ia auauna atu, faamanuiaina, faamalolo, ma togiolaina. I le avea ai ma soo o Keriso, e tatau ona tatou aoao ia lagonaina le agaga malamalama ma tuuina atu le agaalofa. O nisi nei o vaega taua e faamatalaina ai le avea ma soo.

A oo ina matuā faatino e le agaga malamalama ona vaega ofoofogia, e fesoasoani ia i tatou e malamalama ai ona tali atu lea i tiga, manaoga, fefe, po o le faanoanoa o se isi tagata. I le tulaga o le tina talavou, o se tamaitai matua e masalo na tele ni ona aafiaga i le tausiga o fanau ma fanau a fanau e mafai ona tuuina atu le mafanafana auā sa ia onosaia foi ia lava faigata faapena. Ona o lona lava aafiaga, sa agavaa ai o ia e galue o se faamafanafana.

O le a le mea ua agavaa ai Iesu Keriso e faamafanafana i tatou? Na aoao mai Elder Neal A. Maxwell (1926–2004) o le Korama a Aposetolo e Toasefululua: “Ua silafia e Iesu le ala e fesoasoani ai ia i tatou i le lotolotoi o o tatou tiga ma ma’i ona ua uma ona tauave e Iesu o tatou tiga ma ma’i [tagai Alema 7:11–12]. Na te silafia lelei lava i latou; o lea na maua ai Lona agaga malamalama.”¹

Ata

O Iesu o loo asiasi atu ia sa Nifae

O Keriso i le Laueleele o Nuumau, saunia e Simon Dewey

Mauaina o le Agaga Malamalama ma le Fesoasoani atu i Isi

O a ni faigata na e onosaia ina ua e “maua” le tomai e malamalama ai i isi ma agaalofa atu ai ia i latou? Pe na e mafatia i aafiaga o le mativa, sauāina, lē amanaia, faama’i, tuulafoaiina, agasala, po o tauiviga o soo se ituaiga? Afai sa e mafatia ai, atonu na e aluese mai ou mafatiaga o se tagata soifua atamai atu, malosi atu, ma sili atu ona nofouta.

I se faapuupuuga, ua e maua le agaga malamalama. Ua e saunia e faia se eseesega i olaga o i latou o e mafatia. O fea e amata ai? Ou te tuuina atu ni fautuaga se lua:

Muamua, taumafai ia sili atu ona mataala i mafatiaga o isi. O le mea e faanoanoa ai, e mafai ona i ai faatasi ma se tasi o loo tiga ae tumau pea le faigata i o latou mafatiaga. E faapefea ona faateleina lo tatou malamalama? O le faataitaiga a Iesu Keriso e mafai ona aoao ai i tatou.

Ina ua mavae Lona Toetu, ina ua asiasi atu Iesu i sa Nifae, sa Ia faamalamalama atu Lana aoaoga faavae ma aoao atu ia i latou Lana talalelei. Ina ua tu o Ia, sa Ia silasila atu i tagata ma fetalai atu, “Ua ou iloa ua outou vaivai, ua le mafai ona outou malamalama i au upu uma” (3 Nifae 17:2). Ona valaaulia lea e Iesu i latou e o i le fale, malolo, mafaufau loloto i Ana aoaoga, ma toe foi mai i le aso na sosoo ai ia faafouina ma saunia mo nisi mea (tagai i le 3 Nifae 17:3).

Na uma ai i i le tala, a ea? E leai. Ona faalolotoina ai lea o le silafia e Iesu a o Ia suesueina foliga o e na mulimuli ia te ia:

“Ma sa oo ina ua uma ona fetalai atu faapea o Iesu, sa toe silasila solo faataamilo ona fofoga i luga o le motu o tagata, ma silasila atu ua maligi o latou loimata, ma ua latou pulatoa mai ia te ia e peiseai ua latou mananao e ole mai ia te ia ia afio pea o ia faatasi ma i latou mo sina taimi umi teisi atu.

“Ma sa ia fetalai mai ia te i latou: Faauta, ua tumu lou loto i le agaalofa ia te outou” (3 Nifae 17:5–6). A o Ia silasila atu ma le totoa ia i latou, sa Ia silasila atoatoa atu ia i latou. Ma o lena mea na faaosofia ai Lana tali agaalofa.

I se lalolagi pa’ū ua faatumulia i tagata pa’uū, tatou te le tau vaavaai mamao tele ona e le umi ae tatou vaaia loimata i fofoga o fanau a lo tatou Tama Faalelagi. Ae e tatau ona tatou vaai. E pei o le Faaola, e mafai ona tatou filifili e vaai atu i tagata e ala i tioata o ō latou manaoga. Ma o le taimi lava e mafai ai ona tatou vaai atu, ua mafai ona tatou auauna atu.

Na ta’ua e Elder Ulisses Soares o le Korama a Aposetolo e Toasefululuaa “ao tatou tinoū ma le loto i ai e tuufaatasia se uiga mutimuti alofa i o tatou ala o le olaga, e pei ona sa faaa’oa’o mai e le Faaola, o le a atili ai ona tatou nofouta i manaoga o tagata. Faatasi ai ma lena nofouta faateleina, o le a susulu ai lagona o le naunau atu faamaoni ma le alofa ia tatou faatinoga uma.”²

Lua, ofo atu le ituaiga fesoasoani e tulaga ese lou agavaa e tuuina atu. Ina ua uma ona silafia e Iesu manaoga o sa Nifae i Nuumau, sa Ia talotalo atu ia i latou e faalatalata atili mai. Ona Ia faamaloloina lea o ō latou tagata mama’i ma faamanuia a latou fanau. Sa ia faia mea e na o le Faaola o le lalolagi e mafai ona faia.

E mafai foi e oe ma a’u ona fetuunaia ō ta’ua aafiaga ma gafatia e taulima ai manaoga o isi. E lē mafai ona tatou foia faafitauli o tagata uma, ae e mafai ona tatou sii ae le avega a i latou e mafai ona tatou fesootai i ai i o latou mafatiaga. Atonu e lē mafai ona tatou faamaloloina se lepela, ae e mafai ona tatou faamafanafanaina e mama’i. Atonu e lē mafai ona tatou aveesea se tasi mai le mativa, ae e mafai ona tatou faasoa atu mataupu faavae o le ola faasoasoa tatau, faasoa atu se meaai, ma foai atu se taulaga anapogi agaalofa. Atonu e lē mafai ona tatou faamagaloina le agasala, ae e mafai ona tatou faamagalo atu ia i latou o e na faatiga ia i tatou.

O le a se mea e te maua pe a e tuufaatasia se tamai vaalele ma se tina lofituina ma se tamaitiiti laitiiti lē fiafia? O se avanoa e faailoa atu ai le agaga malamalama ma le agaalofa.

Sa tulaueleele le matou vaalele ma sa alu ese atu le tina talavou, o loo sii i luga le ato i le tasi lima, o le tamaitiiti laitiiti i le isi lima. Sa iloa ai sa i ai se isi ana faigamalaga e sosoo ai ma o le a ia misia. Sa ou matauina lona popole i le vaega e faasolo mai ai uta a o sau lana ato i fafo. Sa ou utaina ana meatotino: taavale toso tamaitiiti, nofoa o le taavale, atopau, ato e ave i luga, ma le ato napekini. Sa ia manaomia lava se fesoasoani. Sa manaomia ona siitia atu lo’u agaga malamalama i le agaalofa.

E aunoa ma le tu e faailoa atu a’u lava, sa ou aapa atu mo le tele o ana meatotino ma fai atu, “O le a ou aveina mea ia. Tago oe i le tama. Tamoe i lau faitotoa. O le a ou mulimuli atu ia te oulua.” Sa ia taliaina ma le loto faafetai, ma sa ma faanatinati atu i le malae vaalele. A o ma latalata atu i le faitotoa, sa ou vaaia se isi fafine o aioi atu i le tagata faigaluega o le vaalele e taofi le vaalele mo na o ni nai minute. Sa matou taunuu atu ma le tau lē mānava ae sa matou manumalo. Sa feopoa’i le tina talavou ma lenei tamaitai ma loimata o le olioli ma le toomaga a o le’i o i totonu le pasese.

O lenei faatinoga laitiiti o le auauna atu sa le’i suia ai le lalolagi, ae sa faamanuiaina ai ma le anoa le olaga o se atalii/afafine o le Atua sa manaomia le fesoasoani. E pei lava ona fesoasoani i la’u uo fou ia alualu i luma i lona taunuuga faaletino, sa fesoasoani ia te a’u e agai atu ai i luma i lo’u taunuuga faaleagaga. O le filifilia o le agaga malamalama ma le agaalofa na fesoasoani ia te a’u e avea atili ai e faapei o Iesu Keriso. Ma o lenei mea na ou maua ai le fiafia.

Po o fea lava o tatou i ai—i le galuega po o le aoga, i le lotu po o luga o se vaalele—e mafai ona avea i tatou ma sui agaga malamalama o le Faaola. O ai e ono mafai ona tuuina atu e le Faaola ia te oe e faaalia ai le agaalofa i le asō?