Auauna Atu ma le Onosa’i

I le 2 Korinito 12:7–8, o loo faamatala ai e Paulo le tatalo faatolu mo “se mea matuitui i le tino’ ina ia aveesea. Ae o lana tatalo sa lei taliina e ala i le aveesea atu o le luitau. Nai lo lena, na ta’u atu e le Alii ia te ia, “O lo’u nei alofa tunoa e lava lea e fesoasoani ia te oe.” Sa faaalia e Paulo le onosai ma le faatuatua i le ala na ia tali atu ai: “O lea ua tele ai lava lo’u fiafia i le mitamita i mea ua ou vaivai ai, ina ia tumau i o’u luga le mana o Keriso” (fuaiupu 9).

Na aoaoina foi Moronae e le Alii e faapea e ala i le alofa tunoa o Iesu Keriso, e mafai ai ona tatou aoao ma tuputupu ae i le malosi: “Afai e o mai tagata ia te au o le a ou faaali atu ia te i latou o latou vaivaiga. Ou te avatu i tagata ia vaivaiga, ina ia faalotomaualalo ai i latou; ma ua lava lo’u alofa tunoa mo tagata uma o e e latou te faalotomaualalaloina i latou lava i o’u luma; aua afai latou te faalotomaualalaloina i latou lava i o’u luma, ma faatuatua mai ia te au, ona ou faia lea o mea vaivai ia avea ma mea malolosi ia te i latou” (Eteru 12:27

E pei o Paulo, o le toatele o i tatou sa tatalo mo le tele o taimi mo le toomaga i o tatou olaga—o nisi taimi e sili atu ma le faatolu. O nisi taimi o le taimi sa’o lea e tuuina mai ai lena faamanuiaga, ma o isi taimi, e pei ai i tatou o Paulo, e aoaoina ma faamalosia. I nei taimi, e mafai ona tatou aoao le onosai ma aoao e faatalitali i le taimi a le Alii.

Tatou te manaomia le uiga faa-Keriso o le onosai a o tatou auauna atu foi. E mafai ona tatou auauna atu i tagata e eseese luitau ma tulaga o le malamalama i le talalelei, ma e manaomia ai le onosai ma le alofa e auauna atu ai i tagata atonu e lē taliaina.

Ata

fafine ma lona ulu o loo ea ae i luga

Atapue mai le Getty Images

Atiina A’e o le Onosa’i

A oo ina tatou iloa le Faaola, o le a sili atu ona tatou iloa le mea o le a Ia faia e auauna atu ai i o tatou tulaga. E faapefea ona tatou atiina a’e le uiga faa-Keriso o le onosai?

• Ia iloa o le olaga faaletino e tumu i tulaga e tofotofoina ai lo tatou onosai ma o se mea masani le lagonaina o le lē fiafia i nisi taimi. Manatua o le faatinoina ma le faatuatua i le Alii, e mafai ai ona tatou faaleleia lo tatou tali atu i tulaga faigata. Ia onosai i au taumafaiga ina ia onosai atili!

• Ole atu i le Atua mo se fesoasoani pe a e lagonaina o loo e tauivi ina ia onosai. O se mānava loloto i totonu ma se tatalo e mafai ona fesoasoani e aumaia ai le toafimalie ma le filemu.

• O le faalogologo i musika faagaeetia faaleagaga lea e aumaia ai se lagona toafilemu e mafai ona fesoasoani ia te oe e galue ai i lagona o le lē onosai.

• Faailoa atu le taimi a le Alii i lou olaga. O ō tatou loto ma manaoga e tatau ona fetuunai i Lana taimi faatulagaina.

• O le i ai o le onosai o se mafaufauga. Manatua o le lagona atuatuvale po o le i ai i se tulaga faifai pea o le faanatinati e seāseā ona faaleleia ai o tatou olaga.

O nisi taimi o la tatou galuega faaleauaunaga o le fesoasoani lea i isi ia maua le onosai i tofotofoga. O nisi nei o auala e mafai ona tatou fesoasoani ai:

• Faaali atu i le tagata po o le aiga tatou te alolofa ma popole mo i latou e ui lava i soo se luitau o loo latou feagai, e tusa lava pe latou te mafaufau, po o le a lava le mafuaaga, e lē alofagia ai i latou.

• Faasoa atu ni aafiaga ia i latou ina ua e aoaoina le onosai ma e te malamalama i le faigata e mafai ona i ai. Fesoasoani ia latou lagona e le o tuua na o i latou pe afai latou te lagona le lē onosai po o le lē fiafia.

• Tatalo mo i latou ina ia mafai ona maua le onosai e ala i tofotofoga faigata ma faailoa atu ia i latou o le a faafofogaina e le Tama Faalelagi a latou tatalo ina ia mafai ona latou lagonaina lena malosi.

• Ia avea ma se taliga e faalogo pe a latou manaomia se tasi e talanoa i ai. O le i ai o se uo malamalama o se tasi lea o auala sili ona lelei e onosaia ai se tofotofoga po o se tulaga faigata.