“Ou te Manao Ia Outou Manatua”

Faatasi ai ma poloaiga uma ua Ia tuuina mai, ua folafola mai e le Atua e “saunia e ia se ala mo [i tatou] ina ia mafai ai ona [tatou] faataunuuina o le mea ua ia poloaiina” (1 Nifae 3:7). Ina ia mafai ona tatou usitai i Lana poloaiga ia manatua, ua saunia e le Alii ia faamanatu.

E moni, o mea uma na foafoaina ma faia e molimau ma faamanatu mai ai ia i tatou Keriso (tagai Mose 6:63; tagai foi i le Alema 30:44). Ua faamoemoeina, mo se faataitaiga, tatou te manatua o Ia “a o [tatou] savavali i le vaomatua ma lagona manu valo mai.”¹ O maa e mafai foi ona alaga mai o se molimau ma se faamanatu o Iesu (tagai Luka 19:40). O le mea moni, o le lalolagi atoa, i le leo ma le vaaiga, e tuuina mai molimau ofoofogia ma ofoina mai ni faamanatu ofoofogia o lona Foafoa.

O faamanatu e foliga mai e lei fuafuaina i foafoaga uma ua faatupulaia e faamanatu sili ona aloaia tatou te maua i sauniga paia. Na aoao mai Apinati o Isaraelu anamua na tuuina atu i ai ni sauniga sa’olele e faatino ina ia “taofi ai i latou i le manatua o le Atua ma lo latou tiute ia te ia” (Mosaea 13:30). Ua aoao mai foi e perofeta o aso nei lea lava mea e tasi. Na tautino mai e Peresitene Spencer W. Kimball (1895–1985), “Ou te manatu o le a lē i ai lava se liliuese, o le a leai lava se solitulafono, pe afai e manatua e tagata, manatua moni, mea na latou osifeagaiga ai i autafa o le vai po o le laulau faamanatuga ma totonu o le malumalu.”²

O le Togiola a Keriso e mo tagata uma ma taitoatasi. E faapena Foi Ana faamanatu. O lea, e faaopoopo atu i sauniga laugatasia ua ofoina mai i tagata uma, Na te tuuina mai ia i tatou ni faamanatu eseese ma patino e uiga ia te Ia. Mo se faataitaiga, o le palapala masani po o le eleele e le ono mafua ai ona manatua e le toatele ia Iesu pe malena ae i lagona ma le lotofaafetai mo Ia. Ae o le tagata na toefuatai mai lana vaai ina ua uuina e Iesu ona mata i le palapala atonu sa ia manatuaina ma le faamemelo ia Iesu i taimi uma e tilotilo atu ai o ia i le palapala—eleele! (tagai Ioane 9:6–7). E le faapea foi sa mafai e Naamanu ona vaai i se vaitafe, aemaise lava i Ioritana, e aunoa ma le mafaufau i le Alii o le na faamaloloina o ia iina (tagai 2 Tupu 5:1–15). Ua tofu i tatou ma se tasi pe sili atu foi o faamanatu patino e uiga ia Keriso. Vaai atu ia i latou ma manatua o Ia.

O talafaamaumau ma talafaasolopito o ni mea faaopoopo ia ua poloaiina e le Alii ina ia saunia e fesoasoani ai ia i tatou ia usiusitai i Lana poloaiga ia manatua. O tusitusiga paia—o loo tusia ai fesootaiga a le Atua ma Ana fanau—talanoa soo e uiga i le tuuina atu o molimau, po o le “molimau atu,” e uiga ia te Ia (tagai 2 Korinito 8:3; 1 Ioane 5:7; 1 Nifae 10:10; 12:7; Mataupu Faavae ma Feagaiga 109:31; 112:4).

O faamaumauga paia, e aofia ai api talaaga patino, e fesoasoani tatou te molimauina ai. O taimi loloto ma le Agaga o se meaalofa lea, i lena taimi, tatou te talitonu o le a lē galo lava ia i tatou. Ae o lo tatou tulaga o le faagaloina e mafua ai le malosi o aafiaga sili ona loloto e mou atu faatasi ma le taimi. O se faamaumauga i totonu o se api talaaga, o se ata, po o se faamaumauga e mafai ona fesoasoani ia i tatou e lē gata e manatua ai ni taimi maoae ae ia toe aumaia ai foi lagona ma le Agaga na tatou lagonaina. E le o se mea na faateia ai i lena taimi, o le poloaiga muamua ina ua uma ona faatulagaina le Ekalesia i lenei tisipenisione o le, “ia i ai se talafaamaumau e tausia i totonu o outou” (Mataupu Faavae ma Feagaiga 21:1). O le tausia lelei o faamaumauga e faateleina ai lo tatou manatua ma e mafai ona faatalitonuina ai i tatou i o tatou sese ma aumaia ai i tatou i le Atua (tagai Alema 37:8).

Ioe, e moni lava, e mafai ona tatou molimau atu i le upumoni ona ua tatou maua se molimau o le upumoni mai le Agaga Paia, o le “mau o le lagi” (Mose 6:61). I lenei matafaioi, o loo tusia ai e le Agaga Paia le upumoni i “papatusi aano o [o tatou] loto” (2 Korinito 3:3). E fesoasoani o Ia ia tatou manatua Keriso ma mea uma ua Ia aoao mai ia i tatou (tagai Ioane 14:26).

O le sootaga i le va o Iesu, faamaumauga, o le Agaga Paia, ma le manatuaina o loo faaalia i le Moronae 10:3–5. Ua folafola mai ia i tatou afai tatou te faitau i le Tusi a Mamona, o se talafaamaumau paia, i se agaga o le manatuaina ma ole atu i le Atua i le suafa o Keriso ma se loto faamaoni, ma le manatu moni ma le faatuatua ia Keriso, o le a faaali mai e le Agaga Paia ia i tatou le moni o le talafaamaumau. Ma afai e moni lena talafaamaumau faapitoa, o Lona uiga o Iesu o le Keriso.

Ata

O Alema ma atalii o Mosaea na asia e se agelu

Tulai ae o Alema, saunia e Walter Rane

Manatua ia Togiolaina

O le manatuaina o Iesu e taitai atu ai i le togiolaina ma le faaolataga. Mafaufau i le matafaioi a le manatua na faia i le togiolaina o Alema le itiiti. Ina ua faaali atu le agelu ia Alema, sa ia tuuina atu le poloaiga ia Alema “ia lē toe saili e lepeti le ekalesia.” Ae e oo lava foi a o lei tuuina atu lena poloaiga, sa tautino atu e le agelu, “Ia e manatua le faatagataotauaina o ou tama … ma ia manatua mea tetele na faia e [Keriso] mo i latou; ona sa i ai i latou i le pologa, ma ua laveaiina i latou e Ia” (Mosaea 27:16; faaopoopo le faamamafa).

O le poloaiga a le agelu ia manatua sa le na o se faatonuga poto ma se faaaogaaga lautele. Mo Alema, o se faaiteite patino, o se faaiteite alofa, mo le auala e mafai ona ia sao mai ai i le aafiaga o le maliu lata mai o le a ia oo i ai.

I le luasefulu po o le tele o tausaga mulimuli ane, sa faasoa atu ai e Alema i lona atalii o Helamana, i se auiliiliga maoae, le mea sa ia oo i ai a o ia taoto pipili ma le lē magagana mo aso e tolu, “toetoe a ou oti” (Mosaea 27:28). Ina ua mavae le afio ese atu o le agelu, sa manatua e Alema, ua lelei mea uma; ae na pau lava le mea na mafai ona ia manatua o ana agasala.

“Sa falo tigaina au i le mafatia e faavavau,” na toe manatua ai e Alema. “… Ioe, sa ou manatua au agasala ma amioletonu uma, ia sa ou mafatia ai i tiga o seoli” (Alema 36:12–13). O le manatu o le tu i luma o le Atua na faatumulia ai Alema i se “matau tele e le mafaamatalaina” lea na ia manatu e sola ese ai, e le na o le oti ae o le “tinei i le agaga ma le tino” (Alema 36:14–15).

O i e tatau ona tatou taofi ma malamalama ai: Sa le na ona totogiina e Alema o se faasalaga matautia e tolu aso lea na muai fuafuaina e avea ma taunuuga talafeagai mo ana agasala. Leai, sa i ai o ia i le pito i luma—o aso muamua e tolu—o le “siomia faataamilo e filifili tumau-faavavau o le oti” (Alema 36:18; faaopoopo le faamamafa).

E moni lava, semanu e tumau pea o ia i lenei tulaga leaga e sili atu ma le tolu aso—e le gata—pe ana leai le mea moni e faapea, o le alofa mutimutivale, sa ia manatua ai mai se mea, na valoia e lona tama “e uiga i le afio mai o se tasi o Iesu Keriso, o se atalii o le Atua, e togiola mo agasala a le lalolagi.” Ona ia faapea mai lea:

“O lenei, ina ua tau ane lou mafaufau i lenei manatu, sa ou tagi ifo i totonu o loʼu loto: E, Iesu e, oe le Alo o le Atua, ia e alofa mutimutivale mai ia te au, o se ua i ai i le au oona, ma ua siomia faataamilo e filifili tumau-faavavau o le oti.

“Ma o lenei, faauta, ina ua ou mafaufauina lenei mea, sa ou le toe manatuaina oʼu tiga; ioe, sa ou le toe lagā atuatuvaleina au i le manatuaina o au agasala” (Alema 36: 17–19).

Na mulimuli Alema i le poloaiga a le agelu ia manatua. Sa ia manatuaina Iesu. Ma e pei lava ona laveaiina e Iesu le tamā o Alema mai lo latou faatagataotauaina, sa Ia laveaiina Alema mai lana faatagataotauaina.

E maeu le alofa mutimutivale ma le laveaiga tele! Oka se suiga maofa o le loto ma le mafaufau! O Alema, o lē sa na o sina taimi muamua atu na mafaufau ai e sola ese mai le afioaga o le Atua e ala i le tafi esea, lea ua vaai mamao i le Atua ma Ana agelu paia ma “sa moomoo lo’u agaga i le fia i ai iina” (Alema 36:22).

O lenei suiga faavavega sa faagaoioia e se manatuaga faigofie. O le aafiaga o Alema ua aumaia ai se uiga moni i upu faaiu o le lauga faaiu a le Tupu o Peniamina: “Ma o lenei le tagata e, ia manatua, ma lē fano ai” (Mosaea 4:30).

A o tatou taumafai e manatua pea Iesu, e taua le manatua o loo Ia manatua pea i tatou. Ua Ia tusia i tatou i Ona alofilima (tagai Isaia 49:16). Mafaufau i ai—o le agalelei o Iesu o le a lē mafai, e lē mafai, ona faagaloina i tatou, ae e faigofie lava ma naunau o Ia e faagalo a tatou agasala na faapea ona faamanuaina ai o Ia.

O le mea lena e tatau ona manatua.