2023
Ang Milagrosong Gasa ni Jesukristo
Disyembre 2023

“Ang Milagrosong Gasa ni Jesukristo,” Liahona, Dis. 2023.

Alang sa mga Ginikanan

Ang Milagrosong Gasa ni Jesukristo

Imahe
mga bata nga nag-aksyon sa istorya sa Pagkatawo ni Jesus

Litrato pinaagi ni Scott Law

Minahal nga mga Ginikanan,

Kining bulana nga isyu nagsuporta sa pagtudlo sa inyong mga anak mahitungod kon unsaon sa pagpalambo ug pagpausbaw sa ilang mga relasyon uban sa Manluluwas ug uban sa tanang anak sa Dios. Mahimo nimong gamiton ang mga ideya dinhi sa pagpalambo og mga panaghisgotan kon unsaon sa pag-andam sa paghimo og mga pakigsaad uban sa Dios ug kon unsaon sa pag-uswag sa atong mga relasyon uban Kaniya ug sa uban.

Mga Panaghisgotan sa Ebanghelyo

Paglaom nga anaa sa Manluluwas

Sa artikulo ni Elder Gary E. Stevenson diha sa pahina 4, basaha kon giunsa sa gamayng batang babaye nga ginganlan og Hope ug sa iyang pamilya pagsalig sa Ginoo panahon sa ilang mga pagsulay, ug dayon hisgoti kon giunsa ni Jesukristo “paggunit kanimo” sa imong kaugalingong mga pagsulay.

Ang Labing Mahinungdanon nga mga Gasa

Ipakigbahin ang pipila ka ideya gikan sa artikulo ni Elder Brent H. Nielson mahitungod sa daghang milagro ug mga gasa sa Pasko (pahina 40). Hisgoti uban sa imong pamilya ang tulo ka gasa sa Pasko nga gihisgotan ni Elder Nielson sa kataposan sa iyang atikulo. Hinumdomi unsa nga “mga gasa” ang tingali ihangyo sa Langitnong Amahan ug ni Jesukristo kanimo niini nga panahon sa Pasko.

Mga Sukaranan sa Ebanghelyo

Ang paghimo og mga pakigsaad diha sa templo nagpadayon og sagrado nga relasyon, unang nahitabo sa bunyag, uban sa Langitnong Amahan. Rebyoha ang “Pangandam sa Pagtambong sa Templo” diha sa pahina 22 aron makat-on pa og dugang mahitungod kon unsay mahimo ninyo o niadtong inyong gimahal aron maandam sa pagdawat og mga pakigsaad diha sa templo ug paglig-on sa inyong pakigsaad nga koneksiyon uban sa Dios.

Dali, Sunod Kanako Kalingawan sa Pamilya

Pagbuntog sa Kaaway pinaagi ni Jesukristo

Pinadayag

“Gibuntog sa atong mga kaigsoonan ang [Yawa] pinaagi sa dugo sa Nating Karnero ug sa kamatuoran nga gisangyaw nila” (Pinadayag 12:11). 

  1. Pangutana sa mga sakop sa pamilya kon giunsa ni Satanas pagpaninguha sa pagpasakit, pagtental o paglingla kanila. Isulat kini diha sa panid sa papel.

  2. Hatagi ang tanan og laing pula nga panid sa papel aron sa pagrepresentar sa Pag-ula ni Kristo, o “sa dugo sa Nating Karnero.”

  3. Dapita ang matag tawo sa pagpili og paborito nga kasulatan mahitungod sa Pag-ula ni Kristo o gamita ang usa sa mosunod: Mateo 26:26–28; Mga Taga-Efeso 1:7; Mga Hebreo 9:14, 22; 1 Juan 1:7; Pinadayag 5:9; Mosiah 3:11, 15, 18; Ether 13:10–11.

  4. Ipakopya sa matag tawo ang mga hugpong sa mga pulong gikan sa ilang pinili nga kasulatan diha sa ilang pula nga piraso sa papel. Ubos sa bersikulo sa kasulatan, ang matag tawo mahimong mosulat sa ilang pagpamatuod.

  5. Ipakigbahin ang mga kasulatan ug mga pagpamatuod. Iapil ang pula nga mga papel diha sa ibabaw sa papel gikan sa lakang 1.

Panaghisgotan: Sa unsang paagi nga si Jesukristo nagtabang kanato sa pagbuntog kang Satanas?