4 ka Ideya alang sa Pagtukod og mga Relasyon sa Nagkalain-laing mga Pagtuo

Imahe

duha ka lalaki nga nagpahiyom

Unsa ang mahitabo kon ang mga indibidwal sa daghang mga relihiyon ug mga tinuohan maghiusa sa pagpundok? Ang mga komunidad, mga pamilya, ug gani ang kalibotan mapanalanginan! Sama pananglitan, atol sa Abril 2020 nga kinatibuk-ang komperensiya, si Presidente Russell M. Nelson midapit sa tanan––mga miyembro sa Ang Simbahan ni Jesukristo sa mga Santos sa Ulahing mga Adlaw ug kadtong dili sa atong pagtuo––sa pagpuasa ug pag-ampo alang sa kahupayan gikan sa COVID-19 nga pandemya.²

Agi og tubag ngadto sa tibuok kalibotan nga pagdapit ni Presidente Nelson sa pagpuasa, daghang mga tawo gikan sa mga tinuohan sa tibuok kalibotan naghiusa sa usa ka parehas nga kawsa.

Lain-laing mga grupo sa Facebook misugod sa pagdapit og liboan sa pagpakigbahin sa ilang mga kasinatian. Si Brandi, usa ka sakop sa grupo, miingon: “Sukad sa pagpasakop niini nga grupo, ang akong kinabuhi sa hangtod nausab. Nakita ang tanang kaayohan nakapalihok kanako sama nga walay laing makahimo. … Ingon nga kabahin niining talagsaon nga grupo, uban sa mga tawo nga gikan sa tanang matang sa kinabuhi nag-uban sa gugma ug kalinaw, ingon og lain nga kalibotan. … Unsa ang akong nasinati ug nabati diha niana nga grupo, uban sa labaw sa katunga sa milyon nga kauban, sa tinuoray usa ka paglantaw kon unsa sama ang langit. Ang tanang anak sa Dios naghiusa.”³

Ang mga lider sa Simbahan nagpadayon sa pag-awhag sa mga indibidwal sa pakigtrabaho niadtong ubang mga tinuohan sa pagmugna og mga panaghigalaay, paglig-on sa mga komunidad, ug sa pagtukod og panaghiusa.

Si Presidente Dallin H. Oaks, Unang Magtatambag sa Unang Kapangulohan, miingon: “Bisan pa sa tanang gibuhat sa atong Simbahan sa direktang paagi, kadaghanan sa makitawhanon nga serbisyo ngadto sa mga anak sa Dios sa tibuok kalibotan gihimo sa mga tawo ug sa mga organisasyon nga walay pormal nga koneksiyon sa atong Simbahan. Sama sa naobserbahan sa usa sa atong mga Apostol: ‘Ang Dios naggamit og sobra sa usa ka tawo para sa katumanan sa iyang mahinungdanon ug kahibulongan nga buhat. … Kini dako kaayo, lisod kaayo, para sa usa ka tawo.’”⁴

Unsa ang atong mabuhat sa pagsunod sa propetikanhong tambag ug sa pag-apil sa nagkalain-laing pagtuo nga pagtinabangay isip mga indibidwal, mga pamilya, ug mga ward o mga branch? Aniay upat ka ideya aron kamo makasugod:

1. Paghimo og usa ka kalihokan sa serbisyo, sama sa usa ka kampanya sa paghatag og dugo. Sa California, USA, ang mga miyembro sa Simbahan miapil og kauban nga mga Kristiyanos alang sa usa ka nagkalain-laing pagtuo nga kampanya sa paghatag og dugo. Niana–ang Area Seventy nga si Elder Robert N. Packer miingon, “Kini gihimo tungod kay adunay daghang gugma tali niining komunidad sa Katoliko ug sa komunidad sa Santos sa Ulahing mga Adlaw.”⁵

2. Pagplano ug pag-apil sa usa ka nagkalain-laing pagtuo nga kamping sa adlaw alang sa kabataan o kabatan-onan. Pipila sa mga miyembro sa Simbahan sa Manila, Philippines, miapil sa usa ka tinuig nga nagkalain-laing pagtuo nga kamping sa Relihiyon alang sa Kalinaw sa Asia [Religions for Peace Asia] & ang Pacific Interfaith Youth Network. Ang kamping naghatag sa “mga lider sa mga himan nga ilang gikinahanglan sa pagtabangay og trabaho sa pagtubag sa daghang problema nga giatubang sa kabatan-onan.”⁶

   Ang mga kampo ug mga kalihokan sa nagkalain-laing pagtuo makahatag og mga oportunidad sa paghiusa ngadto sa uban, diin kitang tanan mobati og kalinaw nga moabot pinaagi sa pagserbisyo sama ni Jesukristo.

3. Apil sa lokal nga kampanya sa pagkaon. Si Walker N., edad 7, gikan sa Alberta, Canada, miingon: “Ang among siyudad naghimo og nagkalain-laing pagtuo nga kampanya sa pagkaon matag tuig. Kami nanghatag og mga flier ug dayon nagkuha sa mga pagkaon nga nahibilin diha sa mga hagdanan. Sa dihang among gihatod ang mga pagkaon sa mga estasyonan, gibati ko ang tinuod nga kahinam. Ang akong mama miingon nga kana nga pagbati mao ang Espiritu Santo.”⁷

4. Apil sa mga konsyerto sa nagkalain-laing pagtuo. Sila si Megan C., 18; Ethan M., 19; ug Romy C., 17, gikan sa Florida, USA, miapil sa usa ka Nagkalain-laing Pagtuo nga Pista sa Musika [Interfaith Musical Festival] uban ang tumong sa “pagtabang sa mga tawo gikan sa nagkalain-laing mga kaagi nga mahimong managhigala.”⁸

“Sa kalibotan diin adunay daghan kaayong pagpanggukod sa relihiyon ug sa pagtuo, kini maanindot nga kita magkapundok ug mag-istoryahanay lamang sa usag usa. … Ang mga [nanambong] wala manumbaling mahitungod sa relihiyon ni bisan kinsa. Didto lamang sila sa pagtanyag sa ilang pagtabang,” miingon si Romy.⁹

Samtang didto sa G20 Interfaith Forum sa Italy, si Elder Jack N. Gerard sa Seventy mipahimangno kanato sa importansya sa pagtinabangay sa mga tawo sa tanang mga tinuohan samtang naningkamot kita sa pagsunod sa ehemplo ni Jesukristo: “Ang mga relasyon naggiya ngadto sa tinuod nga pagsinabtanay. … Kinahanglan gayod kita nga mopatigbabaw sa grabeng pagkabahin sa mga opinyon o sa mga panghunahuna sa kalibotan karon. Ug kita kinahanglan nga mangulo sa pagpahinumdom sa atong kaugalingong mga miyembro sa pagpakita pinaagi sa panig-ingnan sa tibuok kalibotan nga sa atong tradisyon sa pagtuo ang Manluluwas Mismo usa ka gamhanang mang-aayo. Kita gipundok Niya ug giawhag ang uban sa dili paghukom sa usag usa apan nga mahimong may pagpugong sa kaugalingon, nga masukod sa paagi nga kita naghunahuna sa usag usa. Kita makahimo sa pagpakig-uban ug makapatigbabaw sa pipila sa [unsay] gitugot sa modernong teknolohiya, ug sa pagkaplag sa atong mga kaugalingon diha sa usa ka mas maayo nga dapit, ingon nga sa tinuoray nakaayo sa mga kasingkasing ug mga kalag sa tanang katawhan, sa walay pagsapayan sa ilang tradisyon sa pagtuo o walay tradisyon sa pagtuo.”¹⁰