Ikaw Ba ang Akong Papa?

Imahe

pinutos nga mga gasa sa Pasko

Paghulagway pinaagi ni Anastasia Suvorova

Pila na ka tuig ang milabay, ang akong anak nga lalaki nga si Nelson nanawag nako sa Bisperas sa Pasko. Semana sa wala pa niana, usa ka abogado nga dili makasulti og Kinatsila mihangyo niya sa pagserbisyo isip usa ka tighubad. Ang kliyente sa abogado, usa ka edaran nga lalaki kinsa dili makasulti og Inenglis, nanghangyo nga hatagan og katungod nga mobantay sa iyang mga apo.

Human sa husay, si Nelson nanghinaot sa kliyente og malipayong Pasko. Ang tawo mitubag nga ang Pasko nianang tuiga mahimong usa ka magul-anon nga panahon. Nanglimbasog siya sa pinansyal aron sa pagsuporta sa iyang pamilya. Agig dugang, ang iyang 29 anyos nga anak nga babaye bag-o lang namatay, nagbilin og lima ka gagmayng mga anak, ang kinamanghoran dos anyos pa lang. Ang ilang amahan tua sa prisohan, mao nga ang kliyente ug ang iyang asawa ang nag-atiman sa ilang mga apo.

Natandog sa sitwasyon sa lalaki, si Nelson ug ang abogado mihukom nga dili na lang siya pabayron alang sa ilang pagserbisyo. Dayon si Nelson nangayo sa mga ngalan ug mga edad sa mga bata ug sa pinuy-anan sa lalaki.

Nianang gabhiona, dili makatulog si Nelson sa paghunahuna kon unsaon niya pagtabang ang pamilya. Samtang miluhod siya ug nangamuyo mahitungod kanila, mibati siya og kadasig sa pagsulat og usa ka sulat, mipasabot sa sitwasyon sa pamilya, mipakigbahin sa mga ngalan ug mga edad sa mga bata, ug nangayo og mahatag nga mga gasa. Pagkasunod adlaw nanghatag siya og mga kopya sa sulat ngadto sa mga huwes, mga abogado, ug ubang mga trabahante diha sa korte.

Ang tubag hilabihan gayod nga sa wala madugay gipuno niya ang likod nga bahin sa iyang sakyanan ug ang mga lingkoranan sa mga gasa. Kadtong walay panahon nga mopalit og mga gasa mihatag og kwarta alang sa pamilya.

“Mamá,” miingon si Nelson, “adunay daghang maayo nga mga tawo sa kalibotan. Kon makakita ka lang kon giunsa nila pagtubag! Mihangyo ko og usa lang ka gasa alang sa matag bata, apan daghan pa ang gipanghatag.”

Naabot si Nelson sa panimalay sa pamilya sa Bisperas sa Pasko. Ang mga bata mahinamon ug nalipay kaayo samtang sila mitabang niya sa paghakot sa mga gasa gikan sa iyang sakyanan. Ang ilang lolo ug lola nagpanlingo lang sa ilang ulo nga daw dili makatuo.

Sa dihang milingkod si Nelson aron sa pagpahulay og kadiyot sa dili pa mobiya, ang dos anyos miduol kaniya ug nagpasabak. Dayon, parayegon nga mihikap sa nawong ni Nelson, nangutana siya, “Ikaw ba ang akong papa?”

Tungod niana, mihilak si Nelson, mapasalamaton niadtong kinsa mitabang sa pagpadasig sa Pasko sa pamilya.

“Mamá,” miingon siya, “walay sama nga kalipay kay sa magserbisyo sa uban. Mapasalamaton ko nga nahimong instrumento sa mga kamot sa Dios aron sa pagpanalangin niining maayo nga pamilya.”

Ang kalipay ni Nelson usa ka pag-aninag sa pagtulon-an sa Manluluwas nga “labi pang bulahan ang paghatag kay sa pagdawat” (Mga Buhat 20:35).