Ang Gasa nga Dili Nako Makalimtan

Imahe

mga batang babaye nagpadausdos gikan sa bungtod nga puno sa niyebe [snow] gamit ang karton

Paghulagway pinaagi ni Anastasia Suvorova

Usa ka tuig alang sa Pasko, ang akong pamilya nakahukom sa paghatag sa kwarta nga amo unta nga gastohon sa mga regalo alang sa among kaugalingon ngadto sa usa ka pamilya nga magkinahanglan og tabang. Nag-ampo kami aron masayod kinsa among tabangan. Akong gitagoan ang kwarta sa usa ka sobre diha sa akong pitaka aron ako mahimong andam dayon kon ang pag-awhag moabot.

Pipila ka adlaw sa wala pa ang Pasko, ang akong mga anak nagdula og padausdos sa balsa [sledding]. Dihang miabot ko sa bungtod aron kuhaon sila, mitan-aw ko samtang ilang gihimo ang usa pa ka makalingaw nga pagdagan padulong sa ubos sa bungtod.

Sa wala magdugay, nakamatikod ko og duha ka gagmayng bata nga mga babaye nga wala magsul-ob og sapot alang sa tugnaw nga panahon. Nagsul-ob sila og botas para sa ulan, karsones nga may buslot sa tuhod, mga spring jacket alang sa tingpamulak, ug usa ka guwantes matag usa gikan sa samang paresan. Lingaw kaayo sila nga nagpadausdos ngadto sa ubos sa bungtod gamit ang usa ka piraso nga karton.

Samtang nagtan-aw ko nila nga nagdagan pasaka sa bungtod paingon sa ilang mama, gibati nako ang kusog nga impresyon nga kini ang pamilya nga kinahanglan namong tabangan. Milakaw ko aron sa pagpakigsulti sa inahan. Paglingi niya, nakurat ko nga nakaamgo nga nakaila ko niya.

Napulo ka tuig ang milabay, ako nahimong visiting teacher niini nga sister. Kaniadto, nagluto kog pan usa ka adlaw ug gibati nako nga kinahanglan nako siyang hatagan ug tinapay. Apan sa akong pagpaingon sa iyang balay, akong namatikdan ang usa ka dili pamilyar nga awto sa iyang agianan. Naghunahuna ko nga segurado aduna siyay kauban, ug dili ko gusto nga makabalda. Mao, mibalik ko sa akong agi ug mipauli.

Paglabay sa tunga sa oras, ang presidente sa Relief Society mitawag aron mangutana kon makaadto ba ko sa balay niini nga sister ug magbantay sa iyang mga anak. Naospital siya, ug ang iyang inahan mianhi aron magpabilin uban sa mga bata apan naghinamhinam siya nga makauban ang iyang anak nga babaye. Nagdali ko sa pag-adto apan naulaw ko nga wala nako masunod ang nauna nga pag-aghat. Sukad niadtong adlawa, naningkamot ko sa akong labing maayo sa pagsunod sa mga pag-aghat gikan sa Espiritu, apan kini nga kasinatian naghasol gihapon kanako.

Mapasalamaton ko nga nakauban pag-usab kining minahal nga sister. Nianang adlawa, dili lamang ang Langitnong Amahan mitubag sa mga pag-ampo nga gitanyag sa akong pamilya nga makakita og pamilya nga alagaran, apan Iya usab kong gipanalanginan og oportunidad sa pagpasaylo sa akong kaugalingon sa miaging sayop. Wala ko magdahom niini nga gasa, apan usa kini nga dili gayod nako makalimtan.