O le Tagata Sili ona Taua i le Tusi a Mamona

I le tele o tausaga ua mavae, sa valaaulia ai a’u e o’u uso o auaunaga ina ia suesue ma le faamaoni i le Tusi a Mamona. Ina ua la tuuina mai ia te a’u lenei valaaulia, sa ou iloaina ai, e ui ina sa ou faitauina sina mea itiiti mai le Tusi a Mamona i aso taitasi, ae ou te le’i suesueina ma le manatu mamafa i ai.

Sa la faasoa maia se folafolaga ia te a’u lea sa faavae i upu mai ia Peresitene Ezra Taft Benson: “O loo i ai se mana i le [Tusi a Mamona] lea o le a amata ona tafe atu i o outou olaga i le taimi lava e amata ai ona outou suesue faamaoni i le tusi. O le a outou maua ai le malosi sili atu e aloese ai mai faaosoosoga … ia aloese mai le taufaasese … ia tumau i le ala sa’o ma le vaapiapi” (Aoaoga a Peresitene o le Ekalesia: Ezra Taft Benson [2014], 157).

Sa ou taliaina la la’ua valaaulia, ma i masina na sosoo ai, sa ou vaaia ai ua faataunuuina la la’ua folafolaga. Na suia ai lo’u olaga.

O se mafuaaga tele ua tuuina mai ai e le Tusi a Mamona ia i tatou le mana faaleagaga ona e faalatalata atili atu ai i tatou ia Iesu Keriso. I le tusiga a Peresitene Henry B. Eyring o loo i le itulau e 4, ua ia tusia, “O i latou o e faitauina ma le faamaoni le Tusi a Mamona, ola i ona mataupu, ma tatalo e uiga i lona moni o le a lagonaina le Agaga Paia ma faateleina lo latou faatuatua i, ma molimau o, le Faaola.”

O Iesu Keriso o le tagata sili ona taua i le Tusi a Mamona. E pei ona ma faasoa ma la’u tusitala lagolago, o Madison Sinclair, i la ma tusiga, “O Iesu Keriso i le Tusi a Mamona” (itulau 10), e silia ma le 7,000 mau faasino i le Faaola i le Tusi a Mamona.

Ou te iloa a tatou suesue i le Tusi a Mamona i lenei tausaga i le Sau, Mulimuli Mai ia te A’u, o le a tatou latalata atili atu ia Iesu Keriso.

Ma le alofa,

John Hilton III

Polofesa o mataupu faalelotu, Iunivesite o Polika Iaga

Ata

fafine o loo faitau tusitusiga paia

Ata na tusia e J. Kirk Richards