O Auala Faigofie e 5 e Faasoa Atu ai le Tusi a Mamona

Saunia e Mike Judson

Matagaluega o Talafaasolopito o Aiga

E le’i faigofie lava le fesoasoani atu i isi ia lagonaina le mana o le Tusi a Mamona i o latou olaga.

Ata

tamaitai e toalua o loo tilotilo i se telefoni

O faamatalaga mai perofeta ma aposetolo o aso nei e uiga i faamanuiaga o le faitauina o le Tusi a Mamona e ofoofogia.

Na saunoa mai le Perofeta o Iosefa Samita: “Sa ou fai atu i le au uso o le Tusi a Mamona o le tusi aupito sili ona saʼo i soo se isi lava tusi i luga o le fogaeleele, o le maaʼauʼau foi lea o la tatou tapuaiga, e sili foi ona latalata atili atu o le tagata i le Atua i lona ola ai i ona mataupu, nai lo se isi lava tusi.”¹

Na aoao mai Peresitene Ezra Taft Benson (1899–1994): “O le Tusi a Mamona o le meafaigaluega lea na mamanuina e le Atua e ‘tafi ai le lalolagi e pei o se lolo, e faapotopoto mai [Lana] au filifilia’ (Mose 7:62).”²

Talu ai nei lava, sa molimau ai Peresitene Russell M. Nelson: “O le tusi lenei o le a fesoasoani e saunia ai le lalolagi mo le Afio Mai Faalua o le Alii.”³

O na tautinoga mamana ua faamanatu mai ai ia i tatou le taua o le faasoaina atu o le Tusi a Mamona ia i latou o siomia i tatou. A o tatou faia lea mea, e mafai ona tatou fesoasoani i isi ia maua le mana faaopoopo i o latou olaga e ala i upumoni o loo aoaoina ai i totonu, e pei ona molimau mai ai Peresitene Nelson ina ua ia saunoa:

“Pe a ou mafaufau i le Tusi a Mamona, ou te mafaufau i le upu mana. O upumoni o le Tusi a Mamona ua i ai le mana e faamalolo, faamafanafana, toefuatai, fesoasoani, faamalosia, faatoafimalie, ma faafiafia ai o tatou agaga.”⁴

Manatu e Mafai Ona E Faataitaia

I lo tatou lalolagi i ona po nei, o loo i ai avanoa e le muta mo le faasoaina atu o le Tusi a Mamona. A o tatou mafaufau pe faapefea ona faasoa atu, e mafai ona tatou amata i le mafaufau po o ai e mafai ona tatou faasoa atu i ai le Tusi a Mamona ma mea o loo tutupu i o latou olaga. Ona mafai lea ona tatou mulimuli i le Agaga ia iloa le auala sili e mafai ona faamanuiaina ai i latou e le Tusi a Mamona. O manatu nei e lima (mai le tele!) e mafai ona tatou faataitaia:

I la tatou suesuega o le Tusi a Mamona, e mafai ona tatou vaavaai mo fuaiupu e tulaga ese ia i tatou. E mafai e se tasi o na fuaiupu ona tatou mafaufau ai i se tasi tatou te iloa? E mafai ona tatou mulimuli i le uunaiga ma faasoa atu ma le alofa ia upu tatou te faitauina ma lena tagata i se feau tusitusia, imeli, valaau i le telefoni, po o se faamatalaga tusitusia.
A o tatou lagonaina se aafiaga lelei e ala i le Tusi a Mamona, e mafai ona tatou tatalo ma ole atu i le Atua po o ai se isi e ono manuia mai le faalogo i o tatou aafiaga. Ona mafai lea ona tatou faasoa atu a tatou tala, ma faalagolago i le folafolaga a le Alii e faapea “O le a Ou alu muamua atu i o outou luma. O le a Ou i ai i lo outou lima taumatau ma lo outou agavale, ma o le a i ai lo’u Agaga i o outou loto, ma si’o faataamilo outou e a’u agelu, e sapasapai outou i luga” (Mataupu Faavae ma Feagaiga 84:88).
Pe na ootia ea i tatou i se tala o loo faaalia i se vitio mai le tuufaatasiga o Vitio o le Tusi a Mamona? Ua faateleina le maua e tagata o nei vitio i luga o le initoneti ma ua tosina atu i upumoni o le talalelei e ala i tala o loo latou faaalia. Ma le isi, afai tatou te lagona le musuia a o tatou matamata, e mafai ona tatou mafaufau po o ai isi e ono fiafia i se aafiaga faapena ona faasoa atu lea o se sootaga faavitio ma i latou.
O se tasi o auala sili ona faigofie e faasoa atu ai o se tulaga faigofie o le pa‘i atu i se faamau i le polokalama o le Tusi a Mamona. E mafai ona e faasoa atu se sootaga i se tasi pe tau lava o le tuu atu ia i latou e kopi se numera faalilolilo mai le polokalama i luga o lau telefoni. E tusa lava foi pe o le nofo i autafa o se tasi i luga o se pasi, e mafai ona e faasoa atu ma tuu atu ia i latou le avanoa e maua ai le Tusi a Mamona i soo se gagana. O le polokalama o loo i ai le tusiga atoa o le Tusi a Mamona. O loo aofia ai foi Vitio o le Tusi a Mamona ma le tele o isi punaoa e mafai ona taitai atu ai tagata e aoao atili e uiga ia Iesu Keriso ma Ana aoaoga.
O se tasi o auala e sili ona masani ai e mafai ona tatou faasoa atu ai le Tusi a Mamona o le tuuina atu lea i se tasi o se kopi ua lolomiina. E toatele tagata o loo saili mo se tusi lelei e faitau. E mafai ona tatou faasoa atu ia i latou le Tusi a Mamona ma ta‘u atu ia i latou le mafuaaga e taua tele ai ia i tatou pe a tatou faitauina.

Ua i ai i le Tusi a Mamona tali i luitau o le olaga!⁵ E na te lagolagoina le faatuatua ia Iesu Keriso⁶ ma faasino atu ai tagata ia te Ia! E mafai ona siitia ai tagata mai le agasala ma le faanoanoa, aoao i latou i le ala e lagona ai le filemu o le Faaola,⁷ ma faalautele ai lo latou malamalama po o ai i latou i taimi uma latou te faitauina ai!

E pei ona saunoa mai Peresitene Nelson, o le Tusi a Mamona o le “meafaigaluega a le Atua e faataunuu ai le faapotopotoina [o Isaraelu].”⁸ Ua aumaia e le Alii le Tusi a Mamona o se vaega o Lana galuega, ma o lo tatou avanoa e faasoa atu o ona tala fiafia i isi. Po o le a lava le auala tatou te faasoa atu ai le Tusi a Mamona, e mafai ona tatou mautinoa o loo tatou i ai i le galuega a le Atua o le faaolataga ma le faaeaga e fesoasoani ai e faapotopoto Lana fanau.