“O Le Alaleo Sa’o,” Liahona, Ian. 2024.
O Leo o le Au Paia o Aso e Gata Ai
O Le Alaleo Sa’o
Ou te lei malamalama pe aisea na le fesootai mai ai le pailate na leiloa ia i matou.
Ata na tusia e Roger Motzkusart
I se tasi aoauli i le taimi o la’u galuega faataitai o se faatonu o feoaiga i le ‘ea i le malaevaalele i Tijuana, Mekisiko, sa ma matauina ai ma lo’u faiaoga o se puao mai le sami na ufitia ai le malaevaalele ma se vaega tele o le aai. Peitai, o le vaaiga manino, sa i ai i totonu o tapulaa na faatagaina mo vaalele e tulaueleele ma felelei ese ai.
E lei leva, ae matou iloaina i luga o le masini faatonutonu se faailo Cessna 172 na sau mai saute i le talafatai, na oo mai i tulafono o faigamalaga vaaia (VFR). I lalo o le VFR, e faailoa mai e pailate i latou lava i ni vaega e faasino i ai i luga o le eleele ina ia taunuu ai i lo latou taunuuga.
Ae paga lea, na leiloa le pailate i le puao. Sa lele faataamilo i le vaega tumatafaga, sa ia taumafai ai e faailoa mai o ia e agai i le malaevaalele, ae o le le manino o le vaaiga na faatapulaa ai lana vaai. Sa ou fesili atu i lo’u faiaoga po o le a se mea e mafai ona ma faia e fesoasoani ai ia te ia.
“E manaomia ona maua le alaleo o le fesoota’iga i le ’ea i le ōlo ma talanoa mai ia i tatou,” na ia tali mai ai. “A leai, e le mafai ona tatou faia se mea mo ia.”
Ou te lei malamalama pe aisea na le fesootai mai ai le pailate na leiloa ia i matou. Pe na i ai se faafitauli i lana leitio? Pe na ia lagonaina e mafai ona ia aluese mai mea matautia na o ia lava?
Na mavae atu minute. Mulimuli ane, na maua e le pailate le alaleo o le ōlo. Faatasi ai ma se leo popole, sa ia talosaga mai ai mo se fesoasoani. Na vave lava ona ma tuuina atu ia te ia faatonuga e taitai saogalemu atu ai o ia i le auala o le malaevaalele. Sa na o lona faatuatuaina lava o a ma faatonuga ma ana meafaigaluega o le faigamalaga.
O le vaaia o le lele ae o le vaalele mai le puao i ni nai minute mulimuli ane ona tulaueleele ai lea ma le saogalemu na aumaia ai ia i matou le olioli e le mafaamatalaina.
A o ou fo’i atu i le fale, sa ou mafaufau loloto i le mea na oo i ai le pailate. O le valaau mai ia i matou i le alaleo sao o le ea na faia ai se eseesega i le va o le mauaina o le fesoasoani po o le lele faataamilo i li’o—po o se tulaga sili ona leaga.
E pei o lenei pailate, e i ai taimi na ou leiloa ai i “se puao o le pogisa” (1 Nifae 8:23). Pe a ou manaomia le taitaiga a le Atua, e faatalitali ma le onosai o Ia e faalogo mai i lo’u leo.
E pei lava ona mafai ona ou vaai i le vaalele na leiloa i le masini faailo, e silasila mai lo tatou Tama Faalelagi ia i tatou ma o tatou luitau. Ou te faafetai ua Ia tuuina mai ia i matou le taitaiga. Na te tuuina mai le fesoasoani e ala i le tatalo, tusitusiga paia, perofeta soifua, ma le meaalofa o le Agaga Paia. O le a Ia taitai ese i tatou mai mea matautia faaletino ma faaleagaga pe afai tatou te maua le alaleo sa’o, talosaga mo le taitaiga, ma faalogo i Lona siufofoga.