A‘oga—o se Faavae Taua mo le Faataunuuina o a Tatou Misiona

Sa saunoa atu Peresitene Russell M. Nelson, lo tatou perofeta, i le autalavou matutua ia Me 2022: “E taua tele le a‘oga. Ou te mafaufau i ai o se tiutetauave faalelotu.”¹ E le silasila le Alii i le a‘oga e ese ma e tulaga ese mai le faaleagaga.

O le mea moni, i le Mataupu Faavae ma Feagaiga 88:77–78, na Ia tuuina mai ai ia i tatou se poloaiga e “aoao le tasi i le isi,” ma folafola mai Lona alofa tunoa e fesoasoani tatou te aoao ai “mea uma e faatatau i le malo o le Atua.” Ma o a na mea e faatatau i Lona malo? O le lisi i le fuaiupu e 79 e ono faateia ai oe ona e le na o le faaaofia ai na o autu o le talalelei e pei o le faatuatua ma le salamo. E aofia ai foi (faatasi ai ma nisi o a‘u iloiloga e ono i ai pe faapefea ona latou fesootai i mea e mafai ona tatou suesueina): 

• “O mea … i le lagi”: O fetu ma paneta? O le siosiomaga o le lalolagi? Femalagaaiga i le ea? (Ou te manatu o le a ioe mai Elder Uchtdorf ia te au!) 

• “O mea … i le lalolagi”: Fausaga? Gaosiga? Faagasologa tau alamanuia? Faamatalaga faatekinolosi? Saienisi o le soifua maloloina ma ona vaega uma? Suesuega faasaienisi o manu? Paiolo? Paiokemisi? Faatoaga? 

• “O mea … i lalo o le lalolagi”: Suesuega o le lalolagi? Suesuega o Minerale? Suesuega o le Sami? Suesuega o meaola i le Sami? 

• “O mea sa i ai”: Talafaasolopito?

• “O mea o i ai nei”: Mea o tutupu i le taimi nei? Saienisifaaupufai? Sosiolo? Pisinisi? Aiaiga faavae mo tagata lautele?

• “O mea ua vave ona oo mai”: Vaai tau? Fuafuaga o mea tautupe? Iloiloga o faama‘i pipisi e ono i ai? Siita‘iga o tulaga faatekinolosi? 

• “O mea o i le aiga”: O mataupu tau i le lotoifale e pei o aoga, lafoga, tulafono, galuega faatino i le lotoifale o le atinaega o le taulaga, ma fuafuaga o le gaosiga o meaai? 

• “O mea o loo i fafo”: Mataupu i le va i fafo? Sootaga faavaomalo? Vanonofo ma atunuu i fafo

• “O taua ma faigata o atunuu, ma faamasinoga o loo i luga o le laueleele; ma se malamalama foi i atunuu ma malo”: Ituaiga eseese o faigamalo, aganuu, ma gagana? Suesuega o Tagata ma ona Afuaga? Tu masani o faatufugaga ma tusiga i le salafa o le lalolagi?

Oka! E sili atu lena nai lo le mea e mafai ona tatou aoaoina i le olaga atoa (ma ou te mautinoa e finagalo le Alii ia tatou aoao atili foi!).

Ma aisea e finagalo ai o Ia ia tatou aoaoina nei mea uma? 

E le na o le ina ia mafai ai ona e maua se galuega lelei—e ui e taua lena mea ia te Ia. Ae o Lana vaaiga mamao e lautele atu nai lo lena, ma o Lona faamoemoega e tele atu ona taunuuga e faavavau. O loo faamatala mai i le fuaiupu e 80: “Ina ia mafai ona outou saunia i mea uma pe a Ou toe auina atu outou e faalautele le valaauga lea ua Ou valaaulia i ai outou, ma le misiona lea ua Ou tofia ai outou.” 

O lenei mea, e foliga mai, o le faamoemoega sili lea o le a‘otauina—ia saunia mo le misiona ua tuuina mai e le Atua ia i tatou, ia saunia pe a Ia toe auina atu i tatou. 

Atonu e fai mai nisi o outou, “Toe auina atu a‘u? Ua uma ona ou auauna atu i se misiona. Pe o le a toe auina atu ea au?” 

O le mea moni, e na o le tasi lava le misiona. Afai sa e auauna atu i se misiona talai, o se vaitaimi ofoofogia lena o auaunaga taulai atu i le Alii. Ae e le o le amataga lea po o le faaiuga o le misiona na Ia auina mai outou iinei e faataunuu. O le a la lena misiona? Mafaufau i faamatalaga nei mai tusitusiga paia: 

• “O le a tatou faia se lalolagi e nonofo ai [fanau a le Atua]; ma o le a tatou tofotofoina ai i latou, e vaai pe latou te faia mea uma o soo se mea e poloaiina ai i latou e le Alii lo latou Atua” (Aperaamo 3:24–25).

• Ia Atamu ma Eva, sa fetalai atu i ai se agelu a le Alii: “O le mea lea, ia e faia mea uma e te faia i le suafa o le Alo, ma ia e salamo ma valaau atu i le Atua i le suafa o le Alo e faavavau” (Mose 5:8). Ma o Atamu ma Eva “sa la faailoa atu mea uma i o laua atalii ma afafine” (Mose 5:12).

• Ina ua mavae Lona Toetu, sa fetalai atu le Faaola ia Peteru, “Fafaga i a’u mamoe” (Ioane 21:17), ma i Ona so’o, “Ia outou o atu e fai nuu uma lava ma soo, ma papatiso atu ia te i latou i le suafa o le Tamā, ma le Atalii, ma le Agaga Paia: ia outou a’oa’o atu ia te i latou ia tausi i mea uma ua ou fai atu ai ia te outou: faauta foi, ou te ia te outou i aso uma lava, e oo lava i le gataaga o le lalolagi” (Mataio 28:19–20).

• Ina ua faaali atu Keriso i Amerika, sa Ia fetalai atu, “O galuega na outou vaai na ou faia o mea ia tou te faia foi” (3 Ni. 27:21).

• I ona po o Iosefa Samita, sa Ia fetalai mai ai: “O lenei faauta, ua lē pine ona oo mai o se galuega ofoofogia i le fanauga a tagata. O lea, outou o e e o atu i le galuega a le Atua, vaai ia outou auauna atu ia te ia ma o outou loto atoa, mafaufau atoa, manatu atoa, ma le malosi atoa, ina ia mafai ona outou tutu ma le lē pona i luma o le Atua i le aso gataaga. “O lea, afai ua ia te outou le manao e auauna atu i le Atua, ua valaaulia outou i le galuega” (Mataupu Faavae ma Feagaiga 4:1-3

• Ma i le asō , e ala mai i le perofeta soifua a le Alii, o Peresitene Russell M. Nelson, ua Ia tau mai ai ia i tatou: “O le faapotopotoina o Isaraelu o le galuega aupito sili lea ona taua o loo faia i le lalolagi i aso nei. O le tasi elemene taua o lenei faapotopotoina o le sauniaina lea o se nuu o ē gafatia, saunia, ma agavaa e talia le Alii pe a toe afio mai o Ia; o se nuu ua uma lava ona latou filifilia Iesu Keriso i lo le lalolagi pa’ū; o se nuu o ē olioli i lo latou faitalia e ola ai i tulafono maualuluga atu ma paia atu a Iesu Keriso. Ua ou valaau atu ia te outou, o‘u uso e ma tuafafine pele, ia avea ma lenei nuu amiotonu. Ia faataua ma faamamalu au feagaiga i lo isi uma tautinoga. … Ia faamuamua le Atua i lou olaga.”²

Afai e mafai ona ou aoteleina la tatou misiona, ona ou faapea atu lea: 

• Ina ia tausia poloaiga a le Atua, Lana tulafono maualuga atu ma paia atu. 

• Ina ia mulimuli ia Iesu Keriso ma o tatou loto atoa, ia faia mea uma i Lona suafa. 

• Ma ia faailoa uma atu i isi fanau a le Atua, ma toe faapotopoto mai i latou ia te Ia e sauniuni ai mo le Afio Mai Faalua o le Alii. 

E mafai faapefea e le mauaina o se aoaoga ona fesoasoani ia te oe e saunia ai mo lenei misiona? E tele tali talafeagai i lenei fesili, ae o ni nai manatu nei:

• O le aoao e uiga i le lagi ma le lalolagi e mafai ona faalolotoina ai lo tatou migao mo Iesu Keriso, o le na foafoaina.

• O le aoao e uiga i le taimi ua tuanai, taimi nei, ma le lumanai e mafai ona tatala ai o tatou mata i taunuuga o le usiusitai—ma le lē usitaia—o poloaiga a le Atua i le talafaasolopito atoa o tagata.

• O le aoao e uiga i “faigata o nuu, … o atunuu ma malo” e mafai ona tatou nofouta atili ai i eseesega faaleaganuu. O le lelei o lo tatou iloa o loto o tagata o le lalolagi—o o latou manaoga, o latou tulaga faatauaina, ma mea e taua ia i latou—o le saunia lelei foi lea o i tatou e faasoa atu le talalelei ia i latou i se auala o le a latou malamalama ai, opogi, ma faapelepele i ai. 

Ua ia te a‘u le talitonuga atoa e mafai e oe ma a‘u ona faataunuuina lenei misiona aua ua faataunuuina e Iesu Keriso Lana misiona. O lo tatou manuia e faalagolago ia te Ia, ma sa faamaoni o Ia i le misiona na tuuina atu e Lona Tama ia te Ia—o se misiona e na o Ia lava e mafai ona faataunuuina. 

Ou te molimau atu na faataunuuina e Iesu Keriso Lana misiona ina ia mafai ona e faataunuuina lau misiona. “Sa Ia faailoga le ala ma taitai le auala.”³ O le taimi nei o lau misiona o le mulimuli lea i Lona ala—le ala o feagaiga—ma faailoa atu i tagata uma. E pei ona saunoa Liae, “Ua taua tele ai le faailoa atu o nei mea i tagata o le lalolagi” (2 Nifae 2:8). Faailoa atu i lau fanau, i o outou uso ma tuafafine, i mamoe a le Alii, i atunuu uma—e oo lava i le gataaga o le lalolagi. Ia faailoa atu e ala i upu ma faataitaiga, faasoa atu ma ola i mea ua e iloa e uiga i le Faaola. Ia faailoa atu e ala i le auauna atu i le Atua ma Ana fanau ma lou loto atoa, manatu, mafaufau, ma le malosi atoa i lenei galuega matagofie o le faapotopotoina o Isaraelu, o le sauniaina o se nuu o e e gafatia, saunia, ma agavaa e talia le Alii pe a toe afio mai o Ia. 

O lau misiona lenei, ma e moni lava o se misiona matagofie. E manaomia e le lalolagi mea ua ia te oe e ofo atu o se soo o le feagaiga a Keriso. O le luitau o le a e feagai ai o le tatau lea ona e ola i lena lalolagi a o faataunuuina foi lau misiona taua. Ma o se lalolagi faigata, lea e faaaoga ai e le tiapolo auupega taufaasese, saili e faasese oe, faia o mea sese e foliga mai e sa‘o, pe mimilo lemu le mea sa sa‘o seia oo ina avea ma se mea sese. 

Na saunoa Mai Elder David A. Bednar o le Korama a Aposetolo e Toasefululua i le konafesi aoao ia Oketopa 2022, “I le pisi o o tatou olaga i aso taitasi ma i le vāvāō o le lalolagi i ona po nei o loo tatou ola ai, atonu e faalavelaveina ai i tatou mai mea e faavavau ia e sili ona taua e ala i le faia o mea e fiafia i ai, manuia, ma le lauiloa o a tatou faamuamua autu.”⁴

E faapefea ona tupu lenei mea i o tatou olaga? Ma e faapenei lona faamatalaina: 

• Tatou te faatauina se pea seevae uliuli mo le galuega. I le aluga o taimi, tatou te manaomia se pea enaena mo faaiuga o vaiaso. Ona tatou manaomia lea o se pea lanumoana e faafetaui i le ofu fou faatoa tatou faatauina mai, ae o le a le o faatasi ma o tatou ofu e fiafia i ai—o seevae papae e fomu atu i lena ofu. E le o toe mamao ae 10 pe 15 tatou pea seevae. Peitai, e na o le tasi lava le pea vae o loo i ai! 

• Faatasi ai ma o tatou taitoalua, tatou te fuafua ai o le faaaluina o le taimi faatasi o se aiga o se faamuamua taua. E le gata i lea, i le “O Le Aiga: O Se Folafolaga i le Lalolagi” o loo faapea mai “o faaipoipoga ma aiga manuia ua faavaeina ma faatumauina i mataupu faavae o le [faatasi ai ma isi mea] gaoioiga faafiafia tuufaatasi.” O lea na matou filifili ai o tausaga taitasi o le a o ai lo matou aiga i se tafaoga fou manaia. I le aluga o taimi, ua amata ona uumi atu malaga. Ua oo atu i Aso Sa na malaga, i nofoaga e le o i ai se falesa e auai ai i sauniga o le Aso Sa. Ua amata ona sili atu foi ona taugata, ma iu ai ina matou faaaluina mea uma ua matou maua—faatasi ai ma nisi o mea matou te le o maua! Ou te manatu ua outou faalogo i le fasifuaitau lenei: “Tatou te faatauina mea tatou te le manaomia, i tupe tatou te le o maua, e faafiafia ai tagata tatou te le fiafia i ai!” Ae matou te tuuina ata uma i luga o a matou itulau o ala o faasalalauga faaagafesootai, ma matou te faamoemoe mo le tele o ni faailoga fiafia (likes)! 

Sa ta‘ua e Peresitene Nelson lenei luitau ina ua ia saunoa: “O le a le uiga o le manumalo i le lalolagi? O lona uiga o le manumalo lea i le faaosoosoga e popole atu i mea a le lalolagi nai lo mea a le Atua. O lona uiga o le faatuatuaina o le aoaoga faavae a Keriso e sili atu i lo filosofia a tagata. O lona uiga o le fiafia i le upumoni, ta’uleagaina le taufaasese, ma avea ma ‘soo lotomaualalalo o Keriso.’ O lona uiga o le filifili e ‘alo’ese mai soo se mea e alu’ese ai le Agaga. O lona uiga o le loto e ‘lafoai ese’ e oo lava i a tatou agasala sili ona tatou fiafia i ai.”⁵

Manatua nei aoaoga a lo tatou perofeta. Tusi i lalo, ma toe faitau i ai pe a faaosoosoina oe i mea o lenei lalolagi: 

• Ia sili atu ona popole i mea a le Atua nai lo mea o le lalolagi. 

• Ia faatuatuaina aoaoga faavae a Keriso e sili atu i lo filosofia a tagata. 

• Saili ma fiafia oe lava i upumoni e faavavau, e pei ona maua i tusitusiga paia ma i upu a perofeta ma aposetolo soifua. 

• Ia avea o se soo lotomaualalo o Keriso. 

• Aloese mai soo se mea e tuliesea ai le Agaga. E moni le Agaga Paia, ma o se meaalofa matagofie i o outou olaga. E mafai ma e tatau ona e sailia i taimi uma ia uunaiga a le Agaga. 

• Lafoai au agasala e sili ona e fiafia i ai! 

Sa sii mai foi e Peresitene Nelson lenei folafolaga mai ia Ezra Taft Benson (1899–1994): 

“O alii ma tamaitai o e ua liliu atu o latou ola i le Atua o le a latou iloa ai e mafai ona Ia faia le anoanoai o mea aoga i o latou olaga nai lo mea latou te mafaia. O le a Ia

• faalolotoina lo latou olioli,

• faalautele la latou vaaiga mamao,

• faaolaola o latou mafaufau, …

• sii ae o latou agaga,

• faateleina o latou faamanuiaga,

• faateleina o latou avanoa,

• faamafanafana o latou agaga,

• maua ni uo, ma

• liligi mai le filemu.”⁶

O le tala sa‘o, o i ai i le lalolagi se mea e faatusatusa i mea ua ofoina atu e le Alii ia te oe? 

E manaomia ona iloa e le lalolagi mea ua e iloa e uiga i faamanuiaga matagofie ua ofoina mai e Iesu Keriso ia i latou o e mulimuli ia te Ia. 

Ou te faaiu atu i mea na ou tusia i le amataga: E alofa le Alii ia te oe ma o loo faamoemoe mai ia te oe e aumaia Lona malamalama i tagata uma tou te fegalegaleai. E finagalo o Ia ia avea lou olaga ma se sulu taiala i au uo ma aiga. Ua ia faamoemoeina oe e tuuina atu lau molimau i le tulaga moni o lo tatou Tama Faalelagi ma le misiona paia a le Alii i lenei lalolagi.

O lau a’oga e taua tele i lau misiona na tuuina mai e le Atua. Ma o lau misiona e taua ma matuai manaomia lava i le lalolagi i aso nei.