Aisea Na Le Suia ai e le Atua Lo’u Olaga?

Ina ua mavae le lima tausaga o le tuuatoatasi ma le sauaina, sa afaina la’u sootaga ma le Tama Faalelagi ma Iesu Keriso. O o’u faamoemoega mo lo’u olaga sa tata’ieseina ma le taunuu.

Sa ou lagonaina le nutimomoia.

Ina ua manino mai sa lei manao lou toalua e sui, sa amata ona ou ole atu i le Atua e laveai a’u mai lo’u tulaga pe faaali mai ia te a’u le ala sa’o e ui ai. Ae ina ua le oo mai tali sa ou manaomia, sa amata ona ou tuuaia le Tama Faalelagi o le pogai o lo’u tiga.

Sa faaauau pea ona ou auai i le lotu ma tausia a’u feagaiga, ae sa tumu lo’u loto i le ita i le leai o se taitaiga.

Ona oo lea i se tasi aso sa ou iloa sa ou maua le tali i lo’u pagatia—sa tatau ona ou faaaogaina lo’u faitalia e faatino ai ma suia o’u tulaga. Ma sa ou iloa le faaiuga o le a sili ona lelei mo a’u i la’u sini faaiu o le toe foi atu i le Tama Faalelagi.

Na iu lava ina ou filifili e laa i luma: Sa ou talanoa i lo’u toalua, ma faavavega, sa faamutaina le ma mafutaga i le lotogatasi.

O lenei aafiaga faigata na fesoasoani ou te aoao ai e uiga i le mana ma le taua tele o la tatou meaalofa na tuuina mai e le Atua o le faitalia.

Na aoao mai Peresitene Dallin H. Oaks, Fesoasoani Muamua i le Au Peresitene Sili: “O le toe tepa i tua, e mafai ona tatou iloa ai le eseesega tele na faia e nisi o a tatou filifiliga i o tatou olaga. Tatou te faia filifiliga ma faaiuga lelei atu pe afai tatou te vaai atu i isi filifiliga ma mafaufau loloto po o fea o le a tau atu i ai. A tatou faia, o le a tatou mulimuli i le fautuaga a Peresitene Russell M. Nelson ia amata ma le taunuuga i le mafaufau. Mo i tatou, o le taunuuga o loo i ai pea i luga o le ala o feagaiga e ui atu i le malumalu e tau i le ola e faavavau, le meaalofa silisili lea o meaalofa uma a le Atua.” ¹

Sa ou iloaina o le a le faalavelave le Tama Faalelagi i le faitalia a soo se tasi—Na te tuuina mai ia te au e fai la’u lava filifiliga i le faaipoipo atu i lo’u toalua. Na te le faamalosia foi lo’u toalua e sui, e ui lava sa ou pipiimau i a’u feagaiga, aua o se faaipoipoga e faavavau e manaomia ai taumafaiga faaleagaga ma faaletino mai tagata uma e lua a o la mulimuli ia Iesu Keriso.

Pe a feagai ma tauiviga, e mafai ona tatou faaaogaina lo tatou faitalia e suia ai o tatou manatu, o tatou uiga faaalia, ma e oo lava ia i tatou lava. O le meaalofa paia lena o le faitalia. E finagalo le Tama Faalelagi ia tatou saili atu ia te Ia ma le Agaga ona faatuatuaina lea o i tatou lava e faia faaiuga sili mo o tatou olaga.

I le taimi muamua sa ou faamoemoe e faamalolo ma vave ona agai i luma mai la’u faaipoipoga sauaina, ae sa telegese ma faigata le faagasologa. E ala i togafitiga, faalogo i savali a perofeta, faitauina o tusitusiga paia, tatalo, ma lagonaina le alofa ma le lagolago mai uo ma aiga, sa ou lagona le faamoemoe mo se lumanai sili atu. A o ou faaaogaina lo’u faitalia e maua ai le faamalologa, ou te tulimatai atu i se olaga e aofia ai le faamagaloga ma sootaga matagofie ma isi, e aofia ai ma le Faaola.

Faatasi ai ma le malamalama faateleina i le auala e faaaoga ai le faitalia i lo’u olaga, sa liua ai lo’u ita i le Atua i le malamalama, ma sa mafai ona faamaloloina la’u sootaga ma Ia.

O le uiga atoa lea o le talalelei—faia o a tatou lava filifiliga e o mai ia Keriso, faatino fautuaga mai perofeta o e faamalosia’u ia i tatou e faaaoga lo tatou faitalia e faalagolago ai i le Alii, ma fatuina ai se olaga matagofie ma faatumulia i le faatuatua.

E pei ona aoao mai Sister Camille N. Johnson, Le Peresitene Aoao o le Aualofa: “O le mataupu faavae musuia o le faitalia e mafai ona faatagaina ai i tatou e tusia a tatou lava tala. … Ae ua tu saunia Iesu Keriso e faaaoga i tatou o ni meafaigaluega paia … e tusi ai se galuega faatino … afai tatou te maua le faatuatua e tuu atu ai ia te Ia, pe afai o le a [tatou] tuu atu ia te Ia e fai ma tusitala i la [tatou] tala.²

O le faamutaina o la’u faaipoipoga o se tasi lea o aafiaga sili ona tiga ua ou feagai ai. Ae ua ou aoaoina afai e feagai ma tofotofoga e lei faamoemoeina i le olaga, e mafai ona tatou sailia le taitaiga faaleagaga ma faia faaiuga e uunaia ai i tatou i luma i luga o le ala o feagaiga. O le mulimuli i le Tama Faalelagi ma Iesu Keriso, e mafai ai ona tatou maua i taimi uma le faamoemoe i mea lelei o le a oo mai ma i a La faamanuiaga folafolaina o le filemu ma le olioli.