Ua Na’o Tusiga Faaeletonika: Autalavou Matutua
O Lesona e 5 mai ia Nifae mo le Taimi e Lē Ogatusa ai le Olaga ma Fuafuaga
E mafai ona tatou aoao mai i tali a Nifae i luitau ma le lē mautonu.
O le avea ma talavou matua o se taimi fiafia o le olaga, e faatumulia i avanoa mo le tuputupu a‘e ma suiga. Ae o se laasaga foi e tumu i faamoemoega—faamoemoega tatou te tuuina i o tatou lava luga, faamoemoega faaleaganuu po o faaagafesootai, ma e oo lava i faamoemoega i le fuafuaga a le Tama Faalelagi mo Ana fanau. Atonu e i ai ni o tatou manatu patino poo a ni foliga e tatau ona i ai o a tatou galuega po o le olaga faaagafesootai, poo se fua faatatau o taimi e ausia ai ni laasaga taua. Ma atonu tatou te manatu o le a tuuina mai ia i tatou mea uma tatou te mananao i ai pe afai tatou te amiotonu ma tumau faalatalata i le Alii.
Ae o le mea moni, e seāseā tulai mai le olaga i le ala tatou te faamoemoe ina ia i ai.
Afai e le ogatusa le olaga ma le ala na e fuafuaina, e le o tuua na o oe. O Nifae, o se tasi o perofeta maoae o le Tusi a Mamona, sa masani foi o ia i tulaga o le lē fiafia ma luitau e lē mailoa.
Na faaauau lava ona tutupu mea sesē ao malaga atu Nifae ma lona aiga i le nuu folafolaina. Ae e ui lava i faafitauli iloga ma le oo i ai o le sauaina ma le tetee, sa tumau pea Nifae ao i ai i nei tulaga lē lelei, ma faalagolago i le Alii. O mea nei e lima ua aoao mai e le faataitaiga a Nifae ia i tatou e fai pe a lē ogatusa le olaga ma fuafuaga.
Toe Taumafai (1 Nifae 4:1–3)
Ina ua mavae le taumafaiga lē manuia a Lamana e toe aumai papatusi apamemea mai ia Lapana, sa toe taumafai Nifae ma ona uso. O le taimi lea, na auina atu ai e Lapana ana leoleo e mulimuli ia i latou ma sa sosola ese atu ai le auuso i le saogalemu. Ina ua sau se agelu e aoai Lamana ma Lemuelu i le osofaia o Sama ma Nifae ona o le lotovaivai, sa ia poloaiina i laua e toe taumafai e toe aumai papatusi. I lenei taumafaiga lona tolu, sa faamanuiaina Nifae.
O se vaega o le mea na aoao mai e le aafiaga o Nifae ia i tatou e faapea, e ui lava atonu tatou te lē manuia i le ala tatou te faamoemoe i ai, afai tatou te taumafai pea, o le a fesoasoani le Alii ia i tatou ia alualu i luma, aoao, ma tuputupu ae a o tatou faaauau pea ona tuu atu lo tatou faatuatuaga ia te Ia.
Faamagalo atu(1 Nifae 7:20–21)
Ina ua faatasi atu le aiga o Isamaeli i le aiga o Liae i le vao, sa fouvale Lamana ma Lemuelu ma nisi o fanau a Isamaeli ia Nifae. Sa latou saisai ona lima ma vae ma fuafua e tuua o ia ina ia oti. Ae, faatasi ai ma le malosi mai le Alii, na motusia ai e Nifae noataga. Ina ua aioi atu Lamana ma Lemuelu mo se faamagaloga, sa lei faasalaina i laua e Nifae i le ita, faafiaamiotonu, po o faitioga. Sa vave ona ia faamagaloina i latou ma agai i luma i le usiusitai i le Alii.
O nisi taimi o le mea mulimuli tatou te mananao e fai o le faamagalo atu o se tasi na faatiga ia i tatou. Ae a o tatou lafoai ese lagona tigā ma le lē fiafia, e mafai ona tatou taliaina le filemu i o tatou olaga ma faasaoina i tatou lava ma isi mai mafatiaga e le manaomia. Ma e mafai ona tatou faaauau pea ona agai i luma ma le faamoemoe ma le filemu ia Keriso.
Galue (1 Nifae 16:23)
A o tulimanu Nifae ma ona uso, sa gau le aufana na gaosia i le sila a Nifae, ma sa tuua ai i latou e aunoa ma ni meaai. Sa tuuaia Nifae, ma e oo lava ia Liae na amata ona muimui faasaga i le Alii ona o lo latou fia aai ma puapuaga. Ae na tauave e Nifae le faafitauli i ona lava lima ma sa galue. Sa ia faia se aufana ma ufanafana laau, ona fai atu lea ia Liae e fesili i le Alii po o fea e tatau ona latou sailia ai ni meaai.
E pei o Nifae, e mafai ona tatou taulamua pe a tatou feagai ma se faafitauli. E mafai ona tatou galulue e suia la tatou vaaiga i o tatou tulaga ma saunia i tatou lava e saili fautuaga mai le Alii, ma talitonu o le a Ia tuuina mai ia i tatou le taitaiga.
Liliu atu i Tusitusiga Paia (1 Nifae 17:22–42)
Ina ua tauemuina o ia e Lamana ma Lemuelu ona o le a amataona fau se vaa, sa ta‘ua e Nifae ia mau e faaali atu ai ia i laua le taua o le mulimuli i poloaiga a le Alii. Sa ia faamanatu atu i ona uso o Mose, faatasi ai ma le mana mai le Alii, na vaeluaina le Sami Ulaula ma fesoasoani ia Isaraelu e sosola ese mai Aikupito.
Pe a tatou tauivi ia malamalama i le aao o le Alii i o tatou olaga, e mafai ona tatou liliu atu i tusitusiga paia ina ia maua ai se vaaiga fou ma musumusuga a o tatou maua mea e tutusa ai o tatou aafiaga ma i latou o perofeta anamua.
Faalagolago i le Alii (2 Nifae 4:19–35)
I le mataupu lenei, ua lofituina Nifae i le faanoanoa ona o ona vaivaiga, agasala, ma faaosoosoga. Ae o lona faanoanoa e na o fuaiupu e tolu le umi. I le manatuaina ma le manumalo, na manatua ai e Nifae “lē ua [ia] faalagolago i ai” (fuaiupu 19) ma ta‘u mai ai o le a ia “lē tuu atu [lona] faalagolago i le lima o le tagata” (fuaiupu 34).
O upu a Nifae ua faamanatu mai ai ia i tatou e faapea, a tatou lē ola e tusa ai ma faamoemoega o soo se ituaiga, e mafai ona tatou liliu atu i le Alii ma faalagolago i Lona mana togiola.
E tumu le olaga i felavasai ma feliuaiga e lei faamoemoeina, ma o nisi taimi o tulaga le mailoa e mafai ona lagonaina ai le tele naua o le mamafa e taulimaina.
Ae e pei ona aoao lata mai nei e Peresitene Russell M. Nelson: “Po o a lava au fesili po o faafitauli o i ai, e maua lava le tali i le soifuaga ma aoaoga a Iesu Keriso. Aoao atili e uiga i Lana Togiola, Lona alofa, Lona alofa mutimutivale, Lana aoaoga faavae, ma Lana talalelei toefuataiina o le faamalologa ma le alualu i luma. Liliu Atu ia te Ia! Mulimuli ia te Ia!”1
Ma o fea e sili atu ona lelei e liliu atu ai mo Lona alofa ma aoaoga nai lo upu a perofeta i le Tusi a Mamona? O aoaoga mai perofeta anamua e pei o Nifae na tusia mo o tatou aso, ma e mafai ona tatou maua i taimi uma le filemu, mafanafana, ma le faamautinoaga e uiga i le lumanai mai a latou upumoni i soo se taimi e foliga mai ai e le o i ai le olaga i le auala sa tatou faamoemoe i ai.
Ou te valaaulia outou ina ia suesue moni i aoaoga ma upumoni o le Tusi a Mamona i lenei tausaga.