Kaoa Kristo Bwa E Na Korea Am Karaki

I moanna man tabekan tabeua titiraki, ae nanonaki ibukin manga taraan maium:

• Te aeka ni karaki raa ae ko koroia ibukin maium?

• Te kawai are ko kabwarabwara n am karaki te kawai ae eti man irariki?

• Am karaki e toki n te tabo are e moanaki iai, ni mweengam i karawa?

• Iai te banna ni katooto n am karaki—ao tiaki ae bon te Tia Kamaiu Iesu Kristo?

I kakoaua bwa te Tia Kamaiu bon “te tia karika ao te tia karokoa n te toki ara onimaki.”¹ Ko na kaoa bwa e na riki bwa te tia korea ao te tia kabanea am karaki?

E ataa moana ao are e na toki iai. Bon Ngaia te tia karika karawa ma aonaaba. E tangiriira bwa ti na oki nakoIna ao Tamara are i Karawa. Bwaai ni kabane e kariki ibukin nakoraoira ao E tangiria bwa ti na tokanikai.

Tera n am iango te bwai ae tauira man Anganakina ara karaki bwa E na koroi?

E kona te kabotau aei ni buoka aron tarakim.

Te roia ae mwatai e ataia bwa n tain te titiraki, ko riai n titirakina te tia kakoaua te titiraki are ko aki ata rekena. Te titiraki n aron anne bon kaoakin te tia kakoaua bwa e na tuangko—ao te tia moti ao kaain te kabowi ibukin bairean te moti—te bwai ae ko aki ataia mai imwaina. Ko kona ni karekea te kaeka ae na kakubanako nakoim ao e kaitaraa te karaki are ko a tia ni barongaia ibukin te bowi.

E ngae ngke titirakinan te tia kakoaua te titiraki ae ko aki ata rekena e bon aki raoiroi ibukin te roia, kaitaraana e bon koaua ibukira. Ti kona n tabeki titiraki ibukin Tamara are i Karawa ae tangiraki, n aran ara Tia Kamaiu ae nanoanga, ao te tia kakoaua ae kaekai ara titiraki bon te Tamnei ae Raoiroi, ae tataekina te koaua n tainako.² Bukina bwa e mwakuri te Tamnei ae Raoiroi n te katiteuanaki ma Tamara are i Karawa ao Iesu Kristo, ti ataia bwa ana kaotioti te Tamnei ae Raoiroi a bon onimakinaki. Bukin tera, ngkanne, n tabetai ti aki tangiria ni bubuti te aeka n ibuobuoki mai i karawa aei, te koaua e kaotaki nakoira iroun te Tamnei ae Raoiroi? Bukin tera ti kawaeremwea tabekan te titiraki ae tiaki ataa kaekaana ngkana te tia kakoaua ae e aki ti iraorao ma e na taekina te koaua n tainako?

Tao bukina ngkai akea ara onimaki ni kariaia te kaeka ae ti na karekea. Tao bukina ngkai te aro ni mwaane ke n aine inanora e aki kariaia ni biti bwaai ni kabane nakon te Uea ao n Onimakinna ni koaua. Tao anne bukina ngkai ti rineia ni kateimatoa te karinerine nakon arora ni maiu, tein ara karaki ae tuai n rinanoaki iroun te Mataniwi ae te tia Korokaraki. Ti aki tangiria n tabeka te titiraki ao ni karekea te kaeka ae aki kaineti ma te karaki ae ti koroia i bon ibukira.

Ni koauana, tabeman mai ibuakora a na koroi nakon ara karaki kataaki aika a kanakoraoi maiura. Ma tiaki tangira kabanean te karaki ae ti warekia ngke te aekita e tokanikai iaon te kangaanga? Kataaki bon mwakoron te bwai ae riki n te karaki are e karika ara karaki ae ti tangiria bwa e na kakaongora, akea taina, e karikirakea te onimaki, ao n tau ibukin karakinana. Te bwai ae tamaroa ae koreaki n ara karaki bon bwaai aika a kaniira riki nakon te Tia Kamaiu ao ni kanakoraoira, ni karaoira n riki n ai Arona.

Ibukin Tawita bwa e na tokanikai iaon Koria, te ataeinimwaane aei e riai ni kaitara te aintoa aei. E kamwengaraoi riki kabwarabwaraana ngkana Tawita e oki ni kawakiniia ana tiibu. Ma n tokina e uringa arona ni kamaiuiia ana tiibu ake a uarereke mairoun te raian ao te bea. Ao ni katean ana koaua iaon tokanikaina, e boota ana onimaki ma te ungannano ni kariaia bwa te Atua e na korea ana karaki, n taekinna ni kaangai, “Te Uea ae kamaiuai mai nanoni bain te raian, ao mai nanoni bain te bea, E na kamaiuai naba mai nanoni bain te I-Biritia aei.”³ Ma nanona ni kariaia te Atua bwa e na tautaeka, ao taningana nakon te Tamnei ae Raoiroi, ao te kariaia bwa te Tia Kamaiu e na riki bwa te tia kabanea korean ana karaki, e tokanikai Tawita iaon Koria ao e kamaiuiia ana botanaomata.

Te kantaninga iaon te moan tua iaon taekan te rinerine, e kariaira bwa tina korea oin ara karaki—ao Tawita e na kaman okira mweengana, ni kawakiniia ana tiibu. Ma Iesu Kristo e tauraoi ni kabonganaira bwa bwaai ni mwakuri ibukina, kaanga ai aron bentira aika kakang are taua I Baina, ni korea ana karaki! Iai nanona ae nanoanga ni kan kabonganaai, te bentira ae tane meere, inanon Baina, ngkana iai au onimaki bwa N na Anganna, ngkana I kariaia bwa E na riki bwa te tia korea au karaki.

Etita bon te banna ni katooto temanna ae tamaroa are kakarimoaa te Atua. Nakon ae e na tiku iaon ana kabwarabwara ibukin kamanoan taekana, e kamwakura ana onimaki, ao e anga nanona ae bwanin nakon te Uea. Aman e bon tabe n iangoa aron tiringakiia tenaan I-Iutaia ake iaon Bootia. Moretekai, are bon ana koraki Etita, e ataa rongorongon te iango aei ao e koro reta nakoina, ni bubutia bwa e na taetae nakon te uea ibukiia ana botanaomata. E anga ana kauring nakoina bwa are kawara te uea n akea kariaiakana e na bon kona n tiringaki. Ma inanon ana onimaki ae korakora, ao e tuanga Moretekai bwa e na bootia ni kabane tenaan I-Iutaia ao a na karaoa aia aki mamatam ibukina. “Ao ngai ma au nikiranroro ti na aki mamatam n te aro naba aei,” ao e taku, “ao N na rin n te aro anne nakon te uea, n te aro ae tiaki ai aron te tua: ao ngkana tao n na mate, ao N na mate.”⁴

E kariaia Etita bwa e na koreaki rongorongona iroun te Tia Kamaiu e ngae ngke, rinanon te nooraba ae riaon ara konaa, motina e na kona ni kananokawaki. Ma te kakabwaia, te uea e butimwaea Etita, ao a kamaiuaki tenaan I-Iutaia ake iaon Bootia.

E bon koaua, korakoran te nanomatoa are iroun Etita e kuri kangaanga bwa e na ataaki iroura. Ma karimoaan te Atua bwa e na riki Ngaia bwa te tia korea ao te tia motika ara karaki, e kainnanoira bwa ti na kawakin Ana tua ao berita ake ti a tia ni karaoi mangaia. Bon man teimatoan kawakinan tua ma berita ae ngaia ae e na kauka te reitaki ibukira bwa tia aonga ni karekei kaotioti mai iroun te Tamnei ae Raoiroi. Ao rinanon ana mwakuri te Tamnei ao ti na kona n namakina bain te Mwatita ae tabe ni korei ana karaki ma ngaira.

Inanon Eberi 2021, ara burabeti ae, Beretitenti Russell M. Nelson, e titirakiniira bwa tera ae ti na kona ni karaoia ngkana e korakora ara onimaki iroun Iesu Kristo. Ma te onimaki ae nene iroun Iesu Kristo, ao ti kona ni kakaea kaekaan te titiraki ae tiaki ataia—butiia Tamara are i Karawa, n aran Iesu Kristo, bwa e na kaota nakoira kaekaana rinanon te Tamnei ae Raoiroi, are bon te tia kaotioti ibukin te koaua. Ngkana e a mwaiti riki ara onimaki, ti na tabeka te titiraki ao n tauraoi ni butimwaea te kaeka are e reke, e ngae ngke e aki boraoi ma tein ara kabwarabwara are ti tangiria. Ao taian kakabwaia ake a beritanaki a na roko man te onimaki are ti kaatuua iaon Iesu Kristo ao e na karikirakei ara onimaki Irouna bwa te tia korea ao te tia kabanea motin ara karaki. E taekinna Beretitenti Nelson bwa ti “kakorakora riki ara onimaki man karaoan bwaai ake a kainnanoa riki te onimaki.”⁵

Ngaia, taanga aika akea natiia a kona ni bubuti rinanon aia onimaki bwa tera ae riai ibukiia ngkana a na tobwaia ataei ao ni kariaia kaekaan aia bubuti, e ngae ngke kabwarabwarakina ae a tia ni koreia ibukiia bwa e na riki natiia rinanon te mwakuri ni kakai.

A kona naba taanga aika a rangi n ikawai ni bubuti ngkana e a riai ibukiia bwa a nang nako ni karaoa aia mition ao ni kariaia bwa a na nako, e ngae ngke te kabwarabwara are a tia ni koreia ibukiia e irekereke ma kabanean riki aia tai inanon aia mwakuri. Ngke tao te reke e na kangai “e tuai moa,” ao imwiina inanon mwakoron aia karaki ao a na ataia bwa tera bukina ngke a kainnanoaki bwa a na tiku ni mwengaia teutana riki te tai.

E konaa te ataeinimwane ke te ataeinnaine ni kakae nako rinanon aia onimaki bwa tera ae kakawaki riki karekeana ibukiia n aron te takakaro ke te reirei ae tamaroa ke te anene ao n tauraoi n iri ana kairiiri te tia kakoaua ae kororaoi, te Tamnei ae Raoiroi.

Bukin tera ti tangira te Tia Kamaiu bwa e na riki bwa te tia korea ao te tia motika ara karaki? Bukina bwa E atai raoi ara konabwai, E na uotira nakon taabo aika ti tuai man iangoi i bon iroura. E kona ni karikiira bwa ai Tawita ke Etita. E na karikirakeira ao ni kaitiakiira bwa ti aonga n riki n ai Arona. Bwaai ake ti karekei man ara onimaki korakora e na bon karikirakea ara onimaki iroun Iesu Kristo.

Tariu ao mwaneu, bon te ririki ae nako ao temanna ara burabeti ae tangiraki e titiraki: “Iai nanom ni moanibwaia te Atua inanon maium? … Ko tauraoi ni kariaia baike E kainnanoi bwa ko na karaoi bwa a kakawaki riki nakon iango riki tabeua?”⁶ I raonna ma te nanorinano te kantaninga ibukira mai irouia burabeti: “Ko konaa ni kariaia te Atua bwa e na riki bwa te tia korea ao te tia motika karakinam?”

Ti reiakinna inanon te Kaotioti bwa ti na tei imatan te Atua ao ni motikaki taekara man te boki ni kamaiu, ni kaineti ma ara mwakuri.⁷

A na motikaki taekara man ara boki ni kamaiu. Ti kona n rineia bwa ti na korea te rongorongo ibukira ae kakukurei. Ke ti kona ni kariaia te Mwatita bwa e na korea ao ni motika ara karaki, ni kariaia bwa te tibwanga are E tangiriira bwa ti na karaoia e na kona n riaon bwaai ake ti kantaningai i bon iroura.

Karika Kristo bwa tei tia karika ao te tia motika am karaki!

Karika te Tamnei ae Raoiroi bwa am tia kakoaua!

Korea te karaki are e na kaota te kawai ae ko mena ngkai iaona e ineti, nakon mweengam i karawa ni maeka ma te Atua.

Kairiaia bwa te korakai ma te mamaara are bon kanoan te karaki ae tamaroa bwa e na riki bwa kaaniam riki, ao arom n riki n ai aron riki, Iesu Kristo.

Karakina te karaki are ko ataia iai bwa a kaukaki karawa. Titirakiniia titiraki aika ko aki atai kaekaaia, ao n ataia ae iai nanon te Atua ni kaoti Ana kantaninga ibukim rinanon te Tamnei ae Raoiroi.

Kariaia bwa e na ti teuana am onimaki ni maium, n ira am Banna ni Katooto, te Tia Kamaiu Iesu Kristo. N aran Iesu Kristo, amen.