« ឯកសារគ្រូបង្រៀន មេរៀនទី ១២ ៖ ការស្ថាបនាបុព្វហេតុនៃក្រុងស៊ីយ៉ូន » ឯកសារគ្រូបង្រៀនមូលដ្ឋានគ្រឹះនៃការស្តារឡើងវិញ ( ឆ្នាំ ២០១៩ )
« ឯកសារគ្រូបង្រៀន មេរៀនទី ១២ » ឯកសារគ្រូបង្រៀនមូលដ្ឋានគ្រឹះនៃការស្តារឡើងវិញ
ឯកសារគ្រូបង្រៀន មេរៀនទី ១២
ការស្ថាបនាបុព្វហេតុនៃក្រុងស៊ីយ៉ូន
ក្រោយពីបានទទួលបង្គាប់ពីព្រះអម្ចាស់ឲ្យស្ថាបនាបុព្វហេតុនៃក្រុងស៊ីយ៉ូនហើយ ពួកបរិសុទ្ធសម័យដើមបានចាប់ផ្ដើមកសាងកន្លែងប្រជុំគ្នាមួយនៅភូមិចាកសុន រដ្ឋមិសសួរី ។ មេរៀននេះត្រូវបានរៀបចំឡើងដើម្បីជួយសិស្សឲ្យស្គាល់របៀបនានា ដែលពួកគេអាចជួយកសាងក្រុងស៊ីយ៉ូននៅជំនាន់របស់យើង ។
យោបល់សម្រាប់ការបង្រៀន
ព្រះអម្ចាស់ត្រាស់បង្គាប់រាស្ដ្ររបស់ទ្រង់ឲ្យស្ថាបនាបុព្វហេតុនៃក្រុងស៊ីយ៉ូន ។
សូមឲ្យសិស្សគិតអំពីចំនួនដងដែលពួកគេបានអធិស្ឋានទៅកាន់ព្រះវរបិតាសួគ៌ ទូលសូមជំនួយឲ្យដឹងពីអ្វីដែលទ្រង់ចង់ឲ្យពួកគេធ្វើក្នុងជីវិតរបស់ពួកគេ ។
សូមពន្យល់ថា នៅរដូវផ្ការីកឆ្នាំ ១៨២៩ គឺពីមុនសាសនាចក្រត្រូវបានបង្កើតឡើង យ៉ូសែប ស៊្មីធបានទទួលវិវរណៈជំនួសឲ្យ អូលីវើរ ខៅឌើរី, ហៃរុម ស្ម៊ីធ និង យ៉ូសែប ណៃត ។ បុរសទាំងនេះម្នាក់ៗបានប្រាថ្នាចង់ដឹងពីអ្វីដែលព្រះអម្ចាស់ចង់ឲ្យពួកគេធ្វើ ។ សូមសរសេរគម្ពីរយោងដូចតទៅនេះនៅលើក្ដារខៀន ៖ គោលលទ្ធិ និង សេចក្ដីសញ្ញា ៦:៦; ១១:៦; ១២:៦ ។
សូមឲ្យសិស្សអានខគម្ពីរនេះដោយស្ងាត់ស្ងៀម ហើយរកមើលសេចក្ដីដែលព្រះអម្ចាស់បានមានបន្ទូលទៅបុរសទាំងនេះម្នាក់ៗ ។
-
តើអ្នកគិតថាឃ្លា « ដើម្បីនាំមក ហើយតាំងឡើងនូវគតិនៃក្រុងស៊ីយ៉ូន » មានន័យដូចម្ដេច ? ( គោលលទ្ធិ និង សេចក្ដីសញ្ញា ៦:៦ ) ។
សូមឲ្យសិស្សម្នាក់អានឮៗនូវសេចក្ដីថ្លែងការណ៍ដោយយ៉ូសែប ស៊្មីធ នៅក្នុងផ្នែកទី ១ នៃឯកសាររៀបចំ ។ ឬ អ្នកអាចបង្ហាញវីដេអូ « Teachings of Joseph Smith: Preparing for Zion » )( ១:៤២ ) ។ សូមឲ្យសិស្សក្នុងថ្នាក់រកមើលអ្វីដែល យ៉ូសែប ស៊្មីធបានបង្រៀនអំពីក្រុងស៊ីយ៉ូន ។
-
ហេតុអ្វីអ្នកគិតថា ក្រុងស៊ីយ៉ូនគឺជាបុព្វហេតុដែលបានទាក់ទាញចិត្តរបស់រាស្ដ្រនៃព្រះទាំងអស់ ? ( សូមឲ្យសិស្សនឹកដល់អ្វីដែលពួកគេបានរៀនមកពីក្នុងឯកសាររៀបចំ ) ។
សូមសរសេរឃ្លាពុំពេញលេញដូចតទៅនេះ នៅលើក្ដារខៀន ៖ យើងអាចកសាងក្រុងស៊ីយ៉ូនបានតាមរយៈ …
សូមពន្យល់ថា នៅខែវិច្ឆិកា និងខែធ្នូ ក្នុងឆ្នាំ ១៨៣០ កាលយ៉ូសែប ស៊្មីធបានធ្វើការបកប្រែដ៏បំផុសគំនិតរបស់លោកលើព្រះគម្ពីរប៊ីប លោកបានទទួលវិវរណៈជាច្រើនអំពីព្យាការីពីបុរាណម្នាក់ឈ្មោះ អេណុក និងប្រជាជនរបស់លោក ។ សូមអញ្ជើញសិស្សម្នាក់ឲ្យអាន ម៉ូសេ ៧:១៨–១៩, ២១ ហើយឲ្យសិស្សម្នាក់ទៀតអាន គោលលទ្ធិ និង សេចក្ដីសញ្ញា ៩៧:២១ ។ សូមឲ្យសិស្សក្នុងថ្នាក់ស្ដាប់រកការពិពណ៌នារបស់ព្រះអម្ចាស់អំពីក្រុងស៊ីយ៉ូន ។
-
តើយើងអាចរៀនអ្វីខ្លះចេញពីការពិពណ៌នារបស់ព្រះអម្ចាស់អំពីក្រុងស៊ីយ៉ូន ដែលជួយយើងឲ្យដឹងពីរបៀបកសាងក្រុងស៊ីយ៉ូននៅជំនាន់របស់យើង ? ( សូមសរសេរចម្លើយរបស់សិស្សនៅលើក្ដារខៀននៅក្រោមឃ្លាពុំពេញលេញនោះ ។ ចម្លើយរបស់សិស្សនឹងខុសពីគ្នា ប៉ុន្ដែអាចរួមមានឧទាហរណ៍ដូចតទៅនេះ ៖ យើងអាចកសាងក្រុងស៊ីយ៉ូនបានតាមរយៈការមានចិត្តតែមួយ និងគំនិតតែមួយ តាមរយៈការរស់នៅដោយសុចរិត តាមរយៈការថែទាំដល់មនុស្សក្រីក្រ និងទ័លច្រក ហើយតាមរយៈការខិតខំមានចិត្តបរិសុទ្ធ ) ។
-
តើវាអាចធ្វើឲ្យមានភាពខុសប្លែកយ៉ាងណាទៅ នៅក្នុងគ្រួសារ វួដ ឬសាខាមួយ នៅពេលគ្រប់គ្នាមាន « ចិត្តតែមួយ និងគំនិតតែមួយ » នោះ ?
សូមឲ្យសិស្សម្នាក់រំឭកសេចក្ដីថ្លែងការណ៍ដោយអែលឌើរ ឌី ថត គ្រីស្តូហ្វឺសិន ក្នុងកូរ៉ុមនៃពួកសាវកដប់ពីរនាក់នៅក្នុងផ្នែកទី ១ នៃឯកសាររៀបចំ ។ សូមឲ្យសិស្សរកមើលរបៀបដែលយើងអាចមានចិត្តតែមួយ និងគំនិតតែមួយ ។ ក្រោយពីពួកគេរាយការណ៍ហើយ អ្នកអាចបន្ថែម ការដាក់ព្រះអង្គសង្គ្រោះជាស្នូលនៃជីវិតយើង និងការធ្វើតាមថ្នាក់ដឹកនាំក្នុងសាសនាចក្រ ទៅក្នុងបញ្ជីនៅលើក្ដារខៀនបាន ។
-
តើអ្នកគិតថា ការដាក់ព្រះអង្គសង្គ្រោះជាស្នូលនៃជីវិតយើង និងការធ្វើតាមថ្នាក់ដឹកនាំក្នុងសាសនាចក្រអាចជួយយើងឲ្យក្លាយដូចជារាស្ដ្រនៃក្រុងស៊ីយ៉ូនដោយរបៀបណា ?
ពួកបរិសុទ្ធបានប៉ុនប៉ងកសាងក្រុងស៊ីយ៉ូននៅស្រុកចាកសុន រដ្ឋមិសសួរី ។
សូមពន្យល់ថា ពួកបរិសុទ្ធបានរៀនមកពីម៉ូសេ ៧ ថា ពីមុនការយាងមកជាលើកទីពីររបស់ព្រះអង្គសង្គ្រោះ នោះរាស្ដ្ររបស់ព្រះអម្ចាស់នឹងត្រូវបានប្រមូលផ្ដុំគ្នាម្ដងទៀត ហើយនឹងបង្កើតជាក្រុងស៊ីយ៉ូនមួយទៀត ( សូមមើល ម៉ូសេ ៧:៦២ ) ។ ពីរបីខែក្រោយពីទទួលបានវិវរណៈដូចបានកត់ត្រានៅក្នុង ម៉ូសេ ៧ ព្យាការី យ៉ូសែប ស៊្មីធបានទទួលវិវរណៈមួយទៀតនៅអំឡុងសន្និសីទសាសនាចក្រមួយ ដែលបានបើកសម្ដែងថែមទៀតទាក់ទងទៅនឹងក្រុងស៊ីយ៉ូននាពេលអនាគតនេះ ( សូមមើល គោលលទ្ធិ និង សេចក្ដីសញ្ញា ៤៥ ) ។
សូមអញ្ជើញសិស្សក្នុងថ្នាក់ឲ្យអាន គោលលទ្ធិ និង សេចក្តីសញ្ញា ៤៥:៦៦–៧១ រួមគ្នា ហើយរកមើលការពិពណ៌នាអំពីក្រុងស៊ីយ៉ូន ។
-
តើអ្នកស្រមៃឃើញថា វិវរណៈនេះបានមានឥទ្ធិពលយ៉ាងណាទៅលើពួកបរិសុទ្ធសម័យដើម ?
សូមរំឭកសិស្សថា ក្រោយមកយ៉ូសែប ស៊្មីធបានដឹងតាមរយៈវិវរណៈថា « កន្លែងកណ្ដាល » សម្រាប់ក្រុងស៊ីយ៉ូនគឺត្រូវនៅ អ៊ិនឌីប៉ែនដែនស៍ ស្រុកចាកសុន រដ្ឋមិសសួរី ( គោលលទ្ធិ និង សេចក្តីសញ្ញា ៥៧:៣ ) ។
-
តើមានឧបសគ្គអ្វីខ្លះ ដែលបានរារាំងពួកបរិសុទ្ធពីការកសាងក្រុងស៊ីយ៉ូននៅស្រុកចាកសុន ? ( សូមលើកទឹកចិត្តសិស្សឲ្យរំឭកអ្វីដែលពួកគេបានរៀនមកពីផ្នែកទី ២នៃឯកសាររៀបចំ ) ។
-
តើពួកបរិសុទ្ធអាចបានសួរសំណួរអ្វីខ្លះ ក្រោយពីពួកគេត្រូវបានបណ្ដេញចេញពីស្រុកចាកសុន ?
ក្រុងស៊ីយ៉ូនអាចត្រូវបានស្ថាបនាឡើងតែនៅលើគោលការណ៍នៃសេចក្ដីសុចរិតប៉ុណ្ណោះ ។
សូមពន្យល់ថា ប៉ុន្មានខែបន្ទាប់ពីការបណ្ដេញពួកបរិសុទ្ធយ៉ាងហិង្សាចេញពីស្រុកចាកសុនដោយពួកឧក្រិដ្ឋជនរដ្ឋមិសសួរី នោះយ៉ូសែប ស៊្មីធបានពិបាកនឹងឆ្លើយសំណួរថា « ហេតុអ្វីព្រះបានរងទុក្ខលំបាកដ៏ធំខ្លាំងម្ល៉េះដើម្បីមកកាន់ក្រុងស៊ីយ៉ូន » និងថា « តាមរយៈមធ្យោបាយអ្វីដែលទ្រង់នឹងបញ្ជូន [ ក្រុងស៊ីយ៉ូន ] ត្រឡប់មកកាន់មរតក [ របស់វា ] វិញ » ( « Letter to Edward Partridge and Others, 10 December 1833 » នៅលើគេហទំព័រ josephsmithpapers.org ) ។ នៅទីបំផុត ព្រះអម្ចាស់បានប្រទានការយល់ដឹងដល់យ៉ូសែបអំពីមូលហេតុ ដែលពួកបរិសុទ្ធត្រូវបានគេបៀតបៀន និងបណ្ដេញចេញ ។
សូមអញ្ជើញសិស្សពាក់កណ្ដាលថ្នាក់ឲ្យរំឭក គោលលទ្ធិ និង សេចក្ដីសញ្ញា ១០១:២–៣, ៦–៨ ហើយសិស្សពាក់កណ្ដាលថ្នាក់ទៀតរំឭក គោលលទ្ធិ និង សេចក្ដីសញ្ញា ១០៥:៣–៦ ដែលជាវគ្គគម្ពីរដែលពួកគេបានសិក្សានៅក្នុងផ្នែកទី ៣ នៃឯកសាររៀបចំ ។ សូមឲ្យសិស្សចែកចាយគំនិតរបស់ពួកគេអំពីសំណួរខាងក្រោមនេះ ដែលពួកគេត្រូវបានអញ្ជើញឲ្យពិចារណា ៖
-
តើមានអ្វីដែលបានរារាំងពួកបរិសុទ្ធពីការស្ថាបនាបុព្វហេតុនៃក្រុងស៊ីយ៉ូននៅស្រុកចាកសុន រដ្ឋមិសសួរី ?
-
តើព្រះអម្ចាស់តម្រូវឲ្យអស់អ្នកដែលនៅថ្ងៃចុងក្រោយ ដែលមានបំណងប្រាថ្នាចង់កសាងស៊ីយ៉ូនឲ្យមានសកម្មភាព និងឥរិយាបថអ្វី ? ( សូមបន្ថែមចម្លើយរបស់សិស្សទៅក្នុងបញ្ជីនៅលើក្ដារខៀន ៖ យើងអាចកសាងក្រុងស៊ីយ៉ូនបានតាមរយៈ … )
សូមពន្យល់ថា ខណៈអ៊ិនឌីប៉ែនដែនស៍ រដ្ឋមិសសួរីគឺជា « កន្លែងកណ្ដាល » នៃក្រុងស៊ីយ៉ូន ( គោលលទ្ធិ និង សេចក្ដីសញ្ញា ៥៧:៣ ) ក៏ព្យាការី យ៉ូសែប ស៊្មីធបានបង្រៀនដែរថា « កន្លែងណាក៏ដោយដែលពួកបរិសុទ្ធប្រជុំគ្នាគឺជាក្រុងស៊ីយ៉ូន » ( ការបង្រៀនរបស់ប្រធាននៃសាសនាចក្រ ៖ យ៉ូសែប ស៊្មីធ [ ឆ្នាំ ២០០៧ ] ទំព័រ ១៨៦ ) ។ សព្វថ្ងៃនេះ ការណ៍រួមបញ្ចូលស្ដេកទាំងអស់ក្នុងសាសនាចក្រទូទាំងពិភពលោក ។
សូមបង្ហាញសម្ដីសម្រង់ដូចតទៅនេះដោយ យ៉ូសែប ស៊្មីធ ៖
« យើងគួរតែមានការបង្កើតក្រុងស៊ីយ៉ូនជាគោលដៅដ៏ធំបំផុតរបស់យើង » ( ការបង្រៀន ៖ យ៉ូសែប ស៊្មីធ ទំព័រ ១៨៦ ) ។
-
ដោយផ្អែកលើអ្វីដែលអ្នកបានរៀនអំពីក្រុងស៊ីយ៉ូន តើអ្នកគិតថា ការកសាងក្រុងស៊ីយ៉ូនគួរតែគោលដៅដ៏ធំបំផុតរបស់យើងមួយ ?
សូមទុកពេលឲ្យសិស្សរំឭកអ្វីដែលពួកគេបានរៀនមកពីបទពិសោធន៍របស់ពួកបរិសុទ្ធសម័យដើម និងវិវរណៈអំពីការកសាងក្រុងស៊ីយ៉ូន ។ សូមអញ្ជើញពួកគេឲ្យសញ្ជឹងគិតអំពីអ្វីដែលពួកគេអាចធ្វើបាននាពេលនេះ ដើម្បីជួយស្ថាបនាក្រុងស៊ីយ៉ូននៅក្នុងគេហដ្ឋាន វួដ និងសាខារបស់ពួកគេ ។ អ្នកអាចលើកទឹកចិត្តឲ្យពួកគេកត់ត្រាគំនិត និងការបំផុសគំនិតនានាដែលពួកគេទទួលបាន ។ អ្នកក៏អាចសូមឲ្យសិស្សបីបួននាក់ចែកចាយអ្វីដែលពួកគេនឹងធ្វើផងដែរ ។ សូមរំឭកសិស្សថា ពួកគេមិនចាំបាច់ចែកចាយអ្វីដែលផ្ទាល់ខ្លួនពេកនោះទេ ។
សម្រាប់ពេលក្រោយ
សូមពន្យល់ថា ដើម្បីជួយពួកបរិសុទ្ធរបស់ទ្រង់ឲ្យស្ថាបនាក្រុងស៊ីយ៉ូន ព្រះអម្ចាស់បានបើកសម្ដែងក្រិត្យវិន័យនៃការថ្វាយ សីលធម៌ សុខភាព និងថ្ងៃឈប់សម្រាកក្នុងចំណោមច្បាប់ផ្សេងៗទៀត ។ សូមគូសបញ្ជាក់ថា សិស្សនឹងមានឱកាសសិក្សាពីប្រធានបទទាំងនេះមួយ ឬច្រើន កាលពួកគេរៀបចំខ្លួនសម្រាប់មេរៀនក្រោយ ។ សូមលើកទឹកចិត្តពួកគេឲ្យមកកាន់ថ្នាក់រៀនលើកក្រោយ ដោយបានរៀបចំខ្លួនដើម្បីចែកចាយអ្វីមួយពិសេស ដែលពួកគេបានរកឃើញអំពីច្បាប់ទាំងនេះមួយ ឬច្រើន ។