« ឯកសារគ្រូបង្រៀនមេរៀនទី ២០៖ ពិធីការបរិសុទ្ធទាំងឡាយ និងការថ្វាយបង្គំក្នុងព្រះវិហារបរិសុទ្ធ » ឯកសារគ្រូបង្រៀនមូលដ្ឋានគ្រឹះនៃការស្តារឡើងវិញ ( ឆ្នាំ ២០១៩ )
« ឯកសារគ្រូបង្រៀន មេរៀនទី ២០ » ឯកសារគ្រូបង្រៀនមូលដ្ឋានគ្រឹះនៃការស្តារឡើងវិញ
ឯកសារគ្រូបង្រៀនមេរៀនទី ២០
ពិធីបរិសុទ្ធ និងការថ្វាយបង្គំក្នុងព្រះវិហារបរិសុទ្ធ
ពេលព្រះវិហារបរិសុទ្ធណៅវូកំពុងសាងសង់ ព្យាការីយ៉ូសែប ស្ម៊ីធបានបង្រៀនថា « សាសនាចក្រនេះពុំទាន់បានរៀបចំឡើងឲ្យពេញលេញនៅឡើយទេ … រហូតដល់ព្រះវិហារបរិសុទ្ធនេះបានសង់ចប់សព្វគ្រប់ » ( Teachings of Presidents of the Church:Joseph Smith [ ឆ្នាំ ២០០៧ ] ទំព័រ៤១៦ ) ។ គោលបំណងនៃមេរៀននេះគឺដើម្បីឲ្យសិស្សយល់ដឹងកាន់តែស៊ីជម្រៅអំពីសារៈសំខាន់នៃពិធីការបរិសុទ្ធទាំងឡាយនៅក្នុងព្រះវិហារបរិសុទ្ធ ហើយអញ្ជើញពួកគេឲ្យកែលម្អនូវភាពញឹកញាប់ ( តាមស្ថានភាពអនុញ្ញាតឲ្យ ) និងគុណភាពនៃការថ្វាយបង្គំរបស់ពួកគេនៅក្នុងព្រះវិហារបរិសុទ្ធ ។
យោបល់សម្រាប់ការបង្រៀន
ព្រះអម្ចាស់បានស្តារពិធីការបរិសុទ្ធទាំងឡាយនៃព្រះវិហារបរិសុទ្ធតាមរយៈ យ៉ូសែប ស្ម៉ីធ ។
សូមបង្ហាញរូបភាពព្រះវិហារបរិសុទ្ធមួយដែលសិស្សស្គាល់ ។ សូមអញ្ជើញសិស្សពីរបីនាក់ដែលបានរីករាយនឹងការថ្វាយបង្គំនៅក្នុងព្រះវិហារបរិសុទ្ធដើម្បីចែកចាយពីអារម្មណ៍របស់ពួកគេ នៅពេលដែលពួកគេចូលទៅក្នុងដំណាក់របស់ព្រះអម្ចាស់ ។ បងប្អូនក៏អាចសួរពីអារម្មណ៍របស់ពួកគេនៅពេលពួកគេចាកចេញពីព្រះវិហារបរិសុទ្ធនោះ ផងដែរ ។
អភិវឌ្ឍការបង្រៀន និងការរៀនសូត្ររបស់យើង
សូមសួរសំណួរដែលលើកទឹកចិត្តឲ្យមានការអនុវត្ត ។ សូមអញ្ជើញសិស្សឲ្យឆ្លើយសំណួរដែលលើកទឹកចិត្តឲ្យមានការអនុវត្ត ។ សំណួរបែបនេះអាចដើរតួយ៉ាងសំខាន់នៅក្នុងការជួយសិស្សឲ្យមើលឃើញទាំងពីរបៀបដែលសេចក្ដីពិតកំពុងពិភាក្សាអនុវត្តនៅក្នុងស្ថានភាពបច្ចុប្បន្នរបស់ពួកគេ ហើយក៏ពិចារណាពីរបៀបដែលពួកគេអាចអនុវត្តនៅពេលអនាគតផងដែរ ( សូមមើល Gospel Teaching and Learning [ ឆ្នាំ ២០១២ ] ៥.១.៤ ) ។
សូមពន្យល់ថា បន្ទាប់ពីពួកបរិសុទ្ធបានតាំងទីលំនៅក្នុងក្រុងណៅរូ រដ្ឋអិលលីណោយហើយ នោះព្យាការី យ៉ូសែប ស៊្មីធ បានទទួលបទបញ្ញត្តិមួយឲ្យសង់ព្រះវិហារបរិសុទ្ធ ។ ដូចជាមួយនឹងព្រះវិហារបរិសុទ្ធខឺតឡង់ដែរ កិច្ចការនេះតម្រូវឲ្យមានការលះបង់ធំចេញមកអំពីពួកបរិសុទ្ធ ។ ពេលព្រះវិហារបរិសុទ្ធណៅវូកំពុងសាងសង់ព្យាការីយ៉ូសែប ស្ម៊ីធ បានបង្រៀនថា « សាសនាចក្រនេះពុំទាន់បានរៀបចំឡើងឲ្យពេញលេញនៅឡើយទេ … រហូតដល់ព្រះវិហារបរិសុទ្ធនេះបានសង់ចប់សព្វគ្រប់ » ( Teachings of Joseph Smith ទំព័រ៤១៦ ) ។
-
ហេតុអ្វីបងប្អូនគិតថា ការស្ដារឡើងវិញនៃសាសនាចក្ររបស់ព្រះអង្គសង្គ្រោះពុំមានភាពពេញលេញ បើគ្មានព្រះវិហារបរិសុទ្ធមួយនោះ ? ( បងប្អូនអាចបំផុសគំនិតសិស្សឲ្យចែកចាយពីរឿងមួយចំនួនដែលពួកគេបានរៀនមកពីការសិក្សាឯកសាររៀបចំ ) ។
សូមពន្យល់ថា នៅក្នុងវិវរណៈមួយដែលបង្គាប់ឲ្យពួកបរិសុទ្ធសង់ព្រះវិហារបរិសុទ្ធណៅវូ នោះព្រះអម្ចាស់បានបើកសម្ដែងពីហេតុផលដែលព្រះវិហារបរិសុទ្ធនឹងមានសារៈសំខាន់ខ្លាំងចំពោះពួកបរិសុទ្ធ ។ ទ្រង់បានពន្យល់ថា ពិធីលាងជម្រះ ពិធីចាក់ប្រេងតាំង ពិធីបុណ្យជ្រមុជទឹកឲ្យអ្នកស្លាប់ និងពិធីការបរិសុទ្ធផ្សេងទៀតមានតែនៅក្នងដំណាក់ដ៏បរិសុទ្ធរបស់ទ្រង់ ។ សូមអញ្ជើញសិស្សឲ្យចំណាយពេលពីរបីនាទីសិក្សា គោលលទ្ធិ និង សេចក្ដីសញ្ញា ១២៤:៣១, ៣៤, ៤០–៤១, ៥៥ ហើយរកមើលរបៀបដែលព្រះអម្ចាស់បានសន្យាប្រទានពរដល់រាស្ត្ររបស់ទ្រង់នៅក្នុងព្រះវិហារបរិសុទ្ធ ។
សូមឲ្យសិស្សរាយការណ៍ពីអ្វីដែលពួកគេបានរកឃើញ ។ ដោយប្រើពាក្យសម្ដីរបស់សិស្ស សូមបង្ហាញ ឬសរសេរសេចក្ដីពិតមួយនៅលើក្ដារខៀនដែលស្រដៀងនឹងអ្វីដូចតទៅនេះ ៖ នៅក្នុងព្រះវិហារបរិសុទ្ធ ព្រះអម្ចាស់ប្រទានពរយើងជាមួយនឹងពិធីការបរិសុទ្ធដ៏ចាំបាច់ទាំងឡាយ ដើម្បីយើងអាចទទួលបានកិត្តិយស អមតភាព និងមានជីវិតអស់កល្បជានិច្ច ។
-
តើបងប្អូនគិតថា ពិធីការបរិសុទ្ធទាំងឡាយនៅក្នុងព្រះវិហារបរិសុទ្ធរៀបចំយើងសម្រាប់កិត្តិយស អមតភាព និងជីវិតដ៏អស់កល្បជានិច្ចតាមរបៀបណា ?
សូមបង្ហាញរូបភាពមួយពីហាងឥដ្ឋពណ៌ក្រហមរបស់យ៉ូសែបនៅក្រុងណៅវូ ហើយសុំឲ្យសិស្សពន្យល់ពីអ្វីដែលពួកគេដឹងអំពីការស្ដារឡើងវិញនៃពិធីអំណោយទានពិសិដ្ឋនៅក្នុងព្រះវិហារបរិសុទ្ធ ។ សូមអញ្ជើញពួកគេឲ្យពិនិត្យមើលផ្នែកទី ២ នៃឯកសាររៀបចំ បើចាំបាច់ ។
-
តើបងប្អូនបានរៀនអ្វីខ្លះអំពីពរជ័យនៃអំណោយទានពិសិដ្ឋមកពីផ្នែកទី ៣ នៃឯកសាររៀបចំ ?
ពេលបងប្អូនពិភាក្សាអំពីអំណោយទានពិសិដ្ឋ សូមពិចារណាសួរសំណួរតាមដានមួយចំនួនដូចខាងក្រោមនេះ ។ សូមចង្អុលបង្ហាញថា អែលឌើរ បែដណា បានបង្រៀនថា ពេលយើងនិយាយពីព្រះវិហារបរិសុទ្ធ យើងពុំគួរ « បញ្ចេញ ឬពិពណ៌នាអំពីនិមិត្តសញ្ញាពិសេសទាំងឡាយដែលទាក់ទងនឹងសេចក្ដី សញ្ញាដែលយើងទទួលបាននៅក្នុងពិធីនៃព្រះវិហារបរិសុទ្ធដ៏ពិសិដ្ឋឡើយ » ប៉ុន្តែយើង« អាចពិភាក្សាពីគោលបំណងមូលដ្ឋាន និងគោលលទ្ធិដែលទាក់ទងទៅនឹងពិធីការបរិសុទ្ធទាំងឡាយ និងសេចក្ដីសញ្ញាក្នុងព្រះវិហារបរិសុទ្ធបាន » ( « ការរៀបចំដើម្បីបានអ្វីៗដែលត្រូវការគ្រប់មុខ » Ensign ឬ Liahona ឧសភា ឆ្នាំ ២០១៩ ទំព័រ ១០៣ ) ។
-
តើអ្វីខ្លះត្រូវបានដាក់បញ្ចូលនៅក្នុងពិធីអំណោយទានពិសិដ្ឋ ? ( សូមមើលផ្នែកទី ៣នៃឯកសាររៀបចំ ) ។
-
តើមានទំនាក់ទំនងអ្វីខ្លះរវាងពិធីការបរិសុទ្ធ និងសេចក្តីសញ្ញា ?
-
ពេលបងប្អូនសិក្សាឯកសាររៀបចំ តើបងប្អូនបានរៀនអ្វីខ្លះពីសេចក្ដីសញ្ញាដែលយើងបានចុះនៅអំឡុងពិធីអំណោយទានពិសិដ្ឋ ?
-
ហេតុអ្វីបងប្អូនគិតថា ព្រះអម្ចាស់ចង់ឲ្យរាស្ត្ររបស់ទ្រង់បានទទួលអំណោយទានពិសិដ្ឋនៅក្នុងព្រះវិហារបរិសុទ្ធ ?
សូមពិចារណាទុកពេលឲ្យសិស្សមួយ ឬពីរនាទីដើម្បីចែកចាយនឹងសិស្សផ្សេងទៀត ដែលអង្គុយនៅក្បែរគេ អំពីគំនិតរបស់ពួកគេនូវសំណួរដូចតទៅនេះដែលមាននៅចុងបញ្ចប់នៃឯកសាររៀបចំ ៖
-
តើបងប្អូននឹងផ្ដល់យោបល់ដល់មនុស្សម្នាក់ឲ្យធ្វើអ្វីខ្លះដើម្បីរៀបចំខ្លួនទទួលអំណោយទានពិសិដ្ឋរបស់គាត់ ? ហេតុអ្វីព្រះវិហារបរិសុទ្ធ និងពិធីការបរិសុទ្ធទាំងឡាយនៅក្នុងនោះមានសារៈសំខាន់ចំពោះបងប្អូនផ្ទាល់ខ្លួន ?
ការថ្វាយបង្គំនៅក្នុងព្រះវិហារបរិសុទ្ធអញ្ជើញព្រះចេស្ដា និងពរជ័យរបស់ព្រះអម្ចាស់ចូលមកក្នងជីវិតរបស់យើង។
សូមរំឭកសិស្សថា ព្រះវិហារបរិសុទ្ធខឺតឡង់គឺជាព្រះវិហារបរិសុទ្ធដំបូងគេនៅក្នុងគ្រាកាន់កាប់ត្រួតត្រារបស់យើង ។ គោលបំណងរបស់វាគឺខុសប្លែកពីព្រះវិហារបរិសុទ្ធដែលកើតមានតាមក្រោយ—វាផ្ដល់ទីកន្លែងមួយសម្រាប់ព្រះអម្ចាស់ដើម្បីស្ដារចំណេះដឹង និងកូនសោបព្វជិតភាពឡើងវិញសម្រាប់ការថ្វាយបង្គំនាពេលអនាគតនៅក្នុងព្រះវិហារបរិសុទ្ធ ។ នៅក្នុងការអធិស្ឋានសម្រាប់ការឧទ្ទិសឆ្លងនៃព្រះវិហារបរិសុទ្ធនោះ យ៉ូសែប ស៊្មីធបានទូលសូមព្រះអម្ចាស់ឲ្យប្រទានពរជ័យជាក់លាក់ដល់អស់អ្នកដែលថ្វាយបង្គំក្នុងព្រះវិហារបរិសុទ្ធ ។ សូមអញ្ជើញសិស្សឲ្យរំឭក គោលលទ្ធិ និង សេចក្តីសញ្ញា ១០៩:១៣, ២២–២៦ ហើយរកមើលពរជ័យដែលពួកគេអាចទទួលបានតាមរយៈការថ្វាយបង្គំក្នុងព្រះវិហារបរិសុទ្ធ ។
-
ស្របតាមខគម្ពីរទាំងនេះ តើមានពរជ័យអ្វីខ្លះដែលយើងអាចទទួលបានតាមរយៈការថ្វាយបង្គំក្នុងព្រះវិហារបរិសុទ្ធ ? ( សូមពិចារណាសរសេរចម្លើយរបស់សិស្សនៅលើក្ដារខៀន ហើយសុំឲ្យពួកគេពន្យល់ពីមូលហេតុដែលពរជ័យទាំងនេះមានសារៈសំខាន់ចំពោះពួកគេ ។ បងប្អូនអាចជួយសិស្សឲ្យស្គាល់គោលការណ៍មួយដូចតទៅនេះ ៖ នៅពេលយើងថ្វាយបង្គំនៅក្នុងព្រះវិហារបរិសុទ្ធរបស់ព្រះអម្ចាស់ ទ្រង់នឹងបំពាក់យើងដោយព្រះចេស្ដា និងការការពាររបស់ទ្រង់ ) ។
សូមពិភាក្សាជាមួយនឹងសិស្សអំពីហេតុផលដែលយើងត្រូវការចាំបាច់នូវព្រះចេស្ដា និងការការពាររបស់ព្រះអម្ចាស់នៅជំនាន់របស់យើង ។ សូមអញ្ជើញសិស្សដែលបានសួរសមាជិកគ្រួសារ ឬមិត្តម្នាក់ពីពរជ័យជាក់លាក់ដែលគាត់បានទទួលតាមរយៈពិធីការបរិសុទ្ធ ទាំងឡាយនិងការថ្វាយបង្គំក្នុងព្រះវិហារបរិសុទ្ធ ឲ្យឡើងចែកចាយពីអ្វីដែលពួកគេបានរៀន ( សូមមើលការអញ្ជើញនៅចុងបញ្ចប់នៃផ្នែកទី ១នៅក្នុងឯកសាររៀបចំ ) ។ បងប្អូនក៏អាចអញ្ជើញសិស្សឲ្យថ្លែងទីបន្ទាល់ពីពរជ័យដែលពួកគេបានទទួលតាមរយៈការថ្វាយបង្គំរបស់ពួកគេផ្ទាល់ក្នុងព្រះវិហារបរិសុទ្ធ ។
សូមដាក់បង្ហាញ ហើយអានជាមួយសិស្សនូវសេចក្ដីថ្លែងការណ៍ដូចតទៅនេះដោយប្រធាន រ័សុល អិម ណិលសុន ៖
ខ្ញុំសូមអង្វរបងប្អូនឲ្យពិចារណាទៅលើការចំណាយពេលវេលារបស់បងប្អូនប្រកបដោយការអធិស្ឋាន ។ … បើបងប្អូនមានព្រះវិហារបរិសុទ្ធនៅជិតបងប្អូន ខ្ញុំសូមជំរុញចិត្តបងប្អូនឲ្យស្វែងរករបៀបមួយដើម្បីធ្វើការណាត់ជួបនឹងព្រះអម្ចាស់ឲ្យបានទៀងទាត់—នៅក្នុងព្រះដំណាក់ដ៏បរិសុទ្ធរបស់ទ្រង់— បន្ទាប់មកបន្តការណាត់ជួបនោះដោយត្រឹមត្រូវ និងអំណរ ។ ខ្ញុំសន្យានឹងបងប្អូនថា ព្រះអម្ចាស់នឹងនាំអព្ភូតហេតុដែលទ្រង់បានញាណដឹងថា បងប្អូនត្រូវការ នៅពេលបងប្អូនធ្វើការលះបង់ដើម្បីបម្រើ និងថ្វាយបង្គំនៅក្នុងព្រះវិហារបរិសុទ្ធរបស់ទ្រង់ ។ ( រ័សុល អិម ណិលសុន « ការក្លាយជាពួកបរិសុទ្ធថ្ងៃចុងក្រោយគំរូ » Ensign ឬ Liahona ខែ វិច្ឆិកា ឆ្នាំ ២០១៨ ទំព័រ ១១៤ )
ដើម្បីជួយសិស្សគិតឲ្យស៊ីជម្រៅពីការតាំងចិត្តរបស់ពួកគេចំពោះព្រះអម្ចាស់ និងបទពិសោធន៍របស់ពួកគេផ្ទាល់ជាមួយនឹងព្រះវិហារបរិសុទ្ធ សូមដាក់បង្ហាញសំណួរខាងក្រោម ហើយអញ្ជើញសិស្សឲ្យពិចារណាសំណួរដែលអនុវត្តចំពោះស្ថានភាពបច្ចុប្បន្នរបស់ពួកគេ ។ សូមទុកពេលគ្រប់គ្រាន់ឲ្យសិស្សគិត ហើយប្រហែលជាកត់ត្រាចំណាប់អារម្មណ៍របស់ពួកគេ ។
-
តើមានការអូសទាញ ឬបញ្ហានៃភាពពុំស័ក្ដិសមរារាំងខ្ញុំពុំឲ្យចូលក្នុងព្រះវិហារបរិសុទ្ធដែរឬទេ ? តើខ្ញុំត្រូវធ្វើអ្វីខ្លះដើម្បីលុបបំបាត់ឧបសគ្គទាំងនេះ ?
-
តើការលះបង់បែបណាខ្លះដែលព្រះអម្ចាស់ចង់ឲ្យខ្ញុំធ្វើ ដើម្បីទទួលបានពរជ័យដ៏ច្រើនដែលមានតាមរយៈការថ្វាយបង្គំក្នុងព្រះវិហារបរិសុទ្ធ ?
-
តើខ្ញុំអាចធ្វើឲ្យការថ្វាយបង្គំរបស់ខ្ញុំក្នុងព្រះវិហារបរិសុទ្ធឲ្យកាន់តែមានន័យយ៉ាងដូចម្ដេច ?
-
តើព្រះអម្ចាស់ចង់ឲ្យខ្ញុំជួយមនុស្សដទៃឲ្យមានបទពិសោធន៍នូវពរជ័យក្នុងព្រះវិហារបរិសុទ្ធដោយរបៀបណា ?
សម្រាប់ពេលក្រោយ
សូមចង្អុលបង្ហាញថា នៅសប្ដាហ៍ក្រោយ សិស្សនឹងមានឱកាសដើម្បីពិភាក្សាពីពិធីបរិសុទ្ធនៃព្រះវិហារបរិសុទ្ធដ៏អស្ចារ្យនៃអាពាហ៍ពិពាហ៍ដ៏នៅអស់កល្បជានិច្ច ។ សូមលើកទឹកចិត្តសិស្សឲ្យអានឯកសាររៀបចំសម្រាប់មេរៀនទី ២១ ហើយពិចារណាពីហេតុផលដែលអាពាហ៍ពិពាហ៍ និងគ្រួសារមានសារះសំខាន់យ៉ាងខ្លាំងចំពោះផែនការនៃសុភមង្គលរបស់ព្រះវរបិតាសួគ៌ ។