Potutusi
Vavega

“Vavega,” Autu ma Fesili (2023)

Ata
ua faamalolo e Iesu Keriso se alii

Taiala mo le Suesueina o le Talalelei

Vavega

Faaaliga o le mana ma le alofa o le Atua

O a nisi o mafuaaga ua e talitonu ai e moni le Atua ma e silafia oe e Ia? E mafai ona e mafaufau i taimi na e iloa ai sa Ia faaalia Lona alofa mo oe? Na aoao mai Peresitene Russell M. Nelson, “Tatalo ia i ai mata e vaaia ai le aao o le Atua i lou olaga ma i le lalolagi o siomia oe.”1 O vavega e faatusa i taimi e galue ai le Atua ma Lona mana e fai ma sui o Ana fanau.

I tusitusiga paia, tatou te aoao ai i vavega tetele na faia e le Ieova Silisili mo Lona nuu i le Feagaiga Tuai. Tatou te aoao foi e uiga i vavega na faia e Iesu Keriso i le taimi o Lona soifuaga faaletino i le Feagaiga Fou ma o le Alii toetu i le Tusi a Mamona. Ae o le vavega silisili o vavega uma o Lana Togiola, ina ua Ia togiolaina le lalolagi mai le agasala ma sa toetu mai le oti. O aso nei ua mafai ona tatou vaai i Ana galuega ma vavega, e tetele ma laiti, i o tatou lava olaga ma aoao ai “e lelei Ieova i tagata uma: o lona alofa mutimutivale agamalu foi ua i luga o ana galuega uma” (Salamo 145:9).

O Le A Le Vavega?

O se vavega o se faaaliga vaaia lea o le mana faalelagi. O vavega o se vaega taua o le galuega a Iesu Keriso, i aso anamua ma aso nei.

Vaaiga aoao i autu: Vavega

Taiala fesootai mo le suesueina o le talalelei: Galuega Faaletino a Iesu Keriso, Tatalo, Faatuatua ia Iesu Keriso, Faamanuiaga Faaleperisitua

Vaega 1

O Iesu Keriso o se Atua o Vavega

Ata
Ua faafilemu e Iesu Keriso le afā

O vavega sa avea pea ma se vaega o le galuega a le Atua i Ana fanau. O le Feagaiga Tuai ma le Fou e aofia ai le tele o tala e uiga ia Iesu Keriso o loo faaalia ai le mana paia e fai ai ma sui o fanau a le Tama Faalelagi. Ua iloa e soo o Iesu Keriso i aso nei o loo faaauau pea ona faaalia le aao o le Atua i auala faavavega i Lana Ekalesia ma i olaga o tagata taitoatasi ma aiga. Na folafola mai e le Atua, “Aua faauta, o Aʼu o le Atua; ma o Aʼu o se Atua o vavega; ma o le a Ou faaali atu i le lalolagi e tutusa lava aʼu ananafi, i le asō, ma le faavavau; ma Ou te lē galue i totonu o le fanauga a tagata vagana ua tusa ai ma lo latou faatuatua” (2 Nifae 27:23).

Mea e mafaufau i ai

  • Ina ua fesili soo e toalua o Ioane le Papatiso ia Iesu, “O oe ea le e maliu mai, pe matou te faatali i se tasi?” Na taua e Iesu ia faataitaiga e faaali atu ai po o ai o Ia (tagai Mataio 11:3–6). Aisea na faamaonia ai e nei faataitaiga pe o ai o Ia? Mafaufau foi po o le a le fetalaiga a Iesu i le Ioane 5:36. O le a le faamoemoega o “galuega” na faia e Iesu?

  • Na aoao mai Elder Ronald A. Rasband, “E faatino e le Alii ia vavega e faamanatu mai ai Lona mana, Lona alofa mo i tatou, Lona aapa mai le lagi i o tatou aafiaga i le olaga nei, ma Lona finagalo e aoao atu mea e sili ona taua.”2 O a nisi o vavega e aupito sili ona e fiafia i ai o loo tusia i tusitusiga paia? O a ni mea ua aoao mai ia te oe e nei vavega e uiga i le Atua?

Gaoioiga mo le aoao faatasi ma isi

  • Valaaulia tagata o le vaega e tofu filifili se tasi o tala nei o vavega a le Faaola mai le Feagaiga Fou. Faailoa le “o ai, o le a, o fea, o anafea, ma le aisea” o le vavega o loo faamatalaina i le fuaitau na filifilia. Talanoaina mea e tutusa ai ma eseesega i le va o nei mea. E mafai faapefea ona faaaoga nei tala e faamalosia ai le faatuatua o tagata e te iloa?

    • O le faamaloloina o tagata tauaso e toalua (tagai Mataio 9:27–31)

    • O le faatuina mai o le atalii o le fafine ua oti lana tane (tagai Luka 7:11–16)

    • O le faamaloloina o le tagata na fanau mai o tauaso (tagai Ioane 9)

    • O le faatuina mai o Lasalo (tagai Ioane 11:1–45)

Aoao atili

Vaega 2

E Oo mai Vavega e Ala i le Faatuatua ia Iesu Keriso

Ata
Iesu Keriso o loo faamalolo se tamaitai

I le Feagaiga Fou, sa folafola atu ai e Iesu i Ona soo o faailoga faavavega “o le a mulimuli atu ia te i latou o e talitonu” (Mareko 16:17–18). I aso e gata ai na Ia fetalai ai,”O lea, e pei ona Ou fai atu i aʼu aposetolo Ou te toe fai atu ia te outou, o tagata uma taitoatasi o e e talitonu ia outou upu, ma papatiso i le vai mo le faamagaloina o agasala, o le a mauaina le Agaga Paia. Ma … o faailoga o le a mulimuli atu ia te i latou oe e talitonu” (Mataupu Faavae ma Feagaiga 84:64–65). Mo i latou o e talitonu i le Atua ma Iesu Keriso, o vavega o se avanoa moni lava, ae e tatau ona latou faatuatua muamua (tagai Eteru 12:12–18).

Ae e le tatau ona tatou sailia vavega o se auala e fausia ai pe faamaonia ai lo tatou faatuatua. Na ta’u atu e le Alii ia Iosefa Samita, “E lē oo mai le faatuatua e ala i faailoga, ae o faailoga e mulimuli ia te i latou o e e talitonu. Ioe, e oo mai faailoga e ala i le faatuatua, ae lē ala mai i le manao o tagata, pe a loto i ai, ae e ala mai i le finagalo o le Atua” (Mataupu Faavae ma Feagaiga 63:9–10). Na tusia e le perofeta o Moronae, “Tou te le maua se molimau seia uma ona tofotofoina o lo outou faatuatua” (Eteru 12:6). O se molimau e amata i le molimauina o se vavega o le a le tumau pe afai e le fafagaina i le faatuatua ma le usiusitai faifai pea.

O nisi vavega e tutupu filemu, e pei o le taimi e maua ai e se tagata se molimau i le upumoni a le Atua, e oo i se suiga tele o le loto, maua le faamagaloga mai le Alii, pe ua faamanuiaina i le filemu ma le malosi i se taimi faigata (tagai Alema 37:6–7).

Mea e mafaufau i ai

  • Mafaufau i le mea na ta’u atu e le agelu ia Maria: “Aua e leai lava se mea e tasi e le mafaia e le Atua” (Luka 1:37). Pe na e feagai ea ma se mea na foliga mai e le mafai ona ausia pe foiaina? E mafai faapefea e le suesueina o tala faatusi paia o vavega e faatinoina e le mana o le Atua ona saunia ai oe e liliu atu ia te Ia ma faalagolago i Lona alofa, alofa mutimutivale, ma le finagalo?

Gaoioiga mo le aoao faatasi ma isi

  • Sa saunoa Peresitene Howard W. Hunter e uiga i le tele o vavega ofoofogia na faia e Iesu Keriso. Ona ia faasoa mai lea:

    “E sili ona ofoofogia le molimauina o se tasi e logonoa ua toe faalogo. Ae e mautinoa lava o lena faamanuiaga sili e le sili atu ona faateia nai lo le tuufaatasiga matagofie o ponaivi ma pa’u ma neura e mafai ai e o tatou taliga ona maua le lalolagi matagofie o le leo. Pe le tatau ea ona tatou tutu ma le maofa i le faamanuiaga o le faalogo ma avatu le viiga i le Atua mo lena vavega, e pei lava ona tatou faia pe a ua toefuatai mai le faalogo pe a mavae ona leiloa?

    “Pe le tutusa ea mo le toe foi mai o le vaai a se tasi po o le tautala atu o a tatou upu, po o lena lava vavega silisili o vavega uma—o le toefuataiga o le ola? O uluai foafoaga a le Tama ua i ai se lalolagi ua matua faatumulia-i le -ofoofogia moni lava. Pe le o vavega silisili ea o le mea moni e i ai o tatou ola ma lima ma le vaai ma le tautala i le taimi muamua?”3

    E mafai faapefea e lenei vaaiga o le tele o vavega i o tatou olaga ona faateleina lo tatou lotofaafetai mo le Atua o vavega?

Aoao atili

Vaega 3

Saili ma Faamoemoe i Vavega i Lou Olaga

Ata
o se alii talavou o loo savalivali i luga o le matafaga

O le a i ai pea vavega pe afai e i ai tagata faatuatua (tagai Moronae 7:27–29). Na aoao Peresitene Russell M. Nelson e tatau ona tatou “saili ma faamoemoe i vavega.” “O le a faamanuia e le Alii oe i vavega pe afai e te talitonu ia te Ia, ‘ma le lē masalosalo i se mea’ [Mamona 9:21]. Fai le galuega faaleagaga e saili ai vavega. Ia ōle atu ma le agaga tatalo i le Atua e fesoasoani mai ia te oe ia faatino lena ituaiga o faatuatua.”4

Ua siomia i tatou e vavega i aso uma. Sa faamalamalama mai e Elder Ronald A. Rasband: “O le toatele o outou ua molimauina vavega, e sili atu nai lo le mea ua outou iloaina. Atonu e foliga mai e laiti pe a faatusatusa ia Iesu o faatutuina e ua oti. Ae o le telē e le tulagaese ai se vavega, vagana na oo mai i le Atua.”5

Mea e mafaufau i ai

  • Mafaufau i le fautuaga a Peresitene Nelson. O le a le uiga o le “saili” vavega i lou olaga? O le a le “galuega faaleagaga” e manaomia ona e faia e “saili ai vavega”? E mafai faapefea ona faamanuiaina oe e ala i le vaavaai mo auala o loo galue ai le Atua i lou olaga?

  • Faitau Mamona 9:7–21. Afai na le liliu lava le Atua ma faaee atu ni vaaiga, faamanuiaga, ma faaaliga i luga o Ana fanau anamua, o le a la le uiga o lenei mea mo oe? O ai e te iloa e mafai ona manuia mai le malamalama sili atu e faapea “e lei uma le avea o le Atua ma se Atua o vavega”? (Mamona 9:15)

Gaoioiga mo le aoao faatasi ma isi

  • Valaaulia tagata o le vaega e faasoa mai se taimi na latou molimauina ai le aao o le Atua o galueaiina se faamanuiaga po o se vavega i o latou lava olaga, pe a talafeagai ai. Talanoaina auala eseese na tutupu ai nei vavega ma faamoemoega eseese na latou auauna atu ai.

Aoao atili