O Le Perisitua Paia

Sa tuuina atu le pule ma le mana o le perisitua i alii anamua. O le perisitua maualalo sa tuuina atu i atalii o Arona e pulea ai mea faaletino faapea foi i nisi o sauniga paia faale-ekalesia. O le perisitua maualuga sa tuuina atu e le Alii lava Ia i Ana Aposetolo, e tusa ai ma Lana folafolaga ia Peteru: “Ou te avatu foi ia te oe ki o le malo o le lagi: o se mea foi e te fusifusia i le lalolagi, e fusifusia foi lea i le lagi: o se mea foi e te tālā i le lalolagi, e tatalaina foi lea i le lagi” (Mataio 16:19).

O le toefuataiga atoa o le perisitua e aofia ai le oo mai o Ioane le Papatiso … faapea foi ma Peteru, Iakopo, ma Ioane. … E aofia ai Mose, Elaia, ma Elia, e taitasi ma aumai ki o le perisitua e faaatoatoa ai le galuega o le toefuataiga o gaoioiga ma sauniga uma o tisipenisione ua mavae i lenei, le tisipenisione mulimuli ma le sili o le atoaga o taimi.

Ua i ai iinei le perisitua. … Ua tatou iloa, aua ua tatou vaai i ai, i le mana o lenei perisitua. Ua tatou vaai i ma’i ua faamalolo, o pipili ua savavali, ma le oo mai o le malamalama ma le poto ma le iloa ia i latou sa i ai i le pogisa.³

Sa faamatalaina e le Perofeta o Iosefa Samita [le perisitua] i se tasi o taimi i upu nei: “O le Perisitua o se mataupu faavae faavavau, ma sa i ai faatasi ma le Atua mai le vavau, ma o le a oo atu i le faavavau, e aunoa ma se amataga o aso po o se iuga o tausaga.” (History of the Church, 3:386.)

O le mana lava o le Silisiliese ua tuuina mai i alii e galulue ai i Lona suafa ma fai ai ma Ona sui. O le faasafua mai o le pule faaleatua, e ese mai i isi mana ma pule uma i luga o le fogaeleele. E ofo laiitiiti ona e faapea, sa toefuatai mai i le tagata e ala i tagata toetutu o e sa umia [le perisitua] anamua, ina ia leai se fesili e faatatau i lena pule ma lona tauaogaina. A aunoa ma lea o le a avea le ekalesia ua na o se igoa, e leai se pule e galueaina ai mea a le Atua. Faatasi ai ma le [perisitua], e leai se mea e faigata i le tauaveina i luma o le galuega o le malo o le Atua. E faaleatua i lona natura. E faaletino ma faavavau i lana pule. Ona pau lea o le mana i luga o le fogaeleele e oo i tua atu o le veli o le oti.⁴

Ou te alofa i le perisitua o lenei Ekalesia. O se mea e ola ma taua. O le fatu ma le malosi tonu lava lea o lenei galuega. O le pule ma le mana e mafai ai e le Atua, lo tatou Tama e Faavavau, ona faataunuu Lana galuega i le fogaeleele.⁵

E tauaveina e le perisitua paia le pule e faatautaia ai mataupu o le malo o le Atua i le fogaeleele. E tusa ai ma faaaliga a le Alii, e pule faamalumalu faitaulaga sili e toatolu i le Ekalesia. E fesoasoani ia i latou le aufono a Aposetolo e Toasefululua, o e e fesoasoani foi i ai … le Au Fitugafulu. O le au Epikopo Pulefaamalumalu e toatolu e nafa ma mataupu faaletino i lalo o le taitaiga a le Au Peresitene. O i latou uma nei e umia tofi o le perisitua. O lena mana faaleatua ua tuuina mai o le pule latou te galulue ai. E faapea foi i siteki ma uarota i au peresitene ma au epikopo. E faapea foi i korama. O taitai o ausilali e faataunuuina a latou galuega i lalo o le taitaiga ma le faasafua atu mai le perisitua. A aunoa ma le perisitua atonu o le a i ai le faatulagaga o le ekalesia, ae aunoa ma se aano moni. O le ekalesia lenei a Iesu Keriso, ma e puleaina e lena pule e “tusa ma le Faatulagaga a le Alo o le Atua.” (MF&F 107:3.)⁶

[O le Perisitua] … o se vaega o le fuafuaga a le Atua lo tatou Tama e Faavavau e faamanuia ai soifuaga o Ona atalii ma afafine o augatupulaga uma.⁷

O le perisitua paia e aofia ai le mana e faamanuia ai. Mo i latou o le Perisitua Arona, o loo tauaveina ai le pule e tufatufa atu ai i le faapotopotoga faatusa o le tino ma le toto o le Alii, o le na tuuina mai Lona soifua o se taulaga mo tagata uma. O le faamanatuga ma le taumamafa i nei faatusa o le fatu tonu lea o a tatou sauniga o le sapati. E aofia ai se faafouga o feagaiga ma le Atua. E na te tauaveina se folafolaga o Lona Agaga Paia ina ia faatasi ma i tatou. O se faamanuiaga e aunoa ma ni uo e fiafia ai tagata uma ma ua mafai ona maua e ala i le pule ua tuuina mai i alii talavou agavaa.…

E tauaveina e le Perisitua Mekisateko le pule e tuuina atu ai le Agaga Paia. O se faamanuiaga sili le i ai o le aafiaga paia o se tasi o le Aiga Atua, na mauaina lena meaalofa i le faaee i ai o aao o i latou o loo galulue i lena pule paia. Afai tatou te savavali pea i le amioga mama, atonu tatou te fiafia i le faataunuuina o le folafolaga na faia e le Alii ina ua Ia fetalai: “O le a avea le Agaga Paia ma āu soa e lē aunoa, ma o lou tootoo o le a avea ma se tootoo lē feliuliua’i o le amiotonu ma le upumoni; ma o lau puleaga o le a avea ma se puleaga tumau-faavavau, ma e aunoa ma ni ala faamalosia, o le a tafe mai ia te oe e faavavau ma faavavau lava.” (MF&F 121:46.)

O le perisitua e aofia ai le mana e faamanuia ai ma’i. Pe i ai ea se tasi o loo mafai ona lagona mai a’u sa le’i faaaogaina pe lagonaina lena mana paia? E mafai e se tasi o i tatou ona masalosalo e faatatau i lona tauaogaina? E mafai ona tatou iloa vavega, paia ma matagofie, ua mafai ona tatou molimauina i totonu o o tatou lava aafiaga….

E tauaveina e lenei Perisitua Mekisateko paia le mana e faamanuia ai i valoaga, e faamafanafana, e lagolago, e taitai. O loo i ai ia i tatou peteriaka o e, i lalo o le pule o loo latou umia, e folafola mai tupuaga ma tuuina mai faamanuiaga mo lo tatou taitaiga. O nei faamanuiaga e mafai ona avea o se taula tatou te pipii i ai ina ia tatou saogalemu mai afa o le olaga.

I lona faamatalaga tupito, e tauave e le perisitua le pule e faamau ai i le fogaeleele ma avea ma faamauga tauaogaina i le lagi. E tulaga ese ma matagofie. O le pule e faaaoga i malumalu o le Atua. E aafia ai e o soifua ma e ua maliliu. O le aano moni lava lea o le faavavau. O le mana paia ua tuuina mai e le Silisiliese o se vaega o Lana fuafuaga sili mo le tino ola pea ma le ola faavavau o tagata.

E ese le taua o le meaalofa a le Atua ua oo mai ia i tatou.⁸

O alii agavaa uma, e le afaina le atunuu, tagatanuu, po o se isi lava tulaga, e agavaa e maua le perisitua. O lona usiusitai i poloaiga a le Atua ua avea ma mea e agavaa ai. O lona faaeeina atu e na o le ola agavaa i luma o le Alii e fua i ai….

O le tulaga maoae lea o lenei perisitua. O le oa e le o se vaega lea e agavaa ai. O le aoaoga e le o se vaega lea e agavaa ai. O le mamalu o tagata e le o ni vaega ia e agavaa ai. O le vaega e agavaa ai e silisili ona taua o le taliaina lea e le Alii.⁹

Ua oo mai le taimi mo i tatou uma ua faauuina i le Perisitua Arona po o le Mekisateko, ma soo se tofi o i ai, ina ia manatunatu i o tatou olaga, ia suesue i o tatou vaivaiga, ma ia salamo i na amioga ua le talafeagai ma ese mai i le tiute maualuga ma paia ua tatou mauaina….

E leai se alii, laitiiti pe matua, … o le ua … faauuina, e mafai ona manatu faatauvaa i le perisitua ua ia umia. Ua faipaaga o ia ma le Atua ma ua i ai i ona luga se tiute tumau ma le paia ina ia ola agavaa ai e tautala ma galue i le suafa o le Atua e avea ma lona sui talafeagai.¹⁰

E ui ina faaee aao o i latou ua i ai le pule i luga o o tatou ulu ma ua faauuina i tatou, e mafai e la tatou amio ona faaleaogaina ma aveesea se aia tatau e faaaoga ai lenei pule paia.

… “E leai se mana po o se aafiaga e mafai pe tatau ona faatumauina ona o le perisitua, nao i le faatauanau, i le tali-tiga, i le agamaualalo ma le agamalu, ma le alofa faamaoni;

“I le agalelei, ma le malamalama manino, lea o le a faalautele atili ai le agaga e aunoa ma le pepelo, ma aunoa ma le faa’ole’ole” (MF&F 121:41–42).

O lenei, ou uso e, o faatulagaga na ua faamatalatalaina ai lenei perisitua. E le pei o se ofu talaloa tatou te ofuina ma toe tatala ese pe a loto i ai. O le, pe afai e faaaogaina i le amiotonu, e faapei o aano moni o o tatou tino, o se vaega o i tatou i taimi uma ma i tulaga uma.¹¹

E ao ona tatou faamaoni i le mea sili o loo ia i tatou. O i tatou o atalii o le Atua ua faamamaluina e umia Lana pule paia. Peitai ua tatou ola i se lalolagi o le amioleaga. O loo i ai i taimi uma se malosiaga, o loo tosoina i tatou i lalo, o loo valaaulia i tatou e fetagofi atu i mea ua matua le talafeagai lava ma le perisitua paia ua tatou umia….

Ia te outou alii, ou te tuuina atu se luitau. Tamomoe ese mai le tai fana’e o le le faamaoni o le a lofituina ai outou. Sola ese mai mea leaga o le lalolagi. Ia faamaoni ia te oe lava. Ia faamaoni i le mea sili o loo ia te oe. Ia faamaoni ma tonu i feagaiga e o faatasi ma le perisitua a le Atua.¹²

I taitai uma, i faiaoga uma i lenei Ekalesia o loo galulue i se tofi o le perisitua, ua faapena ona oo mai le tiutetauave paia o le faalauteleina o lena valaauga o le perisitua. O i tatou taitoatasi e nafa ma le manuia ma le tuputupu ae ma le atiinae o isi. Tatou te le ola mo na o i tatou lava. Afai tatou te faalautele o tatou valaauga, e le mafai ona tatou ola mo na o i tatou lava.¹³

O le toatele o alii ua manatu ona ua faauuina i latou, ua avea le perisitua ma a latou lava ma faaaoga e pei ona latou filifili iai. Ua latou manatu e mafai ona latou solia se feagaiga ma se tulafono iinei ma iina, ma agasala i lenei po o lena ala, ae o loo i ai pea ia i latou le mana o le perisitua ma o le a talia e le Atua mea latou te tautatala ai i Lona suafa paia ma i le suafa o le Togiola. Ua avea lea ma tauemuga, ma ou te talitonu o sea tulaga, ua latou ta’ufuaina ai le suafa o le Atua. Ua latou upuleaga i le suafa o Lona Alo Pele. Ua latou solia le meaalofa paia na ala mai i le faauuga, ma le pule ua aveesea mai ia i latou ona o le solitulafono….

… Ou te sii atu se leo o lapataiga i, tama ma tamaloloa uma, ina ia taofia le agasala. O le solitulafono e le talafeagai ma le pule faaleatua. Aloese ma ponokalafi e pei o le a e aloese mai i se mala. Aloese mai agasala tau feusuaiga o soo se tulaga lava. Ia taofi le le faamaoni ma le faaoleole. Ou te aioi atu ia te outou ina ia taofiofi i soo se tulaga o le faamaualuga po o le faanaunauga fiatagata. Ou te talosaga atu ina ia outou tagai i totonu o outou lava e vaai ai ia leai se amioga o le fiapule po o le faamalosi i a outou ava po o a outou fanau….

… Ou te talitonu e le fiafia lo tatou Tama oi le Lagi i se alii po o se taulealea e talia le faauuga ona faaloloto lea i le tiapolo. I le faagasologa moni o le taliaina o le faauuga, e ulu atu o ia i se tautoga ma se feagaiga i le va o ia ma lona Atua.¹⁴

E leai se alii, pe talavou po ua matua, o loo ola ai i faatulagaga o le perisitua e faalumaluma pe taufaatauvaaina le tulaga faatamaitai, o le ua le mafai ona ia tuuina atu lena fuataga o le faaaloalo i afafine o le Atua e pei ona finagalo ai lo tatou Tama o loo i le lagi latou te tuuina atu.¹⁵

Ia avea i tatou o ni tane ma ni tama lelei. Soo se alii e faasaua i lona lava aiga ua le agavaa mo le perisitua. E le mafai ona avea o ia o se meafaigaluega talafeagai i aao o le Alii pe a le faaalia e ia le faaaloalo ma le agalelei ma le alofa i lana soa na filifilia. E faapena foi, i soo se alii o le fai ma se faataitaiga leaga i lana fanau, e le mafai ona taofiofi lona ma’ema’ea, pe aafia i le le faamaoni po o uiga le mama, o le a oo ina aveesea ai le mana o lona perisitua.¹⁶

O le ava ua e filifilia o le a tutusa ma oe. … E le o ia o sau auauna, sau tavini, po o soo se mea faapena. O se mala ma matua inosia lava le uiga o le faasaua i le ava. O soo se alii i le Ekalesia lenei e faasaua i lana ava, e manatu faatauvaa ia te ia, e faalumaina o ia, e pule ma le amioletonu ia te ia ua le agavaa e umia le perisitua. E ui ina faapea sa faauuina o ia, o le a soloia e le lagi, o le a faavauvau le Agaga o le Alii, ma o le a amene i le pule o le perisitua o lena alii. O soo se alii na te faia nei ituaiga amioga, ua le agavaa e umia se pepa faataga o le malumalu….

… Afai e i ai nisi … o loo tausalaina i ia uiga, ou te valaau atu ia te outou ia salamo. O ifo i o outou tulivae ma ole atu i le Alii e faamagalo outou. Tatalo ia te Ia mo le mana e pulea ai lou laulaufaiva ma lou lima malosi. Talosaga atu mo le faamagaloga a lou toalua ma lau fanau….

Ou te mautinoa afai tatou tutulai i luma o le faamasinoga a le Atua, o le a itiiti se ta’ua o le tele o oa sa tatou faaputua i le olaga po o mamalu sa tatou ausia. Ae o le a i ai ni fesili loloto e suesue ai e uiga i o tatou lava va faalelotoifale. Ma ua ou mautinoa ua na o i latou na savalia le olaga i le alofa ma le faaaloalo ma le faafetai mo a latou soa ma fanau, o le a maua mai i lo tatou faamasino e faavavau ia fetalaiga, “Ua lelei, le auauna lelei ma le faamaoni: … ulufale mai i le fiafia o lou Alii” (Mataio 25:21).¹⁷

Ou te mautinoa na fuafuaina e le Alii ia tatau ona sili atu se korama a le perisitua nai lo o se vasega o mataupu faalelotu i taeao o Aso Sa. O lea lava, o le atiinaeina o le faaleagaga ma le faamalosia o molimau e ala i le lelei o le aoaoina o le talalelei o se tiutetauave taua o le perisitua. Ae ua na o se vaega lenei o le tiute o le korama. O korama taitasi e ao ona avea o se usoga galulue mo tagata taitoatasi pe afai e faataunuuina lona faamoemoega….

… O le korama o le perisitua o le faalapotopotoga lea a le Alii mo alii o le Ekalesia, e faapei foi o le Aualofa o le faalapotopotoga a le Alii mo tamaitai o le Ekalesia. E taitasi i ana matafaioi, o le faavae o lona faamoemoega, o le fesoasoani mo e manaomia le fesoasoani.

Ina ua faavaeina le Aualofa sa saunoa atu le Perofeta o Iosefa i tamaitai o le Sosaiete: “O le a latou felelei atu i le toomaga o se tagata ese; o le a latou liligi atu le suauu ma le uaina i le loto mafatia o le tagata puapuagatia; o le a latou soloia loimata o le tamaitiiti matuaoti ma faafiafia le loto o se tina ua oti lana tane” (Aoaoga a Peresitene o le Ekalesia: Iosefa Samita [2007], 452). Iosefa Samita (2007), 452]. Ou te faamoemoe o le tala foi lea e tasi e fai i alii o le perisitua.

“O le a avea ma se aso ofoofogia … pe a oo ina avea o tatou korama o le perisitua ma taula o le malosiaga i alii uma e i ai iina, pe a mafai e ia alii taitoatasi ona fai atu ma le talafeagai, “O au o se uso o se korama o le perisitua o Le Ekalesia a Iesu Keriso o le Au Paia o Aso e Gata Ai. Ou te tu atu ua saunia e fesoasoani i ou uso i o latou manaoga uma, ona ou te talitonu foi ua latou tutu e sauni e fesoasoani mai ia te au i ou foi manaoga. O le galulue faatasi, o le a tatou tuputupu ae ai faaleagaga o ni atalii o le feagaiga a le Atua. O le galulue faatasi, e mafai ona tatou tutu ai, e aunoa ma le maasiasi ma e aunoa ma le fefe, e tetee atu i matagi uma o faigata e ono pesi mai, e tusa lava pe faaletamaoaiga, faaagafesootai, pe faaleagaga.”¹⁸

Ata

fonotaga a le aufono a le uarota

Ioe, e umia e alii le perisitua. Ae o lo’u toalua o la’u soa. I lenei Ekalesia e le savali le alii i luma po o tua ae o tafatafa o lona toalua. E paaga tutusa i laua i lenei olaga i se taumafaiga maoae.¹⁹

O loo i ai le malosi ma le tomai sili i tamaitai o lenei Ekalesia. O loo i ai tulaga faaleautaitai ma le taitaiga, o se agaga faapitoa o le tutoatasi, ae faamalieina atoatoa i le avea ai o se vaega o lenei, le malo o le Alii, ma galulue soosootauau ma [e o umia] le perisitua e uunai ai i luma.²⁰

Ou te faafetai i lou Tama Faavavau mo le toefuataiga o le perisitua paia, ina ia “mafai ai ona tautatala alii uma i le suafa o le Atua le Alii, e oo lava i le Faaola o le lalolagi” (MF&F 1:20). Ua ou vaai i le manaia ma le ofoofogia o lena perisitua i le taitaiina o lenei ekalesia matagofie. Ua ou lagonaina lona mana e auala mai ia te au mo le faamanuiaina ma le faamaloloina o mai. Ua ou vaai i le faamamaluina ua tuuina atu i alii loto maualalalo ua valaauina i tofiga maoae ma faigata. Ua ou vaai i ai a o latou saunoa mai ma le mana ma le pule mai luga, e peiseai na fetalai mai le Atua e auala mai ia i latou.

Ou te faafetai i le Alii mo le molimau ua ia tuuina mai ia te au i le atoatoa o le talalelei, i lona lautele ma le maualuga ma le loloto. Ua fuafuaina e faamanuia ai atalii ma afafine o augatupulaga uma o taimi—o e o soifua ma e ua maliliu.²¹

• Toe iloilo aoaoga a Peresitene Hinckley i le vaega 1 e faatatau i le toefuataiga o le perisitua. O a ni aafiaga na fesoasoani ia te oe ina ia maua ai le molimau o nei upumoni?

• Na aoao mai Peresitene Hinckley, “O le perisitua paia na te tauaveina le pule e taitai ai mataupu o le malo o le Atua i luga o le fogaeleele” (vaega 2). E faapefea ona faatatau lenei upumoni i siteki ma uarota? i korama? i le Aualofa? E faapefea ona faamalosia e le pule o le perisitua lau auaunaga i le malo o le Atua?

• I le vaega 3, toe iloilo faamanuiaga e mafai e i tatou uma ona maua e ala i le perisitua. O a ni auala ua e aafia ai i le mana ma faamanuiaga o le perisitua?

• O a ni mea tatou te aoao mai i aoaoga a Peresitene Hinckley e faatatau i le eseesega o le pule o le perisitua ma le mana o le perisitua? (Tagai vaega 4.) O le a sou manatu i le uiga mo se e umia le perisitua “ina ia faamaoni i le mea sili o loo ia te [ia]”? Aisea e tatau ai i e o umia le perisitua ona “le ola ua nao i [latou] lava”?

• I le vaega 5, o le a se mea e te fiafia ai e uiga i le faamalamalamaga a Peresitene Hinckley o korama o le perisitua ma le Aualofa? O le a se mea e mafai ona tatou faia i la tatou uarota po o le paranesi ina ia mulimuli ai i lana timaiga?

• Aisea e ao ai ona galulue faatasi alii ma tamaitai o se “paaga-tutusa” e faataunuu ai le galuega a le Alii? (Tagai vaega 6.)

Eperu 5:1–4; 1 Nifae 14:12–14; Alema 13:1–9; MF&F 84:33–44; 88:133; 112:30–32

“Fai fesili e manaomia ai e tagata aoao ona sue tali i tusitusiga paia ma aoaoga a perofeta o aso e gata ai”(O Le Aoao Atu E Leai Se Isi Vaaauga e Sili Ai [1999], 62).