Li wank jo’ xtzolom li Jesukristo chiru chixjunil li yu’am

K’iila paay ru chan ru naru naqak’utb’esi li qarahom choq’ re li Dios. Naru neke’qapaab’ lix taqlahom (chi’ilmanq Jwan 14:15, 21). Naru naqak’e a’an jo’ xb’eenil sa’ li qayu’am, chixq’axtesinkil li qajom chiru li rajom a’an. Naru naqajayali li qajom, li qak’oxlahom, ut li qaam rik’in a’an (chi’ilmanq Alma 37:36). Naru nokob’antioxin rajlal chirix li nokorosob’tesi wi’—ut naru naqawotz chi anchal qach’ool li qosob’tesinkil (chi’ilmanq Mosiah 2:21–24; 4:16–21). Rik’in tijok chirixeb’ ut k’anjelak chiruheb’ li qas qiitz’in, naru naqak’ut ut naqachamob’resi li qarahom choq’ re.

Jo’ xkomoneb’ chik li taqlahom, li taqlahom re xraab’al li Dios nokorosob’tesi laa’o. A’ yaal li naqara, najala li k’a’ru naqasik’. A’ yaal li naqasik’, najala li naqak’oxla ut naqab’aanu. Ut a’ yaal li naqak’oxla ut naqab’aanu, nokojala laa’o—ut ani toowulaq wi’.

Xraab’aleb’ li qas qiitz’in a’an xcha’al li qarahom choq’ re li Dios. Li Kolonel kixk’ut chi k’iila paay ru chan ru taqara li qas qiitz’in (chi’ilmanq, jo’ eetalil, Lukas 10:25–37 ut Mateo 25:31–46). Naqasik’eb’ ut naqak’ulub’aheb’ sa’ li qach’ool ut sa’ li qayu’am. Nokorahok naq nokok’anjelak chiruheb’—rik’in xq’axtesinkil qib’ us ta yal b’ayaq. Naqaraheb’ li qas qiitz’in naq neke’qoksi li maatan kixk’e li Dios qe re rosob’tesinkileb’.

Re xraab’aleb’ li qas qiitz’in na’ajman li kuyum, xchaab’ilal li ch’oolej, ut xmaak’a’il li b’alaq. Na’ajman xkuyb’al li maak chi moko ramb’il ta. Na’ajman rilb’aleb’ chixjunileb’ li kristiaan rik’in oxloq’.

Naq naqara jun kristiaan, sa’ wiib’al noko’osob’tesiik. Naniman li qaam, li rajb’al li qayu’am, ut lix sahil qach’ool.

Li wiib’ xninqal ru taqlahom—xraab’al li Dios ut xraab’al li qas qiitz’in—a’aneb’ xk’ub’elal chixjunileb’ lix taqlahom li Dios (chi’ilmanq Mateo 22:40). Naq naqara li Dios xb’een wa, ut naqara ajwi’ li qas qiitz’in, chixjunil sa’ li qayu’am tixtaw tz’aqal xna’aj. Li rahok a’in tixjal li qilom, chan ru naqoksi li qahoonal, li qajom naqasik’, ut xtusulal li k’a’ru aajel ru choq’ qe.

Sa’ rilob’aal li Dios, li xq’etb’al li chaq’rab’ re saq ru ch’oolej a’an nimla maak (chi’ilmanq Exodo 20:14; Efesios 5:3). A’an li roksinkil chi ink’a’ us li santil wankilal kixk’e a’an re yo’ob’tesink yu’amej. A’b’anan, a’an toj nokoxra us ta naqaq’et li chaq’rab’ a’in. A’an nokoxb’oq chixjalb’al qak’a’uxl ut chi saqob’resiik qu rik’in lix mayej aj tojol-ix li Jesukristo. Sa’ xna’aj lix rahil li maak naru taawanq li ki’il tuqtuukilal wan sa’ lix kuyb’al qamaak xb’aan li Dios (chi’ilmanq Tzol’leb’ ut Sumwank 58:42–43).

Li Dios kixxaqab’ li chaq’rab’ re saq ru ch’oolej re qosob’tesinkil laa’o ut eb’ li musiq’ejil alal k’ajolb’ej naxtaqla chaq sa’ li ruchich’och’. Aajel ru xpaab’ankil li chaq’rab’ a’in re naq taawanq tuqtuukilal sa’ junesal ut li rahok, chaab’ilal, ut junajil sa’ li qajunkab’al.

Naq naqayu’ami li chaq’rab’ re saq ru ch’oolej, taakole’q qix chiru li musiq’ejil rahilal li nachal rik’in li tz’ejwalejil wank naq moko sumsuuko ta. Jo’kan ajwi’, ink’a’ taqanumsiheb’ li ch’a’ajkilal re ch’oolej ut re tib’elej li neke’chal chi kok’ aj xsa’ xb’aan li tz’ejwalejil wank chi jo’kan. Taanimanq lix kawilal qachʼool chiru li Dios (chi’ilmanq Tzol’leb’ ut Sumwank 121:45). Tooruuq chixk’ulb’al xkomon chik lix wankil li Santil Musiq’ej. Tookawresiiq chi us wi’chik re ok sa’ loq’laj sumwank sa’ li santil ochoch li neke’xjunaji li qajunkab’al chi junelik.

Jalam-uuch

Widow’s Mite [Lix kokʼ tumin li xmalkaʼan], xb’aan li xSandra Rast

Chan ru na’oksiman xtuminal li lajetqil

Lix tuminal li lajetqil a’an sant. Naqak’e li qalajetqil re jun komon re li obiispil, malaj sa’ k’iila na’ajej naru naqatoj sa’ internet. Naq li obiispil naxk’ul li lajetqil, neke’xtaqla sa’ lix jolomil li Iglees.

Jun ch’uut re li Xb’eenil Awa’b’ejil, lix Molameb’ li Kab’laju chi Apostol, ut li Obiispil aj Jolominel neke’xtz’il rix chan ru taa’oksimanq xtuminal li lajetqil sa’ xk’anjel li Dios (chi’ilmanq Tzol’leb’ ut Sumwank 120:1). Naru na’oksiman re:

• Xkab’lankileb’ ut xsaab’esinkileb’ li santil ochoch ut li ch’utleb’aal kab’l.

• Xjaltesinkileb’ ru ut xpuktesinkileb’ li loq’laj hu.

• Xkawresinkil li k’anjel ut chixjunil li nab’aanuman sa’ li ch’uut sa’ li junjunq chi na’ajej re li Iglees.

• Xb’aanunkil li k’anjel reheb’ li misioneer chiru li ruchich’och’.

• Xwaklesinkil li k’anjel re li resilal li junkab’al.

• Xk’eeb’al tumin reheb’ li tzoleb’aal ut li jar paay chi tzolok.

Ink’a’ na’oksiman li lajetqil re xtojb’aleb’ laj jolominel re li Iglees sa’ li junjunq chi na’ajej. Neke’k’anjelak a’ yaal rajomeb’ xch’ool ut ink’a’ neke’tojman.

Naq naqatoj li lajetqil, li Dios naxyeechi’i li osob’tesiik li q’axal nim chiru li tumin naqak’e. A’an “tixte … rilob’aal choxa, ut tixhoy … jun osob’tesink toj reetal naq moko tz’aqalaq ta li na’ajej re xk’ulb’al” (Malakias 3:10; che’ilmanq raqal 7–12). Naru naq li osob’tesiik a’an re musiq’ej malaj re li yu’am a’in.

Li qatib’el a’an jun loq’laj maatan kixk’e li Dios qe. Naqaj ru jun qatib’el re wulak jo’ chanru a’an. K’a’jo’ xnimal ru li qatib’el, jo’kan naq li loq’laj hu naxjuntaq’eeta a’an rik’in li santil ochoch (chi’ilmanq 1 Korintios 6:19–20).

Li Qaawa’ naraj naq taqak’e roxloq’ li qatib’el. Re qatenq’ankil chixb’aanunkil a’in, a’an kixk’utb’esi jun chaq’rab’ re kawilal li kixk’ab’a’i li Aatin re Chaab’il Na’leb’. Li k’utb’esinb’il na’leb’ a’in nokoxtzol chirix xtzekankil li chaab’il tzakemq ut ink’a’ roksinkil li k’a’ru narahob’tesink re li qatib’el—jo’ li uk’a nakaltesin, li may, ut li tiqwal uk’a (naraj naxye te ut kape).

Sa’ li musiq’ej re li Aatin re Chaab’il Na’leb’, eb’ li profeet re li kutan a’in neke’xye ajwi’ naq ink’a’ us roksinkil li k’a’ru narahob’tesin, li k’a’ru ramb’il xb’aan xchaq’rab’il li tenamit, ut li k’a’ru nak’aytesin. Eb’ li profeet neke’xye ajwi’ naq ink’a’ us roksinkil chi numtajenaq li b’an wan xliceens re xloq’b’al. (Laa awa’b’ej re mision naru tixsume ma wan chik li k’a’ru ink’a’ us roksinkil sa’ li na’ajej wankat wi’).

Li Qaawa’ kixk’utb’esi li Aatin re Chaab’il Na’leb’ choq’ re li qakawilal sa’ tib’elej jo’ ajwi’ sa’ musiq’ej. A’an naxyeechi’i ninqi osob’tesihom naq naqapaab’ li chaq’rab’ a’in. Jo’ xcha’aleb’ a’an wan li kawilal, xchaabʼilal li naʼlebʼ, li ninqi bʼihomal re nawom, ut li kolb’a-ix (chi’ilmanq Tzol’leb’ ut Sumwank 89:18–21).

Xpaab’ankil li Aatin re Chaab’il Na’leb’ tooxtenq’a chirab’inkil li naxye li Santil Musiq’ej. Us ta chiqajunilo naqak’ul ch’a’ajkilal rik’in xkawilal li qoq quq’, xpaab’ankil li chaq’rab’ a’in tooxtenq’a chi usaak sa’ tib’elej, k’a’uxlej, ut musiq’ej.

Eb’ li te’kub’eeq xha’ tento te’xpaab’ li Aatin re Chaab’il Na’leb’.

Re xtawb’al li na’leb’ chirix xtenq’ankileb’ li neke’ch’a’ajko’ rik’in li k’aytesink-ib’, chi’ilmanq ch’ol 10.

Li hilob’aal kutan a’an jun santil kutan kixxaqab’ li Dios choq’ qe rajlal xamaan re toohilanq chiru li qak’anjel ut re taqaloq’oni a’an. Jun reheb’ li Lajeeb’ chi Taqlahom kik’ehe’ re laj Moises a’an, “Jultikaq aawe li [hilobʼaal kutan], re naq taasantobʼresi” (Exodo 20:8; che’ilmanq ajwi’ raqal 9–11).

Sa’ jun k’utb’esinb’il na’leb’ re li kutan a’in, li Qaawa’ kixka’jultika naq li hilob’aal kutan a’an “jun kutan xaqabʼanbʼil choqʼ aawe re tathilanq chiru laa kʼanjel, ut re taaqʼaxtesi aaloqʼonihom chiru li Qʼaxal Taqenaq Xwankil” (Tzol’leb’ ut Sumwank 59:10). A’an kixye ajwi’ naq li hilob’aal kutan a’an jun kutan re saho’k sa’ ch’oolej, tijok, ut b’antioxink (che’ilmanq raqal 14–15).

Jo’ xcha’al li qaloq’onihom chiru li hilob’aal kutan, nokowulak sa’ li ch’utam re li loq’laj wa’ak rajlal xamaan. Sa’ li ch’utam a’in, naqaloq’oni li Dios ut naqak’ul li loq’laj wa’ak re xjultikankil li Jesukristo ut lix mayej aj tojol-ix. Naq naqak’ul li loq’laj wa’ak, naqa’ak’ob’resiheb’ li qasumwank rik’in li Dios ut naqak’ut naq wan qach’ool chixjalb’al qak’a’uxl chirixeb’ li qamaak. Li k’ojob’anb’il k’anjel re li loq’laj wa’ak a’an li raam li qaloq’onihom chiru li hilob’aal kutan.

Sa’ li iglees nokotz’aqon ajwi’ sa’eb’ li tzoleb’aal b’ar wi’ naqatzol xkomon chik li na’leb’ chirix lix evangelio li Jesukristo. Naniman li qapaab’aal naq naqatzoleb’ li loq’laj hu sa’ komonil. Naniman li qarahom naq naqatenq’a qib’ ut naqakawresi qib’ chiqib’il qib’.

Rochb’een li hilank chiru li qak’anjel chiru li hilob’aal kutan, ink’a’ nokoxik chi loq’ok ut chixb’aanunkil yalaq k’a’ru chik li k’aynaqo chixb’aanunkil wulaj wulaj. Naqakanab’ li k’a’aq re ru re li ruchich’och’ ut naqajayali li qak’oxlahom ut li qab’aanuhom rik’in li k’a’ru re musiq’ej.

Juntaq’eet x’aajelil ru li k’a’ru us naqab’aanu chiru li hilob’aal kutan rik’in li k’a’ru naqasik’ ru ink’a’ xb’aanunkil re xk’uulankil lix santilal. Naqatzol li evangelio, naqakawob’resi li qapaab’aal, nokowan sa’ komonil, nokok’anjelak chiru li qas qiitz’in, ut nokotz’aqon sa’ xkomoneb’ chik li chaab’il k’anjel rik’ineb’ li qajunkab’al ut li qamiiw.

Jalam-uuch

jun sumal neke’ril li loq’laj hu

Li xk’uulankil xsantilal li hilob’aal kutan a’an jun xloq’laj k’utb’esinkil li qaloq’onihom chiru li qaChoxahil Yuwa’ ut li Jesukristo. Naq naqajayali li k’a’ru naqab’aanu chiru li hilob’aal kutan rik’in li rajom li Dios choq’ re li kutan a’in, taqeek’a xsahil qach’ool ut tuqtuukilal. Tooch’oolaniiq sa’ musiq’ej ut too’ak’ob’resiiq sa’ tib’elej. Taqeek’a naq nach’ chik wanko rik’in li Dios ut taqachamob’resi li qasumwanjik rik’in li qaKolonel. Taqakʼuula qibʼ “chi maakʼaʼ qatzʼajnil xbʼaan li ruchichʼochʼ” (Tzol’leb’ ut Sumwank 59:9). Li hilob’aal kutan taa’ok choq’ jun “sahil kutan” (Isaias 58:13; chi’ilmanq ajwi’ raqal 14).

Li kuyuk sa’ naru nokoxtenq’a chi tuulano’k, chi nach’ok rik’in li Dios, ut chi ak’ob’resiik sa’ musiq’ej. Naq maji’ kixtikib’ lix k’anjel, li Jesukristo kixkuy xsa’ (chi’ilmanq Mateo 4:1–2). Sa’eb’ li loq’laj hu tz’iib’anb’ileb’ k’iila seraq’ chirixeb’ li profeet ut li kristiaan li ke’xkuy xsa’ re naq te’xnimob’resi lix musiq’ejil kawilal ut te’xk’ul li rosob’tesinkileb’ a’an malaj eb’ li ras riitz’in.

Na’ux li kuyuk sa’ ut li tijok sa’ komonil. Naq naqakuy qasa’ ut nokotijok rik’in paab’aal, naru chik naqak’ul li k’utb’esinb’il na’leb’. Naru ajwi’ chik naqak’e reetal li yaal ut naqataw ru li rajom li Dios.

Naq naqakuy qasa’, naqak’e tumin re li Iglees re xtenq’ankileb’ li wankeb’ rajom ru. Aʼan li mayej re li kuyuk saʼ yeebʼil re. B’oqb’ilo chixk’eeb’al jun mayej li juntaq’eet rik’in xtz’aq li tzakemq ink’a’ xqatzeka. Waklesinb’il qach’ool chixk’eeb’al xkomon chik chiru xtz’aq li tzakemq a’an wi nokoru. Naq naqak’e li mayej re li kuyuk sa’, yooko chi k’anjelak chiruheb’ li qas qiitz’in.

Li mayej re li kuyuk sa’ na’oksiman re xk’eeb’al li tzakemq ut li k’a’aq re ru aajel ru reheb’ li wankeb’ rajom ru, sa’ li qana’aj ut chiru chixjunil li ruchich’och’. Re xtawb’al chan ru nak’eeman li mayej re li kuyuk sa’, chi’ilmanq “ Chan ru xk’eeb’al li lajetqil ut xkomon chik li mayej” sa’ li tzolok a’in.

Li Iglees a’an b’eresinb’il xb’aan li Jesukristo rik’ineb’ li profeet ut li apostol. B’oqb’ileb’ laj jolominel a’in xb’aan li Dios, k’ojob’anb’ileb’, ut k’eeb’ileb’ xwankil re k’anjelak sa’ xk’ab’a’ li Kolonel.

Najter chaq, li Kristo kixk’e reheb’ lix apostol li wankilal ajwi’ a’in re li tijonelil, li kixk’eheb’ xwankil chixb’eresinkil lix Iglees chirix naq kitaqe’ sa’ choxa. Moqon kisachman li wankilal a’an naq li kristiaan ke’xtz’eqtaana li evangelio ut ke’kam li apostol.

Eb’ li choxahil taql ke’xk’ojob’ wi’chik li tijonelil sa’ 1829 rik’in li profeet aj Jose Smith, ut li Qaawa’ kixxaqab’ wi’chik lix Iglees rik’ineb’ li profeet ut li apostol. (Chi’ilmanq tzolok 1.)

Sa’ li junjunq chi na’ajej, eb’ li obiisp ut li awa’b’ej re oqech wankeb’ xwankil sa’ li tijonelil re xb’eresinkileb’ li ch’uut re li Iglees.

Naq neke’b’oqe’ ut neke’k’ojob’aak li winq ut li ixq re k’anjelak sa’ li Iglees, li Dios naxk’e wankilal reheb’ re k’anjelak sa’ li b’oqok a’an. Li wankilal a’in k’eeb’il reheb’ li misioneer, laj jolominel, laj k’utunel, ut xkomoneb’ chik toj reetal naq naraqe’ xb’oqb’aleb’. Li wankilal najek’man chi b’eresinb’il xb’aaneb’ li neke’k’amok reheb’ xlaawil li tijonelil.

Li wankilal re li tijonelil ka’ajwi’ naru na’oksiman sa’ tiikilal (chi’ilmanq Tzol’leb’ ut Sumwank 121:34–46). Li wankilal a’in, a’an jun loq’laj teneb’aak chixb’aanunkil ruuchil li Kolonel ut chi k’anjelak sa’ xk’ab’a’. Junelik tento na’oksiman re rosob’tesinkileb’ ut k’anjelak chiru as iitz’inb’ej.

Jalam-uuch

eb’ li saaj winq sa’ li dominkil tzoleb’aal

Li Tijonelil re Aaron ut li Tijonelil re Melkisedek

Sa’ li Iglees, wankeb’ wiib’ xjachalil li tijonelil, li Tijonelil re Aaron ut li Tijonelil re Melkisedek. Chi b’eresinb’il xb’aaneb’ li neke’k’amok reheb’ xlaawil li tijonelil, naq’axtesiman li Tijonelil re Aaron ut re Melkisedek sa’ xb’eeneb’ li winq komon re li Iglees li k’ulub’ejeb’. Chirix naq li tijonelil q’axtesinb’il re, li kristiaan nak’ojob’aak sa’ jun li opiis re li tijonelil a’an, jo’ aj tenq’anel malaj xb’eenil. Tento naq taak’ojob’aaq xb’aan li ani k’eeb’il xwankil chixb’aanunkil.

Naq jun winq malaj saaj winq naxk’ul li tijonelil, a’an na’ok sa’ sumwank rik’in li Dios naq tixtz’aqob’resi ru li loq’laj teneb’aak, taak’anjelaq chiru li ras riitz’in, ut taatenq’anq chixwaklesinkil li Iglees.

Eb’ li saaj winq naru neke’xk’ul li Tijonelil re Aaron sa’ li chihab’ te’xket wi’ 12 chihab’. Naru neke’k’ojob’aak choq’ aj tzolonel sa’ li chihab’ te’xket wi’ 14 chihab’, ut choq’ aj tij sa’ li chihab’ te’xket wi’ 16 chihab’. Eb’ li ak’ komon winq li tz’aqlojenaqeb’ xchihab’ naru neke’xk’ul li Tijonelil re Aaron moqon chirix naq neke’kub’e xha’ ut neke’k’ojob’aak choq’ komon. Eb’ laj k’amol re li Tijonelil re Aaron neke’xk’anjelaheb’ li k’ojob’anb’il k’anjel jo’ li loq’laj wa’ak ut li kub’iha’.

Chirix k’anjelak chiru jarub’aq kutan jo’ aj tij sa’ li Tijonelil re Aaron, jun winq li k’ulub’ej ut numenaq 18 chihab’ xyu’am naru naxk’ul li Tijonelil re Melkisedek ut nak’ojob’aak choq’ xb’eenil. Eb’ li winq li neke’xk’ul li Tijonelil re Melkisedek naru neke’xk’anjelaheb’ li k’ojob’anb’il k’anjel jo’ xk’eeb’al li osob’tesink re k’irtesink ut k’ojob’ank ch’oolej reheb’ lix komon ut jalaneb’ chik.

Chi’ilmanq Jolomil K’anjenel Hu, 38.2.9.1, re xtawb’al li na’leb’ chirixeb’ li ak’ komon li te’k’uluq re li tijonelil.

Eb’ li molam re li tijonelil. Jun molam a’an jun ch’uut chi aj k’amol re li tijonelil. Sa’ li junjunq chi teep wan jun xmolameb’ li xb’eenil choq’ reheb’ li winq. Eb’ li molam reheb’ laj tenq’anel, laj tzolonel, ut laj tij wankeb’ choq’ reheb’ li saaj winq.

Li Komonil re Tenq’ank. Neke’wulak sa’ li Komonil re Tenq’ank li ixq li numenaq 18 chihab’ xyu’ameb’. Eb’ li komon re li Komonil re Tenq’ank neke’xkawob’resiheb’ li junkab’al, li kristiaan, ut li tenamit.

Eb’ li Saaj Ixq. Eb’ li saaj ixq neke’ok sa’ li ch’uut reheb’ li Saaj Ixq sa’ xtiklajik li chihab’ neke’xket wi’ 12 chihab’.

Jalam-uuch

jun li ixq naxk’ut jun li tzol’leb’

Li Tzoleb’aal reheb’ li Kok’al. Eb’ li kok’al li 3 toj 11 chihab’ xyu’ameb’ neke’oken sa’ li Tzoleb’aal reheb’ li Kok’al.

Li Dominkil Tzoleb’aal. Eb’ li ninq ut eb’ li saaj neke’xik sa’ li Dominkil Tzoleb’aal, b’ar wi’ neke’ch’utla re xtzolb’aleb’ li loq’laj hu sa’ komonil.

Re xtawb’al xkomon chik li na’leb’ chirix li tijonelil, chi’ilmanq Jolomil K’anjenel Hu, ch’ol 3.

Re xtawb’al xkomon chik li na’leb’ chirixeb’ li molam re li tijonelil ut li k’anjenel ch’uut re li Iglees, chi’ilmanq Jolomil K’anjenel Hu, eb’ li ch’ol 8–13.

Li sumlaak wan wi’ jun winq rik’in jun ixq, a’an k’ojob’anb’il xb’aan li Dios. A’an q’axal aajel ru sa’ lix k’uub’anb’il na’leb’ choq’ reheb’ lix k’ulumeb’ li ralal xk’ajol sa’ li junelik q’e kutan.

Li junajil wan wi’ li b’eelomej ut li ixaqilb’ej jo’ sum aatin a’anaq raj lix komonileb’ jwal nim ru sa’ li ruchich’och’. Teneb’anb’il sa’ xb’eeneb’ naq te’roxloq’i rib’ chirib’ileb’ rib’ ut tiikaqeb’ rik’in lix sumwank re li sumlaak.

Juntaq’eet li b’eelomej rik’in li ixaqilb’ej sa’ rilob’aal li Dios. Maajun reheb’ taataqlanq sa’ xb’een li jun chik. Tento naq neke’xsik’ ru xb’ehileb’ sa’ junajil ut rahok, chi neke’tz’aqon sa’ wiib’al.

Naq li b’eelomej ut ixaqilb’ej neke’xra rib’ chirib’ileb’ rib’ ut neke’k’anjelak sa’ wiib’al, lix sumlajikeb’ naru taawanq jo’ xyo’leb’aal lix sahileb’ xch’ool q’axal nim. Naru neke’xtenq’a rib’ chirib’ileb’ rib’ ut eb’ lix kok’al chi xik sa’ xjayal li junelik yu’am.

Jo’ li sumlaak, li junkab’al k’ojob’anb’il xb’aan li Dios ut q’axal aajel ru sa’ lix k’uub’anb’il na’leb’ choq’ re xsahil qach’ool chi junelik. Jwal sahaq wi’chik xch’ool li qajunkab’al naq nokowan jo’ chanru lix k’utum li Jesukristo. Eb’ li na’b’ej yuwa’b’ej neke’xk’ut li evangelio chiruheb’ lix kok’al, ut neke’xyu’ami ajwi’. Sa’ li junkab’al naru taqara ut taqatenq’a qib’ chiqib’il qib’.

Li junkab’al a’anaq raj li k’a’ru q’axal aajel ru sa’ xyu’ameb’ li na’b’ej yuwa’b’ej. Li xch’oolaninkileb’ lix kok’al li neke’rala malaj neke’xk’ul, a’an jun santil osob’tesink ut teneb’ank choq’ reheb’ li na’b’ej yuwa’b’ej.

Wan li ch’a’ajkilal sa’ chixjunileb’ li junkab’al. Naq naqasik’ xtenq’ li Dios ut naqapaab’eb’ lix taqlahom, eb’ li ch’a’ajkilal sa’ li junkab’al naru toohe’xtenq’a chi k’iik. Wan naq eb’ li ch’a’ajkilal a’an nokohe’xtenq’a chixtzolb’al li jalb’a-k’a’uxlej ut li kuyuk maak.

Jalam-uuch

jun yuwa’b’ej naxtzol lix junkab’al

Eb’ laj jolominel re li Iglees neke’xwaklesi xch’ooleb’ li komon chixb’aanunkil jun q’ojyin re junkab’al rajlal xamaan. Eb’ li na’b’ej yuwa’b’ej neke’roksi li hoonal a’an re xk’utb’al li evangelio chiruheb’ lix kok’al, re xkawob’resinkil xkomonileb’, ut re saho’k sa’ xch’ooleb’ jo’ junkab’al. Eb’ laj jolominel re li Iglees ke’xpuktesi ajwi’ jun jek’inb’il aatin li naxk’uteb’ li xninqal ru na’leb’ chirix li junkab’al (chi’ilmanq “Li Junkab’al: Jun Jek’inb’il Aatin choq’ re li Ruchich’och’,” ChurchofJesusChrist.org).

Naru ajwi’ naqakawob’resi li qajunkab’al rik’in tijok, xtzolb’aleb’ li loq’laj hu, ut loq’onink sa’ komonil sa’ li iglees. Naru ajwi’ naqatz’il rix li resilal li junkab’al, naqach’utub’eb’ li seraq’ re li junkab’al, ut nokok’anjelak chiruheb’ li qas qiitz’in.

Naab’aleb’ li kristiaan ink’a’ neke’wan xhoonal chi sumlaak ut chi okenk sa’ jun junkab’al aj rahonel. Naab’aleb’ neke’xk’ul li jachok-ib’ ut jalan chik li ch’a’ajkilal sa’ li junkab’al. A’b’anan, li evangelio nokorosob’tesi chi junjunqil, maak’a’ naxye chan ru li qajunkab’al. Ut wi tiikaqo chi paab’ank, li Dios tixkawresi li b’e too’osob’tesiiq wi’ rik’in jun junkab’al aj rahonel, sa’ li yu’am a’in malaj li yu’am chal re.

Li santil ochoch a’an rochoch li Qaawa’. A’an jun loq’laj na’ajej b’ar wi’ naru noko’ok sa’ sumwank rik’in li Dios naq naqak’ul lix santil k’ojob’anb’il k’anjel. Naq neke’qapaab’ li sumwank a’in, taak’utmanq li wankilal re choxahilal sa’ li qayu’am (chi’ilmanq Tzol’leb’ ut Sumwank 84:19–22; 109:22–23).

Jun reheb’ li k’ojob’anb’il k’anjel naqak’ul sa’ li santil ochoch a’an li loq’laj tiqib’aak yeeb’il re. Li loq’laj tiqib’aak a’an jun maatan. Li maatan a’in a’an li nawom ut wankilal li nachal rik’in li Dios. Sa’ li loq’laj tiqib’aak, noko’ok sa’eb’ li sumwank rik’in li Dios li nokohe’xb’ak’ rik’in a’an ut li Jesukristo, li Ralal (chi’ilmanq ch’ol 1).

Eb’ li ninq naru neke’xk’ul li loq’laj tiqib’aak chirix naq numenaq jun chihab’ rokikeb’ sa’ li Iglees. Re xtawb’al xkomon chik li na’leb’ chirix li loq’laj tiqib’aak, chi’ilmanq Jolomil K’anjenel Hu, 27.2.

Lix k’uub’anb’il na’leb’ li Dios re sahil ch’oolejil naxkanab’ naq li komonil wank sa’ junkab’alej taaruuq chi kanaak chirix li kamk. Sa’ li santil ochoch naru nokosumla choq’ re li yu’am a’in ut li junelik q’e kutan A’in naxk’e chi uxmank naq eb’ li junkab’al naru te’wanq chi junelik.

Chirix naq eb’ li sumsuukeb’ ak xe’xk’ul li loq’laj tiqib’aak re li santil ochoch, naru te’tz’ape’q sa’ junajil malaj te’sumlaaq chi junelik. Eb’ li kok’al naru te’tz’ape’q sa’ junajil rik’ineb’.

Li b’eelomej ut ixaqilb’ej li tz’aptz’ookeb’ sa’ junajil sa’ li santil ochoch tento te’xpaab’eb’ li sumwank xe’ok wi’ re naq te’osob’tesiiq rik’in li junelikil sumlaak.

Jalam-uuch

jun sumal neke’b’eek sa’ li b’e