« មេរៀនទី ២០ ឯកសារគ្រូបង្រៀន ៖ ពរជ័យទាំងឡាយនៃសេរីភាពខាងសាសនា » ការបង្រៀន និងគោលលទ្ធិនៃព្រះគម្ពីរមរមន ឯកសារគ្រូបង្រៀន ( ឆ្នាំ ២០២១ )
« មេរៀនទី ២០ ឯកសារគ្រូបង្រៀន » ការបង្រៀន និងគោលលទ្ធិនៃព្រះគម្ពីរមរមន ឯកសារគ្រូបង្រៀន
មេរៀនទី ២០ ឯកសារគ្រូបង្រៀន
ពរជ័យទាំងឡាយនៃសេរីភាពខាងសាសនា
សេរីភាពខាងសាសនាគឺជាមូលដ្ឋាននៃសិទ្ធិមនុស្ស ។ ព្រះគម្ពីរមរមនមាននូវគំរូដ៏ច្រើនអំពីពរជ័យនៃសេរីភាពខាងសាសនាផង និងលទ្ធផលនៃការដាក់កំហិតលើសេរីភាពខាងសាសនាផង ។ នៅក្នុងមេរៀននេះ សិស្សនឹងមានឱកាសរកមើលពរជ័យនៃសេរីភាពខាងសាសនា ហើយវាយតម្លៃពីអ្វីដែលពួកគេអាចធ្វើបានដើម្បីជួយថែរក្សា និងការពារសេរីភាពនេះនៅជំនាន់របស់យើង ។
យោបល់សម្រាប់ការបង្រៀន
ស្ដេចម៉ូសាយស្ថាបនារដ្ឋាភិបាលមួយបែបដែលការពារដល់សេរីភាពខាងសាសនា ។
កំណត់ចំណាំ ៖ ស្ថានភាពនៃសេរីភាពខាងសាសនាមានលក្ខណៈខុសគ្នាខ្លាំងនៅទូទាំងពិភពលោកនេះ ។ នៅពេលអ្នកពិភាក្សាពីសេរីភាពខាងសាសនា សូមប្រយ័ត្នពីកាលៈទេសៈពិសេសនៅកន្លែងដែលអ្នករស់នៅ ។ សូមលើកទឹកចិត្តសិស្សឲ្យនិយាយប្រកបដោយការគោរពដល់រដ្ឋាភិបាល ព្រះវិហារផ្សេងទៀត និងប្រពៃណីខាងសាសនាទាំងអស់ ។
សូមរំឭកសិស្សថា ពេលរៀបចំខ្លួនសម្រាប់មេរៀននេះ ពួកគេត្រូវបានអញ្ជើញឲ្យធ្វើការសន្ទនាជាមួយមនុស្សម្នាក់ ឬច្រើននាក់ដែលមានសាសនាខុសគ្នា ។ សិស្សត្រូវបានលើកទឹកចិត្តឲ្យសួរបុគ្គលទាំងនេះថា ហេតុអ្វីសាសនារបស់ពួកគេសំខាន់ចំពោះពួកគេ និងសួរថាតើពួកគេធ្លាប់ជួបនឹងការបៀតបៀនខាងសាសនាដែរឬទេ ។ សូមឲ្យសិស្សមួយចំនួនចែកចាយអ្វីដែលពួកគេបានរៀនចេញពីការសន្ទនារបស់ពួកគេ ឬមកពីបទពិសោធន៍នាអតីតកាលជាមួយនឹងបុគ្គលដែលកាន់ជំនឿផ្សេងទៀត ។
សូមពិចារណាពីសំណួរខាងក្រោមនេះមួយ ឬច្រើន ៖
-
តើអ្នកឲ្យនិយមន័យលើសេរីភាពខាងសាសនាយ៉ាងដូចម្តេចដែរ ? ( ប្រសិនបើចាំបាច់ សូមអញ្ជើញសិស្សឲ្យរំឭក សេចក្ដីផ្ដើម និង ផ្នែកទី ១ នៃឯកសាររៀបចំ ) ។
-
ហេតុអ្វីអ្នកគិតថា វាសំខាន់សម្រាប់មនុស្សទាំងអស់ដើម្បីមានសិទ្ធិបញ្ចេញមតិ និងធ្វើសកម្មភាពស្របតាមជំនឿសាសនារបស់ពួកគេ ? ( វាអាចមានប្រយោជន៍ដើម្បីរំឭក មាត្រានៃសេចក្ដីជំនឿទីដប់មួយ និង សេចក្ដីថ្លែងការណ៍របស់ប្រធាន យ៉ូសែប ស៊្មីធ នៅក្នុងផ្នែកទី ១ នៃឯកសាររៀបចំ ) ។
-
តើជីវិតរបស់យើងអាចរងឥទ្ធិពលយ៉ាងដូចម្ដេច ប្រសិនបើយើងមិនមានសេរីភាពដើម្បីបញ្ចេញមតិ ឬធ្វើសកម្មភាពស្របតាមជំនឿស្នូលរបស់យើង រួមទាំងទស្សនៈខាងសាសនារបស់យើងទេនោះ ? តើមានឧទាហរណ៍ណាខ្លះស្ដីពីការគំរាមកំហែងដល់សេរីភាពខាងសាសនានៅជំនាន់របស់យើង ?
សូមរំឭកសិស្សថា ស្ដេចម៉ូសាយបានបង្កើតច្បាប់មួយដើម្បីការពារប្រជាជនក្នុងនគររបស់ទ្រង់ ដែលត្រូវបានបៀតបៀនដោយសារតែជំនឿរបស់ពួកគេ ។ អ្នកអាចរំឭក ម៉ូសាយ ២៧:១–៤ ជាមួយនឹងសិស្ស ហើយសូមសួរ ៖
-
តើយើងអាចរៀនអ្វីខ្លះអំពីសេរីភាពខាងសាសនាចេញពីសេចក្ដីប្រកាសរបស់ស្ដេចម៉ូសាយ ?
សូមពិចារណាបង្ហាញរូបភាពដែលអមមកជាមួយនេះ ហើយអញ្ជើញសិស្សឲ្យសង្ខេបយោបល់មួយចំនួនដែលកូរីហូរបានបង្រៀន ( សូមមើល ផ្នែកទី ១ នៅក្នុងឯកសាររៀបចំ ) ។ សូមអញ្ជើញសិស្សឲ្យរំឭក អាលម៉ា ៣០:៧–៩, ១១ ហើយរកមើលខគម្ពីរណាដែលបង្រៀនអំពីសេរីភាពខាងសាសនា ។ សូមពិចារណាថា តើអ្នកអាចសួរសំណួរខាងក្រោមណាមួយ ដែលនឹងជួយសិស្សរបស់អ្នកឲ្យរៀនកាន់តែស៊ីជម្រៅបានល្អបំផុត ៖
-
តើយើងអាចរៀនអ្វីខ្លះចេញពីខគម្ពីរទាំងនេះ អំពីគុណតម្លៃដែលព្រះវរបិតាសួគ៌បានដាក់លើសេរីភាពខាងសាសនា ? ( សិស្សអាចរកឃើញគោលការណ៍មួយដែលស្រដៀងគ្នាដូចតទៅនេះ ៖ ព្រះសព្វព្រះទ័យឲ្យបុត្រាបុត្រីរបស់ទ្រង់ទាំងអស់មានសិទ្ធិ និងអភ័យឯកសិទ្ធស្មើគ្នា ដើម្បីពួកគេមានសេរីភាពក្នុងការជ្រើសរើសដើម្បីបម្រើទ្រង់ដោយគ្មានការបង្ខិតបង្ខំ ព្រមទាំងមានសេរីភាពដើម្បីជ្រើសរើសមិនបម្រើទ្រង់ផងដែរ ) ។
-
ហេតុអ្វីបានជាវាសំខាន់នៅក្នុងផែនការរបស់ព្រះថា យើងមិនត្រូវបានបង្ខំឲ្យជឿលើ ឬធ្វើតាមទ្រង់នោះ ?
-
តើវាមានន័យចំពោះអ្នកយ៉ាងណាដែរ ពេលព្រះវរបិតាសួគ៌ និងព្រះយេស៊ូវគ្រីស្ទនឹងមិនបង្ខំអ្នកឲ្យជឿលើ ឬធ្វើតាមទ្រង់ទាំងទ្វេនោះ ? តើចំណុចនេះបង្រៀនអ្នកអ្វីខ្លះអំពីគុណលក្ខណៈរបស់ទ្រង់ទាំងទ្វេ ?
-
តើសេរីភាពខាងសាសនាមានអត្ថប្រយោជន៍ដល់សមាជិកទាំងអស់ក្នុងសង្គមតាមរបៀបណា ? តើវាមានប្រយោជន៍ចំពោះអ្នកយ៉ាងណាដែរ ?
មេទ័ពមរ៉ូណៃលើកទង់ឥស្សរភាព ហើយកេណ្ឌប្រជាជនឲ្យរក្សាសេរីភាព ។
សូមអញ្ជើញសិស្សពីរបីនាក់ឲ្យចែកចាយឧទាហរណ៍អំពីរបៀបដែលឥស្សរភាពខាងសាសនាអាចត្រូវបានគេគំរាមកំហែង ។ ( ប្រសិនបើចាំបាច់ អ្នកអាចសូមឲ្យពួកគេរំឭក ផ្នែកទី ២ នៃឯកសាររៀបចំនេះ ) ។
សូមអញ្ជើញសិស្សឲ្យអាន អាលម៉ា ៤៦:៤, ១០ រួចហើយពន្យល់ពីរបៀបដែលអាម៉ាលិកាយបានគំរាមកំហែងដល់សេរីភាពរបស់ពួកសាសន៍នីហ្វៃ រួមទាំងសេរីភាពខាងសាសនារបស់ពួកគេផងដែរ ។ សូមសួរសិស្សថា តើមេទ័ពមរ៉ូណៃបានឆ្លើយតបនឹងការគំរាមកំហែងនេះយ៉ាងដូចម្ដេច ។ ( ប្រសិនបើចាំបាច់ សូមឲ្យសិស្សរំឭក អាលម៉ា ៤៦:១២–១៣, ១៩–២០ ) ។ សូមពិចារណាពិភាក្សាសំណួរដូចតទៅនេះ ៖
-
តើគោលការណ៍នៃដំណឹងល្អអ្វីខ្លះស្ដីពីសេរីភាពខាងសាសនា ដែលយើងអាចរៀនមកពីកិច្ចខិតខំរបស់មេទ័ពមរ៉ូណៃ និងប្រជាជនរបស់លោក ? ( សូមជួយសិស្សឲ្យរកមើលគោលការណ៍មួយស្រដៀងគោលការណ៍ដូចតទៅនេះ ៖ នៅពេលយើងអំពាវនាវដល់ព្រះ ហើយរៀបចំខ្លួនយើងដើម្បីធ្វើសកម្មភាព នោះទ្រង់នឹងពង្រឹងយើងក្នុងកិច្ចការពារដល់ក្រុមគ្រួសាររបស់យើង សាសនារបស់យើង និងសេរីភាពរបស់យើង ) ។
-
តើមេទ័ពមរ៉ូណៃ និងទង់ឥស្សរភាពមានឥទ្ធិពលអ្វីខ្លះលើប្រជាជន ? ហេតុអ្វីយើងត្រូវការជំនួយរបស់ព្រះវរបិតាសួគ៌ នៅក្នុងកិច្ចខិតខំរបស់យើងដើម្បីការពារសេរីភាពខាងសាសនា ?
-
តើការការពារសេរីភាពខាងសាសនារបស់មេទ័ពមរ៉ូណៃ ស្រដៀងគ្នានឹងរបៀបដែលព្រះយេស៊ូវគ្រីស្ទ បានការពារសេរីភាពដើម្បីជ្រើសរើសរបស់យើងតាមរបៀបណា ?
ដើម្បីជួយសិស្សឲ្យពិចារណាពីរបៀបមានសុជីវធម៌ នៅពេលការពារសេរីភាពខាងសាសនា អ្នកអាចបង្ហាញសេចក្ដីថ្លែងការណ៍ដូចខាងក្រោមដោយប្រធាន ដាល្លិន អេក អូក នៃគណៈប្រធានទីមួយ ៖
យើងគួរស្រឡាញ់មនុស្សទាំងអស់ ធ្វើជាអ្នកស្តាប់ដ៏ល្អ ហើយបង្ហាញការព្រួយបារម្ភចំពោះជំនឿដ៏ស្មោះសររបស់មនុស្សដទៃ ។ យើងគួរតែមានប្រាជ្ញាក្នុងការពន្យល់ ហើយបង្ហាញពីជំនឿយើង និងប្រើឥទ្ធិពលយើង។ យើងគួរតែស្វែងយល់ដឹង និងគាំទ្រអ្នកដែលមិនជឿ ។ ហើយយើងក៏ត្រូវតែចូលរួមនឹងសកម្មភាពផ្លូវការនានារបស់រដ្ឋាភិបាល និងស្ថាប័នពហុជាតិដែលសមស្របផងដែរ ។ ទាំងអស់នេះគឺចាំបាច់ដើម្បីរក្សាសេចក្ដីល្អដ៏អស្ចារ្យ ដែលស្ថាប័នសាសនា និងអ្នកជឿទាំងឡាយអាចសម្រេចបាន ដើម្បីជាប្រយោជន៍ដល់មនុស្សជាតិទាំងអស់ ។( « Challenges to Religious Freedom » [ សុន្ទរកថានៅឯ Argentina Council for Foreign Relations ( CARI ) នៅថ្ងៃទី ២៣ ខែ មេសា ឆ្នាំ ២០១៥ ] នៅលើគេហទំព័រ newsroom.ChurchofJesusChrist.org )
ដើម្បីជួយសិស្សឲ្យរៀនអនុវត្តការការពារសេរីភាពខាងសាសនា សូមអញ្ជើញពួកគេឲ្យធ្វើការជាមួយនឹងដៃគូម្នាក់ ហើយពិភាក្សាពីរបៀបដែលពួកគេនឹងឆ្លើយតបចំពោះស្ថានភាពខាងក្រោមនេះ ៖
អ្នកមានមិត្តភក្តិកាន់សាសនាអ៊ីស្លាមម្នាក់នៅកន្លែងធ្វើការ ដែលស្វែងរកកន្លែងឯកជនមួយដើម្បីអធិស្ឋាន អំឡុងម៉ោងសម្រាករបស់គាត់ ។ មិត្តរួមការងារបីបួននាក់ចាប់ផ្ដើមសើចចំអកចំពោះការធ្វើបែបនេះ ។ មិត្តរួមការងារម្នាក់បានពោលនៅចុងក្រោយថា « គាត់គួរតែទុកសាសនារបស់គាត់សម្រាប់តែខ្លួនគាត់ទៅ ហើយមិនគួរមកអនុវត្តវានៅកន្លែងធ្វើការនោះទេ » ។ រួចហើយនាងងាកមករកអ្នក ហើយនិយាយថា « តើអ្នកគិតយ៉ាងណាដែរ ? »
បន្ទាប់ពីសិស្សមានពេលពិភាក្សាគ្នាពីចម្លើយរបស់ពួកគេជាមួយនឹងដៃគូខ្លួនហើយ សូមអញ្ជើញសិស្សពីរបីនាក់ឲ្យចែកចាយរបៀបដែលពួកគេបានឆ្លើយតបចំពោះស្ថានភាពនេះ ។
ការអភិវឌ្ឍការបង្រៀន និងការរៀនសូត្ររបស់យើង
សូមអញ្ជើញសិស្សឲ្យដាក់គោលដៅ ។ ប្រធាន អិម រ័សុល បាឡឺដ ក្នុងកូរ៉ុមនៃពួកសាវកដប់ពីរនាក់បានសង្កេតឃើញថា « ខ្ញុំជឿជាក់យ៉ាងខ្លាំងថា ប្រសិនបើយើងមិនដាក់គោលដៅនៅក្នុងជីវិតរបស់យើង ហើយមិនរៀនគ្រប់គ្រងរបៀបរស់នៅដើម្បីសម្រេចគោលដៅរបស់យើងទេនោះ នៅពេលយើងចាស់ទៅ ហើយក្រឡេកមើលទៅជីវិតរបស់យើងពីមុនវិញ យើងអាចមើលឃើញថា យើងបានសម្រេចបានដែរ ប៉ុន្ដែគ្រាន់តែមួយផ្នែកតូចប៉ុណ្ណោះនៃសក្ដានុពលទាំងមូលរបស់យើង » ( « Do Things That Make a Difference » Ensign ខែ មិថុនា ឆ្នាំ ១៩៨៣ ទំព័រ ៦៩–៧០ ) ។ សូមផ្ដល់ឱកាសឲ្យសិស្សគិត និងដាក់គោលដៅជាក់លាក់ដែលអាចជួយពួកគេឲ្យធ្វើសកម្មភាពដ៏មានប្រសិទ្ធភាព និងសុចរិត ។ ប្រសិនបើគោលដៅរបស់ពួកគេមិនផ្ទាល់ខ្លួនខ្លាំងពេកទេ សូមអញ្ជើញឲ្យសិស្សចែករំលែកគោលដៅរបស់ពួកគេជាមួយអ្នក ហើយពិចារណាពីរបៀបដែលអ្នកអាចតាមដានសិស្សអំពីគោលដៅរបស់ពួកគេ ។
សូមអញ្ជើញសិស្សឲ្យដាក់គោលដៅជាក់លាក់មួយ អំពីអ្វីដែលពួកគេអាចធ្វើបានដើម្បីរៀបចំខ្លួនកាន់តែប្រសើរឡើង ដើម្បីការពារសិទ្ធិសេរីភាពខាងសាសនាដ៏ពិសិដ្ឋនេះ ។ ( វាអាចមានប្រយោជន៍ដើម្បីបង្ហាញ និងរំឭកដល់ សេចក្ដីថ្លែងការណ៍ដោយអែលឌើរ រ៉ូបឺត ឌី ហ៊ែល នៅក្នុងផ្នែកទី ២ នៃឯកសាររៀបចំ ) ។ សូមពិចារណាអញ្ជើញសិស្សឲ្យសរសេរផែនការសកម្មភាពសាមញ្ញមួយ ដើម្បីសម្រេចឲ្យបានគោលដៅរបស់ពួកគេ ។ សូមពិចារណាថ្លែងទីបន្ទាល់របស់អ្នកអំពីសារៈសំខាន់នៃសេរីភាពខាងសាសនា ដើម្បីបញ្ចប់មេរៀននេះ ។
សម្រាប់ពេលក្រោយ
ចូរសូមឲ្យសិស្សពិចារណាអំពីមូលហេតុដែលសេចក្ដីឆ្មើងឆ្មៃគឺជាបាវចនាទូទៅមួយនៅក្នុងព្រះគម្ពីរមរមន ។ សូមចង្អុលបង្ហាញថា ប្រធានអ៊ែសរ៉ា ថាហ្វ ប៊ែនសឹន បានសង្កេតឃើញថា « សេចក្ដីឆ្មើងឆ្មៃគឺជាអំពើបាបមួយ ដែលអាចឃើញនៅលើមនុស្សដទៃបានយ៉ាងងាយ ប៉ុន្ដែកម្រនឹងឃើញនៅក្នុងខ្លួនឯងណាស់ » ( « Beware of Pride » Ensign ខែ ឧសភា ឆ្នាំ ១៩៨៩ ទំព័រ ៥ ) ។ សូមអញ្ជើញឲ្យសិស្សពង្រីកការយល់ដឹងរបស់ពួកគេឲ្យកាន់តែស៊ីជម្រៅលើការបង្រៀនអំពីសេចក្ដីឆ្មើងឆ្មៃនៅក្នុងព្រះគម្ពីរមរមន និងរបៀបដែលសេចក្ដីឆ្មើងឆ្មៃអាចមានឥទ្ធិពលលើជីវិតរបស់ពួកគេ ។