Aoaoina Atu o le Talalelei i Totonu o le Aiga

O o tatou aiga e le gata ina avea ma sulufaiga ae o ni nofoaga o sauniuniga ia mafai e o tatou tupulaga talavou ona o atu i luma ma le lototetele e taitai ma faafeagai ma se lalolagi fesouaina. Ua tatou iloa o le mea tatou te aoaoina i le aiga e i ai se tulaga ofoofogia e tausisia pea; o mea e vaaia ma tutupu i le aiga a lē fesoasoani i tupulaga talavou i tausaga a sau po o le faatamaia ai foi. E mafai ona avea o tatou aiga ma faataitaiga mo tagata uma, ae peitai e tatau ona tatou matua faatauaina fautuaga a taitai o le Ekalesia e uiga i lenei autu nai lo le mea sa tatou faia muamua e oo mai i le taimi nei. E masani ona avea lenei mea ma luitau faapitoa, ae ua sili atu i le taimi lenei ona o le tulaga lautele o le faaleagaina o aiga ua i ai i o tatou taimi. O fanau e mafai ona latou “lagona ma vaai” i le faatinoina o le talalelei i le aiga. E mafai ona latou vaai i lona sa’o lele ma lona mana mo le taimi muamua; e mafai ona latou iloa pe faapefea ona faamalieina e le talalelei manao o tagata taitoatasi.²

E tautalagia pea lava pea le faamatalaga o le aiga o le faavae o se olaga amiotonu. … Ua tau mai ia te i tatou e faaaliga a le Atua ma aoaoga a tagata le taua tele o le aiga i le faafaileleina o le poto masani faaleolaga o le tagata.³

Ua faasolo ina manino mai lava o le aiga o le ki i le lumanai o le Ekalesia. O se tamaitiiti e le alofagia, o se tamaitiiti e le iloa le amio pulea, e le iloa galue, e le iloa foi ana matafaioi, e masani ona gauai atu i amioga faasatani ia e suitulaga mo le fiafia—fualaau faasaina, faataitai ona fai uiga feusuai, ma le fouvale, pe ala i le mafaufau i ai po o amioga foi. …

E leai se isi nofoaga sili atu nai lo le aiga e aoao ma aoaoina ai e uiga i le faaipoipoga, alofa, ma feusuaiga aua o nei mea e mafai ona tuufaatasia i le tulaga sao i se faaipoipoga faalemalumalu faa paiaina. E leai se isi nofoaga sili e foia ai masalosaloga o o tatou talavou nai lo le nofoaga o i ai le alofa—le aiga. O le alofa e mafai ona faasaolotoina o tatou talavou e faalogo ia i latou ua latou iloa e latou te faatuatuaina. …

Pe mafai ea e se tamaititi ona alofa i lona tuaoi pe afai na te le iloa alofa ia te ia lava? Pe mafai e se tagata talavou e le i mafai ona faatuatuaina ona aoao e faatuatuaina? Pe mafai e se alii talavou e le iloa le galue po o matafaioi ona vaai i le mafuaaga e manaomia ai nei uiga taua e tuufaatasia ai lo tatou siosiomaga atoa? Pe mafai e se tamaitai talavou e le i avea ma se vaega o talanoaga faamaoni faasamasmanoa o mataupu faavae o le talalelei i totonu o lona aiga ona tali atu i faitioga a le lalolagi ma tala e faamaina ai lona tulaga malamalama i lana lotu?… A aunoa ma se poto masani e ala i le ola ai i le mataupu faavae o le talalelei, o le a sili atu ona faigata ona talitonu i lena mataupu faavae. …

I se vaitaimi sa tau mai ai ia te i tatou o le a pei lava o taimi o Noa, e tatau ona tatou fesoasoani i o tatou tupulaga talavou e aoao i le faia o filifiliga tonu, e tuputupu ae i se olaga faaletagata aloaia, aemaise lava pe a mafai ona latou i lalo o aafiaga tuusao o le aiga, lea e mafai ai e le alofa faaleaiga ona faatino ma faataua le salamo. O le siosiomaga o o tatou talavou i fafo atu o le aiga ma le Ekalesia e masani ona gaogao e tusa ai o uiga taua, pe o le a i ai foi ni manatu e feteenai ma mataupu faavae o le talalelei.⁴

I luga o matua i le aiga ma luga o le Ekalesia ua tuuina atu i ai se matafaioi sili e aoao le upu moni o le talalelei lea o le a avea ma taula i agaga taitasi. A aunoa ma lenei taula, o le a avea le tagata e pei o “peau o loo felafoaiina,” ma feaveaiina e matagi uma lava o mataupu le faavaea o le a fenumiai i lona mafaufau ma mea sese i le silafaga a le Atua [tagai Efeso 4:14; Iakopo 1:6]. E tatau ona pito sili atu ona aoaoina i tatou i luga o le fogaeleele pe afai tatou te usiusitai i faatonuaga a le Alii.

Afai e faamalolosia faapea o tatou tupulaga talavou, o le a le mafai ona faalavelaveina o latou faatuatuaga faalelotu pe a latou fetaiai ma manatu sese faaleaoaoga e feteenai ma upu moni o le talalelei. Ua faaauupegaina i latou e tetee atu i u fanafana oona o le taufaaleaga ma le pepelo.

Alii talavou…, afai e taitaia o latou mafaufauga e le upu moni “faavae,” o le a le gauai atu i se taimi o le vaivai pe a aunoa ma se puipuiga, i se faaosoosoga e faatamaia ai uiga lelei i o latou olaga atoa. …

Le au talavou pele o ē ua oo i le taimi e faaipoipo ai, afai e taitaiina outou e manatu e pei ona tuuina mai e le talalelei moni, o le a faamamaina outou e ala i le tausia o le tulafono o le faaipoipoga faaselesitila e maua ai le fiafia e faavavau.⁵

Sa tau mai e le Alii e lei tuuina atu ia Satani le mana e faaosooso ai tamaiti, “vagana ona ua tatau ia te au ona sueina a latou amio i ou luma” (MFF 29:47). Ona mulimuli mai ai lea o lenei faamatalaga taua: “Ina ia sueina mea sili mai o latou tama” (MFF 29:48). O lenei, o lona uiga o matua. Aisea lava le mafuaaga ua le faatagaina ai e le Alii Satani e faaosooso i tamaiti vagana ua oo i tausaga e tatau ai? O le mafuaga ina ia tuu atu i matua le avanoa faaauro e toto ai i loto o fanau laiti ia mea taua ae lei oo i tausaga e tatau ai, a leai, o le a tuai i matua ona toto ia mea i loto o a latou fanau.⁶

O i tatou, o tama, o faiaoga, o tina, ua i ai ia i tatou [se galuega] sili i le fausiaina o agaga o tagata. E moni, e le mafai e Satani ona faaosooso tamaiti ae lei oo i tausaga e tatau ai; ae peitai o loo faia e Satani mea uma na te mafaia e ala i le taumafai e faaosooso i latou ua tuuina atu i ai le vaaiga ma le aoaoina o i latou ina ia faatalale ma faatamala ma faatagaina i latou e atinae uiga faatauvaa o le a taitai ese mai ai i latou, ma o le a [faia i latou] ia le agavaa mo le matafaioi sili i le tauvaga ma Satani, ma le mafai ai ona ofu i le ofutau i le taimi e taunuu ai i tausaga e tatau ai.⁷

E tatau ona tatou faamamafa i luga o tama uma o le a fesiligia o ia e tusa ai ma le tulaga solo lelei e faavavau o lona aiga: o lona uiga o le o mai i le Ekalesia ma lona aiga; o lona uiga o le auai i le sauniga faamanatuga ma lona aiga; o lona uiga o le faia o afiafi faaleaiga e tuufaatasia ai ma faamaopoopo lona aiga; o lona uiga o le saunia lea o ia lava e ave lona aiga i le malumalu, ina ia mafai ona saunia ai i latou mo laasaga ia o le a fausia ai se aiga e faavavau.⁸

Oi, outou tina, outou tama, ou te aioi atu ia toe foi i se lagona o ia te outou se matafaioi atoatoa mo ia agaga faapelepele. Afai tou te le saunia i latou mo lenei aso o le a oo mai, o ai la e faia? I lena aso pe a afio mai [le Alii] e pei o se gaoi i le po, o e saunia ea i latou e tutu atu i lona afioaga? Ao i ai i latou i luga o le malae o le taua, ao faafeagai i latou ma tulaga matautia, ma feagai ma faaosoosoga, pe mafai ea e lou alofa faatina ona aapa atu i le afe o maila o loo valavala ai ma taofi lena atalii ma lena afafine ina ia tumau?⁹

Sa tusia e le perofeta o Enosa e uiga i aoaoga a lona tama. Sa ia faapea mai, “Faauta, ua oo ina iloa e au o Enosa o lo’u tama o le tagata amiotonu ia, aua na ia aoaoina mai ia te au. … i le ma le aoaiga ma le apoapoaiga a le Atua. … Ia faamanuiaina lava le suafa o lo’u Atua ona o lena mea” (Enosa 1:1). Sa ou mafaufau loloto i lena lava faamtalaga, “Sa aoaoina au e lou tama i le aoaiga.” O le a le uiga o lena mea? O le aoaiga o lona uiga o se ala faagaoioiga o aoaoga ma pulega lelei. “Sa aoaoina ma pulea lelei au e lou tama i aoaoga e tatau ai.” O le a le uiga o apoapoaiga?

O lona uiga o ni aoaiga, lapataiga po o le faamanatu malie mai i se uiga faale-uo. Ia faamanu i le suafa o le Atua mo le tama ma le tina o loo aoao atu i le aoaiga ma apoapoaiga a le Alii!¹⁰

O le Alii lava ia na fetalai manino e uiga i lenei sauniuniga mo le puipuia o tupulaga talavou mai mailei matautia e ono faaumatia ai i latou. Ua ia tuuina mai se tiute tauave i luga o aiga o lenei laueleele. O ana upu nei:

“O lenei foi, afai e maua fanau e matua i Siona, po o se siteki ua faatulagaina, e le aoaoina atu ia te i latou ia malamalama le mataupu o le salamo, ma le faatuatua ia Keriso, le Atalii o le Atua Soifua, ma le papatisoga, ma le meaalofa o le Agaga Paia i le faaeeina o lima, pe a valu tausaga o lona matua, o le a pau lea agasala i matua. ….

“O le a latou aoao atu foi i a latou fanau ia tatalo, ma savavali tonu i luma o le Alii.” [MFF 68:25, 28.]¹¹

O le auupega sili ona malosi o i ai ia i tatou e tetee atu ai i le fili i le lalolagi, po o a lava ia fili, o se molimau maumaututu lea o le Alii ma le Faaola, o Iesu Keriso. Ia aoao lau fanau laiti ao iai i latou i ou tulivae ma o le a latou tuputupu ae ma avea ma ni tagata malolosi ma le lototetele. Atonu o le a sē i latou, ae o lou alofa ma lou faatuatua o le a toe aumaia ai i latou.¹²

E tatau i matua ona manatua a latou galuega i le faamaoni atoatoa, ia vaai ia leai se tasi e faatalanoa, ia aua nei tuputupu ae fanau i le amioleaga, ae ia aoao i latou e saili ma le filifiliga oa o le faavavau, ma ia aua nei tumu o latou mata i le manumanu (tagai MFF 68:30–31). O lenei o le matafaioi lena a le tama ma le tina. Ua tuuina mai e le Alii le matafaioi muamua i matua o le aoaoina lea o le aiga.¹³

O fanau taitasi e tatau ona aoao o ia o se atalii poo se afafine a ni matua faalelagi ma o loo i ai ia te ia le aia e aoao ai ma amio ai e pei o se atalii po o se afafine o le Atua ina ia oo i le taimi e manaomia ai se fesoasoaniga e tatalo atu ma mafai ona talia mai e tusa o se fanau faamaoni.

E tatau ona aoao fanau taitasi o lona tino o le malumalu o le Atua ma o se faaleaga i le malumalu o le Atua, o le a faaleagaina lena tagata e le Atua [tagai 1 Korinito 3:16–17].

E tatau ona aoao fanau taitasi o le faatuatua e lava mo le faaatoatoaina, e na o le ositaulaga e mafai ona atinae ai ma seiloga e aoao e ositaulaga ona tuinanau ma manaoga faaletino e ala i le usiusitai i tulafono o le Talaleleli o le a le mafai ona faapaiaina o ia ma faia ia atoatoa i luma o le Alii.

E tatau ona aoao fanau taitasi e faaaloalo i faailoga o mea paia ma faaaloalo i e pule i aiga, i totonu o le Ekalesia, ma totonu o nuu.

E tatau ona aoao faalelei fanau taitasi i le faaaogaina o o latou lima ma mafaufau ma ia faia ia malamalama na tuuina mai e le Atua ni lagona faananau mo se faamoemoega faaleatua pe a pulea lelei.

E tatau ona aoao fanau taitasi e faaaoga tatau ona taimi samasamanoa ma a taalo, ia lē na ona taalo. Ua na o se faataitaiga o se vaega o le a ia faia i lona olaga faatagata matua.

E tatau ona lava le poto masani e maua e fanau e iloa ai o le auauna atu ma le lē manatu faapito e aumaia ai le fiafia ma o le galuega e faia e se tasi e aunoa ma se totogi o le galuega lena e maua ai le fiafia silisili.¹⁴

E tatau ona faalogo a tatou fanau, i totonu o puipui o fale, i molimau a o latou matua. E maeu le poto o se tama po o se tamamatua e avea ma ana masani le tuuina atu o lana molimau patino i lana fanau, taitoatasi!¹⁵

Sa toe faamamafa atili mai le aoaoina o fanau i totonu o le aiga e matua e ala i le polokalama ua tatou taua o le afiafi faaleaiga. E le o se polokalama fou lenei mea. … I le tusi talu ai sa tusia i le Ekalesia e Peresitene Polika Iaga ma ona fesoasoani, sa aioi atu ai i matua e faapotopoto faatasi a latou fanau ma aoao i latou i le talalelei i totonu o le aiga i se tulaga faifai pea. Ma o le afiafi faaleaiga sa uunaia mai talu ona faatuina le Ekalesia i lenei tisipenisione.¹⁶

Afai tatou te faatalale i o tatou aiga iinei i le faia o afiafi faaleaiga, ma tatou le faia lo tatou tiutetauave iinei, faamata o le a se vaaiga e i ai pe afai tatou te le maua i latou ona o lo tatou faatalale? O le a le avea le lagi ma se lagi seiloga ua faia mea uma tatou te mafai e faaolaina ai i latou sa auina mai e le Alii i lo tatou gafa. O lea e tatau ai ona faaliliuina loto o outou tama ma tina i a outou fanau i le taimi nei, pe afai o ia te outou le agaga moni o Elia, ma lē manatu ua faatatau lena tulaga mo na o i latou o i tua atu o le veli. Ia tuuina atu o outou loto ia faaliliuina i a outou fanau, ma ia aoao a outou fanau; ae tatau ona outou faia a o lava lo latou laiti e aoao lelei ai i latou. Ma afai o outou faatalale i a outou afiafi faaleaiga, o lona uiga ua outou faatalale i le amataga o le misiona a Elia e pei lava foi ua outou faatalale i a outou galuega o le sailia lea o gafa.¹⁷

Pe o tatou faaauau pea ona galulue i totonu o lio faaleaiga ma a tatou fanau faapea foi ma a latou fanau? Pe o tatou sailia ea i a tatou mamoe o loo i le tulaga matautia o le sē ese atu mai le leoleo mamoe poo le lafu? Pe o tatou aoaoina o tatou aiga [i] afiafi faaleaiga? Pe o faia ea a tatou afiafi faaleaiga na o i tatou lava pe o tatou faapea ifo, “Se, o nei lesona e le aoga ia i taua, ua na o A’u foi ma Tina, ma o le afiafi faaleaiga e mo na o i latou e i ai fanau iti”?¹⁸

Sei ou fesili atu ia te outou i se fesili. Afai e te iloa o loo e faataotolia i se mai ua le aoga i ai se togafiti ma ua puupuu ou taimi i le lalolagi ma o loo i ai ia te oe se aiga ma ni fanau laiti o loo faalagolago ia te oe mo fautuaga, mo faatonuga, mo le taitaiga, o le a se mea o le a e faia ina ia saunia ai i latou mo lou oti? Pe ua e tu ea ma fesiligia oe lava i lena ituaiga fesili ogaoga?

Sei ou faitau atu ia te outou… mai se tusi a [se tina]: “Ina ua ou faatoa auai i le Ekalesia, sa masani ona ou mafaufau i se ituaiga aiga ou te faamoemoe e maua i se aso. Sa ou faaoso i ou mafaufauga e faaataata mai ia te au se mea sili ona matagofie ma faamalie loto e mafai ona ou vaaia. Sa ma faatinoina lena ata faalemafaufau ma lou toalua ina ua faapotopoto faatasi le ma fanau ma aoao atu ia te i latou le talalelei. … E tasi le mea sa faateia ai i ma’ua ma ua ma fiafia tele ai o le mea moni o le ma fanau, e le fuatasi, ua aoaoina e fiafia i a matou afiafi faaleaiga. … Sa amata ona faateleina lou iloa i le vave ona matutua o la maua fanau ma le pupuu o taimi sa ma’ua maua o ni matua e aoao ai i latou…

“Sa maua au i se mai faigata i le tautoulu ua tea atu. Ou te faamoemoe e lē atagia ai se lotovii i lenei mea, ae o le taimi muamua lea faatoa ou iloa ai lo’u taua i la’u lava fanau. … Ao ou taoto ua le mafai ona ou tali atu i o latou manao, sa ou iloa a lē faasalavei mai lou Tama Faalelagi, semanu ua muta o’u aafiaga mo i latou i lenei olaga, e foliga mai e maeu le manaomia ma le pele o itula o vaiaso ma masina ma tausaga o le lumanai.

“Sa tele mea sa ou naunau i ai i lena taimi e tusa o le faaaogaina o na taimi pe afai e tuuina mai ia te au. O se tasi o le faia lea o sina vaega itiiti i luga o le fogaeleele, e faaaluina ai le taimi i po taitasi e faitau ma talatalanoa ai i le fanau. … E le gata i isi mea latou te fiafia i ai, ae ou te faitau atu foi se vaega tele o le Tusi a Mamona mai le tusitusiga mo tamaiti. … E le taumatea le taua ia te i latou ina ua ou faalogo i lau tama e valu tausaga le matua o faafetai atu i lana tatalo mo perofeta sa teuina nei tusitusiga, pe a o faafetaia e lau tama e lima tausaga le matua le sola ese ma le saogalemu o Nifae ma le au faatuatua ao saili Lamana ma Lemuelu e fasioti ia te ia. O se mea ua ma’ua aoaoina o le taimi lava e ma te maua ai le avanoa e fesoasoani ai i la ma’ua fanau e faateleina lo latou fiafia ma lo latou malamalama i le talalelei ma le Tama sa foafoaina i latou, ua faateleina foi lo matou alofa o le tasi i le isi ma ua faa-aafiaina le tulaga o le mausali faaleaiga i se auala sili ona taua. Ona o lenei pogai, o afiafi faaleaiga i vaiaso taitasi ua matua faatumutumu lona taua ia te i matou.”¹⁹

I o outou aiga, ou te tatalo ia outou, fai atu e faapei o Iosua o anamua: “A o au ma lo’u aiga, matou te auauna ia Ieova” (Iosua 24:15). Aoao o outou aiga i a outou afiafi faaleaiga; aoao i latou e tausi i poloaiga a le Atua, aua ua na o iina o i ai lo tatou saogalemu i aso nei. Afai latou te faia ia mea, o le a afio ifo i o latou luga le mana o le Silisiliese e pei o se uatoa mai le lagi, ma o le a i ai le Agaga Paia ia te i latou.²⁰