Fetufaaiina o le Talalelei

Tatou te tausisia a tatou molimau i le ola ai, tatalo ma toaaga i le lotu atoa ma le tausiaina o poloaiga a le Atua. O iina o le a mafuta ai le Agaga taiala mo i tatou, o se tasi lea o oa aupito taugata e mafai ona i ai i se tagata o le ekalesia.

Faatasi ai ma lenei molimau, o le tiutetauave a i tatou uma lava, o lo tatou iloaina lea o la tatou matafaioi le tuuina atu o a tatou molimau i le misiona paia a le Alii i soo se mea lava e maua ai lo tatou avanoa. Afai tatou te faaaogaina i tatou lava, e tele avanoa e aoao atu ai le talalelei, i le aso ma lea aso, o lea itula ma lea itula, i soo se mea lava tatou te i ai. Afai sa tatou ola mo lea faamoemoe, afai ua tatou saunia i ai, o le a tuu mai e le Agaga taitai le tomai tatou te aoao atu ai. Ia manatua, o upu ua na o ni upu lava, i le aoaoina atu o le talalelei, sei vagana ua o faatasi ma le Agaga o le Alii. …

O lo tatou tiutetauave o le aumaia lea i le lalolagi o le savali o le upumoni, e ta’u atu ai i le lalolagi o totonu o aoaoga o le talalelei a Iesu Keriso, e tatau ona maua ai vaifofo mo faafitauli uma e mafatia ai le tagata.³

E tatau ona tatou taliaina avanoa uma e avatu ai le malamalama o le talalelei i isi—i tagata o loo tatou mafuta ae ua le toaaga i le lotu, o a tatou uo le lolotu i kolisi, o galuega faamiliteli, ma pisinisi, atoa ai ma o tatou tuaoi ma uo.

Na tuuina mai e le Alii lenei faaaliga i le Perofeta: “Auā o i ai nei lava nisi e toatele i le laolagi i ituaiga lotu uma, vaega, ma ekalesia, ua faatauasoina i togafiti faa’ole’ole a tagata, o lea latou te lamalama e faa’ole’oleina ai, ae taofia mai le upumoni ona ua latou lē iloa lemea e maua mai ai.” (MFF 123:12.)⁴

E le o toe se isi leo e talia e i faamaoni o latou loto nai lo le leo o le avefeau moni o loo folafola le talalelei a Iesu Keriso.⁵

Tou te manatuaina [Elder Charles A. Callis] na faamatalaina mai se taimi na alu ai i Montana e asiasi i se tagata sa faia se misiona i Aialani. Ina ua maea ona sailia o lenei tagata, o lē ua toeaina i le taimi lea, sa ia faailoa atu ia lava ma faapea atu, “O oe o le faifeautalai lea sa galue i Aialani i tausaga ua mavae?” Ma sa faapea mai le tagata lea, ioe. “Ia,” o lana tala lea, “pe o oe ea o le tagata lea na faapea i lau lauga faamavae i le misiona, na e ta’utino atu ai masalo e le’i manuia lou tolu tausaga na e i ai iina ona e na o le toatasi se tamaitiiti palapalā Aialani na mafai ona e papatisoina? Na e faia lena tala?” “Ioe, ou te manatua la’u tala lena.” Na fai atu Uso Callis, “Ia, ou te fia faailoa atu a’u. O a’u o Charles A. Callis o le Aufono a Aposetolo e Toasefululua O Le Ekalesia a Iesu Keriso o le Au Paia o Aso e Gata Ai. O a’u o le tamaitiiti palapalā lena o Aialani na e papatisoina a o e faamisiona i Aialani.” O le agaga e toatasi na avea ma aposetolo o le Ekalesia ma le Malo o le Atua.⁶

E leai lava se tagata e tuu atu lona lima e fesoasoani ai i se tasi e aunoa ma lona mauaina mo ia lava o le aia tatau mo le faaolataga e tatau ai ona o lona naunau e fesoasoani atu i isi. Ia tautuana, o i tatou uma lva o fanau a lo tatou Tama, pe o avea nei i tatou ma nisi o le Ekalesia pe leai. O isi ia fanau a lo tatou Tama e tatau ona tatou popole tele i ai. E pele foi i latou ia te Ia e faapei ona pele i latou o i ai nei i le Ekalesia. Afai o i ai se tasi o i tatou o galue i le aumaia o isi i le lafu, ua fetalai mai le Alii ua ia aumaia foi le faaolataga i lona lava agaga [tagai MFF 4:4).⁷

O le autu moni lava o le mea ua tatou ta’ua o le Kerisiano ua maua lea i le tusi a le tusitala o le talalelei o Ioane lea na ia ta’ua ai le molimau a le Matai i lana lava misiona paia o le Faaola o le lalolagi. O ana faaupuga nei:

“Auā ua faapea lava ona alofa mai o le Atua i le lalolagi, ua ia au mai ai lona Atalii e toatasi, ina ia le fano se tasi e faatuatua ia te ia, a ia maua e ia le ola e faavavau” (Ioane 3:16.)

O lea ua ta’ua ai le auaunaga aupito maualuga e mafai ona tatou tuuina atu i lenei olaga, o le naunautai e taulagaina o tatou lava tagata mo le lelei o isi. O le nofoaga mo le taulaga ma le auaunaga i lenei tulaga faapaiaina o le olaga, sa faamatalaina mai e le Perofeta o Iosefa Samita:

“O se lotu e le manaomia le ositaulagaina o mea uma, e le taitai onalava le malosi e maua ai le faatuatua e tatau ai mo le ola ma le faaolataga. …

“O lenei taulaga, ma na o le pau lava foi lenei, ua faauuina e le Atua o le a olioli ai le tagata i le ola e faavavau.” [Lectures on Faith (1985), 69.]

Afai e mafai ona tatou faaaogaina ia i tatou lava ma o tatou olaga lena mataupu faavae ina ia mafai ai ona tatou maua lena mea foaifua taua, o le mea moni ua tatou atamamai. O le Tupu o

“… pe a i ai outou i le galuega a o outou uso ua na ona i ai outou i le galuega a le Atua.” (Mosaea 2:17.). …

O lona uiga, o le foai atu po o le tuuina atu, o se faailoga o le alofa o se tagata, ma afai e tuuina atu moni e tagata ia lava, o se faamaoniga lea o le alofa moni o lena tagata ua naunautai e foai atu. …

O le alofa tele o le Perofeta o Iosefa Samita i le upumoni sa faailoa atu ia te ia o lea sa nauanu ai o ia e ositaulaga mea uma na ia umia i lenei lalolagi, na te le’i taofia foi lona ola, na ia faia mea uma e oo i le iuga ina ia mafai ai ona ia tuuina atu lena molimau ma ina ia mafai ai ona lagona e atunuu uma o le lalolagi. …

Sa ou asiasi i se siteki i ni nai masina talu ai ma sa talosagaina a’u e faatalanoa ni alii talavou ua faamoemoe e avea ma faifeautalai. Sa ta’u mai ia te au e le peresitene o le siteki, o se tasi o alii talavou, ina ua mavae se taimi umi sa taofia ai i le falemai, ua toe malosi mai se ma’i tugā sa maua ai a’o i ai i le fitafita. A’o ou tilotilo atu i lenei alii talavou i le faatalanoaga, sa ou fesili atu ia te ia, “Ua e manao i se a e te alu i lenei misiona?”

Sa umi se taimi o nofo ma mafaufau, ona ia tali mai lea, “Ina ua ou alu i le fitafita, o se taimi muamua lea ua ou alu ese ai mai lo’u aiga. Sa ese lava tulaga sa i ai. Sa ou fetaiai ma faaosoosoga i soo se itu faapea foi ma le agasala. Sa ou manaomia le malosi e taofia ai mai le agasala, ma sa ou alu atu i lo’u Tama Faalelagi ma tatalo atu ia te ia i le faatuatua ina ia aumai ia te au lena malosi e tetee atu ai i le leaga. Sa faafofogaina e le Atua a’u talosaga ma sa aumaia ia te au lena malosi. Ina ua maea le taimi faaleaoaoga [i le militeli] ma ua oo atu i le vaega o taua, sa matou faalogoina le papa o fana na muai aumai ai le savali ua oo mai le oti. Sa ou fefe, ma sa ou gatete. Sa ou tatalo i le Atua mo le lototele, ma sa ia aumai ia te au le lototele, ona oo mai ai lea ia te au o le filemu ou te le’i iloaina muamua. …Sa tofia au e tiute ta’imua, o lona uiga sa ou ta’imua i vaegaau tau ma o nisi taimi e toetoe lava ua siomia uma e le fili. Sa ou iloaina e na o le tasi lava le mana i le lalolagi e mafai ona laveaiina a’u, ma sa ou tatalo i lena mana e puipuia a’u, ma laveaiina lo’u ola, ma sa faafofogaina e le Atua a’u tatalo ma toe faafoi mai a’u i la’u vaega.”

Ona ia fai mai lea ia te au: “Uso Lee, o mea uma na e tumu ai a’u i le loto faafetai. Ua na o sina mea iitiiti ou te mafaia lo’u alu atu e avea o se amepasa a Iesu Keriso, e aoao atu i tagata mea matagofie sa ou mauaina a o itiiti i lo’u aiga.”

A o ou faalogo atu i se faamatalaga o le faatuatua mai lena alii talavou, sa ou faatusatusaina ia i latou sa ou faalogo atu o faapea mai ua latou manatu afai e o i le misiona, o le a latou maua ai ni aoaoga, o le a latou vaai i le lalolagi, o le a latou maua ai tomai aoga e faamanuiaina ai i latou. …

O le manatu faapito e puepue mai avanoa mo le tagata lava ia, e lē mai aoaoga o le upumoni ae mai aoaoga a lē ua fai ma fili o le upumoni. …

O le tagata e naunau mo lona lava lelei ma ona lava avanoa e lē avea lava ia o se tagata fiafia, auā e tu mai pea i ona luma i’u o tafa’ilagi o le olaga e tauemuina ai ana taumafaiga i mea e faataunuuina ma manumalo ai. O le tagata e tautua pe auauna atu ma le lē manatu faapito, o ia lea o le tagata fiafia.⁸

Ua tatou molimauina i la tatou galuega faafaifeautalai se vaaiga ofoofogia o alii talavou ma tamaitai talavou [ua malaga atu]…i tulu’iga uma o le lalolagi, ina ia avea a latou auaunaga ma le lē manatu faapito latou te tutu atu ai e avea ma molimau i taimi uma ma nofoaga uma, mo le tiutetauave paia a le Ekalesia e aoao atu le talalelei.⁹

O Alema. …ma atalii o Mosaea na malaga atu i misiona ma sa latou faataunuuina se auaunaga faafeautalai tele…Sa vaaia e Alema ona uso, o atalii o Mosaea, o malaga atu i le nuu o Saraemila.

“O nei atalii o Mosaea sa faatasi ma Alema i le asona muai faaalia mai ai le agelu ia te ia; ole mea lea na olioli tele ai Alema ina ua vaai atu o ia i ona uso; o le mea sili foi na faateteleina ai lona fiafia, o ona uso pea i latou i la le Atua; ioe, ma ua tutupu malolosi i latou i le malamalama o le upumoni; aua o i latou o tagata mafaufau lelei, ma ua latou suesueina tusipaia ma le filifiligā, ina ia latou iloa ai le afioga a le Atua.

“Ae peitai ua le gata i lea, a ua latou tatalo faatauanau ma ua anapogi, o le mea lea ua i ai ia te i latou le agaga oleperofetaga ma le agaga o le faaaliga. A latou aoao atu foi, ua aoao atu i le mana ma le pule mai le Atua.” (Alema 17:2–3.)

O lea la, pe ua outou [malamalama] ea i le fuafaatatau e mafai ona outou aoao atu ai i le mana ma le pule a le Atua? Ia tutupu malolosi i le malamalama o le upumoni, ia avea ma tagata mafaufau lelei, suesue ma le filifiligā i tusitusiga paia ina ia tatou iloa le afioga a le Atua. Peitai, e le na o le pau lena. E tatau ona tatou tatalo, ma e tatau foi ona tatou anapopogi, e tatau foi ona tatou maua le agaga o perofetaga; ma a uma ona faia o na mea uma, ona tatou aoao atu ai lea i le mana ma le pule a le Atua.¹⁰

Ua fetalai mai le Alii: “Ou te tuuina atu foi ia te outou le poloaiga ia outou aoao le tasi i le tasi i mataupu o le malo,” ona ia toe faaopoopo mai lea, “Ia outou aoao atu ma le filifiligā ma o lo’u alofa tunoa o le a mafuta ma outou” (MFF 88:77–78). E tatau ona ou faapupulaina atu na upu “filifiligā” ma le “alofa tunoa.” O le filifiligā, o loo faapea mai le lomi fefiloi o le “ua’i atu ma le lē gaoiā, faia ma le matuā faaeteete,” o lona faafeagai o le paiē, o le faatamala, po o le faalēāno i ai. …

… Ou te talitonu o le faauigaina o le “alofa tunoa” o loo faamanino mai i le vaega e fa o le Mataupu Faavae ma Feagaiga i le mea lea na folafola atu e le Alii ia i latou e galulue punouai i le galuega faafaifeautalai: “…o lē na te tago i lana selesaito ma lona malosi, ua na faaputu ai fua ma teu ina ia lē matelaina, ae aumaia le olataga i lona agaga.” (MFF 4:4.) O le “alofa tunoa” e laveaiina ai i le mana togiola o le Alii, o le amaua e lē na te tuuina atu faapea foi i latou e mauaina pe taliaina sauniga laveai o le talalelei.¹¹

Ma le mea mulimuli, o le mea lenei e tasi e foliga mai ia te au e pei foi lona taua o isi mea uma, pe o le sili atu foi:

“O lea tuuina atu foi le Agaga ia te outou i le tatalo i le faatuatua; ae afai tou te lē maua le Agaga aua tou te aoao atu.” (MFF 42:14.)

O lea la e mafai ona matou tuuina atu ia te oe meafaigaluega i lenei fuafuaga faafaifeautalai mo le tuuina atu ma le suesueina o le talalelei; o loo i ai uma lava iina. Ae sei vagana lava ua tatalo ma le filifiligā le faifeautalai, o le a na le maua lava le Agaga, lea e mafai ai ona ia folafola atu le talalelei. O le uiga lena o le tala a Nifae [ina ua ia] faapea mai:

“O lenei foi, o a’u o Nifae, ou te le mafai ona tusia mea uma na aoaoina ai lo’u nuu; ou te le malosi a’u i le tusitusi e tusa ma lo’u malosi i le tautala atu, aua pe a tautala atu le tagata ile mana o le Agaga Paia, e moliooina ai i le mana ole Agaga Paia i loto o le fanauga a tagata.” (2 Nifae 33:1.)

… Pe afai e ia te oe le Agaga ma e faalogo i ai ma taialaina ai ma maua le agaga e malamalama ma iloatino ai, lea e tofu maua e tagata taitoatasi ua valaauina i Lana galuega le aia tatau e faaaoga ai, ona mafai lea ona e iloa ma taitaiina ai ma o le a o faatasi foi au upu ma le mana o le Agaga Paia. A aunoa ma le agaga e leai lava se tasi o le a mafai ona avea ma faiaoga lelei o le talalelei a Iesu Keriso.¹²

O le ala sili i le lalolagi e faatosina mai ai tagata i le talalelei o le ola ai lea i faamoemoega ma tulaga o loo tatou faamoemoina mai ē ua faapea mai e auai i le Ekalesia. O le mea muamua lena e ta’u atu ai i se tagata ese. E faapefea ia i tatou, o ē faapea mai o tagata auai, ona faaali atu o tatou uiga o ni tagata o le Ekalesia?…

… E leai se alii po o se tamaitai e mafai ona aoao atu le talalelei pe a lē ola ai. O le amioga muamua lava e faaagavaaina ai oe lava e avea ma faifeautalai o le ola ai lea i mataupu faavae e te aoao atu. Pe ua e manatu ea o se tagata agasala o se faiaoga lelei tele lea o le salamo? E te manatu e lelei i se tagata ona aoaoina atu isi e tausia ma faapaia le aso Sapati pe afai na te lē tausia e ia lava le paia o le aso Sapati? E te manatu e mafai ona e aoaoina atu soo se mataupu faavae o le talalelei pe afai e lē lava lou talitonu e totoina ai i o lou olaga?¹³

Na [fetalai mai] Iesu: “O le mea lea ia outou sisii ai i luga lo outou malamalama, ina ia pupula atuai i le lalolagi. Faauta, o a’u o le malamalama tou te sisii i luga—o mea ua ou fai ua outou vaai i ai. Faauta, ua outo vaai mai, uaou tatalo ile Tama, ma ua molimau ai outou uma.” (3 Nifae 18:24.) O la tatou galuega o le “sisii i luga” i le lalolagi mea na faia e Iesu mo le tagata: o le togiola, o le faataitaiga na Ia faatuina, ma aoaoga na tuuina mai e Ia lava ma Ana perofeta o anamua ma aso nei. Sa aoaoina foi i tatou e le Matai: “Ia faapea ona pupula atu lo outou malamalama i luma o tagata, ina ia latou iloa la outou amio lelei, latou te vivii atu ai i lo outou Tama o i le lagi.” (Mataio 5:16.)…

I tulaga uma lava faaleautaitai ia tatou te saili ai e faaleleia amioga a tagata, e faigata lava ona soona faia se fuafaatatau o le malosi o faataitaiga—pe o aofia ai matua uma [le tamā ma le tina] i le faaalia lea ma ta’u atu i a la’ua fanau le taua o le faaipoipoga i le malumalu po o se faifeautalai ua mae’a le misiona ma o loo susulu atu o se taunuuga o suiga ma lona tulaga matua i le talalelei ua i ai o ia.¹⁴

“O outou o le malamalama o le lalolagi outou; o se aai ua tu i luga o le mauga.” [Tagai Mataio 5:14.] O le a le uiga o lena mea?…

… Soo se tagata lava o le Au Paia o Aso e Gata Ai i le i gaoioiga faale-Ekalesia, auaunaga faamiliteli, o fegalegaleaiga o le olaga, po o le faalapotopotoga faapisinisi, e vaavaai atu i ai e lē gata o se tagata e toatasi, ae o le Ekalesia vaaia foi i aso nei. Fai mai se tasi tagata: “Ia faaeteete i au amioga, aua e le iloa pe latou te lē faitauina lava Tusitusiga Faavae o le Ekalesia ae ua na o oe le faataitaiga latou te faitauina.” O iina ua lapata’ia ai i tatou e le Alii e tatau ona maualuga atu le tulaga o le ola ai i le Ekalesia nai lo le ola ai i le lalolagi.¹⁵

Sa ou i ai i Seoul i Korea talu ai nei [1954], ma o se tasi o alii aupito lelei sa i ai i lena atunuu o se tagata lea e igoa ia Dr. Ho Jik Kim. O ia…o se faufautua i le malo o Korea. O ia o se taitai o se tasi o aoga iina, ma o le taimi lena ua tolusefulu fa tagata liliu mai ua ia faapotopotoina, o le toatele lava o i latou o ni tagata e maualuluga aoaoga. Sa ma talanoa mo se lua itula, ma sa ma taumafai e faataatia se faavae e mafai ai ona amatalia gaoioiga faafaifeautalai i le nuu o Korea. Na ia faamatalaina mai lona liua. “O le mea lava na tosina ai a’u i le ekalesia,” na ia faamatala mai ai, “o le taimi na valaaulia ai au i aiga o ni alii o le Au Paia o Aso e Gata Ai o le aigā faiaoga a le Iunivesite o Cornell. …O le mea lava na sili ona faagaeetiaina ai a’u o le ituaiga olaga na latou ola ai. Ou te le’i alu muamua i ni aiga e ese le manaia o fegalegaleaiga i le va o le tane ma le ava, o le tamā ma le tina ma le fanau. Sa ou vaaia i latou o fai a latou lotu faaleaiga. O lo’u fiafia tele na amata ai ona ou fesilisili e uiga i la latou lotu. Ma i se tasi po ina ua maea a’u suesuega mo se taimi umi ma ua tosina lo’u manao e fia auai i sea ituaiga, sa ou muai iloa e tatau ona i ai sa’u molimau. Sa ou tootuli ifo i o’u tulivae ma tatalo toetoe o le po atoa, ma sa ou mauaina se molimau i le paia o lenei galuega.” Ae manatua sa amata lava i se faataitaiga lelei tele a se aiga na ola i se ituaiga olaga faaleaiga ua faamoemoeina e le talalelei i tagata moni o le Au Paia o Aso e Gata Ai.¹⁶