Aoaoga a Peresitene
Mataupu 8: Iosefa Samita, Perofeta a le Atua Soifua

Mataupu 8

Iosefa Samita, Perofeta a le Atua Soifua

Aisea e matua taua tele ai se molimau e uiga i le misiona faaperofeta a Iosefa Samita i a tatou molimau o le talalelei a Iesu Keriso?

Faatomuaga

Sa i ai i a Peresitene Harold B. Lee se molimau malosi i le Perofeta o Iosefa Samita ma e masani ona ia faaaogaina upu a le Perofeta ao ia aoao atu mataupu faavae o le talalelei. Sa ia silafia e matua taua tele i se molimau o le talalelei a Iesu Keriso, le i ai o se molimau i le misiona a le Perofeta o Iosefa Samita. Sa latou fetaiai ma tagata e toatele sa le i ai ni molimau e uiga i le Perofeta. O se tasi o i latou o sau uo sa ia faitauina le Tusi Mamona ma sa talanoa i lona “faaaloalo i ona aoaoga.” Sa fesili i ai Peresitene Lee, “Aisea ua e le faia ai se mea e uiga i lena mea?…Aisea ua e le auai ai i le Ekalesia?” Sa tali mai le alii ma le mafaufau lelei: “Atonu o le mafuaaga atoa lava ona o Perofeta Samita e latalata tele ia te au. Ana faapea sa ia soifua i le lua afe tausaga talu ai, atonu o le a ou talitonu. Ae ona o lona latalata mai tele, ou te matea, o le mafuaaga lea ou te le taliaina ai.” Sa ta’ua e Peresitene Lee o le tali mai a lana uo, “Ua faapea mai lenei alii, “ou te talitonu i perofeta ua maliliu ma ua silia ma le afe tausaga talu ona soifua mai anamua, ae e matua faigata tele ona ou talitonu i se perofeta soifua.’ ”1

I se tasi foi mea na tupu, sa faapea mai se tina, “E te silafia, ou te mafai ona ou taliaina soo se mea i le Ekalesia vagana ai le mea e tasi… ou te le mafai ona ou taliaina se mea e faapea o Iosefa Samita o se Perofeta a le Atua.” Sa maitauina e Peresitene Lee, “Pe faapefea ona mafai ona taliaina e se tasi le talalelei e aunoa ma le taliaina o ia sa fai ma meafaigaluega i le toefuataiina mai, o le a ou le mafai ona iloa.”2

Sa saunoa mai Peresitene Lee: “E tatau ona tatou iloa ma le mautinoa i o tatou loto ma mafaufau o Iesu o le Keriso, o le Faaola o le lalolagi. E tatau ona tatou iloa o le Ekalesia moni lenei a Iesu Keriso, o le malo o le Atua i le lalolagi i nei aso e gata ai; ma le mea mulimuli e tatau ona i ai sa tatou molimau o Iosefa Samita o se perofeta a le Atua.”3

Aoaoga a Harold B. Lee

Aisea e tatau ai ona i ai sa tatou molimau o Iosefa Samita o se perofeta a le Atua?

O le a se mea e iloa gofie ai se Perofeta moni a le Atua? Muamua o ia o le fofoga o le Atua i lena taimi ma i lena faalapotopotoga. Lua, e na te toe taua upumoni anamua ma saili e faatumauina tagata i tulafono e lē fesuisuiaia o le talalelei. Tolu, e na te mauaina mai faaaliga faaopoopo mai le Alii e talafeagai ma faafitauli o le fuafuaga alulau i luma lea ua faaalia mai. O nei mea moni fou e mai le Atua, ma e na o le perofeta lava o lena vaitaimi e auala mai ai. O lea tagata o Iosefa Samita, i vaega uma o se Perofeta a le Atua. Ioe, e moni lava e faapei [o le] Perofeta o Amosa sa faapea mai, “E moni e le faia lava e le Atua se mea e tasi, ae muai faaali lona finagalo i ana auauna perofeta.” [Amosa 3:7]4

Mai le taele o lou agaga, ou te … iloa o Iosefa Samita o se perofeta a le Atua soifua. Ou te iloa sa ia soifua ma maliu ina ia aumaia i lenei augatupulaga le auala lea e mafai ai ona tatou maua le faaolataga. Ou te iloa o loo afio o ia i se mea maualuga ma o loo ia umia ki o lenei tisipenisione mulimuli. Ou te iloa o i latou o e mulimuli ia te ia ma faalogo i ana aoaoga ma talia o ia o se perofeta moni a le Atua ma ana faaaliga ma aoaoga o ni afioga a le Atua, o le a le mafai e faitotoa o seoli ona manumalo ia i latou ….[tagai MFF 21:4–6.]5

E tatau ona tatou talia le misiona mamalu a le Perofeta o Iosefa Samita i le avea ma se mea faigaluega na faataunuuina ai le toefuataiga o le talalelei ma le faatulagaga o le Ekalesia a Iesu Keriso. O tagata taitoatasi o le Ekalesia, ina ia saunia mo le nofo tupu i le meleniuma, e tatau ona maua se molimau, a le tagata lava ia mo ia lava, i le paia o le galuega sa faatuina e Iosefa Samita. O lea lava le talalelei sa aoaoina i se ala faigofie e le Au Paia ina ua mavae le galuega a le Faaola i lenei lalolagi, ma sa faapea foi ona toe taua e se tasi o o tatou taitai o tatou nei aso, ina ua ia tautino mai, ou te manatu e faatusatusa i le faataoto i taupou valelea e toalima ma taupou popoto e toalima i le faataoto a le Matai [Mataio 25:1–13], “O le oo mai le taimi o le a le mafai ai e se tane poo se fafine ona faalagolago i se malamalama nono. E tatau ona taitaiina tagata taitoatasi e le malamalama o loo i totonu.”[Orson F. Whitney, Life of Heber C Kimball (1945), 450.]6

O outou o e sa suesue loloto i tusitusiga paia, outou o e sa saili e maua se molimau e uiga i le molimau paia a le Agaga lea e i ai ia te outou uma taitoatasi se aia tatau e maua ai e ala i le molimau a le Agaga Paia, e mafai ona i ai i totonu ia te outou … se tasi o aafiaga aupito sili nai lo se isi lava pe a mafai ona e faapea ifo i lou loto, “Ua ou iloa nei ma lo’u loto atoa e pei ou te lei iloaina muamua, o Iesu o le Alii, o le Faaola o le lalolagi, ma o Iosefa Samita, le na maliu fasia, o le perofeta sa faaaogaina e le Alii e faatuina Lana Ekalesia e pei ona i ai i ona po nei.”7

Sa faapefea ona saunia Iosefa Samita mo lona valaauga o le Perofeta o le Toefuataiga?

O Iosefa Samita o le sa faatulai e le Alii mai lona talavou ma faaee atu ia te ia le pule paia ma aoaoina o ia i mea e tatau ona ia iloa ma maua le perisitua ma faataatia le faavae mo le malo o le Atua i nei aso e gata ai.8

I talafaasolopito, o perofeta taitai sa filifilia mai i ni tulaga maualalo o le olaga, e le aoaoina faafaifeau i ni aoga faatusipaia. Mafaufau i le tele o perofeta. Sei ou toe foi i le talafaasolopito: o Elisaia o se faifaatoaga olaola; o Amosa o se leoleo mamoe i Iutaia; o le perofeta o Isaia o se tagatanuu o Ierusalema; o Mika o se tagatanuu o Iutaia; o Ieremia o se alii talavou mai se aiga faitaulaga anamua; o Esekielu sa avea ma faitaulaga i le malumalu; o Peteru, Anetelea, Iakopo, ma Ioane o ni faifaiva; o Iesu ma lona tama o Iosefa o ni kamuta. Atonu o lea ua faamatala ai le mafua aga sa filifilia ai [le Perofeta o Iosefa Samita e avea] ma perofeta taitai o lenei tisipenisione. … Sa ia filifilia se tasi e mafai ona faapotoina i mea a le Alii —o mea ia i lo latou foliga mai e valea i e sa aoaoina i na o mea o le lalolagi.9

I le olaga o le taulealea o le perofeta o Iosefa Samita, ae na te lei mauaina le tuuina aloaia mai o faaaliga silisili e lua ua tuuina mai i tagata, o nei faaaliga e lua sa taimua mai ai le faailoaina mai o le mana o le tiapolo —i le Togalaau Paia, ma luga o le Mauga o Kumora. E foliga mai sa tatau ona malamalama le Perofeta i le natura o le mana o lena malosiaga ina ia mafai ai ona ia saunia e tetee atu ma le manumalo i lena mana.10

E le avea se perofeta ma se taitai faaleagaga i le suesueina o tusi e uiga i lotu, pe avea foi ma taitai faaleagaga i le auai atu i se aoga faatusipaia. … E avea se tasi ma perofeta po o se taitai faalelotu e ala i fesootaiga moni faaleagaga. O le taitai moni faaleagaga e maua sao mai lona tusi faamaonia po o lona tipiloma mai le Atua.11

O a ni mea silisili sa faatuina e le Alii e ala i le Perofeta o Iosefa Samita?

O le misiona a le Perofeta o Iosefa Samita sa faailoa mai … pe tusa o le 2,400 tausaga ae lei fanau mai o ia. O valoaga … e uiga ia Mose ma Iosefa sa faamaumauina i papatusi apamemea ma sa maua mai e atalii o Liae ia Lapana e pei ona outou manatua. O iina sa maua ai lenei valoaga e leai se isi o faasinotonu i ai ua na o Iosefa Samita lava:

“Ioe, e moni sa faapea mai Iosefa [e le taumateina e faatatau i a Iosefa sa faatau atu i Aikupito]: O loo faapea ona fetalai mai le Alii ia te au: Ou te faatuina le tagata vaai filifilia ai le fua o ou sulugatiti; … Ou te foai atu ia te ia le mana e aumai ai lau upu i le fanau a ou sulugatiti, e le na o le aumaia o lau upu, ao le faamautinoa ia te i latou o lau upu e muamua atu ia te i latou. … Faauta, e faamanuiaina e le Atua lena tagata vaai; e faafememeaiina i latou e saili e faaumatia o ia. … E igoa foi o ia i lou igoa o le igoa foi lea o lona tama. E tusa foi i maua ma ia; aua o le mea e faataunuuina e le Atua i lona lima e aumaia ai lou nuu i le olataga i le mana o le Atua.”[tagai 2 Nifae 3:7, 11, 14-15,]12

I lenei tisipenisione, e faapea lava le tulaga i isi foi tisipenisione uma ua mavae o le talalelei i luga o le fogaeleele, sa tuuina atu ai e ala i le perofeta o ona po nei, o Iosefa Samita le malamalama moni e uiga i le Atua ma lona Alo, lo tatou Faaola, ina ua la’ua talanoa atu ia te ia, o ni tagata mamalu e mafai ona talanoa ma vaaia e tagata, ma sa peiseai o loo faailoa atu ai lo la’ua tulaga faitino moni, a’o tatalaina mai le tisipenisione o le atoaga o taimi, e saunia ai mo le afio faalua mai o le Alii e nofotupu o le Alii o alii ma le Tupu o tupu i le amataga o le meleniuma.13

O soo se taimi lava tatou te teena ai i le faatuatua ma le malamalama o le Alii, i Lona alofa tunoa, e toe aumaia ai le malamalama atoatoa sili atu o le Atua ma Lona Alo, ma o soo se taimi lava e sasaaina mai ai le malamalama faalelagi e uiga i le Tama ma le Alo tatou te faapea ifo ai, ua tatou maua se tisipenisione fou. Sa faapea foi i le taimi o Atamu; sa faapea foi i le taimi o Aperaamo; i le taimi o Mose; ina ua Ia afio ifo i le nuu o Sa Nifae; i le nuu o Enoka; ma sa faapea lava foi le Faaola ona maliu mai i tagata e aoao i latou e uiga i le fesootaiga a le Atua ma le Alo o le Atua…

E matua taua tele, ina ia tatalaina le tisipenisione o le atoatoaga o taimi, sa tatalaina i le a? E se faaaliga mai o le uiga patino o le Atua le Tama ma le Alo i le perofeta talavou o Iosefa Samita.14

“O Iosefa Samita, le Perofeta ma le Tagata Vaai a le Alii, e sili atu ana mea ua faia, vagana o Iesu lava, mo le faaolataga o tagata i lenei lalolagi, i lo soo se isi lava tagata ola na ola ai.“(MFF 135:3). O lenei, e i ai nisi ua manatu o se faamatalaga soona fai lea, ae [e leai] pe a tatou mafaufau i mea sa Ia tuuina mai ia i tatou e ala i lenei alii talavou ofoofogia, i se vaitaimi puupuu o le lua tausaga, sa ia aumaia ni tusitusiga paia sili, o se molimau lona lua lea i le misiona a le Alii, le Tusi a Mamona …O lenei alii talavou, sa lē ia te ia ni meaalofa e pei ona maua e alii ua aoaoina, ae sa uunaia e le mana o le Atua Silisili Ese, ma sa ia faaliliu lena tusitusiga mai i se gagana e lei iloaina, i se gagana ua i ai ia i tatou i ona po nei, le tusi lea ua tatou maua ai le atoatoaga o le talalelei e faavavau.15

O Iosefa Samita, le alii talavou e lei aoaoina i se aoga faatusipaia o lea taimi, e lei aoaoina i se aoga maualuga o lona vaitaimi …[sa] ia mafai ona usiusitai i aoaoga ma musumusuga a le Agaga. Semanu e le mafai e Iosefa ona faatuina lenei ekalesia. Semanu e le mafai ona ia aumaia i luma le galuega a le Alii, le Tusi Mamona. E ono mafai ona latou faatauemu i le Perofeta o Iosefa Samita o se tagata. E ono o latou fesiligia pe na faapefea ona amataina lenei ekalesia, ae o lenei le mea e tu o se maa faamanatu —le Tusi a Mamona lava ia. O Iosefa, o le tagata, semanu e le mafai ona ia faia lenei mea, ae peitai o Iosefa, sa galueaiina e le mana o le Atua Silisiliese, sa mafai, ma sa ia faatinoina lenei auaunaga ofoofogia o le aumaia o le malo nai le mea lilo, i le talalelei toefuataiina a Iesu Keriso.16

Sa faamatala atu e Moronae i le Perofeta …ua oo i le taimi na atofaina mo le talalelei i lona atoatoa e talai atu ai i le mana i atunuu uma. O lenei mea ua faataunuuina ai le mea sa folafolaina atu i a Ioane ina o lele le agelu i le taulotoaiga o le lagi ma le lalolagi, “o loo i ai le [atoatoaga o le ] talalelei e faavavau e talai atu i a i latou o e o nonofo i le lalolagi” (Faaaliga 14:6). O le toefuataiga o lena atoatoaga o le talalelei sa faataunuuina ina ua toefuatai mai i le lalolagi le Tusi a Mamona e ala mai i le Perofeta o Iosefa Samita, lea sa tautino mai o le tusi o loo i ai le atoatoa o le talalelei.17

I le aso 21 o Setema 1823 [sa oo ane ai Moronae i a Iosefa Samita ma faaali atu, i se vaega,] “o le galuega sauniuni mo le afio faalua mai o le Mesia sa faateleai ona amataina; ma ua oo mai lava le taimi mo le Talalelei i lona atoatoa uma e talai atu i le mana, i nuu uma. … ina ia saunia tagata mo le nofoaiga i le Meleniuma,” o lona uiga e mo le afio mai o le Alii (History of the Church, 4:537). I se isi faaupuga, o le faamoemoega autu mo le toeuataiina o le talalelei o le sauniaina lea o ni tagata o e o le a saunia e tutu i le afioaga o le Alii pe a afio mai o Ia; a leai,… o le a le mafai ona lavatia Lona afio mai.18

O aso nei, ua avea le galuega o le malo o le Atua i le lalolagi ma se maa faamanatu i le suafa o le Perofeta o Iosefa Samita. Ua miliona ma miliona ua latou talia le mamalu o lenei misiona, e pei ona ia folafola ma taitaiina i le lalolagi atoa. Ua faamanuiaina i tatou i lena penina tau tele e aunoa ma se totogi, o le talalelei lea a Iesu Keriso, lea sa toefuataiina e ala mai ia te ia o se mea faigaluega a le Atua, e fesoasoani ia i tatou e ola, ma oti pe a tatau ai, ina ia tatou saunia i le taimi talafeagai mo lena nofotupu i le Meleniuma. O lenei mea e le tatau ona galo ia i tatou. O le taimi lenei mo i tatou, manu o i ai le taimi, e saunia ai e fetaiai ma le Atua.19

Fautuaga mo Suesuega ma Talanoaga

  • E faapefea e i tatou taitoatasi ona faamalolosia a tatou molimau e uiga i le misiona a le Perofeta o Iosefa Samita? O le a se mea ua faamalosia ai lau molimau e uiga i le Perofeta?

  • E faapefea ona tatou mulimuli i faataitaiga a le Perofeta o Iosefa ina ia faateleina ai lo tatou lava poto ma le faaleagaga? O a ni uiga faa-Keriso o loo vaaia i le soifuaga o le Perofeta o Iosefa Samita?

  • O a nisi o mea moni taua o le talalelei sa faaalia mai e ala mai i le Perofeta o Iosefa Samita?

  • O le a se mea ua faia e Iosefa Samita mo le faaolataga o fanau uma a le Atua? O a ni tulaga o lou olaga ua suia ona o faaaliga sa maua e le Perofeta o Iosefa Samita?

  • E faapefea ona fetufaai atu i isi lau molimau e uiga i le Perofeta o Iosefa Samita?

Faamatalaga

  1. “The Place of the Living Prophet, Seer, and Revelator.” lauga i faiaoga seminare ma mataupu faale lotu, Brigham Young University, 8 Iulai 1964, Matagaluega Faamaumauga o Talafaasolopito, O le Ekalesia a Iesu Keriso o le Au Paia o Aso e Gata Ai, 2-3.

  2. “He Lived Great, Died Great in Eyes of God and His People,” Church News, 10 Tes. 1955, 4.

  3. The teachings of the Harold B. Lee, ed. Clyde J. Williams (1996), 371.

  4. “He Lived Great,” 13.

  5. The teachings of Harold B. Lee, 371.

  6. In Conference Report, Oct. 1956, 62.

  7. “Two Great Commandments,” Savali o le Kerisimasi i tagata faigaluega o le Ofisa o le Ekalesia. 14 Tes. 1972, Matagaluega Faamaumauga o Talafaasolopito, O le Ekalesia a Iesu Keriso o le Au Paia o Aso e Gata Ai, 6.

  8. In Conference Report, Oke. 1972, 18; po’o Ensign, Ian. 1973, 23.

  9. “A Man among Men—A Man of Inspiration,” lauga i le Aso Faamamaluina Lona fa Faale Tausaga o Tavita O. Makei, 29 Set. 1968, Matagaluega Faamaumauga Talafaasolopito, O le Ekalesia a Iesu Keriso o le Au Paia o Aso e Gata Ai, 12.

  10. The teachings of Harold B. Lee, 372.

  11. “He Lived Great,” 5.

  12. “He Lived Great,” 5.

  13. In Conference Report, Ape. 1969, 132–33; Improvement Era, Iuni 1969, 105.

  14. The Teachings of Harold B. Lee, 373–374.

  15. The Teachings of Harold B. Lee, 372.

  16. The Teachings of Harold B. Lee, 372.

  17. The Teachings of Harold B. Lee, 374.

  18. The Teachings of Harold B. Lee, 375.

  19. In Conference Report, Konofesi Faa Eria Munich Germany 1973, 7.

Sa molimau mai Peresitene Harold B. Lee: “Ua ou… iloa o Iosefa Samita o se perofeta a le Atua soifua. Ou te iloa sa ia soifua ma maliu ina ia aumaia i lenei augatupulaga le ala e mafai ai ona maua le faaolataga.”

O le tisipenisione o le atoaga o taimi sa tatalaina i le Uluai Faaaliga, “o se faaaliga o uiga patino o le Atua le Tama ma Lona Alo” i le perofeta filifilia a le Alii.