Aoaoga a Peresitene
Mataupu 16: Tutu faatasi e Laveai Agaga

Mataupu 16

Tutu faatasi e Laveai Agaga

E faapefea ona fesoasoani aoaoga faavae o le talalelei ma le aiga ona galulue faatasi e faaolaina agaga?

Faatomuaga

A o auauna Harold B. Lee o se tasi o le Korama a le Toasefululua, sa tofia o ia e le au Peresitene Sili e vaaia atoa se taumafaiga ina ia taulai uma polokalama a le Ekalesia i le faamoemoega laualuga o le talalelei a Iesu Keriso—ia “faataunuu le faaofuina o le tagata i le tino ola pea ma le ola faavavau” (Mose 1:39). O lenei taumafaiga sa taua o le faamaopoopoga. O le faamaopoopo e aofia ai le faamamafaina o le taua o le aiga ma le auaiga e ala lea i le faamautinoaina o faamalolosia ma lagolago le aiga e ausilali, polokalama, ma gaoioiga. E aofia ai foi le faatulagaina o faalapotopotoga uma ma galuega a le Ekalesia i lalo o le taitaiga a le perisitua. I le 1960, e tele ni laasaga sa faia e faataunuu ai nei faamoemoega, e aofia ai le toe faamamafaina o afiafi faaleaiga ma le toe iloiloina o faasologa o polokalama o le Ekalesia ina ia mautinoa o malosi le aiga. E faaauau lava i aso nei le galulue faatasi i le Ekalesia i lalo o le taitaiga a le Au Peresitene Sili, i le mulimulitai lea i aoaoga faavae sa faaalia mai e le Alii.

Sa aoao mai Peresitene Lee: “O mea uma tatou te faia e tatau ona faia ‘ma le manatu tasi i le mamalu o le Atua.’[MFF 82:19.] Ma o le a le mamalu o le Atua? E pei ona faamalamalama e le Alii ia Mose, o le faataunuuina lea o le faaofuina o le tagata i le tino ola pea ma le ola faavavau. … I a tatou taumafaiga uma i le… polokalama faamaopoopo tatou te teuina pea nei mea tatou te maitauina i o tatou mafaufau. I se faaupuga faigofie, o o tatou faamoemoega tupito i le faamaopoopoga, o le faagaoioia lea o le perisitua e pei ona faamanino mai e le Alii, faatasi ai ma faatulagaga a ausilali e fesootai lelei i ai, ma lona lua ia faalautetele e matua ma aiga o latou valaauga e pei ona poloaiina ai e le Alii. Ma ua tatou vaai o mea uma tatou te faia e ao ona faia ma le fesili e tasi i o tatou mafaufau: pe o lenei gaoioiga o faatuputeleina ai le mea o faananau i ai le malo, pe o tasi ea o tatou manatu i lena faamoemoe faavae o le faalapotopotoga a le Alii—ia faaolaina agaga ma aumaia le tino ola pea ma le ola e faavavau i tagata?”1

Aoaoga a Harold B. Lee

E faapefea ona fesoasoani le Ekalesia ia “faataunuu le faaofuina o le tagata i le tino ola pea ma le ola faavavau”?

Ina ia saunia i tatou mo le taliaina i le afioaga o le Alii, o loo i ai ia te i tatou se Ekalesia. O le a le mea sa ta’ua e le Aposetolo o Paulo—Sa latou tuuina mai foi nisi e fai ma aposetolo, o perofeta, epikopo, aoao, evagalia—i se isi faaupuga, e faatuina le Ekalesia—mo le a? “Ina ia faaatoatoaina ai le au paia, latou te fai ai le galuega a auauna, ia atiina ae ai le tino o Keriso; seia tatou oo atu o i tatou uma lava ma le loto gatasi i le faatuatua ma le iloa lelei o le Alo o le Atua, ina ia fai ma tagata matua.” [Tagai Efeso 4:11–13.] Sa silafia e le Alii tatou te le atoatoa, ma o lea na ia tuuina mai ai le Ekalesia e fesoasoani ia i tatou ia avea ma tagata atoatoa.2

O le faamoemoega o le Ekalesia e le na ona faatuina o se faalapotopotoga lautele pe avea ma ona faamoemoega se isi lava mea e ese mai i le faaolaina o agaga.3

O le faamoemoega [o le Ekalesia o le] faaatoatoaina lea o olaga o i latou ua avea ma tagata o le Ekalesia. …O le faamoemoe ia aoao tagata ua auai, o le tino po o tagata o le Ekalesia i mataupu faavae ma aoaoga o i ai, e mafai ona o mai tagata i se lotogatasi o le faatuatua ma se malamalama e uiga i le Alo o le Atua seia oo ina atoatoa, o le malamalama lea, e tusa ai ma le finagalo o le Matai Lava Ia, a o Ia tautino mai i lena tatalo [lauiloa] i totonu o le Feagaiga Fou, “O le ola e faavavau foi lenei, ia latou iloa oe le Atua moni e toatasi, atoa ma le ua e auina mai, o Iesu Keriso lava lea.” (Ioane 17:3).4

Aisea e tatau ai ona manatu e uiga i faatulagaga?… Tatou te faatulaga ina ia sili atu ona lelei ma faigofie le faiga o le galuega a le Alii e ala i le faamatuu atu o tiutetauave i isi. Tatou te faatulaga ma faia le galuega a le Alii ia faigofie ma sili atu e ala i le talia ma le faataunuuina o tiutetauave, ia e maua mai ai taitai i tagata o le ekalesia. E faapei lava ona fetalai mai le Matai a o Ia tuuina atu i Ona au soo le poloaiga lenei e tasi- - -“Ina mulimuli maia ia te au, ou te faia oulua ma faifaiva i tagata” - –e mafai ona faapea a o tatou faia i aso nei- - -“Afai tou te tausia au poloaiga, o le a ou faia outou ma taitai o tagata ma taitai i lo’u nuu.”5

O le ekalesia ma le malo o le Atua o se ekalesia mo le lalolagi atoa ma e le faapitoa i se atunuu po o ni ituaiga tagata e tasi. O a tatou taumafaiga o le tuuina atu i le Au Paia uma a Le Silisili i soo se mea o nonofo ai, avanoa uma e ola ai ma atinae i le atoatoa e mafai ai, e atinae i le malosi ma i le mana mo le lelei i le laueleele ma maua le taui o le faamaoni.6

Aisea e taua ai ona faamalosi le aiga i soo se mea tatou te faia i totonu o le Ekalesia?

O fea o i ai le laina muamua o le puipuiga i totonu o lenei ekalesia? Pe o le Peraimeri? Pe o le Aoga Sa? E leo le ala lena na faaali mai e lo tatou Tama Faalelagi. Toe faitau le vaega e onosefulu valu o le Mataupu Faavae ma Feagaiga. O le a outou maua e tuuina e le Alii le laina muamua o le puipuiga, o le aiga, i luma o le tafa o le taua faasaga i mana ia o le a ono faatoilaloina nei puipuiga le aiga. (tagai MFF 68:25–32).7

O polokalama a le au perisitua e faagaoioia e lagolagoina ai le aiga; o polokalama a ausilali e ofoina atu ai fesoasoaniga taua. E mafai e taitai o le perisitua atamamai ona fesoasoani ia i tatou e faia la tatou vaega i le faataunuuina o le faamoemoega tupito o le Atua, “ia faaofuina le tagata i le tino ola pea ma le ola e faavavau” (Mose 1:39). Ua tauina mai ia i tatou e faaaliga a le Atua ma le aoaoina o tagata le taua o le aiga i le foafoaina o le poto masani o le olaga atoa faaletagata. …o le tele o mea o loo tatou faia faale-faalapotopotoga, e fausia ai se faatulagaga lagolago ao tatou saili e galueaiina le tagata, ma e tatau ona aua nei faagaloina le faatulagaga lagolago mo le agaga.8

O le aiga [o le] faatulagaga aupito muamua lava lea ma le taua a le Atua. Na tuuina mai le ki o a tatou polokalama faamaopoopo uma e le Au Peresitene Sili ina ua latou tautino maia mataupu faavae aupito taua e tatau ona tatou galulue i ai: “O le aiga o le faavae o le olaga amiotonu, ma e leai lava se isi mea faigaluega e mafai ona suia lona tulaga pe faatinoina lana matafaioi taua. O le mea sili e mafai ona faia e ausilali o le fesoasoani lea i le aiga i ona faafitauli, ma tuuina atu fesoasoaniga faapitoa ma fesoasoani i le mea o manaomia ai.”

O lona uiga, faatasi ai ma lena manatu, o gaoioiga taitasi i totonu o le Ekalesia e ao ona fuafua ina ia faamalolosia—ae ia le toese mai ai—le galueaiina o se aiga faatulagaina lelei. Afai e vaivai le taitaiga faamatua, e tatau i faiaoga o aiga o le perisitua ma ausilali ona tuuina atu taitaiga e tatau ai. O lona uiga i se tulaga taua o gaoioiga uma e faatulaga e le Ekalesia e tatau ona fuafua ma lenei manatu i le mafaufau, faatasi ma le faamamafa patino i le taua o le uunaiga o aiga taitasi e faia ma le faamaoni afiafi faaleaiga i vaiaso taitasi, ma uunaia ma faaauupegaina tama o umia le perisitua paia i le faataunuuina o o latou tiute e tatau ai a o avea ma ulu o o latou aiga.9

E le mafai e le Atua ona fesili atu i soo se tagata e faataulagaina lona aiga ina ia faataunuu ai isi ona tiute i totonu o le malo. Ua fia taimi o matou taumafai e faamamafa atu o le galuega pito sili ona taua i le galuega a le Alii o le a tatou faia o ni tama ma ni tane o galuega ia tatou te faia i totonu o puipui o o tatou fale? O tama o loo i luga o le tofiga e tasi lea e le mafai ona faamalolo mai ai.10

Ao ou manatunatu i la tatou mea o loo fai nei ma lona aafiaga talafeagai, sa oo mai upu a le Perofeta o Mika, “A o aso e gata ai e oo ina faatumauina ai le mauga o i ai le fale o Ieova i tumutumu o mauga, e faamaufaailogaina foi ia sili i mauga iti, ona gasolo ane lea o nuu i ai.

“E o mai lava nuu ese e tele, ma latou faapea ane, O mai ia, tatou o ae ia i le mauga o Ieova, o le fale foi o le Atua o Iakopo; e aoao mai ai o ia ia te i tatou i ona ala, ona tatou savavali ai lea i ona ala; aua e alu atu le tulafono mai Siona, o le afioga foi a Ieova mai Ierusalema.” (Mika 4:1–2.)

Ou te fai atu ia te outou tina ma tama o le Au Paia o Aso e Gata Ai, afai tou te tutu atu i le matafaioi o le aoaoina o a outou fanau i le aiga—o korama a perisitua o loo sauniaina tama, o le Aualofa o tina—o le a le pine ona oo mai lea o le aso e o mai le lalolagi atoa i o tatou faitotoa ma o le a faapea mai, “Faailoa mai ia i matou ou ala ina ia mafai ona matou savavali ai.”11

E mafai faapefea e faatulagaga a ausilali ona galulue faatasi i lalo o le taitaiga a le perisitua e faamalosi ai le aiga?

I se tulaga lautele lava, o le faamaopoopo o lona uiga. …o le tuu lea o le perisitua a le Atua i le mea sa fetalai mai ai le Alii e tuu i ai… o le ogatotonu ma le autu o le Ekalesia ma le malo o le Atua—ma vaai i aiga o le Au Paia o Aso e Gata Ai o i ai foi o latou tulaga i le fuafuaga paia o le faaolaina o agaga.12

O lenei o i ai pea faatulagaga i totonu o le Ekalesia e ese mai faatulagaga faaleperisitua o faatulagaga faaleausilali, e pei ona taua i totonu o le Feagaiga Fou, “o e fesoasoani, o taitai” e pei ona faaopoopo i le perisitua [tagai 1 Korinito 12:28]. Sa saunoa Peresitene F. Samita e faatatau i nei faatulagaga: “O loo i ai i lou mafaufau a tatou faalapotopotoga; o a ia faalapotopotoga? O fesoasoani i le faalapotopotoga faatulagaina a le Ekalesia. E le tutoatasi i latou. Ou te manao e fai atu i Alii Talavou ma Tamaitai Talavou a le Mutuale (MIA), ma le Aualofa, ma le Peraimeri, ma le Aoga Sa, ma vasega Faalelotu ma isi faalapotopotoga uma i totonu o le Ekalesia, e leai se tasi o i latou e tutoatasi mai le Perisitua a le Alo o le Atua, e leai se tasi o i latou e mafai ona tu i se taimi puupuu i le taliaina o le Alii pe a latou liliu ese mai le leo ma mai le fautuaga a i latou o umia le Perisitua ma pulefaamalumalu ia i latou. Latou te i lalo o mana ma le pule a le Ekalesia, ma latou te le tutoatasi na o i latou; pe mafai foi ona latou faaaogaina soo se aia i totonu o a latou faalapotopotoga i se tulaga tutoatasi mai le Perisitua ma le Ekalesia.“ [Gospel Doctrine, 5th ed. (1939), 383.]13

I le faaaliga sili o ona po nei e uiga i le faatulagaga o le Ekalesia, na faaiuina e le alii i lenei faamatalaga:

“Faauta, o le ala lenei na atiina ae ai e au aposetolo, i ona po anamua, lau ekalesia ia te au.

“O lea, ia taitoatasi le tagata ma tu ai i lona tofiga, ma galue i lona lava valaaulia, a ia le fai atu le ulu i vae e leai se aoga o vae; aua a leai ni vae o le a faapefea ea ona mafai e le tino ona tu?

“E aoga foi i le tino itutino taitasi, ina ia atiina ae faatasi itu uma, ma tausia le tino ia atoatoa.” (MFF 84:108–110.)

Ua manino, ao e mafaufau e uiga i na tusitusiga paia, sa tuuina mai e faamautu ai le manaomia o talatalaga le masuia ma le faaauau pea ma faamaopopoga o vaega eseese, le korama a perisitua ma ausilali ma isi iunite uma i totonu o le malo o le Atua mo ni mafuaaga se fa:

Muamua, e tofu faalapotopotoga taitasi ma ni galuega patino, ae ua le ina ia faoa ai le galuega a le isi, e faapei o le fai atu o le mata i lima, “e leai sou aoga.”

Lona lua, o vaega eseese taitasi e tutusa uma o latou taua i le galuega o le faaolataga, e pei lava o itutino taitasi o le tino faaletino e taua e faaatoa ai le tagata.

Lona tolu, ina ia malamalama mea uma ma aoaoina faatasi; ma le

Lona fa, ia mafai ona teuina ia atoatoa le faiga, po o se isi faaupuga, ina ia o gatasi ma le auivi o le fuafuaga a le Alii o faalapotopotoga mo le faaolataga o lana fanau, o le a faatino ai e le Ekalesia e faapei lava o le tino tagata ua faatulagaina atoatoa, faatasi ai ma itutino taitasi o loo galulue e tusa ma faamoemoega na faia ai i latou.14

O nisi taimi, i aso ua mavae, ua tatou liliu le faiga o mea, ma foliga mai ai ua tatou matele i polokalama ae le o le lafu [tagata o le Ekalesia]. Matou te uunaia tagata uma e aofia ai…ina ia mulimulita. …i lena poloaiga aua o le faamoemoega atoa lena: “ia faaofuina le tagata i le tino ola pea ma le ola e faavavau” (Mose 1:39). Ia faifai pea, afai tatou te mananao i se fua e iloa ai po o aoga lea polokalama po o lena polokalama: pe o fesoasoani lenei polokalama i le alualu i luma o le tagata agai i lena sini o le ola e faavavau i le afioaga o le Tama? Afai e leai, ma e leai sona sootaga i ai, o lona uiga e leai se avanoa e uunaia ai lena polokalama i totonu o le Ekalesia.15

Fautuaga mo Suesuega ma Talanoaga

  • Aisea e taua ai i mea uma tatou te faia i le talalelei, ona tatou manatua le pogai tupito o le Ekalesia–“ia faataunuu le faaofuina o le tagata i le tino ola pea ma le ola faavavau”? (Mose 1:39).

  • E faapefea ona fesoasoani le Ekalesia ia i tatou e faaatoatoa o tatou olaga? E faapefea ona fesoasoani ia i tatou e “tuputupu ae ma atinae i le atoatoa e mafai ai”?

  • Aisea ua avea ai le aiga ma muai faalapotopotoga taua ma le sili i faatulagaga uma a le Atua? O a ni mea e mafai ona tatou faia i o tatou valaauga faalelotu e faamalosi i le aiga?

  • O le a sou manatu o le a le uiga o le saunoaga a Peresitene Lee ina ua ia saunoa mai o le perisitua o le “totonugalemu ma le autu o le Ekalesia”? E faapefea ona fesoasoani ia i tatou le fautuaga o tuuina mai i totonu o le MFF 84:108–10 e malamalama ai i le pogai e tatau ai ona galulue faatasi faalapotopotoga a le perisitua ma ausilali?

  • E faapefea e polokalama a le au perisitua ma ausilali ona “gaoioi i lelagolagoina o le aiga”? E faapefea e nei polokalama ona lagolagoina o outou aiga?

  • I a tatou taumafaiga e auauna i le Ekalesia, aisea e tatau ai ona tatou faaeteete ina ia le avea polokalama ma mea sili atu ona taua nai lo tagata? E mafai faapefea ona tatou ausia lenei mea?

Faamatalaga

  1. Lauga tuuina atu i le konofesi aoao a le Aoga Sa, 2 Oke. 1970, Matagaluega o Faamaumuaga o Talafaasolopito, O le Ekalesia a Iesu Keriso o le Au Paia o Aso e Gata Ai, 7.

  2. Lauga tuuina tu i le Iunivesite a Brigham Young, 3 Oke. 1950, Faamaumuga Faletusi, Iunivesite a Brigham Young, 9–10.

  3. Lauga tuuina atu i le toe faatulagaina o le Siteki a Virgina,30 Iuni 1957, Matagaluega Faamaumauga o Talafaasolopito, O le Ekalesia a Iesu Keriso o le Au Paia o Aso e Gata Ai.

  4. The Teachings of Harold B. Lee, ed. Clyde J. Williams (1996), 587.

  5. The Teachings of Harold B. Lee, 565.

  6. The Teachings of Harold B. Lee, 385.

  7. The Teachings of Harold B. Lee, 262.

  8. The Teachings of Harold B. Lee, 267.

  9. The Teachings of Harold B. Lee, 559.

  10. The Teachings of Harold B. Lee, 292–93.

  11. I le Conference Report, Oke. 1964, 87; po o le Improvement Era, Tes. 1964, 1081.

  12. The Teachings of Harold B. Lee, 563.

  13. Laugaina i le Mutuale (MIA), 1948, Matagaluega o Faamaumauga o Talafaasolopito, O le Ekalesia a Iesu Keriso o le Au Paia o Aso e Gata Ai, 3.

  14. I le Conference Report, Oct. 1961, 77–78.

  15. Laugaina i le semina a sui risone, 4–5 Aper. 1973, Matagaluega o Faamaumauga o Talafaasolopito, O le Ekalesia a Iesu Keriso o le Au Paia o Aso e Gata Ai, 10.