Mataupu 1

O Le Toefuataiga o le Talalelei

Na auala mai i le Perofeta o Iosefa Samita, sa toefuataiina mai ai e le Alii Lana talalelei i lona mamalu, mana, faatulagaga, ma le malamalama moni.

Mai le Soifuaga o Wilford Woodruff

Ao tamaitiiti Wilford Woodruff, sa faauo atu o ia ma lona aiga ia Robert Mason, o se tagata sa lauiloa ona o ona talitonuga patino faalelotu. Sa manatua e Peresitene Woodruff:

“Sa talitonu o ia e tatau ona i ai perofeta, aposetolo, miti, faaaliga vaaia ma faaaliga i le ekalesia a Keriso, le mea lava e tasi e pei ona sa i ai ia i latou o e sa ola i aso anamua; sa ia talitonu foi o le a faatuina e le Atua se nuu ma se ekalesia, i aso e gata ai, e i ai perofeta, aposetolo ma meaalofa, mana, ma faamanuiaga uma, ia sa i ai i [lana ekalesia] i soo se augatupulaga o le lalolagi. … Sa masani ona sau o ia i le fale o lo’u tama ao ou laitiiti, ma aoaoina a’u ma o’u uso i na aoaoga faavae; ma sa ou talitonu ia te ia.

“Sa matua malosi o [ia] e tatalo, sa i ai foi ana miti ma faaaliga, ma sa faasino i ai e le Alii ni mea se tele, e ala i faaaliga, o mea o le a oo mai i aso mulimuli.

“O le a ou ta’uina atu nei se tasi faaaliga, lea sa ia ta’u maia ia te au. O le taimi mulimuli lava na ou vaai ai ia te ia, sa ia fai mai: ‘Sa ou galue i la’u faatoaga i le aoauli ae ufitia loa a’u i se faaaliga. Sa tuuina a’u i le ogatotonu o se vaomatua tele o laau aina; Sa ou matua fia ai lava, ma ou savali ai i le ala e ui atu i le togalaau, e sailiili se fua ou te ai ai; ae sa le mafai ona maua se fua i le togalaau atoa, ma sa ou tagi ai aua sa le mafai ona ou mauaina se fua. Ao o’u tu ma ou sioa atu i le togalaau, ma ou manatunatu pe aisea na leai ai se fua, sa amata ona pauu i lalo laau i o’u itu uma seia oo ina leai ma se laau e tasi na tu i le togalaau atoa; ma a o o’u maofa i lenei vaaiga, sa ou vaaia ai ni tatupu fou o amata ona tulioso a’e mai aa o laau ia na pauu, ma e na matalatala mai i ni laau fou lauusiusi i luma o ou mata. Sa totogo mai, fuga mai, ma fua mai seia oo ina matua faatutumuina laau i fua matua silisili ona lelei faatoa ou vaai lava i ai, ma ou olioli ai ina ua ou vaai i nei mau fua matagofie. Sa ou laa atu i luma o se laau ma tauina seia tutumu o’u lima i fua, ma ou maofa i lona lalelei, ma ina ua ou tago atu o le a tofoina, ae tapunia loa ma le faaaliga, ma ou toe tei ane ai o loo ou i totonu o la’u faatoaga i le nofoaga lava lea sa ou i ai ina ua amata le faaaliga.

“ ‘O lea sa ou tootuli ai i luga o le eleele, ma tatalo atu i le Alii, ma aioi atu ia te ia, i le suafa o Iesu Keriso, e faailoa mai ia te a’u le uiga o lenei faaaliga. Sa fetalai mai le Alii ia te a’u: “O le faauigaga lenei o le faaaliga; o laau tetele o le vaomatua o le faatusa o augatupulaga o tagata lea foi e te ola ai. E le o i ai se ekalesia a Keriso, po o le malo o le Atua i luga o le fogaeleele i lau tupulaga. E leai se fua o le Ekalesia a Keriso i luga o le fogaeleele. E le o i ai se tagata ua faauuina e le Atua e faatinoina soo se sauniga paia o le talalelei o le faaolataga i luga o le fogaeleele i lenei taimi ma lenei tupulaga. Ae peitai, i le tupulaga e sosoo ai, o A’u le Alii ou te faatuina lo’u malo ma la’u Ekalesia i luga o le fogaeleele, ma o fua o le malo ma le ekalesia a Keriso, e pei ona sa mulimuli i perofeta, aposetolo ma le au paia i augatupulaga uma, o le a toe maua i lo latou atoatoaga i luga o le fogaeleele. O le a e ola e te vaai i lena aso, ma o le a e tago i lona fua, ae o le a e le tofo i ai i la le tino.’ ”

Sa faaauau le faamatalaga a Peresitene Woodruff: “Ina ua uma ona [ia] faamatala mai le faaaliga ma lona faauigaga, sa ia faapea mai ia te a’u, … ‘O le a ou le tofo lava i lenei fua i la le tino; ae o le a e [tofo ai], ma o le a avea oe o se isi e iloga i lena malo.’ Ona ia liliu ai lea ma alu ae tuua au. O toe upu lava ia na tautala mai ai o ia ia te a’u i luga o le fogaeleele. …

“Sa ia mauaina lenei faaaliga po o le tausaga e 1800, ma na ia ta’uina mai ia te a’u i le 1830—le tautotogo lava lea e tasi na faavaeina ai le Ekalesia lenei.

“O lenei faaaliga, faatasi ma isi ana aoaoga ia te a’u, sa maua ai se mea na matua iloga na aafia ai lo’u mafaufau, ma sa ou matua malosi ou te tatalo i le Alii e taitai a’u i le Agaga, ma saunia a’u mo lana Ekalesia pe a oo mai.”

Ina ua auai Wilford Woodruff i le Ekalesia, sa ia tusia se tusi i lana uo o Robert Mason. “Sa ou … ta’uina atu ia te ia ua ou mauaina le Ekalesia a Keriso lea sa ia ta’u maia ia te a’u,” sa ia toe manatua ai mulimuli ane. “Sa ou ta’u atu ia te ia e uiga i lona faatulagaga ma le oo mai o le Tusi a Mamona; ma o le Ekalesia e i ai perofeta, aposetolo, ma meaalofa ma faamanuiaga uma i totonu, ma o le fua moni lea o le malo ma le Ekalesia a Keriso ua faailoa mai i le Au Paia e pei ona faaalia e le Alii ia te ia i lana faaaliga. Sa ia mauaina la’u tusi, ma faitauina ma toe faitauina mo le tele o taimi, ma sa ia uuina [le tusi] e pei o loo ia taulimaina fua i le faaaliga; ae peitai ua matua o ia, ma e lei umi ae maliu. Sa lei ola o ia e feiloai i se Toeaina e faatinoina sauniga o le Talalelei ia te ia.

“O le avanoa muamua lava sa ou mauaina, ina ua uma ona faaalia mai le mataupu faavae o le papatisoga mo e ua oti, sa ou alu atu loa ma papatisoina mo ia.”¹

Aoaoga a Wilford Woodruff

O le talalelei a Iesu Keriso e faavavau ma e le suia lava.

Ua tuuina e le Alii Lona aao i le tele o taimi i augatupulaga eseese e faavae Lona malo i luga o le fogaeleele; ua Ia faatula’i ae alii—ni agaga tamalii—o e ua o mai ma soifua i le faaletino i vaitau ma vaitaimi eseese. Ua ia musuia na alii; ua tuuina ia i latou faaaliga; ua faatumuina i latou i musumusuga, i le malamalama, i le upumoni, i mea o le malo o le Atua.²

Ana fai e te feiloai ia tama Atamu, ma Setu, Mose, Arona, Keriso, po o le au aposetolo, latou te aoaoina uma lava aoaoga faavae lava ia e tasi sa aoaoina ai i tatou; o le a leai se iota se tasi o le a ese ai i latou. O lenei talalelei e faavavau i lona natura ma e le suia lava [ae tumau] i ona uiga patino.³

E lei i ai lava se isi ua na o le tasi le talalelei, ma o le a leai lava se isi ae na o le tasi e auina atu i le fanauga a tagata, ma e lei suia ma o le a le mafai lava ona suia i se taimi po o le faavavau. E tumau lava i tupulaga uma o le lalolagi; o ona sauniga e tumau. O e talitonu i le talalelei sa i ai le faatuatua i a Iesu ao lei afio mai o Ia i la le tino, ma o le salamo i agasala sa talaiina a o lei oo i Ona aso e oo mai lava i aso nei talu mai lena; sa latou faatinoina foi papatisoga mo le faamagaloina o agasala ma le faaeeina atu o lima mo le meaalofa o le Agaga Paia; ma sa ia i latou le faatulagaga o le ekalesia faatasi ma alii musuia iina. … O nei mea uma e manaomia i tupulaga uma o le lalolagi.⁴

Soo se taimi lava e i ai se ekalesia a le Alii i luga o le fogaeleele, ma mauaina e lena Ekalesia le Talalelei a Keriso, ma latou olioli i le Agaga Paia, o meaalofa ma mea silisili uma sa i ai mai le vavau i le Ekalesia a le Atua e i ai foi i lena Ekalesia.⁵

Sa faavaeina e Iesu Keriso Lana Ekalesia i le taimi o Lana galuega i le olaga nei, ae sa toe liliuese tagata a o lei umi ona mavae Lona maliu ma Lona Toetu.

O Iesu Keriso … na aumaia le Talalelei i tagata Iutaia ma faavaeina Lona malo e lotolotoi ia i latou, ma sa aumaia faatasi ma ana meaalofa, mea silisili ma mana uma; sa faamaloloina mai; tuli esea agaga leaga; sa faaalia meaalofa uma ia i latou. Ae peitai sa le taliaina o Ia e tagata Iutaia, ma iu ai ina latou faaoo le oti ia te Ia. … Sa lei taliaina o Ia; ma o lea, e tusa ai ma poloaiga, sa auina atu ai lenei Talalelei i Tagata o Nuuese.⁶

Ina ua tuuina atu le malo i Tagata o Nuuese, sa tuuina atu ma aposetolo ma perofeta, ma le mana o le faamalologa, ma faaaliga tuusao mai le Atua, faatasi ma meaalofa ma mea silisili uma sa talitonu i ai tagata Iutaia, ma olioli ai a o latou tumau i le faatuatua: ina ua auina atu i Tagata o Nuuese sa matua atoatoa i lona faavaeina, ae i le gasologa o taimi sa latou suia ai sauniga o le malo o le Atua, ma pauu atu ai i le ituaiga le talitonu lava e tasi, ma sa tumau ai mo senituri e aunoa ma le faatulagaga moni o le lagi faatasi ma i latou. … I le gasologa o taimi o meaalofa, ma mea silisili, ma mana o le malo o le Atua sa aveesea, ma o tagata o e sa faia sauniga i le ekalesia anamua a le Atua sa toetoe lava ina a fasiotia uma; sa fasiotia i latou ona o lo latou taumafai e faatumauina le ekalesia i lona mama, ma taumafai i lo latou malosi uma ina ia faatulagaina ia aoaoga faavae ia sa faaalia mai e le Atua.⁷

Ua mavae senituri uumi. E miliona ma miliona tagata na fananau mai, ola i luga o le fogaeleele, oti, ma o atu i le lalolagi o agaga, ma e lei i ai ma se agaga e toatasi o i latou, e tusa ai ma lo tatou iloa, sa i ai se mana e alu atu e faatasi ma tagata ma faatinoina sauniga o le Talalelei o le ola ma le faaolataga. E le taumate sa i ai le miliona ma miliona o tagata lelei, o e sa faia i le malamalama sili sa ia i latou. …, o e sa tulai mai i o latou aso ma talai le Talalelei e tusa ai ma le malamalama sa ia i latou. Ae peitai sa le i ai le mana ia te i latou e faatinoina ai se sauniga e tasi e oo atu sona malosi i talaatu o le oti. Latou te lei umia le Perisitua paia.⁸

Sa toeitiiti lava oge le lalolagi i le fiailoa o le upumoni, ma tulaga i le Agaga Paia lea e sasaa mai e taitaia ai tagata i auala o le upumoni. … O le mea moni lava faapea sa tulai mai i lea augatupulaga ma lea augatupulaga ma faavaeina polokalama ma faatulagaga, ia latou te tautino uma mai e o gatasi ma le ata o le faaolataga, ae peitai e tetee le tasi i le isi, seia oo ina latou faatuina le tele o lotu e eseese uma a latou vaega o mataupu faavae, e faamaonia mai ai e i ai lava ni mea o sese ai.⁹

Ina ua mavae senituri o le liliuese, sa toefuataiina mai e le Alii le atoaga o le talalelei e ala i le Perofeta o Iosefa Samita.

O loo ua agai atu i luma le talalelei i o tatou aso i lona mamalu, mana, faatulagaga, ma le malamalama moni e pei lava sa masani ai ao tuu mai e le Atua sona nuu i le lotolotoi o tagata lea sa ia taliaina. O le faatulagaga ma le talalelei lava e tasi lea sa ala ai ona maliu Keriso, ma faamasaa ai le toto o aposetolo ina ia faamaonia, lea ua toe faavaeina i lenei tisipenisione. Sa faapefea ona oo mai? E ala i le galuega a se agelu paia mai le Atua, mai le lagi, o le sa talanoa ma le tagata, ma faaalia ia te ia le pogisa sa ufitia ai le lalolagi, ma faailoa atu ia te ia le matautia o le pogisa lea sa liolio ai atunuu, vaaiga na e tatau ona tutupu i lenei tisipenisione, ma o le a mulimuli le tasi i le isi i se faasologa vave lava seia oo atu i le toe afio mai o le Mesia [tagai Iosefa Samita—Talafaasolopito 2:30–49]. Sa aoaoina e le agelu ia Iosefa Samita i na aoaoga faavae o loo manaomia mo le faaolataga o le lalolagi; ma sa tuuina atu e le Alii ia te ia poloaiga, ma faamauina i ona luga le perisitua, ma tuuina atu ia te ia le mana e taitaiina ai sauniga i le maota o le Alii. Sa ia ta’u atu ia te ia e le o i ai le talalelei i tagata, ma sa lei i ai se faatulagaga moni o lona malo i le lalolagi, ma sa liliuese tagata mai lana faatulagaga moni, suia sauniga ma solia le feagaiga faavavau, ma talia pepelo ma mea sa leai se aoga. Sa ia tauina atu ia te ia ua oo mai le taimi e faataatia ai le faavae mo le faavaeina o le Malo o le Atua i le lotolotoi o tagata mo le toe taimi e sauniuni ai mo le gataaga o le lalolagi.¹⁰

O le a le mea na faia e Iosefa Samita ina ua maea ona ia mauaina [le] perisitua ma ona sauniga? O le a ou tauina atu ia te outou le mea na ia faia. Sa ia faia le mea sa le mafai ona faia e senituri e sefulufitu ma augatupulaga e limasefulu, o e ua mavae ma tea atu, mai faifeau uma ma ekalesia uma i le lalolagi faa-Kerisiano, ma le lalolagi atoa pe a tuu faatasi—e ui lava o se talavou [e lei aoga], ae sa ia tuuina atu i le lalolagi le talalelei a Iesu Keriso i lona atoatoa, manino ma le faigofie, e pei ona aoaoina e lona lava Mataisau ma ana aposetolo; sa ia tuuina atu le ekalesia a Iesu Keriso ma le malo o le Atua i le atoatoa o la laua faatulagaga, e pei ona faaalia mai e Paulo—faatasi ma le ulu ma vae, ogalima ma lima, itu tino uma o le tino e atoatoa i luma o le lagi ma le lalolagi [tagai 1 Korinito 12:12–28]. E faapefea e ia o se tamaitiiti [e lei aoga], ona faia se mea sa matua le mafai e le aupopoto uma o le lalolagi Kerisiano mo le sefulufitu senituri? Aua sa taitaiina o ia e le mana o le Atua, sa faatonutonuina o ia e na alii, a o soifua i le faaletino, na latou talaiina le talalelei lava lea e tasi, ma i le faia o lea mea sa ia faataunuuina ai mea sa vavalo i ai uma le Tama ia Atamu, Enoka, Mose, Elia, Isaia, Ieremia ma Iesu ma ana aposetolo.

E sao le fai mai a Paulo—“Aua ou te le ma i le tala lelei ia Keriso; aua o le mana lava lea o le Atua e ola ai i latou uma o e faatuatua.” [Tagai Roma 1:16.] Ia faapena foi ona fai mai le Au Paia o Aso e Gata Ai—“Matou te le mama i le talalelei a Keriso.” Ou te le ma ou te fai atu o Iosefa Samita o le perofeta a le Atua; ou te le ma ou te molimau atu o ia sa valaauina e le Atua, ma faataatiaina le faavae o lenei ekalesia ma le malo i luga o le fogaeleele, aua e moni lea, ma o soo se alii po o se tamaitai ua musuia e le Agaga Paia e mafai ona ia vaai ma malamalama i nei mea.

… Sa soifua o ia seiloga ua maua uma e ia ki, sauniga paia ma tulafono uma sa tuuina mai i soo se tagata i luga o le fogaeleele mai le vavau, mai le Tama ia Atamu ma faasolo mai ai, e tua mai i lenei tisipenisione. Sa ia mauaina mana ma ki mai lima o Mose mo le faapotopotoina o le aiga o Isaraelu i aso o le gataaga; sa ia mauaina mai lima o [Elia] ia ki o le faamauina o loto o matua i fanau ma loto o fanau i matua; sa ia mauaina mai lima o Peteru, Iakopo ma Ioane le tulaga faa-aposetolo, ma mea uma e aofia ai; sa ia mauaina mai lima o Moronae ki ma mana uma e manaomia mo le laau a Iosefa i lima o Efaraima; sa ia mauaina mai lima o Ioane le Papatiso le perisitua Arona, faatasi ai ma ki ma mana uma; ma isi ki uma ma mana e aofia i lenei tisipenisione, ma ou te le ma e fai atu o ia lava o se perofeta a le Atua.¹¹

O Iosefa Samita, nai lo lona soifua seia toeitiiti afe ona tausaga e pei ona sa soifua ai Atamu, sa soifua o ia e tusa o le tolusefulu valu ona tausaga. Sa ia auina mai le faamaumauga o le laau a Iosefa mai lima o Efaraima—le talafaasolopito o tagata anamua sa nonofo i lenei konetineta. O le mana o le Atua sa ia faaliliuina ai, ma ua maea ona lolomiina i gagana e tele. E ese mai lena, sa ia faatulagaina le Ekalesia a Iesu Keriso o le Au Paia o Aso e Gata Ai i luga o faavae o aposetolo ma perofeta, ma Keriso Iesu o le maatulimanu autu [tagai Efeso 2:20]. Sa faauuina alii i le Perisitua ma auina atu, mai i a latou galuega eseese o le olaga, e tauaveina lenei Talalelei i le lalolagi. Sa faailoa atu e le Atua ia Iosefa Samita faapea sa valaauina o ia ina ia teuteu le tovine mo se toe taimi mo le taimi mulimuli lava a o lei afio mai le Atalii o le Tagata [tagai MFF 24:19]. Talu mai lena, ua faitau afe ma afe Toeaiina o Isaraelu ua auina atu i le lalolagi e talai le Talalelei. … Ia faitauina e soo se tagata ia faaaliga i le Tusi o Mataupu Faavae ma Feagaiga, ia sa auina atu e ala atu ia te ia i si taimi puupuu sa ia faaaluina iinei i la le tino. O se tasi o faamaumauga matua sili ona maoae ua tuuina atu e se tagata i le fanauga a tagata. E le gata i lea, ae sa ia faatulagaina faaeega paia ma faia le tele o isi galuega. O ai se na te manatu ia te ia, i le taimi puupuu sa ia soifua ai i le faaletino, na te faia [ni mea] sili atu nai lo ia [mea] na ia faia? Sa ou mauaina o’u faaeega paia mai ona aao. Sa ia aumaia nei sauniga uma ia ua maea ona tuuina atu i le Au Paia o Aso e Gata Ai. E moni lava, o se mea ofoofogia ma le matagofie lona faatinoga o le tele o mea sa ia faia.¹²

Ua tatou maua nei le avanoa e savavali ai i le malamalama o le talalelei toefuataiina.

Ou te manatu ua faamanuiaina soo se tagata lava ua faaalia i ai e le Alii le talalelei a Iesu Keriso, o e ua ia avatu i ai le perisitua paia ma le pule e faia ai sauniga i lona maota. … Ou te manatu o lo tatou tulaga lenei i le aso; ua tatou maua le avanoa e savavali ai i le malamalama, ua tatou maua le avanoa e malamalama ai ma iloa le upumoni, o le iloa o le auala e faaolaina ai ma faaeaina i luma o lo tatou Tama o lo tatou Atua. Ua tatou i ai i le tulaga e iloa lona mafaufau ma lona finagalo, e ala i ana auauna o perofeta. Ua tuuina mai e le Alii ia i tatou faiaoga ma alii musuia, o alii o loo musuia e le Agaga ma le mana o le Atua; faaofuina i latou i le upumoni ma faaeeina i latou i le poto e aoao mai i tatou i taimi uma i le ala e tatau ona tatou savavali ai. O se faamanuiaga maoae lenei.¹³

Ao ou toe tomanatu … i le tulaga o le aiga o le tagata soifua, ma manatunatu i le eseesega o lo tatou tulaga mai le toatele o tagata, ou te lagonaina ai faapea e tatau ona tatou faafetai i lo tatou Atua sili o Le e faamanuiaina i tatou. O loo i ai le miliona ma miliona o le fanauga a tagata soifua o e o loo faapotopoto i fale eseese, i falesa tetele, i falelotu ma falesa, mo le faamoemoe e tapuai atu i le Atua, ae o i ai ea se tasi o na mau faapotopotoga o e o mai faatasi ma se malamalamaaga o le upumoni, vagana ai o loo i ai se Toeaina o le Au Paia o Aso e Gata Ai o le ua valaauina e talai atu i tagata uma o le lalolagi? Pe o mai faatasi ea i latou ma so latou malamalamaaga i mataupu faavae o le talalelei lea e tasi, le ata lava lea e tasi o le faaolataga, le talalelei a Iesu Keriso, i se auala ma se faiga e mafai ai ona tasi i latou?

I le taimi lenei, e le mafai e le Atua ona faia ia tasi se nuu i le tele o ituaiga o faatuatuaga, ma le matua eseese tele o mataupu faavae, e matuai feteenai le tasi i le isi, e pei ona i ai i le lalolagi, ae o tatou o se nuu faamanuiaina; o loo ia i tatou aoaoga faavae o le aufaatasi ma le lotogatasi, ma i le faatinoina o ia [aoaoga faavae] latou te fusia faatasi i tatou ma avea i tatou ia tasi.

O luga o lenei aoaoga faavae [o le lotogatasi] lea e faamanuiaina ma faasaolotoina ai le Au Paia o Aso e Gata Ai. Ua matua tele lava ina laveaiina mai i tatou mai na faalavelave ma tulaga o le le mautonu, mataupu faavae sese, le pogisa, le sese ma le masalosalo lea sa faapogisaina ai o tatou mafaufau seiloga lava na faailoa mai le malamalama i le fanauga a tagata o lea sa i ai i latou i le pogisa, aua o le tulaga lava lea sa i ai i tatou uma; i se itu tele lava, sa tatou fetolofi lava i le pogisa seia oo ina taunuu mai le malamalama. E ui lava faapea tatou te faamaoni, ma faapea e faaosofia i tatou ona o lagona sili ma le paia, ae peitai ana le faaalia mai le atoatoaga o le talalelei, e pei lava le lalolagi o le tauaso tautagotago mo le puipui [tagai Isaia 59:9]. Sa leai ni a tatou Aposetolo, leai ni Perofeta, sa leai ni a tatou alii musuia e tulai mai ma ta’u mai ia i tatou le mea e tatau ona fai ina ia faasaoina ai, ma sa tatau ai lava lo tatou ui atu i na faafitauli, faanoanoaga ma le pogisa lea e saisaitia ai le fanauga a tagata ao nonofo i lalo ifo o aoaoga faavae sese, faiga sese, ma faiaoga sese. …

Ua faasaolotoina i tatou mai nei mea, ua aveesea le ao o le pogisa ma i tatou, ma o le malamalama o le upumoni faavavau ua amata ona susulu i o tatou mafaufau. …

O lenei mea ou te faitauina o se tasi o faamanuiaga matua silisili lea ua tuuina mai e le Atua i le fanauga a tagata, ina ia aoaoina atu le upumoni manino ia i latou. …

O fea o i ai se alii po o se tamaitai na te malamalama i se mea e uiga i le Atua pe uiga i le faavavau vagana ai lava ina ua faaalia e Iosefa Samita le atoatoaga o le talalelei? E mafai ona ou faitauina na mea i le Tusi Paia lea tatou te talitonu ai nei ma talia, ae peitai sa siomia a’u i faiga a le lalolagi ma sa le mafai ai ona ou malamalama ai.

Ua aoaoina nei i tatou, mai lea taimi i lea taimi, i aoaoga faavae manino o le talalelei a Iesu Keriso, le ata o le faaolataga—le ala e ola ai ina ia taliaina e lo tatou Tama oi le Lagi. E le o se faamanuiaga ea lenei e sili atu nai lo faamanuiaga uma? Afai e mafai ona malamalama lenei nuu i o latou faamanuiaga e le tatau lava ona i ai so latou faanoanoa itiiti. Afai e mafai ona malamalama lenei nuu i le tulaga latou te tutu ai ma le latou fesootaiga moni ma le Atua e mafai ona latou matua lagona le loto malie, ma e mafai ona latou iloa o lo tatou Tama Faalelagi e alofa mutimutivale ia i tatou ma ua ia faaeeina faamanuiaga maoae ma le paia i luga ia i tatou.¹⁴

Ou te faafetai i le Atua ona o lea ua ou ola i nei aso ma lenei tisipenisione o le lalolagi, ina ua faalogo o’u taliga i le leo o le atoatoaga o le talalelei a Keriso.¹⁵

Fautuaga mo Suesuega ma le Aoaoina atu

Mafaufau i manatu nei a o e suesueina le mataupu po o lou sauniuni foi e aoao atu. Mo fesoasoaniga faaopoopo, tagai i itulau v–ix.

Toe iloilo le tala i le itulau 1–3. O le a le mea sa misi mai le olaga o Robert Mason? O le a se mea e aoao mai e lenei tala e uiga i le Liliuese Tele ma le Toefuataiina o le talalelei?
Aoao itulau 3–5, vaavaai ni uiga faapitoa o le Ekalesia moni a le Alii. Aisea e taua ai le tatau pea ona faavaeina le Ekalesia ia tusa ai ma le mamanu e tasi?
E tusa ai ma le finagalo o Peresitene Woodruff, o le a le mea sa auala atu ai le Liliuese Tele? O a nisi o taunuuga o le Liliuese Tele? (Tagai itulau 4–5). O faapefea ona faamaonia nei taunuuga i le aso?
Toe iloilo itulau 6–9, ma vaavaai ni nai taunuuga maoae a le Perofeta o Iosefa Samita i le Toefuataiina o le talalelei. O faapefea ona aafia lou olaga i ana faataunuuga maoae?
Faitau le faamatalaga lea o loo i le itulau e 7. E faapefea ona tatou faaali atu tatou te le ma i le talalelei toefuataiina a Iesu Keriso?
Matau upu pogisa ma le malamalama i itulau 9–10. O a ni mea e te aoaoina mai i le faaaogaina e Peresitene Woodruff o nei upu? O le a se mea e ono misi mai lou olaga pe ana e le talisapaia le talalelei toefuataiina?

Mau E Faatatau I Ai: Isaia 29:10–14; Amosa 8:11–12; Mamona 1:13–14; MFF 128:19–21