Mataupu 3

O Le Tisipenisione o le Atoatoaga o Taimi

I le avea ai ma Au Paia o Aso e Gata Ai, ua ia i tatou se tiute paia e fesoasoani e fausia le malo o le Atua i lenei tisipenisione faaiu.

Mai le Soifuaga o Wilford Woodruff

I taimi eseese i le faasologa o le talafaasolopito o le lalolagi, sa faavaeina ai e le Alii ia tisipenisione faaletalalelei. I tisipenisione taitasi ua Ia faaalia Lana talalelei e ala mai le tasi po o le tele foi o ana auauna ua faamaonia. O le Perofeta o Iosefa Samita sa avea ma meafaigaluega a le Alii i le faavaeina o le augatupulaga o loo i ai nei, lea e taua i tusitusiga paia o le “augatupulaga o le atoatoaga o taimi” (Efeso 1:10; MFF 128:20).

I le tautotogo o le 1834, sa auai Wilford Woodruff i se fono faaleperisitua i Katelani, Ohaio. I lenei fonotaga sa amata ai ona ia malamalama i le taunuuga o le Ekalesia i lenei tisipenisione. Sa mulimuli ane ona faamatala mai:

“Sa valaauina e le Perofeta i latou uma lava o e umia le Perisitua e faapotopoto i le tamai falea’oga laau sa i ai iina. O se fale e laitiiti lava, pe a ma le 14 futu faatafafa. Ae na ofi uma ai le Au Perisitua atoa O Le Ekalesia a Iesu Keriso o le Au Paia o Aso e Gata Ai o e sa i ai i le taulaga o Katelani i lena taimi. … O le taimi muamua lena na faatoa ou vaai ai i a Oliva Kaotui, pe na ou faalogo foi i ai o tautala; o le taimi muamua lea na faatoa ou vaai ai ia Polika Iaga ma Heber C. Kimball, ma le au Pratts e toalua [Orson ma Parley], ma Orson Hyde ma le isi toatele. Sa leai ni Aposetolo i le Ekalesia i le taimi lena vagana ai Iosefa Samita ma Oliva Kaotui. Ina ua matou faapotopoto sa valaau mai le Perofeta i Toeaina o Isaraelu faatasi ma ia e folafola atu molimau o lenei galuega. O i latou uma o e ua ou ta’ua o latou igoa sa lauga, ma le isi toatele ou te lei ta’ua o latou igoa, sa faia a latou molimau. Ina ua maea uma latou sa faapea mai le Perofeta, ‘Uso e ua matua faagaeetia a’u ma ua aoaoina e ala i a outou molimau iinei i le po nei, ae ou te fia fai atu ia te outou i luma o le Alii, e tou te leiloaina nisi mea faaopoopo e uiga i taunuuga o lenei Ekalesia ma le malo nai lo se pepe i luga o vae o lona tina. Tou te lei malamalama i ai.’ Sa pei e faateia au. Sa ia faapea mai ‘ua na o sina aofaiga toaitiiti lava o le Perisitua o loo outou vaai atu i ai i le po nei, ae o lenei Ekalesia o le a faatumulia ai Amerika i Matu ma Saute—o le a faatumulia ai le lalolagi.’ ”¹

Sa tuuina atu e Wilford Woodruff lona soifua i le fausiaina o le malo o le Atua, ma ia faaauau pea ona maua faatonuga mai ia Iosefa Samita, e oo lava ina ua mavae le maliu o le Perofeta. Sa ia faamatalaina sana miti lea sa la talanoa ai ma Iosefa Samita: “Sa ou vaai ia te ia i le faitotoa o le malumalu sa i le lagi. Sa ia oo mai ma fai mai ia te au. Sa ia faapea mai e le mafai ona tu se i talanoa mai ia te a’u leaga o loo faanatinati o ia. O le tagata na sosoo ona ou feiloai atu i ai o Iosefa Samita le Matua [Iosefa Samita Sr.]; e le mafai ona ia talanoa mai ia te a’u leaga o la foi sa faanatinati. Sa ou feiloai i le toatele o isi o le usoga o e sa umia tofiga maualuluga i le lalolagi, ma e leai ma se isi o i latou sa mafai ona tu ma talanoa mai ia te a’u ona sa latou taufai faanatinati uma lava. Sa ou matua ofo. Sa faasolo mai ma sa ou toe vaai atu i le Perofeta ma sa maua lo’u avanoa e fai atu ai ia te ia sa’u fesili.

“ ‘O lenei,’ sa ou fai atu ai, ‘Ou te fia iloaina pe aisea ua e faatele’a’i ai. Sa ou faatele’a’i i lo’u olaga atoa lava; ae peitai sa ia te a’u le manatu e mae’a uma a’u faatele’a’iga pe a ou oo atu i le malo o le lagi, pe a fai ou te oo atu i ai.’

“Sa faapea mai Iosefa: ‘O le a ou ta’u atua ia te oe, Uso e Woodruff. O tisipenisione uma lea sa i ai le perisitua i le lalolagi ma ua oo atu i le malo selesitila e i ai le aofaiga faapitoa o galuega e fai e sauniuni ai mo le oo atu i le lalolagi faatasi ma le Faaola pe a ia foi mai e nofotupu i luga o le fogaeleele. O augatupulaga taitasi sa lava le taimi e fai ai le galuega. Ae e le lava so tatou taimi. O tatou o le tisipenisione faaiu, ma e matuai tele galuega e manaomia ona fai, ma ua tatau ai ona tatou faatele’a’i ina ia faataunuuina.’ ”²

Aoaoga a Wilford Woodruff

Sa silafia e le Alii ma Ana perofeta lenei tisipenisione mai le amataga a o lei faavaeina le lalolagi.

O tagata musuia uma, mai i aso o le tama ia Atamu e oo mai i aso o Iesu, sa i ai se vaaiga, i ni nai vaega, o le tisipenisione faaiu ma le maoae o le atoatoaga o taimi, o le taimi o le a tuuina mai ai e le Alii lona aao e sauniunia le lalolagi ma se nuu mo le afio mai o le Atalii o le Tagata ma se nofotupu o le amiotonu.³

Ou te manatu o le galuega … lea na gaoioi pea mai le taimi na faatulagaina ai lenei ekalesia, o loo tauaveina atu le fuafuaga maoae a lo tatou Tama oi le Lagi,—lena fuafuaga lea sa faauuina a o lei faavaeina le lalolagi. O le mea moni, e leai se isi tisipenisione sa vaavaai i ai ma le fia iloa ia perofeta uma ma alii musuia. …

O Isaia, e ala i miti faaperofeta sa vaavaai mai i le vaitaimi lenei, sa ia faaaogaina se gagana matua malosi lava i lona taumafai e faamatala mai ona lagona e faatatau i ai. I se tasi taimi na ia faapea mai “Ia alaga oe le lagi e, ia olioli oe le lalolagi e, ia leo tetele outou mauga, ma ia alalaga fiafia; aua ua faamafanafanaina e Ieova lona nuu, ua ia alofa foi i ona tagata ua tigaina.” Fai mai Siona “Ua lafoaiina a’u e Ieova; ua galo mai a’u i le Alii.” “E galo ea i le fafine lana tama ua susu, na te le alofa i le tama a lona lava manava?” “Ioe,”ua fetalai mai le Alii, “ai lava e galo ia te i latou,” ae o le a le galo ia te Ia Siona. Ua fetalai mai o Ia “O Siona ua ou taia lou faatusa i o’u alofilima, e tumau ou pa i o’u luma.” [Tagai Isaia 49:13–16.]

O lea o lenei Siona a le Atua sa i ai i luma o ona fofoga mai lava a o lei faavaeina le lalolagi.⁴

E lei faapea lava na faia e le Alii lenei lalolagi e aunoa ma se fuafuaga; na te lei faia lava soo se galuega e aunoa ma se fuafuaga. Sa faia le lalolagi mo ni faamoemoega faapitoa; ma o le tasi o na faamoemoega o le toe faaolaina [o le lalolagi] ma le faavaeina o lona malo ma lana nofoaiga i luga [o le fogaeleele] i aso e gata ai, e saunia ai mo le nofotupu o le Alii o Iesu Keriso, o le e tatau ona nofotupu. Ua oo mai lena taimi faatulagaina, o lena tisipenisione ua i o tatou luma, ma o loo tatou ola i lona lotolotoi.⁵

E leai se mea e mafai ona taofia le Ekalesia mai le faataunuuina o ona taunuuga.

O lenei ekalesia o loo faaauau pea ona tupu. Ona pau ai lea o le ekalesia moni i luga o le lalolagi atoa. O lona talafaasolopito ua i luma o le lalolagi. Ua faaauau pea ona ola ma faateleina mai le aso na faatulagaina ai seia oo mai i le taimi nei. … Sa mamanuina e le Atua Silisiliese ina ia tu i luga o le fogaeleele i le mana ma le mamalu ma le pule, e pei ona vaai i ai perofeta a le Atua i o latou aso ma tupulaga. O le malo lenei lea sa vaai i ai Tanielu, ma o le a faaauau pea ona taavale atu seia tumu ai le lalolagi atoa [tagai Tanielu 2:34–35, 44–45; MFF 65:2].⁶

Tatou te talitonu o lenei Ekalesia o le a saunia le ala mo le afio mai o Keriso e nofotupu o le tupu, ma o lenei Ekalesia o le a tupu i le avea ai ma malo o le Atua, lea o loo tatalo Kerisiano uma o le a oo mai; o le a faia ai le finagalo o le Atua i luga o le fogaeleele e pei ona faia i le lagi [tagai Mataio 6:10].⁷

E leai se mana i luga o lenei fogaeleele e mafai ona ia motusia lenei Ekalesia. Aisea? Aua o loo taulimaina e le Atua i Ona aao. O ia o le Mataisau o le [Ekalesia], ma ua Ia folafola mai, e ala i leo o le anoanoa’i o perofeta, ma o le a tumau foi.⁸

Ina ua latou faaoo le oti ia Iosefa ma Ailama, latou te lei faaumatia ai le “Faamamona,” latou te lei faaumatia le faatuatua i le Atua, latou te lei faaumatia le faamoemoe ma le alofa mama, latou te lei aveesea ia sauniga paia o le maota o le Atua, po o le mana o le Perisitua Paia. Sa faauuina e le Atua o le lagi nei mea.⁹

O le malo o le Atua e agai i luma; e le agai i tua.¹⁰

O fea o i ai se tasi o le Au Paia o Aso e Gata Ai po o se isi lava tagata o se ua vaai i soo se taimi o solomuli i tua le ekalesia po o le malo lenei?. … E le afaina po o le a le mea sa i ai lo tatou tulaga o le malo lenei ua agai i luma ma agai i luga i aso uma lava seia oo mai lava i le itula lenei. E i ai ea se taimi e agai ai i tua? E leai, o le a le mafai lava. O Siona lenei a le Alii, i lona lalelei, mana ma le mamalu uma o loo ua taia lona faatusa i luga o aao o le Atua Silisiliese, ma o loo i ai foi i luma o ona fofoga i taimi uma; o ana folafolaga ua mautu ma e leai se tagata e mafai ona ia liliueseina.¹¹

E ui ina faasaga tau mai mana uma o le pogisa e tetee mai ia i tatou, o le Alii o la tatou Uo ma o le a Ia lagolagoina i tatou ma aumaia ia i tatou mana e fausiaina ai Siona ma tauaveina atu lana galuega seia oo mai le afio mai o le Atalii o le Tagata. O le mea lea, ia faamafanafanaina o outou loto. … E tatau ona fusia faatasi i tatou i le galuega o loo tatou galulue ai nei. Pe a tatou faia lenei mea o le a tatou faaiu i le manumalo.¹²

E lei matua faigofie ia i tatou, ua tatou faafeagai ma taua ma feteenaiga mai lava i le amataga seia oo mai i lenei aso; ae o tatou ma le lalolagi atonu e mafai ona faamaloloina o tatou loto e uiga i le “Faamamona,” aua o le a le muta lava seia afio mai le Alii o Iesu Keriso i ao o le lagi.¹³

E mavae atu auro ma ario, e faatamaia fale ma fanua; o le a tea ese atu mea faaletino uma; ae o le a le mafai lava ona mavae atu le perisitua, o le faaolataga e le mafai, o le malo o le Atua e le mafai, ma valoaga o le a le mafai lava ona le faataunuuina.¹⁴

Sa faasaoina i tatou i le lalolagi o agaga e fausiaina le malo o le Atua i le tisipenisione lenei.

Sa faasaoina i tatou i le lalolagi o agaga mo le afe ma afe o tausaga, e tutu i la le tino i aso e gata ai, ma aveina le malo o le Atua ma fausiaina. I lo tatou malamalama ai la i nei mea, ma le avea ai ma Au Paia o Aso e Gata Ai, o a ni mea o loo tatou mafaufau i ai? O loo i ai se taua tele tatou te tauina. O Lusifelo, le atalii o le taeao, ma ana au uma, o loo ua fusia faatasi e tetee mai ia te i tatou. O i tatou ua na o se vaega laitiiti lava, i le faatusa atu i tagata uma o le lalolagi. E leai lava nisi ua na o nai alii ma tamaitai, i soo se augatupulaga o le lalolagi, o e sa lava lo latou tutoatasi e tetee atu i le tiapolo ma auauna atu i le Alii. Ae ua faitauina i tatou e agavaa e faitaulia faatasi ma Lona nuu. O le mea lea, ua oo mai le taimi tatou te tutu ai, tatou te ala mai ai, ma ua faaofuina i le mana o le Atua ma le Perisitua Paia, ua tatau ona tatou faalauteleina lenei Perisitua ma maua ai faamanuiaga o loo i ai iina.¹⁵

E lei i ai lava se nuu faapei o lenei. E lei i ai lava se galuega faapei o lenei talu ona faia e le Atua le lalolagi. E moni, sa i ai alii o e sa talaiina le talalelei; ae i le atoatoaga o taimi ua tuuina mai e le Alii lona aao e faavaeina lona malo. O le tisipenisione faaiu lenei. Ua ia faatupuina ae alii ma tamaitai e tauaveina lana galuega, ma e pei ona ou fai atu ai pea lava pea, e toatele i tatou sa taofia i le lalolagi o agaga mai le faatulagaina o lenei lalolagi seia oo i le tupulaga lea o loo tatou ola ai.¹⁶

O faaaliga a le Atua i le Tusi Paia, Tusi a Mamona ma le Mataupu Faavae ma Feagaiga o loo ua faataunuuina. O loo tatou faataunuuina i latou. Ma a o tatou i ai iinei ia tatou faatuatua i le Atua, o Elohima le Silisiliese, le Atua o tagata Iutaia faapea foi ma Tagata o Nuuese. O loo faamoemoe mai o Ia ia i tatou ae le o se isi lava. O loo faamoemoe mai o ia i le Au Paia o Aso e Gata Ai. Aisea? Talu ai e leai lava ma se isi ua mauaina le atoatoaga o le Talalelei faavavau; e leai lava ma se isi ua uumauina le fausiaina o lenei malo. O lo’u faatuatuaga ma o’u lagona e uiga i lenei mataupu e faapea sa tofiaina i tatou ao lei i ai le lalolagi, e pei lava ona tofiaina aposetolo anamua, ina ia o mai i la le tino ma faatuina lenei Malo, ma e tatau ona tatou faia, a leai o le a fano i tatou. O lo tatou tulaga lena e oo mai lava i le aso. O loo i o tatou luga fofoga o au o le lagi; o fofoga o le Atua lava ia ma lona Alo o Iesu Keriso ma na aposetolo ma perofeta uma o e ua faamaufaailogaina a latou molimau i o latou toto ma o loo vaavaaia lenei nuu. Latou te asiasi mai ia te outou, latou te matauina a outou galuega, aua latou te silafiaina lelei o lo outou taunuuga o le fausiaina lea o lenei Malo, e fausiaina Siona, e faapaiaina, faapaiaina le lalolagi ma saunia le lalolagi mo le afio mai o le Atalii o le Tagata.¹⁷

I le avea ai ma Au Paia o Aso e Gata Ai, o loo i ai sa tatou galuega tele e faia.

O Iosefa Samita… sa oo mai ina ia faataunuuina ai valoaga, faatinoina le galuega sa manaomia ai o ia, faataatiaina le faavae o le galuega, mauaina ki o le perisitua ma le tofi aposetolo, ma meaalofa ma mea silisili uma i le faatulagaina o le ekalesia ia e manaomia mo le faaauauina pea. Ua valaauina i tatou e fausiaina pea le faavae sa ia faataatiaina.¹⁸

Afai e mafai ona tatalaina le vaaiga mamao a o tatou mafaufau ma ia faalauteleina atu i le lumanai ma vaai atu ai i lenei malo ma le galuega o loo faamoemoe e faataunuuina, faatasi ai ma mea e tatau ona tatou faia, ma le taua e tatau ona tatou manumalo mai ai, o le a mautinoa lava lo tatou iloaina o le matua tele o le galuega o loo i o tatou lima.¹⁹

O lo tatou valaauga faapitoa o le fausiaina lea o Siona, ma saunia tagata uma ina ia tutu i nofoaga paia ao sasaaina mai faamasinoga a le Alii i luga o e amioleaga.²⁰

O le mafaufau ma le finagalo o le Atua faapea o le Au Paia o Aso e Gata Ai e tatau ona matua malamalama atoatoa mo i latou lava o lea o loo latou tutu i le lotolotoi o le tisipenisione faaiu ma le matautia a le Atua i tagata; ma e tatau foi ona matua malamalama atoatoa i le tiute o loo ua tuuina mai i luga o i latou ua avea ma e o loo faatinoina. Ma e le tatau lava ona galo ia te i latou le mea moni faapea e ui ina o loo auau faatasi uma mana o le pogisa e taumafai, ae le mafaia lava ona latou faalavelave i fuafuaga a le Atua ia e faasaga tonu i le galuega lea ua tuuina mai Lona aao e Na te faatinoina, i le aso ma le tupulaga o loo tatou nonofo ai. E tatau i le Au Paia o Aso e Gata Ai ona ola i luma o le Alii i se auala ina ia malamalama ai i le tulaga ua tatou i ai, ma tiute o loo manaomia i o tatou lima; ona o loo manaomia e le Alii ni mea faapitoa mai ia i tatou i o tatou aso ma tupulaga, e pei ona Ia manaomia mai i Ona tagata i augatupulaga uma, ina ua Ia tuuina atu ia te i latou le atoatoaga o le Talalelei faavavau, ma le mana ma le pule o le perisitua paia. …

O le finagalo lava foi o le Atua lea ia tatou totogiina a tatou sefuluai ma taulaga; o Lona finagalo lea ia tatou usiusitai i le Upu o le Poto; o Lona finagalo lea ia tatou tausia poloaiga, ma tatou aoaoina atu i isi. O le a faamasinoina i tatou mo mea uma lava tatou te le faia ia e tatau ona tatou faia, faapea foi ma mea e ao ona tatou faia. E tatau ona tasi lo tatou loto ma le manatu, ma ia le faatagaina soo se mea lava faaletino pe faaleagaga i lona natura e vavaeeseina tatou mai le alofa o le Atua ma tagata.

… Ua tatau ona fusia faatasi i tatou ma ua tatau ona tatou sailiili mo le manuia o le isi. Ua tatau ona tatou aoaoina atu mataupu faavae o le Talalelei a Keriso i o tatou atalii ma o tatou afafine, faapea foi i le lalolagi, ma saunia i tatou lava mo mea o le a tutupu ia na valoia i faaaliga ia ua uma ona tuuina mai e le Alii ia i tatou. Ua uma ona ia amataina Lana galuega, Lana galuega matautia ma le ofoofogia, i tagata o le lalolagi, lea na faatatau i ai Isaia [tagai Isaia 29:14]. O le a Ia le aveesea lava Lona aao seia faataunuuina uma Ana fuafuaga.²¹

O loo i ai sa tatou galuega maoae o loo i o tatou luma, ma o le a manaomia ai lo tatou malosi uma ma a tatou taleni ma agavaa uma e faatinoina ai. E tatau ona tatou sailiili atu i le Agaga o le Atua e fesoasoani ia i tatou; aua a aunoa ma le Agaga o le a laitiiti lava se mea e mafai ona tatou faataunuuina.²²

Ou te ta’u atu ia te outou afai tou te vaavaai solo ma iloa atu le tulaga ua i ai le lalolagi i le isi itu ma le galuega e tatau ona tatou faatinoina i le isi itu, ma le mea e tatau ona taunuu i ai le malo o le Atua ina ia faataunuuina lona taunuuga ma faaaliga a Iesu Keriso, o lo tatou faamoemoe autu e tatau ona i ai o le fausiaina lea o le malo o le Atua ma faataavale atu i luma. …

… E tatau ona tatou vaavaai i le fausiaina o le malo, ma faamautu mai e le gata i faamanuiaga mo i tatou lava, ae sailiili e avea ma faaola o tagata i le Mauga o Siona, ma taumafai e faia mea lelei uma e mafai ona tatou faia, e galulue ai e faaalualuina i luma le galuega ma le faamoemoega o Siona i vaega taitasi ia ua valaauina i tatou tatou te galulue ai.

O le tulimatai atu o lenei faamoemoe o le a faamanuiaina ai i tatou, ma faatumauina le filemu i o tatou mafaufau ma pei ona fetalai mai le Alii, e leai lava se mea o le a taofia mai i soo se tagata o loo saili mo le amiotonu ma faamanuiaga a le malo o le Atua. …

… E matautia le tele naua o mea o loo i o tatou faitotoa, le tele naua o suiga o loo tutupu i le lalolagi, ma o loo tuputupu pea le malo; ma ou te fia apoapoai atu nei i le Au Paia o Aso e Gata Ai uma o e o loo lagonaina mai a’u i lenei aso ina ia aoao lelei le tulaga o loo e i ai, ma suesue o outou loto ma vaai po o tatou lagolagoina lo tatou Alii lo tatou Atua, ona tatou faaauau ai pea lea i le faateleina o lo tatou faatuatua, o lo tatou faamoemoe, o lo tatou amiotonu, ma i aoaoga faavae mama uma ia tatou te manaomia ina ia lagolagoina i tatou i lu’i uma ia e ono valaauina tatou ina ia tatou manumalo mai ai ina ia faamaonia ai, o tatou o uo a le Atua, pe tatou te tumau i le feagaiga pe leai; o le a tofotofoina i tatou mai le taimi lenei seia oo ina afio mai le Mesia pe a o tatou nonofo ai foi i le lalolagi.²³

E le tatau ona i ai se atuatuvale pe a fai o le a na o le faamaoni o le Au Paia o Aso e Gata Ai i feagaiga ua latou osia ma lo latou Atua ma faamaoni i le ola ai i aoaoga faavae ia na Ia ta’u mai ia i tatou e tatau ona pulea ai i tatou i le fausiaina o Lana Siona.

Ae peitai, afai e galo ia i tatou a tatou feagaiga, ma o ese mai ai ma tiai ese aoaoga ia na Ia tuuina mai ia i tatou, ona outou mautinoa lea, le Au Paia o Aso e Gata Ai, o lo tatou tulaga ua tumu i faigata. O faamoemoega o le Atua o le a le taofia; ae o le a faasalaina i tatou, ma o i latou o e tumau ai pea i lea ala sese o le a le amanaiaina ma o le a faaogeina i tufaaga uma o faamanuiaga ua uma ona folafolaina mai ia Siona.²⁴

O loo i ai le Alii faatasi ma lenei nuu, ae peitai i le avea ai o i tatou ma Au Paia o Aso e Gata Ai, ou te manatu tatou te le o faatauaina pea o tatou avanoa. Ua valaauina i tatou e faatinoina se galuega; ua tuuina mai e le Alii lenei galuega i o tatou lima, ma ua tuuina mai e avea ma o tatou tiute i luma o le lagi ma le lalolagi ina ia faaaogaina taleni—le malamalama ma le upumoni, ia ua tuuina mai i o tatou lima.²⁵

Fautuaga mo Suesuega ma le Aoaoina Atu

Mafaufau i manatu nei a o e suesueina le mataupu po o lou sauniuni foi e aoao atu. Mo fesoasoaniga faaopoopo, tagai i itulau v–ix.

Toe iloilo itulau 25–26. O faapefea ona faataunuuina nei le valoaga a Iosefa Samita? O le a se mea e mafai ona tatou aoaoina mai i le faaaliga a Peresitene Woodruff?
Aisea na tulimatai ai e perofeta lenei tisipenisione? E taua i se a lo tatou malamalama “o loo tatou ola i le lotolotoi o le” tisipenisione faaiu? (Tagai itulau 27.)
O le a le uiga pe a tatou molimau atu o [le ekalesia] lea tatou te auai “e na o le pau lenei o le ekalesia moni i luga o le fogaeleele atoa”? (itulau 28); tagai foi MFF 1:30). E mafai faapefea ona tatou fetufaaiina atu lenei upumoni i isi i se auala faamaualalo?
O le a se mea ua iloga ona aafia ai ou lagona ao e suesue i aoaoga a Peresitene Woodruff e uiga i le taunuuga o le Ekalesia? (Tagai itulau 28–29.)
Faasolo lau vaai i itulau 28–29, vaavaai mo ni mea e pala ma ni mea e tumau e faavavau. O a ni eseesega i le va o mea e pala ma mea e tumau?
Faitau aoaoga a Peresitene Woodruff e uiga i lo tatou “faasaoina i le lalolagi o agaga” ina ia fananau mai i le augatupulaga lenei (itulau 30–31). O a ni ou lagona ao e manatunatu loloto i nei faamatalaga?
Tagai i le ata o loo i le itulau 33. O le a se mea a lenei ata e faia i le fausiaina o le malo o le Atua? I a Peresitene Woodruff, o a nisi o o tatou tiute ao tatou fesoasoani e fausiaina le malo o le Atua? (Tagai itulau 31–34.)
Faitau le parakalafa mulimuli i le itulau 34. O a avanoa o loo tatou maua i lenei tisipenisione? O le a sou manatu o le a le uiga [o le faaupuga] ia “faatauaina o tatou avanoa”?

Mau E Faatatau I Ai: MFF 6:32–34; 64:33–34; 121:26–32; 138:53–56