1 Jinapis ashkhas kanqanku — chay p’unchaypi, maypachachus paykunaj chawpinkupi t’ukuchina ruwanata ruwasaj. Chayta ruwasajtaj runaspa wawasninkuwan tratosniyta yuyarinaypaj, iskay kaj kutirayku makiywan llajtayta pallanaypaj, pikunachus Israelpa wawasnink kanku, paykunata.

2 Jinataj, qanwan tratosniyta yuyarinaypaj, Nefi, tataykiwan tratoyta yuyarinaypajtaj, wawasniykita yuyarinaypaj; wawasniykej nisqasninku simiymanta llojsinankupaj wawasniykiman. Nisqasniytaj kay jallp’aj kantusninkama chayanqanku, llajtaypaj, pikunachus Israelpa wawasnink kanku, paykunapaj yachachiy kanampaj.

3 Nisqasniy llojsimusqankuraykutaj — ashkha gentiles nenqanku: ¡Biblia! ¡Biblia! Bibliayku kanña, manataj waj Biblia kanmanchus.

4 Chaywampis kayta nin Señor Dios: O wampus, Biblianku kan. Chaytaj judiosmanta, ñawpaj trato llajtaymanta llojsenqa. ¿Ima graciastataj judiosman qonku chay Bibliata jap’isqankumanta? Arí, ¿Imata niyta munanku chaywan gentiles? ¿judiospa puriyninkunasta, llank’ayninkunasta, muchuyninkunastawan yuyarinkuchu? Jinapis, ¿Ñoqapaj ruwasqasninkuta, gentilesman salvacionta apajtinku, chayta yuyarinkuchu?

5 O qankuna gentiles, ¿Ñawpaj trato llajtayta, judiostapis yuyarinkichischu? Mana, astawanqa paykunata juchachankichis, paykunata chejninkichis, manataj paykunata yanapayta munankichischu. Qhawaychis, tukuy kaykunata kikin umasniykichisman kutichisqaykichis, imaraykuchus ñoqa, Señor, llajtayta mana qonqanichu.

6 Qankuna wampus, pikunachus ninkichis: Biblia, Bibliayku kanña, manataj waj Bibliata necesitaykuchu. ¿Biblia kapusunkichismanchu karqa, mana judios kajtinku?

7 ¿Manachus ashkha llajtas kasqanta yachankichis? ¿Manachus tukuy runasta ñoqa, Señor Diosniykichis, ruwasqayta yachankichis? ¿Manachu tukuy jatun qhocha kantupi tiyakojkunata yuyarisqayta yachankichis? Chay jinapis, ¿Janaj pachata, kay pachatawan kamachisqayta manachu yachankichis? Jinapis, ¿Palabrayta runaspa wawasninkuman apachini, arí, tukuy kay pachaj llajtasnimpi tiyakojkunamampis nisqayta apachini, chayta manachu yachankichis?

8 ¿Imapaj thutunkichis, astawan nisqasniyta jap¿inaykichispaj? ¿Manachu yachankichis iskay llajtaspa willayninkuna qankunapaj Dios kasqaymanta testigo kasqankuta, uj llajtamanta yuyarikusqayta, imaynatachus waj llajtamanta yuyarikuni, chayta manachu yachankichisri? Iskay llajtas ujllaman rejtinku paykunaj willayninkunapis ujman rillanqankutaj.

9 Kayta ruwanitaj ashkha runasman kikin qayna, kunan, wiñaypajpis kasqayta rikuchinaypaj. Jinapis munasqayman jina parlani. Jinapis uj palabrata nisqayta yachajtiykichis, mana waj palabrata mana waj jinata ninayta yuyaychischu. Imaraykuchus ruwanay manaraj tukusqachu, jinapis mana tukukonqachu runa tukukunankama, nitaj chaypachamanta wiñayniypa wiñayninkamapis.

10 Chayraykutaj, Biblia kapusqaykichisrayku, mana tukuy nisqasniy chaypi kasqanta yuyaychischu. Jinapis mana wajta mana escribichisqayta yuyaychischu.

11 Noqa tukuy runasta inti llojsimojpi, inti yaykojpipis, uranejpi, patanejpipis, jatun qhochaj kantusnimpi tiyakojkunatapis, tukuy paykunata paykunaman nisqasniyta escribinankupaj kamachini. Imaraykuchis escribisqa librosmanta kay pachata juzgasaj, sapa runa ruwasqanman jina, librospi escribisqasman jinataj.

12 Ñoqa judiosman parlasaj, chayta escribenqankutaj. Nefitasman parlasaj, parlasqayta escribillanqankutaj. Waj Israelpa familiasninmampis, mayqenkunatachus karuman pusarqani, paykunamampis parlallasajtaj, parlasqayta escribenqankutaj. Jinapis, tukuy kayu pachapi llajtasman parlasaj, paykunataj parlasqayta escribenqanku.

13 Jinataj judios nefitaspa nisqasninku kaponqanku. Nefitastaj judiospa nisqasninku kaponqanku. Nefitastaj judioswan chinkasqa Israelpa familiasnimpa nisqasninku kaponqanku. Jinapis chinkasqa Israelpa familiasninku nefitaspa, judiospawan nisqasninku kaponqanku.

14 Jinallataj llajtay, pikunachus Israelpa wawasnink kanku, paykuna kapuyninku jallp’asninkuman juntuchasqas kanqanku. Nisqaypis ujllaman juntuchasqa kallanqataj. Ñoqaj nisqaypa contranta, llajtaypa, pikunachus Israelpa wawasnin kanku, paykunaj contrankuta maqanakojkunaman rikuchillasajtaj Dios kasqayta, Abrahanwan tratochasqaytataj wawasninta wiñaypaj yuyarinaypaj.