1 Jinataj ñoqa, Nefi, Señor Diosniyman anchata wajyarqani hermanosniypa phiñakusqankurayku.

2 Chaywampis astawanraj phiñakuwarqanku, wañuchiwayta munanankukama.

3 Arí, ñoqaj contrayta thutorqanku, nispa: Sullk’a hermanonchis kamachiswayta munan; payraykutaj anchataña muchunchis. Chayrayku payta wañuchisun, manaña paypa nisqasninrayku phutiyniyoj kananchispaj. Payqa mana kachunchu kamachejninchis; kay llajtata kamacheyqa ñoqanchis, kuraj hermanosnimpaj.

4 Kunantaj mana tukuy, imatachus ñoqaj contrayta thutorqanku, chayta kay planchaspi mana ’alitutachu escribini. Chaywampis, basta ninaypaj wañuchiwayta munasqankuta.

5 Jinataj Señorqa willawarqa ñoqa, Nefi, paykunamanta ch’in pampasman ayqenaypaj, pikunachus ñoqawan rinkuman, paykunapis ñoqawan ayqenankupajtaj.

6 Chayrayku ñoqa, nefi, familiaywan, Zoram, paypa familianwan, Sam, kuraj hermanoy, familianwan, Jacobwan, Josewampis, pikunachus ullk’a hermanosniy, hermanasniywan, tukuy ñoqawan riyta munajkunawampis, paykunawan ayqerqani. Tukuy ñoqawan rejkuna Diospa willasqasninta, rikuchisqasnintawan creerqanku. Chayrayku, imatachus paykunata nerqani, chayta uyarerqanku.

7 Carpasniykuta aparqayku, imatapis apayta atisqaykutawan. Unaytataj ch’in pampaspi purerqayku. Chay chhika unay purisqaykumantarí carpa wasisniykuta sayacherqayku.

8 Llajtayrí chay lugarta Nefi nispa sutichanaykuta munarqanku. Chayrayku chay lugarta suticharqayku Nefi nispa.

9 Tukuy ñoqawan runastaj sutichakorqanku Nefij llajtan.

10 Señorpa juiciosninta, willasqasninta, kamachisqasnintawan junt’ayta munarqaykutaj Moisespa leyninman jina.

11 Señortaj ñoqaykuwan kasharqa. Walejtaj riwarqayku, imaraykuchus mujusta tarporqayku, askhatataj poqocherqayku. Animal tropasniykutaj kapuwarqayku, tukuy laya animalniyku karqa.

12 Ñoqataj, Nefi, bronce planchaspi escribisqasta aparqani. Chaywantaj aparqani morq’ota, mayqen morq’ochus pusanapaj brujula karqa, mayqentachus Señor kikin makinwan wakicherqa tataypaj, escribisqaman jina.

13 Jinataj allin riwarqayku, jallp’api ashkhata yapakorqaykutaj.

14 Ñoqataj, Nefi, Labampa espadanta jap’ispa ashkhata chayman rijch’akoj espadasta ruwarqani jark’akunaykupaj lamanita nisqa runas ñoqaykuman jamojtinku; yachallarqanitaj paykuna chejniwasqaykuta ñoqata, wawasniyta, ñoqaypata sutichasqa llajtaytawan.

15 Llajtayta wasichayta, tukuy laya k’ulluta llank’ayta, fierrota, cobreta, bronceta, acerota, qorita, qolqeta, valesqa metalesta, chaykunatapis llank’ayta yachacherqani, chaykuna ashkha kasqanrayku.

16 Ñoqataj, Nefi, templota ruwarqani. Chayta ruwarqani Salomompa templonman rijch’akojta, chaywampis mana ashkha valesqa cosaswan ruwasqachu temploqa; chaykunas casi mana tarikusqanrayku chay lugarpi. Chayrayku Salomompa templon jina kikimpuni mana karqachu. Chaywampis Salomompa templonman rijch’akoj karqa. Chay temploj ruwasqantaj sumaj karqa.

17 Jinataj ñoqa, Nefi, llajtayta llank’ajkunaman, makisninkuwan ruwajkunamampis tukucherqani.

18 Chay jinapis paykuna reyninku kanayta munarqanku. Jinapis ñoqa, Nefi, mana reyniyoj kanankuta munarqanichu. Chaywampis atisqayman jina paykunapaj ruwarqani.

19 Señorpa hermanosniyman nisqanman jina, mayqenchus ñoqa paykunaj kamachejninku, yachachejninkutaj kanayta nerqa, chay junt’akorqa. Chayrayku ñoqa paykunaj kamachejninku, yachachejninkutaj karqani wañuchiwayta munanankukama, Señorpa kamachisqanman jina.

20 Chayrayku Señor ñoqata niwasqan junt’akorqa, chaypacha niwarqa: Mana nisqasniykita kasonqanku chayqa, Señormanta qharqosqas kanqanku. Chay jinapunitaj karqa, paypa ñawpaqenmanta qharqosqas karqanku.