1 Kunantaj ñoqa, nefi, qankunaman sut’inchasqayta tukuchani, munasqa hermanosníy. Cheqamanta jamoj imasmanta uj chhikallanta escribiyta atini. Chay jinapis hermanoy Jacobpa nisqasninmanta uj chhikallanta escribiyta atini.

2 Chayrayku, imatachus escribiniña, chay bastalla kanman. Chaywampis wakin Jesucristoj yachachiyninkunamantaraj parlanay tiyan. Chayraykutaj sut’inta parlaykichis, sut’inchayniy sut’i kasqanman jina.

3 Manchayta kusikuni sut’i kajkunapi. Kay jinallamantataj Señor Dios runaspa wawasninkupaj ruwan. Imaraykuchis Señor Dios k’anchayta qon entiendechinampaj. Imaraykuchus runasman parlan parlayninkuman jina entiendenankupaj.

4 Chayrayku chay profetamanta, mayqen profetatachus Señor rikuchiwarqa, paymanta qankunaman parlasqayta yuyarinaykichista munayman. Payqa Diospa Corderonta, pichus kay pachaj juchasninta pampachanqa, payta bautizanqa.

5 ¡Kunanrí, sichus Diospa Corderon, llimphu kaspa, tukuy Diospa kamachisqasnintaraj junt’anampaj yakupi bautizachiskunan tiyan chayqa, astawanraj ñoqanchis, mana llimphu kaspa, bautizachikunanchis tiyan, arí, yakupi!

6 Kunantaj, munasqa hermanosníy, tapuykichisman, ¿Imaynataj bautizachiskuspa Diospa Corderon tukuy Diospa kamachisqasninta junt’arqari?

7 ¿Acaso manachus yachankichis mana juchayoj kasqantari? Jiná mana juchayoj kaspapis, runaspa wawasninkuman rikuchin Tataj ñawpaqempi aychapi k’umuykusqanta, Tataman kasukoj kasqanta willaspa kamachisqasninta junt’anampaj.

8 Chaymanta, payqa bautizachikusqantawan, paypa patanman Santo Espiritu uraykamorqa paloma jina.

9 Watejmantataj chay runaspa wawasninkuman rikuchin ñampa cheqan kasqanta, rikuchin punkuta, maynejtachus yaykunanku tiyan, chaypa k’ullku kasqantapis. Paytaj paykunaman rikucherqa imaynatachus yaykunanku kasqankuta.

10 Runaspa wawasninkuman nerqataj: Ñoqata qhatiwaychis. Chayrayku munasqa hermanosníy, ¿Jesusta qhatiyta atisunmanchu mana Tataj kamachisqasninta junt’aspa?

11 Tatataj nerqa: Diosman kutiriychis, Diosman kutiriychis, Munasqa Wawaypa sutimpi bautizakuychistaj.

12 Jinataj Wawa ñoqaman parlawajta uyarerqani, niwarqataj: Tataqa Santo Espirituta sutiypi bautizakojman qonqa, ñoqaman jina. Chayrayku qhatiwaychis, imatachus ruwajta rikuwankichis, chayta qankuna ruwallaychistaj.

13 Chayrayku, munasqa hermanosníy, tukuy sonqoykichiswan Wawata qhatinkichis, mana puraj uya kaspa, manataj Diospa ñawpaqempi pantachispaqa, jinapis cheqa munaywan, Tataman willankichis Cristoj sutinta apayta munasqaykichista bautismonejta — arí, Señorniykichista, Salvadorniykichistapis yakuman qhatinkichis nisqanman jina chayqa, tukuy chayta ruwankichis chayqa, Santo Espirituta jap’inkichis. Arí, chantataj nina bautismo jamun Santo Espiritu bautismowan, chantataj angelkunaj parlayninkupi parlayta atinkichis, Israelpa Ajllasqanman yupaychanasta qhapariyta atillankichistaj.

14 Chaywampis munasqa hermanosníy, kay jinamanta Wawa ñoqaman parlarqa: Juchasniykichismanta kutirikuytawan, Tataman willaytawantaj kamachisqasniyta junt’ayta munasqaykichista yakupi bautismonejta, nina bautismota, Santo Espiritu bautismotawan jap’iytawan mosoj parlaypi parlanaykichispaj, arí, angelkunaj parlayninkupipis, tukuy chayta ruwaytawan, ñoqata negawankichis chayqa, aswan allin qankunapaj kanman karqa mana ni jayk’ajpis rejsinawaykichis.

15 Tatamanta nisqanta uyarerqanitaj, nispa: Arí, Munasqaypa nisqasnenqa cheqa, allintaj. Pitajchus tukukuykama sumajta sayan, payqa salvasqa kanqa.

16 Kunantaj, munasqa hermanosníy, chaymanta yachani runa mana tukukuykama sumajta sayanchu, kawsay Diospa Wawampa rikuchisqanman jina chayqa, pay mana salvakuyta atinmanchu.

17 Chayrayku, imatachus Señorniykichis, Kacharichejniykichispis ruwanqa, rikusqaymanta willasqayman jina, chayta qankunapis ruwallaychistaj. Chayrayku ñoqaman rikuchisqas kanku, punkuta, mayqennejtachus yaykunaykichis tiyan, chayta rejsinaykichispaj. Chay punkoqa, mayqennejtachus yaykunaykichis tiyan, chayqa Diosman kutiriy, yakupi bautismotaj; chantataj juchasniykichista pampachay jamun ninanejta, Santo Espiritunejtataj.

18 Chaymantataj cheqan, k’ullku ñampi, mayqen ñanchus wiñay kawsayman pusa, chaypi purinkichis. Arí, punkunejta yaykunkichisña. Tataj, Wawajpawan kamachisqasninkuta junt’ankichis. Santo Espirituta, pichus Tatamanta Wawamantawan willan, payta jap’inkichistaj, pay qosqaykichis nispa nisqanta junt’anampaj, maypachachus nerqa ñannejta yaykunkichis chayqa, jap’inkichis.

19 Kunantaj, munasqa hermanosníy, ña kay cheqan, k’ullku ñanman yaykushajtiykichisña, tapuykichisman ¿Chaywan tukuy imayñachus ruwakun?, nispa. Niykichis, Mana. Imaraykuchus mana kaykama chayamunkichischu, astawanqa Cristoj nisqanman jinalla, paypi mana kuyurej feniyoj kaspa, kallpayoj salvanampaj Kajpa sumaj ruwasqasnimpi llimphitumanta confiaspa.

20 Chayrayku ñawpajman rinaykichis tiyan Cristopi sinchista sayaspa, suyaypi cabal k’anchayniyoj kaspa, Diosta, tukuy runastawan munakuspataj. Chantá, ñawpajman rinkichis chayqa, Cristoj nisqanrayku kusikojtiykichis, tukukuykama sumajta sayajtiykichis chayqa, Tata nin jinata: Wiñay kawsayniyoj kankichis.

21 Kunantaj munasqa hermanosníy, kayqa ñan. Manataj waj ñan kanchu ni waj qosqa suti kanchu janaj pachaj urampi, mayqennejtachus runa Diospa reinompi salvakuyta atinman. Kaytaj Cristoj yachachiynin, Tataj sapan cheqa yachachiynin, Wawajpatapis, Santo Espiritojpatapis. Paykunataj uj Dioslla kanku, tukukuyninkutaj mana kanchu. Amen.