1 Kunantaj, munasqa hermanosníy, ñampiña kajtiykichis, imatachus ruwanaykichis tiyan, chaymanta sonqoykichispi t’ukusqaykichista reparakuni. Chaywampis, ¿Imarayku chaykunasmanta sonqosniykichispi t’ukunkichis?

2 ¿Manachu yuyarinkichis Santo Espirituta jap’isqaykichistawan angelkunaj parlayninkupi parlayta atinaykichista nisqayta? Kunantaj, ¿Imaynataj mana Santo Espiritunejta angelkunaj parlayninkupi parlayta atiwajchis?

3 Angeles Santo Espiritoj atiyninnejta parlanku. Chayrayku Cristoj nisqasninta parlanku. Chayraykutaj, nerqaykichis, Cristoj nisqasninrayku kusikuychis; imaraykuchus Cristoj nisqasnenqa willasunkichis tukuy imata ruwanaykichismanta.

4 Chayrayku, kayta nisqaytawanña, sichus kaykuhnata mana entiendeyta atinkichischu chayqa, chay jina kanqa mana mañakusqaykichisrayku, mana takasqaykichisraykutaj. Chayrayku mana k’anchayman pusasqaschu kankichis, jinapis laqhapi wañunaykichis tiyan.

5 Uyariwaychis, watejmanta niykichis, sichus ñannejman yaykunkichis, Santo Espirituta jap’inkichistaj chayqa, tukuy imata ruwanaykichis tiyan, Santo Espiritu chayta rikuchisonqachis.

6 Kayqa Cristoj yachachiynin. Manataj waj qosqa yachachiy kanqachu pay, cuerpoyoj kaspa, rikhurimunankama. Mayk’ajchus pay, cuerpoyoj kaspa, rikhurimusonqachis, chaypacha imatachus nisonqachis, chayta ruwankichis.

7 Kunantaj ñoqa, Nefi, mana astawan niyta atinichu. Espiritu parlajta jark’awan. Kaypitaj phutiyniyoj kani mana creeyrayku, sajra ruwayrayku, mana yachayrayku, runas rumi sonqoyoj kasqankuraykutaj. Paykunaman may sut’inta yachay qosqaña, chay sut’i yachay tukuy yachaymanta astawanraj sut’i, chaywampis paykuna yachayta mana mask’ankuchu, manataj sumaj yachaykunata entiendenkuchu.

8 Kunantaj, munasqa hermanosníy, sonqoykichispi t’ukojtaraj rikuykichis. Ñoqata nanachiwantaj kay imamantachus parlanaypaj. Runata Diosmanta mañakunampaj yachachej Espirituta kasunkichis, chayqa, Diosmanta mañakunaykichista yachawajchis. Imaraykuchus sajra espiritoqa mana runata Diosmanta mañakunampaj yachachinchu, runata yachachin mana Diosmanta mañakunampaj.

9 Chaywampis Diosmanta mañakunaykichistapuni niykichis, mana yuyayniykichista chinkachinaykichistataj. Mana ni imata ruwanaykichista nillaykichistaj manaraj Tatamana mañakuspa Cristoj sutimpi, payqa qankunapaj ruwanaykichista bendecinampaj, ruwanaykichis allinniyoj kanaykichispaj.