1 Kunantaj, munasqa hermanosníy, kaykunata leeni tukuy Israelpa wawasninwan tratosninmanta yachanaykichispaj —

2 Pay judiosman, santo profetasnejta, parlasqanta kay mundoj qallariyninmantapacha, sapa miraymantaj, Diospa cheqa iglesianman, cheqa tropanman ima kutichisqas kanankukama, chayta yachanaykichispajtaj. Chaypachataj paykuna chayaqe jallp’asninkuman juntuchasqas kanqanku, tukuy prometisqa jallp’asninkupitaj wasichasqas kanqanku.

3 Qhawaychis, munasqa hermanosníy, kaykunata yachachishaykichis kusikunaykichispaj, umasniykichista wiñaypaj oqharinaykichispajtaj, Señor Diospa wawasniykichispaj bendicionesninrayku.

4 Imaraykuchus ashkha qankunamanta jamoj tiemposmanta yachanaykichispaj sumajta maskásqaykichista yachani. Chayrayku aychanchis ismunanta, wañupunantapis yachasqaykichista yachani. Chaywampis cuerpoyoj kaspa Diosninchista rikusunchis.

5 Arí, Jerusalempi kajkunaman, maymantachus jamorqanchis, cuerpoyoj rikuchikunanta yachasqaykichista yachani. Imaraykuchus paykunaman jamunampaj allin kanman. Imaraykuchus jatun Ruwajpaj allin kanman cuerpoyoj kaspa runasta kusunan, tukuy runapaj wañunan kosa kanman tukuy runas payta kasunankupaj.

6 Jatun Ruwajpa khuyayniyoj munayninta junt’anampaj tukuy runas wañupunku. Chayraykutaj kawsarichimuy atiy kanan tiyan. Runaj urmasqanraykutaj runaspaj kawsarimuy kanan tiyan. Runaj urmasqan karqa jucharayku, runaj urmasqanraykutaj Señormanta t’aqasqas karqanku.

7 Chayraykutaj wiñaypaj allinyachiy kanan tiyan. Mana wiñaypaj allinyachiy kajtenqa kay ismoj cuerpo mana p’achalliikunmanchu mana ismojwan. Jinapis ñawpaj runata juzgayqa wiñaypaj kanman karqa. Chay jina kajtinrí kay cuerpoqa ismoj, t’unakoj ima jallp’aman siriykunman karqa mana jayk’ajpis watejmanta kawsarimunampaj.

8 ¡O Diospa sumaj yuyaynin, khuyaynin, k’acha kaynimpis! Cuerposninchis mana watejmanta kawsarimunkumanchu karqa chayqa, espiritusninchis wiñaypaj Diosmanta urmasqa angelta, pichus supayman tukorqa, payta kasunkuman karqa, mana ni jayk’aj kawsarimunanchispaj.

9 Espiritusninchisrí pay jinaman tukunkuman karqa. Ñoqanchistaj supaykunaman tukusunman karqa supaypa angelesninman, wiñaypaj Diosninchismanta t’aqasqas kananchispaj, llullaspa tatanwan, pay jina muchuypi, wiñaypaj quedakunanchispaj. Arí, ñawpaj tatasninchista engañajman, k’anchayniyoj angel rijch’achikojman, runaspa wawasninkuta tukuchejman, pakaypi wañuchejkunaman, pakaypi laqha ruwachejman, payma rijch’akusunman karqa.

10 O may jatun Diosninchispa k’acha kaynin. Payqa kay millay phiña animalmanta ayqenapaj ñanta wakichipuwanchis. Arí, chay millay animalmanta, wañuy, ukhu pachataj animalmanta, mayqen animaltachus ñoqa sutichani cuerpoj wañuynin, espiritoj wañuynin ima.

11 Diosninchispa, Israelpa Ajllasqampa, ayqena ñanninrayku kay wañuy, mayqen wañuymantachus willaniña, mayqen wañuychus kay kawsaymanta, chay wañuy wañusqasninta qoponqa. Kay wañuytaj tumba.

12 Kay wañuyrí, mayqen wañuymantachus willaniña, mayqen wañuychus espiritumanta wañuy, chay wañuy wañusqasninta qopullanqataj, chay espiritumanta wañoyqa ukhu pacha. Chayrayku wañuy, ukhu pachawan wañusqasninkuta qopunanku tiyan. Ukhu pachataj watasqa espiritusninta qopunan tiyan. Tumbataj watasqa cuerposninta qopunan tiyan. Chantá, runaspa cuerposninku, espiritusninkuwan mosojmanta tantakonqanku. Chayta ruwayta atinkutaj Israelpa Ajllasqampa kawsarichimuy atiyninnejta.

13 ¡O may k’acha Diosninchispa munaynin! Waj partemanta Diospa paraisonqa allin ruwajkunaj espiritusninkuta qopunan tiyan. Tumbapis allin ruwajpa cuerponta qopunan tiyan. Chantá espiritu, cuerpowan tantasqas kanqanku. Tukuy runataj mana wañoj cuerpowan p’achallikonqanku, wiñaypaj kawsanankupaj, kawsaj runas kanqanku. Paykunaj cabal yachayninku ñoqanchispa aychapi yachayninchisman jina. Chaywampis yachayninchis cabal kanqa.

14 Chayrayku cabal yachayniyoj kasunchis, juchayoj, ch’ichi kasqanchismanta, q’ala kasqanchismantawan. Allin ruwajkunarí cabal yachayniyoj kanqanku kusikunankumanta, junt’aj kasqankumanta, llimphu, k’anchaj p’achawan p’achallisqas, arí, allin ruway p’achawan p’achallisqas kanqanku.

15 Jinataj tukuy runas kay ñawpaj wañuymanta kawsarimuyman chayajtinkuña, wiñaypaj kawsanankupaj, chaypacha Israelpa Ajllasqampa ñawpaqempi rikhurimunanku tiyan. Chantá juicio kanqa, Diospa cheqa, cheqantaj juicionman jina juzgasqas kananku tiyan.

16 Chantataj, cheqamanta, Señorpa kawsasqanman jina, imaraykuchus pay nerqaña paypa wiñaypaj nisqampi, chaytaj mana tukukuyta atinchu, nin allin ruwajkuna allin ruwajkunaraj kanqanku, chay jinapis ch’ichi kajkuna ch’ichiraj kanqanku. Chayrayku ch’ichi kajkuna supay, angelesninwan kanku. Paykunaqa paykunapaj wakichisqa wiñay nina lawrayman renqanku. Ñak’ariyninkutaj nina azufre qhocha jina. Chay nina lawrayqa wiñaypaj, tukukuynintaj mana kanchu.

17 ¡O may jatun Diosninchispa k’acha kaynin, cheqa kaynin ima! Imaraykuchus payqa tukuy nisqasninta junt’an. Siminmantataj llojsinku, leynintaj junt’akunan tiyan.

18 Chaywampis allin ruwajkuna, Israelpa Ajllasqampa allin kawsajninkunapis, pikunachus Israelpa Ajllasqampi creenku, pikunachus kay mundoj cruzninta oqharinku, pikunachus p’enqayninkuta neganku, paykunajpata Diospa reinon kanqa. Chay reino paykunapaj wakichisqa karqa kay pachaj qallariyninmantapacha, kusikuyninkutaj wiñaypaj junt’asqa kanqa.

19 ¡O Diosninchispa may sumaj khuyaynin, Israelpa Ajllasqantaj! Imaraykuchus payqa allin kawsajkunata pusan chay millay phiña animalmanta, supaymantapis, wañuymantapis, ukhu pachamantapis, chay nina lawray azufre qhochamantapis, mayqenchus wiñaypaj ñak’ariy.

20 ¡O may sumaj Diosninchispa k’anchaynin! Imaraykuchus tukuy imata yachan pay, mana ni ima mana yachasqan kanchu.

21 Pay jamun kay pachaman tukuy runasta salvaj, nisqanta kasojtinkoqa. Imaraykuchus tukuy runaspa ñak’arinankuta ñak’arin, tukuy kawsajpa ñak’ariyninmantapis, qharispata, warmispata, wawaspatapis, pikunachus Adampa familian kanku, paykuna ñak’arinankuta ñak’arin.

22 Kayta ñak’arintaj tukuy runas kawasarimunankupaj, tukuy runas paypa ñawpaqempi sayarinankupaj jatun juicio p’unchaypi.

23 Tukuy runasta kamachillantaj Diosman kutirinankupaj, paypa sutimpi bautizakunankupaj, Israelpa Ajllasqampi cabal feniyoj kaspa, mana chayqa mana Diospa reinompi salvakuyta atinkuchu.

24 Manachus Diosman kutirinku, manataj paypa sutimpi creenkuchu, manataj tukukuykama sumajta sayankuchu chayqa, paykuna juchachasqas kananku tiyan, imaraykuchus Señor Dios, Israelpa Ajllasqan, chayta nin.

25 Chayrayku leyta qon. Maypichus ley mana kanchu, chaypi mana jasut’iy kanchu. Maypichus jasut’iy mana kanchu, chaypi jucha mana kanchu. Maypitajchus juchachay mana kanchu, chaypeqa Israelpa Ajllasqampa khuyaynin paykunapaj kan allinyachisqanrayku, imaraykuchus paykuna tiyninnejta kacharisqas kanku.

26 Imaraykuchus allinyachiynin justiciampa munayninta ruwan mana leyniyoj runaspaj chay millay phiña animalmanta, wañuymanta, ukhu pachamanta, supaymanta, nina lawray azufre qhochamantapis, mayqenchus wiñaypaj ñak’ariy, chaykunamanta kacharisqas kanankupaj. Diosmantaj, pichus paykunaman kawsayta qon, pichus Israelpa Ajllasqan, payman kutichisqas kanku.

27 Chaywampis, ¡Ay leyniyoj runamanta! Arí, pejpatachus Diospaj tukuy kamachisqasnin kapun, ñoqanchis jina, pitajchus chay kamachisqasninta mana junt’anchu, ¡Ay chayrunamanta! Jinapis kasukojchus manachus rikuchikunampaj p’unchayninkunata tukuchin. ¡Paypa kawsaynenqa millay!

28 ¡O sajra runaj yachaysapa munaynin! ¡O runaj qhasi mana kajninkuna, mana kallpayoj kajnin, wampu kajnimpis! amañaj kaspa yachaysapa kasqankuta yuyanku. Diospa nisqasninta manañataj kasunkuchu; chayta uj laduman churanku, kikillankumanta yachasqankuta yuyaspa. Chayrayku paykunaj yachayninku mana yuyayniyoj, manataj kosachu paykunapaj. Paykunataj wañonqanku.

29 Chaywampis Diospa nisqasninta kasukunku chayqa, yachayniyoj kay kosa.

30 ¡Ay qhapaj kajkunamanta, pikunachus kay jallp’aj kapuyninkunamanta qhapaj kanku! Qhapaj kasqankurayku mana kupuyniyoj runasta qhesachanku, llamp’u sonqoyoj kajkunatataj qhatiykachanku. Sonqosninkutaj kapuyninkupi kashanku, chayrayku kapuyninkoqa diosninku. Reparakuychis, paykunaj kapuyninku paykunawan kuska wañonqa.

31 Ay llojt’ukunamanta, pikunachus mana uyarinkuchu, imaraykuchus paykuna wañonqanku.

32 Ay ciegosmanta, pikunachus mana qhawayta munankuchu, imaraykuchus paykunapis wañonqanku.

33 Ay mana yuyayniyoj rumi sonqosmanta, imaraykuchush qhepa p’unchaypi juchasninkumanta yachayqa paykunata jasut’enqa.

34 Ay llulla runamanta, imaraykuchus pay ukhu pachaman wijch’usqa kanqa.

35 Ay wañuchiyta munaspa wañuchejmanta, imaraykuchus payqa wañonqa.

36 Ay qhencha runasmanta, imaraykuchus paykuna ukhu pachaman wijch’usqas kanqanku.

37 Arí, ay falso dioskunata yupaychajkunamanta, imaraykuchus tukuy supaykunaj supaynin paykunamanta asiykun.

38 Jinapis, ay tukuy juchayoj wañojkunamanta, imaraykuchus paykuna Diosman kutipuspa paypa uyanta rikonqanku, juchachasqastaj kanqanku.

39 O munasqa hermanosníy, K’anchayniyoj Diospa contrampi juchallikuy millay kasqanta yuyariychis. Sajra yuyayniyoj kajpa munayninta ruway millay kasqanta, chaytapis yuyarillaychistaj.

40 O munasqa hermanosíy, nisqasniyta uyariychis. Israelpa Ajllasqampa k’acha kayninta yuyariychis. Amataj sinchis cosasta contraykichispi nisqayta ninakuychischu. Chayta ruwajtiykichisqa, cheqa kajpa contrampi kankichis, imaraykuchus qankunaj Ruwajniykichispa nisqasninta willaykichis. Cheqa kajpa nisqasnin tukuy ch’ichi kajkunapaj sinchi kasqankuta yachani. Cahywampis allin ruwajkuna chaykunamanta mana mancharikunkuchu, imaraykuchus paykuna cheqa kajkunata munakunku, yuyayninkutataj mana tijrankuchu.

41 Chantataj, munasqa hermanosníy, Señorman, Ajllasqamampis, jamuychis. Paypa ñanninkuna cheqan kasqankuta yuyariychis. Qhawaychis, runapaj ñan k’ullku, chaywampis paypa ñawpaqempi cheqan. Israelpa Ajllasqan punkuta qhawajtaj. Chaypitaj yanapajnin mana kanchu. Manataj waj ñan kanchu, punkullanta yaykuna, imaraykuchus mana payta engañayta atinkuchu, imaraykuchus sutenqa Señor Dios.

42 Punkuta takajta kicharenqa. Yuyayniyoj kajkunata, amañasqa kajkunata, qhapaj kajkunata, pikunachus jatunchakunku amañasqankurayku, yuyayninkurayku, kapuyninkuraykutaj – arí, paykunata p’enqachenqa. Paykuna mana chaykunamanta t’aqakojtinkoqa, wampus kasqankuta mana reparakojtinkoqa, manataj sumajta k’umuykojtinkoqa, payqa paykunata mana kicharenqachu.

43 Chaywampis yachayniyojpa, yuyayniyojpawan cosasninku paykunamanta wiñaypaj pakasqas, arí, chay kusiytapis, mayqenchus allin kawsajkunapaj wakichisqaña kashan.

44 O munasqa hermanosníy, nisqasniyta yuyariychis. Qhawaychis, p’achasniyta lluch’ukuni, chaykunata ñawpaqeykichispi thalanitaj. Salvawaj Diosmanta mañakunitaj tukuyta qhawaj ñawinwan qhawanawanta. Chayrayku qhepa p’unchaypi, maypachachus tukuy runas ruwasqasninkuman jina juzgasgas kanqanku, chaypacha Israelpa Ajllasqan ñoqamanta juchasniykichista thalajta rikuwasqanta yachankichis. Paypa ñawpaqempi k’anchayniyoj sayanayta, yawarniykichista manaña apanaytawan yachallankichistaj.

45 O munasqa hermanosníy, juchasniykichismanta kutiriychis, qankunata usqhayta watajpa waskhasninta thalarakuychis. Diosman kutiriychistaj, pichus salvakunaykichispaj rumi.

46 Wakichikuychis k’anchayniyoj p’unchaypaj, juzgana p’unchaypajpis, maypachachus tukuy allin ruwajkunaman justiciata qonqanku, mana may chhika mancharikuspa k’umuykunaykichispaj. Jinapis, mana juchasniykichista cabalta yuyarinaykichispaj, qhaparinaykichiskama: Cheqan, cheqan juiciosniyki, o tukuy atiyniyoj Señor Dios, chaywampis juchachasqa kasqayta yachani. Leyniykita p’akerqani, p’akisqasniytaj ñoqaypata kanku. Supaytaj ñoqata atipawan millay muchuyniyoj kanaypaj.

47 Chaywampis hermanosníy, ¿Allinchu kanman qankunata rijch’arichinaypaj kay millay imasmanta? ¿Molestaykichismanchu munayniykichis mana juchayoj kajtenqa? ¿Cheqa kajpa sut’i kasqanman jina sut’inta parlaykichismanchu mana juchayoj kajtiykichis?

48 Qhawaychis, k’anchayniyoj kawajchis chayqa, k’anchayniyoj kajkunamanta parlaykichisman. Chaywampis mana k’anchayniyojchu kankichis, yachachej jinata qhawallawankichistaj. Chayrayku allin, imachus pasan juchayoj runaswan, chayta qankunaman yachachinaypaj.

49 Qhawaychis, juchallikuyta chejnini, sonqoytaj leyta junt’aypi kusikun, Diospa llimphu sutinta yupaychallasajtaj.

50 Jamuychis, hermanosníy, sapa ch’akichikojpis, jamuychis yakusman. Mana qolqeyoj rantikamuy, mikhuytaj, arí, vinota, lechetawan rantikuy mana qolqewan, mana ima preciowantaj.

51 Chayrayku, ama qolqeykita gastaychu mana valej cosasta rantispa. Amataj llank’aychischu mana allinyachisoj llank’aypi. Sumajta uyariwaychis, nisqasniyta yuyarichistaj. Israelpa Ajllasqanman jamuychistaj, mana ismojta mikhuychis, imachus mana ismuyta atinchu, ashkhapi kusikojta saqekuychistaj.

52 Jinapis munasqa hermanosníy, Diosniykichispa nisqasninta yuyariychis. P’unchaypi paymanta mañakuychis, tutapirí santo sutinta agradeceychis. Sonqosniykichista kusikojta saqeychis.

53 Reparakuychistaj may sumaj Señorpa tratosnin kasqankuta, may sumaj runaspa wawasninkupaj khuyayniyoj kasqantawan. Jatun kasqanrayku, k’acha khuyayniyoj kasqanraykutaj wawasninchis kay kawsaypi mana tukuyninkuchu tukuchisqas kanankuta niwanchis, astawanqa paykunata waqaychanqa. Jamoj miraykunapitaj paykuna allin ruwaj rama kanqanku Israelpa wawasnimpaj.

54 Kunantaj hermanosníy, astawan parlaykichisman, chaywampis q’aya astawan parlarimusqaykichis. Amen.