1 Xcʼulmataj cʼut chi ri Jesús xuqʼuis u bixic we tak tzij. Cʼäte cʼu riʼ, xutzolkʼomij rib chi jumul chquiwäch ri qʼuialaj winak. Xuchap u bixic chque, xubij: Kastzij, kastzij quinbij chiwe: Mikʼat tzij paquiwiʼ nicʼaj winak chic, rech man cäkʼat tä tzij piwiʼ.

2 Jas quiban ix quikʼat tzij paquiwiʼ ri nicʼaj winak chic, je cäban na chiwe, cäkʼat na tzij piwiʼ. Jas ri pajbal xicoj ix cucʼ nicʼaj winak chic, je cäcoj na chiwe.

3 ¿Jasche cacaʼyej ri mes ri cʼo pa ri u bokʼwäch ri awachalal, are cʼu ri nimalaj cheʼ ri cʼo pa ri a bokʼwäch are cʼu man cawil taj?

4 ¿Jas che cʼut cabij che ri awachalal: Chayaʼ chi quinwesaj ri mes pa ri a bokʼwäch? Are cʼu jewaʼ cʼo jun nimalaj cheʼ pa ri a bokʼwäch.

5 ¡Xak quieb a wäch! Nabe chawesaj ri nimalaj cheʼ ri cʼo pa ri a bokʼwäch. Cʼäte riʼ, kas catcaʼy na che resaxic ri mes pa ri u bokʼwäch ri awachalal.

6 Miyaʼ jun lokʼalaj jasäch chque ri tzʼiʼ. Miqʼuiak chquiwäch ri ak ri jeʼlalaj tak abäj ri quejuluwic. We quiban jewaʼ ri e areʼ cʼut xak quequitacʼalej, quetzelej chiwij, quixquimuchʼu.

7 Chitaʼ jas ri quiwaj, cäyataj cʼu na chiwe. Chitzucuj, quirik cʼu na. Chixcʼorcʼotok che u chiʼ je, cäjaktaj cʼu na chiwäch.

8 Jachin ri cutaʼ jun jasäch, cucʼam na. Ronojel ri cutzucuj, are curiko. Ronojel ri cäcʼorcʼot che u chiʼ ja, cäjaktaj na chuwäch.

9 ¿Jachin tä jun winak chiwe, we ri ralcʼual cutaʼ u wa che, cuyaʼ jun abäj che u qʼuexwäch?

10 We cutaʼ u car che, ¿la cuyaʼ la jun cumätz che?

11 We ri ix cʼut, ix itzel tak winak, iwetaʼm quiyaʼ utzalaj tak jastak chque ri iwalcʼual, ¿e tä cʼu lo ri i Tataxel ri cʼo chicaj, quebuyaʼ na utzalaj tak jastak chque ri quetow che?

12 Je cʼu riʼ, ronojel ri quiwaj chi cäquiban ri winak chiwe, jeriʼ xukujeʼ chibanaʼ ix chque. Are cʼu waʼ cubij ri pixab y xukujeʼ ri kʼalajisanelab che ri cäpe na.

13 Chixoc bic pa ri u chiʼ ja re ri be ri latzʼ u wäch. Sibalaj nim u wäch ri be ri cäcʼaman bic jawijeʼ quesach qui wäch ri winak, xukujeʼ nim ri u chiʼ ja re ri be riʼ. E qʼui cʼut ri queboc bic chupam.

14 Latzʼ u wäch ri be y ri u chiʼ ja re ri be riʼ ri cäcʼam bic pa ri cʼaslemal. Man e qʼui taj ri querikowic.

15 Chichajij iwib chquiwäch ri winak ri cäquijaluj quib chi e kʼalajisanelab che ri cäpe na. Ri e areʼ quepe iwucʼ, je tä ne u tzʼumal chij ri catzʼiak qui cojom, are cʼu ri chupam e itzel tak utiw, cäcaj cäquiqʼuis ronojel.

16 Rumal ri qui wächinic quiwetamaj wi na qui wäch. ¿La cäyac lo uvas che ri jun cheʼ qʼuix? ¿La cäyac lo higos che ri nicʼaj kʼayes chic e qʼuix?

17 Je cʼu riʼ, ronojel utzalaj cheʼ cuyaʼ utzalaj tak u wäch. Are cʼu ri cheʼ man utz taj, cʼä ri u wäch cuyaʼo.

18 Jun utzalaj cheʼ man cäcuin taj cuyaʼ u wäch ri man utz taj. Xukujeʼ man yatal taj ri jun cheʼ ri man utz taj cuyaʼ quiʼalaj u wäch.

19 Ronojel cheʼ ri man cuyaʼ tä utzalaj u wäch, cäramic, cäqʼuiak pa ri kʼakʼ.

20 Je cʼu riʼ, rumal ri qui wächinic quiwetamaj na qui wäch.

21 Man ronojel tä ri cubij chwe: Kajaw, Kajaw, coc tä na bic pa ri rajawibal ri Dios ri cʼo chicaj. Xane coc bic ri cäbanow ri u rayibal ri in Tat ri cʼo chicaj.

22 E qʼui cʼut cäquibij na chwe pa ri kʼij riʼ: ¿La ma tä xkayaʼ kʼalajisabal che ri cäpe na pa ri biʼ la? ¿La ma tä xkesaj itzel tak uxlabal pa ri biʼ la? ¿La ma tä xkaban qʼuialaj mayibal pa ri biʼ la?

23 Ri in cʼut quinbij na chque: Mawi jumul xinchʼob i wäch. Chixel chnuwäch, ix banal tak etzelal.

24 Rumal cʼu riʼ, ronojel jachin cutatabej we nu tzij riʼ, cunimaj cʼut, are je jas jun achi utz u chomanic. Ri achi riʼ xuyac jun rachoch puwiʼ jun nimalaj abäj.

25 Xkaj ri jäb, xnimar ri nimaʼ, xpe nimalaj cakʼikʼ chrij ri ja riʼ. Man xtzak tä cʼut, rumal rech chi ri u tacʼalibal are abäj.

26 Ronojel ri cutatabej we nu tzij riʼ, man cunimaj tä cʼut, are je jas jun achi ri man utz taj u chomanic. Ri achi riʼ xuyac jun rachoch puwiʼ ri sanyeb.

27 Xkaj ri jäb, xnimar ri nimaʼ, xpe nimalaj cakʼikʼ, xuqʼuiak rib chrij ri ja riʼ. Xtzak cʼut. Sibalaj nim ri u tzakic.