1 Xcʼulmataj cʼut chi xutak chque ri qʼuialaj winak chquiqʼuisaʼ cʼut u banic ri qui chʼawem rucʼ ri Dios. Jewaʼ xubij chque ri u tijoxelab xukujeʼ. Y xutak chque conojel chi mäquiqʼuiso u banic ri chʼawem rucʼ Dios pa canimaʼ.

2 Cʼu xutak chque chewalajok, chetacʼalok. Xewalaj cʼut, xetaqʼuiʼ.

3 Xcʼulmataj cʼu riʼ chi xupir chi jumul ri cäxlan wa, xutewichij, xuyaʼ chque ri u tijoxelab, rech cäquitijo.

4 Aretak qui tijom chic, xutak chque chquipiraʼ ri cäxlan wa, chquiyaʼo chque ri qʼuialaj winak.

5 Aretak qui yaʼom chic riʼ chque ri qʼuialaj winak, xukujeʼ xuyaʼ u waʼl uvas chque rech cäquikumuj. Xutak cʼu chque chquiyaʼo chque ri qʼuialaj winak.

6 Are cʼu riʼ, ri tijoxelab y ri qʼuialaj winak man qui cʼamom tä ulok cäxlan wa mawi ri u waʼl uvas.

7 Tzare kastzij xuyaʼ cäxlan wa chque chquitijaʼ, xukujeʼ xuyaʼ u waʼl uvas chquikumuj.

8 Xubij cʼu chque: Apachin ri cätijow we cäxlan wa riʼ, cutij ri nu tiojil che ri ranimaʼ. Apachin cʼut ri cäkumun we vino riʼ, cukumuj ri nu quiqʼuel che ri ranimaʼ. Mawi jumul cäche ri ranimaʼ. Mawi jumul cänum na pa ranimaʼ, mawi jumul cächakiʼj na u chiʼ pa ranimaʼ, xane cänojisaxic pa ranimaʼ.

9 Aretak ri qʼuialaj winak xquitijow chic, xekumun chic, chiwilampeʼ, kas xenojisataj che ri Uxlabalixel. Xquibij cʼut junam qui chʼabal, xquiyaʼ u kʼij ri Jesús, ri quilom, xukujeʼ qui tom.

10 Xcʼulmataj chi aretak conojel qui yaʼom u kʼij ri Jesús, xubij cʼu chque: Chiwilampeʼ, camic cʼut quinqʼuis u bixic ri jun takbal ri u takom ulok ri Tataxel chwe chquij we winak, ri jun chque ri u nicʼajil winak ri e aj uwo rachoch Israel.

11 Cänataj chiwe ri xixintzijobej, aretak xintzijon chque tak ri u tzij ri Isaías ri quetzʼakatisax na. Chiwilampeʼ, e tzʼibatalic, e cʼo chiwäch. Rumal riʼ, chebinicʼojampeʼ cʼut.

12 Kastzij, kastzij quinbij chiwe chi aretak quetzʼakatisaxic ri tak tzij riʼ, je cʼu riʼ, cätzʼakatisaxic ri yabal tzij ri u banom ri Tataxel chque ri u winak, ri e aj uwo rachoch Israel.

13 Cʼäte cʼu riʼ, ri tak u nicʼajil winak ri e quejabutaj na apanok cho ri uwächulew, quemulix na ulok tzpa ri relbal kʼij y xukujeʼ ri kajbal kʼij, y tzpa ri u wiquiakʼab relbal kʼij y ri u moxkʼab ri kajbal kʼij. Ri e are quetijotaj cʼu na chretamaxic ri Ajawaxel qui Dios, ri e resam pa qui mac.

14 Cʼu ri Tataxel u takom chwe chinyaʼ we ulew chiwe, che iwechbal.

15 In cʼut quinbij chiwe chi we man cäquiqʼuex tä qui cʼux ri Gentilib, aretak qui cʼamom chic ri jun tewichibal, aretak qui jabum chic ri nu winak cumal—

16 Cʼäte cʼu riʼ, ri ix, ri jun chque u nicʼajil ri rachoch ri Jacob, quixbe na apan chquixol, y quixcʼojiʼ cʼu na chquixol jun nimalaj mulaj winak, y quixcʼojiʼ cʼu na chquixol je jas tä ne jun coj ri cʼo chquixol tak ri awaj re cʼachelaj, je jas jun alaj coj chquixol jun chijel. Ri coj riʼ quebutacʼalej, xukujeʼ cäcʼajin ronojel we cäbe chquixol, y man cʼo tä jun ri cäcuinic che cäcolotajic.

17 Cäwalajisax na i kʼab paquiwiʼ ri quixquicʼululaj, y quetastaj cʼu na conojel ri i cʼulel chiwij.

18 Quebinmulij cʼu na nu winak je jas jun achi ri cumulij tak rakän trico cho u pa ja.

19 Are waʼ quinban na chque ri nu winak, ri banom jun yabal tzij ri Tataxel chque. Kas jeʼ, quinqʼuex na iwucʼa cho chʼichʼ, quinqʼuex cʼu na ri iwixqʼuiak che quiäk chʼichʼ. Quiban cʼu na chakatak chque qʼuialaj winak. Quinjach cʼu na qui kʼinomal pa u kʼab ri Ajawaxel. Quinjach cʼu na qui jastak pa u kʼab ri Ajawaxel ri cʼo paquiwiʼ conojel ri e aj uwächulew. Chiwilampeʼ, in riʼ ri quinbanowic.

20 Cäcʼulmataj cʼu na, cächa ri Tataxel, chi pa ri kʼij riʼ, ri machet re ri nu kʼatow tzij cäraj na cuban cʼäx paquiwiʼ, y kastzij cäkaj na paquiwiʼ conojel ri qui tinimit ri Gentilib we tä man cäquiqʼuex tä qui cʼux che ri qui mac.

21 Cäcʼulmataj cʼu na chi quebentacʼabaʼ na nu winak, ri e aj uwo rachoch ri Israel.

22 Chiwilampeʼ cʼu riʼ, quebintacʼabaʼ na we winak pa we ulew riʼ, rech cätzʼakatisax ri yabal tzij ri xinbano che ri i tat, ri Jacob. Are cäban cʼu na jun Cʼacʼ Jerusalén, cäcʼojiʼ cʼu na ri tak u cuinem ri caj chquixol we winak. Kas jeʼ ri in, in quincʼojiʼ na chixol.

23 Chiwilampeʼ, in riʼ ri xtzijox rumal ri Moisés, ri xubij: Ri Ajawaxel Dios cuwalajisaj na chiwe jun kʼalajisanel che ri cäpe na chquixol ri iwachalal, jas ri in. Chitatabej ronojel u tzij ri cubij na chiwe. Cäcʼulamtaj cʼu na chi conojel ri man cäcaj taj cäquitatabaj ri jun kʼalajisanel riʼ che ri cäpe na, quetastaj na chquij ri winak.

24 Kastzij quinbij chiwe: Kas jeʼ, conojel ri kʼalajisanelab che ri cäpe na tzpa ri Samuel, y conojel ri quepe na, jeʼ, conojel ri quechʼawic, qui kʼalajisam chwij.

25 Ix riʼ ri calcʼual ri kʼalajisanelab che ri cäpe na. Ix aj uwo rachoch ri Israel. Ix cʼo chupam ri yabal tzij ri u banom can ri Tataxel cucʼ ri i mam ojer. Je xuban ri Tataxel aretak xubij che ri Abraham: Cumal ri awijaʼl quetewichix na ri winak pa tak conojel tinimit cho ri uwächulew.

26 Ri Tataxel xinuwalajisaj nabe rech quinpe chiwach ix. Xinutak ulok rech quixintewichij, rech quinban chi chijujunal ri ix quiyaʼ can ri etzelal. Are cʼu waʼ rumal chi ix ri alcʼualaxelab re ri yabal tzij.

27 Aretak ix xixtewichitaj chic, cʼäte cʼu riʼ ri Tataxel cutzʼakatisaj ri yabal tzij ri xuban rucʼ ri Abraham, xubij: Cumal ri awijaʼlil quetewichix na ri winak pa tak conojel tinimit cho ri uwächulew, rumal rech chi cämaqʼuix na ri Uxlabixel paquiwiʼ ri Gentilib. We tewichibal riʼ, ri cäyaʼ na paquiwiʼ ri Gentilib, quebucowirisaj na chquiwäch conojel, quequijabuj na nu winak, ri e aj uwo rachoch ri Israel.

28 Cäquetzelaj na qui wäch ri winak ri e cʼo pa we ulew riʼ. Pune cäquiban jewaʼ, we cäquicowirisaj qui cʼux chwij aretak qui cʼamom ri u tzʼakatisaxic ri lokʼalaj nu tzijobal, quintzelej na ri quetzelal paquiwiʼ ri e areʼ, cächa ri Tataxel.

29 In cʼut quinnatajisaj na ri yaal tzij ri nu banom cucʼ ri nu winak. Nu yaʼom nu tzij chque chi quebinmulij na pa ri kʼij ri quinchomaj chi utz. Xinyaʼ nu tzij chi kas xinyaʼ chque chi na jumul ri culew ri ojer qui mam qui tat che quechbal. Are riʼ ri ulew re Jerusalén, are jun tasom ulew chque cäbe kʼij sak, cächa ri Tataxel.

30 Cäcʼulmataj cʼu na chi cäpe ri kʼij re ri u tzijoxic ri tzʼakatisanic re ri lokʼalaj nu tzijobal chque.

31 Quecojon cʼu na chwe, chi in riʼ ri Jesucristo, ri u Cʼojol ri Dios. Cäquiban cʼu na chʼawem rucʼ ri Tataxel pa nu biʼ ri in.

32 Cʼäte cʼu riʼ, ri qui chajinelab cäquirak na qui chiʼ. Junam qui chʼabal quebixon na, rumal rech chi kʼalaj cäquil na rucʼ qui bokʼwäch.

33 Cʼäte riʼ, ri Tataxel quebumulij chi na jumul, cuyaʼ cʼu na ri Jerusalén chque, che ri ulew re ri quechbal.

34 Cʼäte cʼu riʼ, cäquichaplej na ri qui quicotem: Junam chixquicotok, ix ri tzʼinowinak tak cʼolbal pa Jerusalén, rumal rech chi ri Tataxel u cuʼbisam qui cʼux ri u winak, e resam pa ri qui mac ri e aj Jerusalén.

35 Ri Tataxel u chʼanabam ri lokʼalaj u kʼab chquiwäch conojel tak ri tinimit. Conojel ri winak cʼut ri e cʼo pa tak u cʼulbat ri ulew, quilow na ri colotajibal rech ri Tataxel. Ri Tataxel y ri in, uj xaʼ jun.

36 Cʼäte cʼu riʼ, cäcʼulmataj na jas ri tzʼibatalic: Chatcʼastajok, chatcʼastaj chi jumul, chacojoʼ ri a chukʼab, lokʼalaj Sión. Chacojoʼ ri jeʼlalaj tak awatzʼiak, chʼajchʼojalaj Jerusalén, ri lokʼalaj tinimit. Tzpa camic cʼut man quebopan tä chi na awucʼ ri man qui cojom tä retal che qui cowil, ri man e chʼajchʼoj taj.

37 Chatotaʼ awib che ri cʼajcʼaj ulew ri cʼo chawij. Chatwalajok, chattʼuyulok, lokʼalaj Jerusalén. Chaquiraʼ ri ximbal ri sutim pa a kul, lokʼalaj u mial ri Sión, at kajinak pa qui kʼab ri a cʼulel.

38 Jeriʼ cubij ri Ajawaxel: I cʼayim iwib che u qʼuexel ri jastak ri man cʼo tä qui patan, man quixcolotaj tä cʼu na rumal ri puak.

39 Kastzij, kastzij quinbij chiwe chi ri nu winak cäquetamaj na ri nu biʼ. Kas jeʼ, pa ri kʼij riʼ cäquetamaj na chi in riʼ ri kas quinchʼawic.

40 Cʼäte cʼu riʼ, cäquibij na: Sibalaj jeʼlic puwiʼ tak ri juyub ri rakän ri areʼ ri cäcʼamow ulok ri utzalaj u bixical chque, ri cäkʼalajisan ri utzilal, ri cäcʼamow ulok chque ri utzalaj u bixical ri utzi, ri cäkʼalajisan ri colonem, ri cubij che ri Sión: ¡Cajawinic ri a Dios!

41 Cʼäte cʼu riʼ, quel na apan jun siqʼuinem ri cubij: Jix, jix, chixel bi chilaʼ. Michap jas ri man chʼajchʼoj taj. Chixel bi chuxol ri areʼ. Chibanaʼ chʼajchʼoj ix ri quixcʼamow ri u kumbal ri Ajawaxel.

42 Mixel tä bic chanim, mawi rucʼ aninakil, rumal rech chi ri Ajawaxel cänabej na chiwäch. Y ri Dios re ri Israel cuban na ri chajinel chiwij.

43 Chiwilampeʼ, ri nu pataninel cächacun na rucʼ u noʼjibal. Cänimarisax na u kʼij y curik u cʼolibal chicaj, sibalaj ajsic cäcʼojiʼ na.

44 Are riʼ e qʼui ri xquimayij chawäch. Sibalaj etzelam ri u wäch, etzelam cʼu na chuwäch apachique achi chic. Etzelam cʼu na ri u sucʼumal ri u tiojil chquiwäch ri calcʼual ri winak.

45 Je cʼu riʼ, cuyaʼ na canok ri u tzijobal chquixol qʼui tinimit. Ri ajawinelab cäquitzʼapij na qui chiʼ chuwäch, rumal rech chi cäquil na jas ri man xbix tä chque, cäquichomaj cʼu na jas ri man quilom taj.

46 Kastzij, kastzij quinbij chiwe: Kas cäcʼulmataj na ronojel waʼ je jas u takom ri Tataxel chwe. Cʼäte riʼ, cätzʼakatisax na we yabal tzij ri xuyaʼ ri Tataxel chque ri u winak. Quecʼojiʼ na chi jumul ri nu winak pa Jerusalén, ri cux na ri ulew re ri quechbal.