1 Cʼäte cʼu riʼ, cʼo ri cubij ri ka tzijobal y ketaʼm chi kas sucʼ ri ka tzijobal. Kastzij are riʼ jun sucʼalaj achi ri xcʼolow ri tzijobal. Kas xuban qʼui tak mayibal pa ri u biʼ ri Jesús. Man cʼo tä cʼu jun achi ri xcuinic chubanic tak mayibal pa ri u biʼ ri Jesús, xak xuwi we kas chʼajchʼoj cho ri retzelal.

2 Xcʼulmataj cʼu riʼ chi ocʼowinak chic ri junab treinta y tres. Waʼ, we man xsachic taj che we achi riʼ u rajilaxic ri kʼij.

3 Are cʼu riʼ, ri winak xquichaplej ri reyexic ri jun retal xbix canok rumal ri kʼalajisanel che ri cäpe na, ri Samuel, ri aj Lamanita. Ri e areʼ xqueyej rucʼ jun nimalaj qui cowinic. Xqueyej tak ri kʼij are cäpetic jun kʼekum cho ri uwächulew che oxib kʼij.

4 Ri winak xquichaplej ri u banic quieb qui cʼux, xquichaplej xquichʼoʼjij cachbil quib, pune yatajinak chic qʼuialaj tak etal.

5 Xcʼulmataj cʼut pa ri junab treinta y cuatro, pa ri nabe icʼ, y pa ri ucaj kʼij chupam we icʼ riʼ, xwalajic jun nimalaj jäb rucʼ cakuljaʼ ri mi jumul etamatal cho ronojel ri ulew.

6 Xbanic jun nimalaj jäb rucʼ cakʼikʼ, xukujeʼ rucʼ jun cʼäxalaj cakuljaʼ ri xusalabaj ronojel ri uwächulew, cʼä xak jubikʼ xraj na xujach rib pa nicʼaj.

7 Xbantaj cʼu riʼ, mayilaj tak cayapa ri mawi jumul quilitajinak cho ronojel ri uwächulew.

8 Xcʼatic ri tinimit Zarahemla.

9 Xsach ri tinimit Moroni chuxeʼ ri nimalaj jaʼ, y xejikʼic ri conojel winak aj ri tinimit riʼ.

10 Cʼu ri ulew xumuk ri tinimit Moroníah. Xbantaj cʼu riʼ jun nimalaj juyub che ri u qʼuexwäch ri tinimit.

11 Xbantaj cʼu riʼ jun cʼäxalaj sachibal wächaj pa ri ulew pa ri u wiquiakʼab ri kajbal kʼij.

12 Tzare kastzij xbantaj jun sachibal wächaj nim na pa ri ulew ri cʼo pa ri u wiquiakʼab ri relbal kʼij. Chiwilampeʼ, xqʼuextaj u banic ronojel u wäch ri ulew riʼ cumal tak ri nimalaj jäb, y ri nimalaj salkʼut jäb, y ri cakuljaʼ, y ri cayapa, y xukujeʼ rumal ri nimalaj cabrakän pa ronojel ri uwächulew.

13 Xerakin cʼu riʼ ri nimak tak be. Xetzelexic ri alaj tak be. Qʼui tak cʼolibal lianic xquiban bukubak siwan.

14 Xesach pa ri nimalaj jaʼ sibalaj tinimit e utzalaj qui banic. Xecʼatisax cʼu qʼui tak tinimit chic. Sibalaj tinimit chic xetzakic cho ulew rumal ri cabrakän, y xecämisaxic conojel ri e aj ri tak tinimit riʼ. We tak tinimit riʼ xetuquix qui wäch.

15 Are cʼu riʼ, cʼo jujun tinimit ri man xetzaktaj. Tzare sibalaj nim xewulijic, y sibalaj winak xecämisaxic.

16 Cʼo jujun winak ri xecʼam bic rumal jun nimalaj salkʼut ja. Man cʼo tä jun winak cuchʼobo ja ri xebe wi. Xak xuwi quetaʼm chi xecʼamic bic.

17 Je cʼu riʼ xjechʼobic ri u banic ronojel ri uwächulew rumal tak ri nimalaj jäb rucʼ cakuljaʼ y cayapa, y rumal ri cabrakän ri xuban cho ri ulew.

18 Chiwilampeʼ, xepaxic tak ri abäj, xel pa tak nicʼaj cho ronojel ri uwächulew. Je cʼu waʼ, xerikic ri tak abäj pa tak cʼolbal jawi jakal wi ri ulew, cʼä xerikic cho ronojel u wäch ri ulew.

19 Xcʼulmataj chi xqʼuis u banic ri cakuljaʼ y ri cayapa, ri salkʼut jäb, y ri cabrakän. Chiwilampeʼ, cäraj ne oxib hora xuban waʼ. Cʼo jujun ri xquibij chi naj ne xubano, pune tä xaʼ xebantaj we nimalaj cʼäxalaj jastak che oxib hora. Cʼäte cʼu riʼ, kas xkaj ulok jun kʼekum cho ri u wäch ri ulew.

20 Xcʼulmataj cʼut chi xcʼojiʼ jun kʼekum cho ronojel u wäch ri ulew. Je cʼu waʼ, ri e cʼo cho ri ulew, ri man e cäminak taj, xecuinic chunaʼic ri ruxlab ri kʼekum.

21 Man xuyaʼ taj u cojic jun sakil, rumal rech ri kʼekumal. Man xuyaʼ taj qui tzijic ri candela, mawi ri chäj. Mawi xuyaʼ u tzijic che jun kʼakʼ rucʼ ri qui siʼ ri sibalaj utz y sibalaj chakiʼj. Jewaʼ man xuyaʼ tä u tzijic majun kʼakʼ.

22 Man xilitaj taj jun sak. Man xilitaj taj jun kʼakʼ, mawi jun juluwem, mawi ri kʼij, ri icʼ, y ri chʼimil. Are sibalaj nim ri kʼekumal ri xcʼojiʼ cho ri u wäch ri ulew.

23 Xcʼulmataj cʼu riʼ chi man xilitaj taj mawi jun kʼakʼ che oxib kʼij. Xbantaj nimalaj tak bisonic, qʼuecatem, y okʼibal chquixol ri winak. Kas nim ri qui cʼuyuwem ri winak, rumal rech chi kajinak paquiwiʼ jun kʼekumal y jun nimalaj sachibal wächaj.

24 Pa jun cʼolbal, xtatabex cʼu ri cokʼenic, xquibij: ¡Ay, we tä ka qʼuexom ka cʼux nabe chuwäch we nimalaj cʼäxalaj kʼij, ma tä xesax qui cʼaslemal ri kachalal, ma tä xecʼatic pa ri jun nimalaj tinimit u biʼ Zarahemla!

25 Pa jun cʼolbal chic xtatabex ri cokʼenic y ri qui bisonic, xquibij: ¡Ay, we tä ka qʼuexom ka cʼux nabe chuwäch we nimalaj cʼäxalaj kʼij, ma tä xekabucʼ che abäj ri kʼalajisanelab che ri cäpe na, ma tä xekesaj bic chkawäch, y ma tä xekacämisaj! Je cʼu waʼ, we tä ma tä xkabano, kastzij xecolotaj ne lo ri ka nan y ri jeʼlalaj tak ka mial, y xukujeʼ ri kalcʼual, y man xemuk tä canok pa ri jun nimalaj tinimit u biʼ Moroníah. Are cʼu riʼ ri nimalaj cʼäxalaj cokʼenic ri winak.