1 Wacamic cʼut chiwilampeʼ, quinbij chiwe chi aretak ri Ajawaxel chuchomaj pa ri u noʼjibal chi utz quepe chi sak we jastak chque ri Gentilib, je jas u beyal ri u tzij, cʼäte riʼ, quichʼob na chi tajin cuchaplej u tzʼakatisaxic ri yabal tzij ri u banom ri Tataxel cucʼ ri alcʼualaxel re Israel chrij ri qui tzelejibal cho ri ulew re ri quechbal.

2 Quiwetamaj cʼut chi quetzʼakatisax na ronojel ri u tzij ri Ajawaxel ri xbix canok cumal ri lokʼalaj tak kʼalajisanelab che ri cäpe na. Man cuyaʼ tä na chi quibij chi cäbeytaj ri u petibal ri Ajawaxel chque ri alcʼualaxel re Israel.

3 Michomaj pa iwanimaʼ chi man cʼo tä qui patan ri tzij ri bitajinak. Chitampeʼ, ri Ajawaxel cunatajisaj na ri yabal tzij ri u banom cucʼ ri u winak ri e aj uwo rachoch ri Israel.

4 Aretak cʼut quiwilo chi quel na we tak tzij chixol, mixutuj chic ri u banom ri Ajawaxel, rumal chi ri machet re ri u kʼatbal tzij cʼo cho ri u wiquiakʼab. Chitampeʼ, quixurik na we quixutuj ri u banom pa ri jun kʼij riʼ.

5 ¡Tokʼob u wäch apachin ri cuxutuj ri u banom ri Ajawaxel! Kas jeʼ, ¡tokʼob u wäch apachin ri cuxutuj ri Cristo, y xukujeʼ ri u banom areʼ!

6 Kastzij, ¡tokʼob u wäch apachin ri cubij chi man cʼo tä ri u kʼalajisanem ri Ajawaxel, y xukujeʼ ri cubij chi ri Ajawaxel man cächacun tä chic rumal ri u kʼalajisanem, mawi rumal ri kʼalajisabal che ri cäpe na, mawi rumal ri u sipanic, mawi rumal ri nicʼaj chʼabal, mawi rumal ri cunanic, mawi rumal ri u cuinem ri Lokʼalaj Uxlabixel.

7 Kastzij, ¡tokʼob u wäch apachin ri cubij pa ri jun kʼij, chutokʼobisaxic rib chi ri Jesucristo man cäcuin tä cuban mijun mayibal! Rumal chi apachin ri cubij na waʼ, cux na je jas ri ralcʼual ri itzel, man cʼo tä elbal cʼuxaj ri xyaʼ che, je jas u beyal ri u tzij ri Cristo.

8 Kastzij, michʼachʼat chquij ri aj Judeyib, mixutuj ri e areʼ, miwetzʼbej ri qui wäch ri e areʼ, y xukujeʼ mijun chque ri nicʼaj winak ri e aj uwo rachoch ri Israel. Rumal chiwilampeʼ, ri Ajawaxel cunatajisaj na ri yabal tzij ri xuban cucʼ, cuban cʼut ri xubij chi kas cuban na chque.

9 Rumal riʼ, michomaj pa iwanimaʼ chi quixcuinic quiqʼuex ri u wiquiakʼab ri Ajaw che ri u moxkʼab, rech man cuban tä ri u kʼatbal tzij cʼä che u tzʼakatisaxic ri yabal tzij ri u banom cucʼ ri winak ri e aj uwo rachoch ri Israel.