1 Xcʼulmataj chi aretak pakinak chi ri Jesús chicaj, xquijach quib ri qʼuialaj winak. Ronojel achi xbe rucʼ ri rixokil y ri tak ralcʼual, y xetzelej cʼä cho ja.

2 Chanim cʼut xjabux apan ri bixical, are majok xoc ri akʼab, chi ri qʼuialaj winak quilom ri Jesús, chi u banom ri lokʼalaj u chac rumal quech, y xukujeʼ chi cucʼut na rib chquiwäch ri qʼuialaj winak pa ri kʼij re chuek, nim akʼab.

3 Jeʼ, xjabux apan u bixical ri Jesús che ronojel ri chakʼab. Rumal chi xtak apan we bixical riʼ chque ri winak, e cʼo qʼui, kastzij e cʼo sibalaj winak ri nim xechacunic che ronojel ri akʼab riʼ, rumal rech chi quecʼojiʼ na chilaʼ akʼab jawi cucʼut wi na ri Jesús chquiwäch ri qʼuialaj winak.

4 Xcʼulmataj cʼut chi aretak xel ri kʼij, y qui mulim chi quib ri qʼuialaj winak, chiwilampeʼ, chilaʼ e cʼo wi ri Nefi rucʼ ri rachlal ri u walajisam cʼä chquixol ri cäminakib, u biʼ Timoteo. Xukujeʼ cʼo u cʼojol, u biʼ Jonás, y xukujeʼ ri Matoni. E cʼo chilaʼ xukujeʼ ri Matoníah, ri rachalal, y ri Kumen, y ri Kumenoni, y ri Jeremías, y ri Shemnón, y ri Jonás, y ri Sedecías, y ri Isaías. Are cʼu riʼ ri qui biʼ ri tijoxelab ri e u chaʼom ri Jesús. Xcʼulmataj cʼut chi xebec xetaqʼuiʼ chquixol ri qʼuialaj winak.

5 Chiwilampeʼ cʼut, e qʼui ri winak ri qui mulim quib. Rumal cʼu riʼ, xquiban chi xetasic chque cablajuj mulaj.

6 Cʼäte cʼu riʼ, ri cablajuj tijoxelab kas xequitijoj ri qʼuialaj winak. Chiwilampeʼ, xquibano chi xexuquiʼ ri qʼuialaj winak cho ri ulew chubanic chʼawem rucʼ ri Tataxel pa ri u biʼ ri Jesús.

7 Ri tijoxelab xukujeʼ xquiban chʼawem rucʼ ri Tataxel pa ri u biʼ ri Jesús. Xcʼulmataj cʼut chi xewalajic, xquiban lokʼalaj pataninic paquiwiʼ ri winak.

8 Xquicamulij cʼut ri tzij ri u bim ri Jesús, man xquiqʼuex tä mawi jun tzij chuwäch ri u bim ri Jesús. Cʼäte cʼu riʼ, kastzij xexuquiʼ chi jumul, xquiban chʼawem rucʼ ri Tataxel pa ri u biʼ ri Jesús.

9 Xquiban chʼawem chutaʼic che ri Dios jas ri mas nim u rayibal ri canimaʼ. Xquirayij cʼut chi cäsipataj ri Uxlabixel chque.

10 Aretak qui banom chic jewaʼ ri chʼawem rucʼ ri Dios, xekaj apan chuchiʼ ri jaʼ, y xequiterenej ri qʼuialaj winak.

11 Xcʼulmataj cʼut chi xoc ri Nefi chupam ri jaʼ, xkasax chuxeʼ.

12 Cʼäte cʼu riʼ, xel bic chupam ri jaʼ, y xuchaplej u banic qui kasabal xeʼ jaʼ conojel ri e u chaʼom ri Jesús.

13 Xcʼulmataj cʼut chi aretak banom chic qui kasbal xeʼ jaʼ conojel ri e areʼ, y ri e elinak bi chic chupam ri jaʼ, xkaj ri Uxlabixel paquiwiʼ, xenojisax cʼut che ri Lokʼalaj Uxlabixel y che kʼakʼ.

14 Chiwilampeʼ cʼut, sutim quij je tä ne jun kʼakʼ, y xquiyaʼ kʼalajisabal chrij, ri kas xpe ulok chicaj. Ri qʼuialaj winak kas xquilo ri xcʼulmatajic. Xekaj cʼu ulok angelib aj chicaj, y xquiban lokʼalaj pataninic paquiwiʼ ri winak.

15 Xcʼulmatajic cʼut chi aretak ri angelib cätajin quequipatanij ri tijoxelab, chiwilampeʼ cʼut, xpe ulok ri Jesús, xtaqʼuiʼc chquixol, xebupatanij.

16 Xcʼulmataj cʼu riʼ, xtzijon chque ri qʼuialaj winak y xutak chque chi quexuquiʼ chi jumul cho ri ulew, xukujeʼ xutak chque ri u tijoxelab chexuculok cho ri ulew.

17 Are e xuculic chi conojel cho ri ulew, xcʼulmataj chi xtakan chque ri u tijoxelab chquibanaʼ chʼawem rucʼ ri Dios.

18 Kas chiwilampeʼ cʼu riʼ, xquichaplej u banic ri chʼawem. Xquiban cʼu ri chʼawem che ri Jesús, xquibij ri Cajaw che, y ri qui Dios.

19 Xcʼulmataj cʼu riʼ, xel bic ri Jesús chquixol, xel apan jutzʼit chquiwäch, xxuquiʼc cho ri ulew, xubij cʼut:

20 Tataxel, quinmaltioxij che la rumal yaʼom la ulok ri Uxlabixel chque ri e nu chaʼom. Quecojon cʼu chwe, rumal rech cʼu riʼ, e nu chaʼom ulok chquiwäch ri winak ri e cʼo cho ri uwächulew.

21 Tataxel, quintzʼonoj che la chi cäyaʼ na la ri Uxlabixel chque conojel ri quecojon che ri qui tzij.

22 Tataxel, lal yaʼom la ri Uxlabixel chque rumal rech chi quecojon chwe. Lal quil cʼu la chi quecojon chwe rumal rech chi cäta la qui tzij. Cäquiban lokʼalaj chʼawem chwe, cäquiban cʼut ri lokʼalaj chʼawem chwe rumal chi in cʼo cucʼ.

23 Wachinim Tataxel, quinban chʼawem ucʼ la rumal quech, xukujeʼ rumal quech conojel ri quecojon na che ri qui tzij. Quintzʼonoj che la rech chi quecojon chwe, rech chi quincuinic quincʼojiʼ chquipam, je jas ri lal, Tataxel, lal cʼo chnupam in, rech chi uj xaʼ jun.

24 Xcʼulmataj cʼut chi aretak ri Jesús banom chic we chʼawem rucʼ ri Tataxel, xopan cucʼ ri u tijoxelab. Chiwilampeʼ, cʼä qui takem u banic lokʼalaj chʼawem rucʼ, man qui qʼuisom taj. Y man xquicamulij tä cʼu sibalaj tak tzij, rumal cʼut chi yaʼom chque jas xquibij na pa ri chʼawem, xenojisax cʼut che jun utzalaj rayibal.

25 Xcʼulmataj cʼut chi ri Jesús xebutewichij aretak cätajin cäquiban we chʼawem rucʼ. Xtzeʼn ri u wächibal chquiwäch, xjuluw cʼut ri sakil re ri u wächibal chquiwäch. Chiwilampeʼ, xebux sak je jas ri u wächibal y ri ratzʼiak ri Jesús. Chiwilampeʼ, ri u sakil riʼ are nim na cho ronojel sakil. Kas jeʼ man cʼo tä jun jasäch cho ri ulew ri sak je jas ri u sakil riʼ.

26 Cʼu ri Jesús xubij chque: Chitakej u banic chʼawem rucʼ Dios. Areʼ cʼu riʼ, man xquiqʼuis tä u banic chʼawem rucʼ Dios.

27 Xutzolkʼomij cʼu rib chquij jumul chic, xbe cʼu apan jutzʼit, xxuquiʼc cho ri ulew, xuban chi jumul chʼawem rucʼ ri Tataxel, xubij:

28 Tataxel, quinmaltioxij che la chi lal e chʼajchʼojarisam la ri e nu chaʼom, rumal rech ri qui cojobal. Quinban chʼawem ucʼ la rumal quech, xukujeʼ rumal quech ri quecojon na che ri qui tzij, rech chi quebux chʼajchʼoj wumal in, rumal ri qui cojobal che ri qui tzij, je jas ri e areʼ kas e chʼajchʼoj wumal in.

29 Tataxel, man quinban tä chʼawem ucʼ la rumal quech ri winak ri e aj ri uwächulew, xane rumal quech ri e yaʼom la chwe, ri e elinak ulok chquiwäch ri winak ri e aj ri uwächulew. Quinban waʼ rech chi rumal ri qui cojobal, quebux chʼajchʼoj wumal ri in. Rumal cʼu jewaʼ in cʼo na cucʼ je jas lal, Tataxel, lal cʼo wucʼ in, rech uj xaʼ jun, rech cänimarisax nu kʼij rumal quech.

30 Aretak ri Jesús u bim chic we tzij, xpe chi jumul cucʼ ri u tijoxelab. Chiwilampeʼ cʼut, man salabam tä canimaʼ pa ri chʼawem ri xquiban che ri areʼ, man xquiqʼuis tä u banic. Xtzeʼn chi jumul u wächibal chque. Chiwilampeʼ, e sak je jas ri Jesús.

31 Xcʼulmataj chi xbe chi jumul jubikʼ naj, xuban chʼawem rucʼ ri Tataxel.

32 Ri akʼaj man cäcuin taj cätzijonic ri tzij ri xubij pa ri u chʼawem rucʼ ri Dios, mawi cuyaʼ chi cätzʼibax rumal jun winak ri tzij ri xubij pa ri u chʼawem rucʼ ri Dios.

33 Ri qʼuialaj winak cʼut kas xquito, y xquiyaʼ kʼalajisabal. Jakatal cʼu ri canimaʼ, xquichʼob pa canimaʼ ri tak u tzij ri xubij pa ri u chʼawem rucʼ ri Tataxel.

34 Pune jeriʼ, rumal ri nimalaj mayilaj tak tzij ri xubij pa ri u chʼawem, man cuyaʼ tä quetzʼibaxic, mawi chi quebixic cumal winak.

35 Xcʼulmataj chi aretak ri Jesús xuqʼuis u banic ri u chʼawem rucʼ ri Dios, xpe chi jumul cucʼ ri u tijoxelab, xubij chque: Sibalaj nim ri i cojobal chwe. Mawi jumul wilom nimalaj cojobal chquixol conojel ri aj Judeyib je wilom chixol ri ix. Rumal man xecojon taj, man xuyaʼ taj xincʼut nimalaj tak mayibal chque je jas nu cʼutum chiwe.

36 Kastzij, quinbij chiwe chi man cʼo tä jun chque ri quilom ri nimalaj jastak je jas iwilom ix. Mawi qui tom ri nimalaj jastak ri i tom ix.