1 Kastzij cʼut quinbij chiwe: Quincʼut chiwe jun etal, rech quichʼob na jas ri kʼij cäraj cäcʼulmataj na waʼ. Ri kʼij ri quebinmulij na nu winak, o ri e aj uwo rachoch ri Israel, ri qʼui tak kʼij e jabutal chquixol juleʼ winak chic, quintacʼabaʼ chi na jumul ri Sión chquixol.

2 Chiwilampeʼ cʼut, are waʼ ri quincʼut na chiwe che retal: Kastzij quinbij chiwe chi quintzijoj we tzij riʼ chiwe, quintzijoj cʼu na nicʼaj tzij chic chiwe wumal in. We tak tzij riʼ cäkʼalajisax na chque ri Gentilib rumal ri u cuinem ri Uxlabixel, ri cäyaʼ na chiwe rumal ri Tataxel. Cäkʼalajisax na waʼ chque ri Gentilib rech quecuinic quechʼobon chquij we winak riʼ, ri jun chque u nicʼajil winak aj uwo rachoch ri Jacob, chquij xukujeʼ ri nu winak ri quejabutaj na cumal.

3 Kastzij, kastzij quinbij chiwe chi ri Tataxel cukʼalajisaj na we jastak chque ri areʼ. Cʼäte cʼu riʼ, quepe we jastak chiwe cumal ri e areʼ.

4 Are cʼut ri u noʼjibal ri Tataxel chi quetacʼabax na waral pa we ulew riʼ, y quetacʼabax cʼu na jun winak ri e tzokopitalic rumal ri Tataxel, rech copan we jastak riʼ cumal chque ri iwijaʼlil. Jewaʼ cʼu riʼ, rech cätzʼakatisax ri yabal tzij ri Tataxel ri u yaʼom chque ri u winak, ri uwo rachoch Israel.

5 Je cʼu riʼ, we tak chac riʼ, xukujeʼ ri nicʼaj chac chic ri cäban na chixol, quepe na ulok cumal ri Gentilib chque ri iwijaʼl, pa jun kʼij aretak man quecojon taj rumal rech ri etzelal ri cäquibano.

6 Jewaʼ rumal rech chi are laʼ u rayibal ri Tataxel chi cäpe na ulok cumal Gentilib, rech cäcuinic cucʼut ri u cuinem chquiwäch ri Gentilib. Je cʼu waʼ, we Gentilib man cäquicowirisaj tä ri canimaʼ, quecuin na cäquiqʼuex qui cʼux, quekasax xeʼ jaʼ pa ri nu biʼ ri in, y cäquichʼob ri kastzij u sucʼumal ri lokʼalaj nu tijonem. Je cʼut quecuinic quebajilataj na chquixol ri nu winak, ri lokʼalaj ri uwo rachoch ri Israel.

7 Aretak cäcʼulmataj na waʼ, jeʼ, aretak ri iwijaʼl cäquichaplej qui chʼobic we jastak, are waʼ je tä ne jun etal chquiwäch chi ri Tataxel u chaplem chi riʼ ri u chac chutzʼakatisaxic ri yabal tzij ri xuban chque ri winak, ri e aj ri uwo rachoch ri Israel.

8 Cʼäte riʼ, aretak cäpe ri kʼij riʼ, cäcʼulmataj cʼu na chi ri ajawinelab cäquitzʼapij na qui chiʼ, rumal rech chi cäquil na jas ri man xbix tä chque, cäquichomaj cʼu na jas ri man qui tom taj.

9 Rumal rech chi pa ri kʼij riʼ, ri Tataxel cuchacuj na jun chac rumal wech, ri cux na jun nimalaj mayilaj chac chquixol. Cäcʼojiʼ cʼu na jujun chquixol ri man quecojon taj pune jun achi cukʼalajisaj na chquiwäch.

10 Tzare chiwilampeʼ, cäcʼojiʼ na pa nu kʼab in ri u cʼaslemal ri nu pataninel. Rumal riʼ, man cäquiban tä na cʼäx che, pune jeʼ cäsocotaj u wäch cumal ri e areʼ. Are cʼu ri in quincunaj na, rumal quincʼut na chque chi mas nim na nu noʼjibal chuwäch ri itzelalaj subunic re ri itzel.

11 Rumal cʼu waʼ, cäcʼulmataj na chi conojel jachin ri man quecojon tä che nu tzij ri in, ri Jesucristo, are riʼ quetastaj na chquij ri nu winak re ri yabal tzij. In riʼ ri jun ri cätak na rumal ri Tataxel chucʼamaʼ ulok ri tzij chque ri Gentilib, y cuyaʼ na cuinem pa u kʼab che u cʼamic ulok chque ri Gentilib, (cäbantaj na waʼ je jas xubij ri Moisés).

12 Ri nu winak are jun chque ri u nicʼajil uwo rachoch ri Jacob. Ri e areʼ quecʼojiʼ na chquixol ri Gentilib. Kas jeʼ quecʼojiʼ na chquixol je tä ne jun coj ri cʼo chquixol tak ri awaj re cʼachelaj, je jas jun alaj coj ri cʼo chquixol jun chijel. Ri coj riʼ quebutacʼalej, xukujeʼ cäcʼajinic we cäbe chquixol, y man cʼo tä jun ri cäcuinic che qui colotajic.

13 Cäwalajisax na qui kʼab paquiwiʼ ri quequicʼululaj, quetastaj apan conojel ri qui cʼulel chquij.

14 Kas jeriʼ, tokʼob qui wäch ri Gentilib, we tä man cäquiqʼuex tä qui cʼux. Cäcʼulmataj cʼu na pa ri kʼij riʼ, cächa ri Tataxel, chi quebinwesaj na ri quiej chixol, quinwetzelaj cʼu ri i careʼt rech quiej.

15 Quebinpucaj cʼu na chiwij ri tak tinimit ri cʼo pa ri iwulew, quebinwulij na ri tak i cʼolbal ri nim qui chukʼab.

16 Quebinsach na qui wäch ri quebanow tak itzibal pa ri iwulew y man quecʼojiʼ tä na chʼabonelab iwucʼ.

17 Quebinsach na qui wäch ri alaʼs tak i tiox y ri tacʼal tak i tiox. Mikʼijilaj chi na jas banom che i kʼab.

18 Quebinbok na ri cʼachelaj ri cʼo chixol. Jeriʼ cʼut quinwulij na qui wäch ri tak i tinimit.

19 Cäcʼulmataj cʼu na chi quesach na qui wäch conojel banow tzij, y conojel tak subunic, y ronojel u petic royowal jun aretak jun chic curik utzil, y ronojel tak chʼoʼj, y ronojel itzel tak chac ri cäban cumal ri ajyukʼab que ri winak, y ronojel itzibal chquixol achijab y ixokib.

20 Cäcʼulmataj cʼu na, cächa ri Tataxel, chi conojel ri jachin man queqʼuexow tä na qui cʼux, man quebopan tä na rucʼ ri lokʼalaj nu Cʼojol pa ri kʼij riʼ. Are riʼ quebintas na chquij ri nu winak, ri e aj uwo rachoch Israel.

21 Quintzelej cʼu na jun cʼäx paquiwiʼ, quinqʼuiak na jun nimalaj woyowal chquij, je jas ri quinban na chque ri man cäquicoj tä ri u tzij ri Dios, je jas man qui tom taj.

22 Tzare we tä cäquiqʼuex qui cʼux, y cäquitatabej ri nu tzij, y man cäquicowirisaj tä ri canimaʼ, in cʼut quintacʼabaʼ na nu winakil chquixol. Cʼu ri e areʼ queboc na pa ri yabal tzij rucʼ ri Dios, quebajilataj cʼu na chquixol ri nicʼaj uwo rachoch ri Jacob. In cʼut nu yaʼom chque we ulew che quechbal.

23 Quequitoʼo na ri nu winak, rech quecuinic cäquiyac na jun tinimit, ri cäbix ri Cʼacʼ Jerusalén che. Ri nu winak ri cäquiban na waʼ, are riʼ ri u nicʼajil ri uj uwo rachoch ri Jacob, y xukujeʼ conojel ri e aj ri uwo rachoch Israel ri quepe na.

24 Cʼäte cʼu riʼ, quequitoʼo na nu winak rech quemulix ulok cʼä pa ri Cʼacʼ Jerusalén. E jabutal ri e areʼ cho ronojel u wäch ri ulew.

25 Cʼäte riʼ, ri u cuinem ri caj cäkaj na ulok chquixol, in xkujeʼ quincʼojiʼ na chquixol.

26 Cʼäte ri kʼij riʼ, cächapletaj na ri lokʼalaj u chac ri Tataxel, aretak cätzijox na we lokʼalaj tzijobal chque ri u nicʼajil we winak. Kastzij quinbij chiwe chi pa ri kʼij riʼ, kas cächapletaj na ri u chac ri Tataxel chquixol conojel ri nu winak ri e jabutal apanok. Kas jeʼ, chquixol ri jutak mulaj winak junam quijaʼlil ri e sachinak, ri u cʼamom bi qui be pa Jerusalén.

27 Kas jeʼ, cächapletaj na we lokʼalaj chac chquixol conojel nu winak ri e jabutal apanok. Cächapletaj na rumal ri Tataxel chusucʼumaxic ri u beyal rech quecuinic quebopan wucʼ, rech quecuinic cäquichʼabej ri Tataxel pa ri nu bi.

28 Jeʼ, cächapletaj cʼu na ri lokʼalaj chac chquixol conojel tak tinimit rumal ri Tataxel. Jewaʼ cusucʼumaj na ri u beyal rech chi ri u winak quecuinic quemulitajic ulok pa ri ulew re ri quechbal.

29 Quebel cʼu na ulok chquixol conojel tak tinimit. Man quebel tä ulok chanim, mawi rucʼ aninakil, rumal rech chi ri in quinnabej na chquiwäch cächa ri Tataxel, y quinban cʼu na ri chajinel que chquij.