Ngwac Kahlwem Fuhkah?

Tamuhlwel ac tahmtahel sacohk wiyuck, ma na engan se tuh kuht sulpac tuhkweni ke toeni luhlahp se inge ke Alu luhn Jisus Kraist luhn Mwet Luhlahlfongi ke Lwen-sahflah ye kolyuck luhn mwet pahluh sacohk lasr, Prestuhn Russell M. Nelson. Nga fahkwack nuh suwohs lah ke kuht ac lohng puhsren Mwet Lahngo lasr, Jisus Kraist, ke kuht lohng mwe luti luhn mwet suc pruhe, on, ac sramsram nuh ke ma yohk srihpac luhn lwen lasr ke toeni se inge.

Oacna sihmlac ke puk luhn Orekma, mwet luti Philip el luti wosasuc nuh sin sie mwet Ethiopia se suc sie mwet fuhlwact in karihngihn mwe kahsruhp luhn kasra luhn acn Ethiopia.¹ Ke fuhfahsryucsr lal fohlohk liki Jerusalem, el rit ke puk luhn Isaiah. Kolyuck sin Nguhn Muhtahl, Philip som nuh yohrohl ac fahk, “Ku kom kahlem ke ma kom riti an?

“Na [mwet eunuch sac] fahk, Nga ac kalem fuka fin wangin mwet aketeya nu sik? …

“Na Philip el mutawauk in sramsram. El mutawauk ke mwe rit se inge, ac fahkang nu sel ke Pweng Wo ke Jesus.”²

Kihsen siyuck se sin mwet Ethiopia se pa sie mwe acsmak ke kunohkohn muhtahl lasr kwewa in suk in etwaclah ac luti sie sin sie wosasuc luhn Jisus Kraist.³ Ke pwacye, ke etwayacn ac lutiyacn wosasuc uh, kuht kuhtuh pacl oacna mwet Ethiopia sac—kuht enenuh kahsruh luhn mwet luti luhlahlfongi ac suwohs se; ac kuhtuh pacl kuht oacna Philip, kuht enenuh in luti ac ahkkweye mwet sahyac ke fuhfahsryucsr lalos.

Srihpacsr in suk in etaclah ac in luti wosasuc luhn Jisus Kraist enenuh in ahkyohkye luhlahlfongi ke God ac plwacn muhtahl Lal ac Jisus Kraist ac kihsac in Iwaclah Lal ac in eis eklac na pwacye se. Kain luhlahlfongi ac eklac na pwacye inge fah kahsrwe kuht oraclah ac karihngihn olwelah lasr yurin God, pwacnacng ahkfokokoye kena lasr in ukwe Jisus Kraist ac oraclah ke eklac pwacye luhn nguhnasr—kuh ke kuhtuh kahs sahyac, kuht mwet sasuclac, oacna lutiyuck nuh sesr sin Mwet Sap Paul ke lwacta lal nuh sin Mwet Corinth.⁴ Eklac se inge ac use nuh sesr engan, oaru, ac moul wo se ac kahsruh kuht ke luhlahlfongi ma pahtpaht. Kuh tiac pa ma sikyak nuh sin mwet Ethiopia se tukun el etaclah ke mwet Lahngo ac eklac nuh ke wosasuc Lal? Ma suhmuhslah fahk muh, “el som inkanek lal el arulana engan.”⁵

Masap se in etwaclah wosasuc ac luti sie sin sie tiac ma sasuc; kalweniyuck pacl puhkantwen ke muhtwacwacackiyacn moul luhn mwet.⁶ Ke sie pacl, ke Moses ac mwet lal muhta ke acn luhn Moab met liki eltahl ilyak nuh ke acn wihlwihl, Leum el moklwacl in kaiyac mwet lal ke kunohkohn lalos in etwaclah masap ac olwelah elos eis sin Leum ac luti ma inge nuh sin tuhlihk nahtuhlos,⁷ puhs selos tiacna ahluhkwelah Meoa Sruhsrah kuh mwe fwackyuck luhn Finohl Sinai.

Moses el kaiyac mwet lal:

“Akos ma sap ac oakwuk nukewa ma nga luti kowos kac, na kowos fah ku in moul ac muta fin facl se su Leum God lun papa tomowos El sot nu suwos. …

“… Srumun nu sin tulik nuhtuwos ac nu sin tulik nutin tulik nuhtuwos.”⁸

Na Moses el kaliyac, fahk, “Akos ma sap lal nukewa ma nga asot nu suwos misenge, na ma nukewa ac fah wo nu suwos ac nu sin fwilin tulik nuhtuwos. Ac fah loes pacl lowos in muta fin facl se su Leum God lowos El asot nu suowos in lowos new tok.”⁹

Mwet pahluh luhn God kwacna luti nuh sesr kuht enenuh tuhfahlah sucu lasr “ke luhngse ac masap luhn Leum”¹⁰ ac “ke kahlwem ac pwacye.”¹¹ Prestuhn Nelson el fahk, “Ke lwen inge ke ma koluk ac petsac koluk oacna pornography, oasr kunohkohn muhtahl se luhn pahpah ac ninac in luti tuhlihk nahtuhlos yohk srihpen God [ac Jisus Kraist] ke moul lalos.”¹²

Tamuhlwel ac tahmtahel, mwe luti luhn mwet pahluh wowo lasr ahkacsmakihnye kuht lah oasr kunohkohn sifacna lasr in suk in etwaclah ac luti sucu lasr lah oasr Pahpah Inkuhsrao suc luhngse kuht ac suc oraclah plwacn muhtahl luhn engan ke tuhlihk Natuhl; lah Jisus Kraist, Wen Nahtuhl, pa Mwet Molwelah luhn facluh; ac lah molwelah tuhkuh sin luhlahlfongi ke Inel.¹³ Moul lasr enenuh in muhsahiyuckyak ke yot luhn Mwet Lahngo lasr, Jisus Kraist, ma e sahp kahsruh kuht mwet sifacna ac sucu in muh oasr puhla luhn nguhn insiyacsr, in tuh kahsruh kuht kampare ke luhlahlfongi lasr.¹⁴

Sahp kom esam lah luo sin mwet tuhma lutlut luo suc fahsr tohkohl John Pacptais som ac fahsr tukun Jisus Kraist ke elos lohng John fahk muh Jisus El Lahm nuhtin God, suc Messiah. Mukul wowo inge tuh eis mwe solsol luhn Jisus in “tuhkuh ac liye”¹⁵ ac elos muhta yohrohl ke lwen sacn. Elos etwaclah Jisus El Messiah an, Wen nuhtin God, ac fahsr tohkohl ke lusen moul lalos.

Ohinge, ke kuht eis mwe solsol luhn Mwet Lahngo in “tuhkuh ac liye,” kuht enenuh muhta yohrohl, rit yohk ke ma suhmuhslah, engankihn, etwaclah mwe luti Lal, ac srihke in moul oacna El moul. Tukun ma inge muhkwena kuht ac muhtwacwacack in etwacl, Jisus Kraist, ac akihlen puhsrwacl, ac etuh lah ke kuht tuhkuh nuh yohrohl ac Luhlahlfongwel, kuht fah tiac pac masrinsrwacl kuh maluh.¹⁶ Kuht ac kuh in ahkihlen ma pwacye pacl nuhkwewa, oacna sin mwet tuhma lutlut luo ingacn suc tuh muhta yohrohl Jisus ke lwen sacn.

Tamuhlwel ac tahmtahel, ma inge ac tiac sikyak na. In ukwe moklweyuck luhn inkuhsrao tiac ma fihsrwacsr se; enenuh kuht in pahng sin God ac etwaclah fuhkah lah kuht in use wosasuc luhn Jisus Kraist nuh infulwacn moul lasr. Fin kuht oruh, nga olwelah lah Nguhn Muhtahl e fah us ma pwacye nuh insiyacsr ac nuhnak lasr ac ahklohye ke ma inge,¹⁷ luti kuht ma nuhkwewa.¹⁸

Kihsen siyuck luhn mwet Ethiopia se, “Nga ac kalem fuka fin wangin mwet aketeya nu sik?” oasr pac kalmac yohk nuh ke kunohkohn lasr sifacna in oruh ip yohk luhn wosasuc kuht etwaclah in orekma ke moul lasr. Oacna ma sikyak nuh sin mwet Ethiopia se, ke srihkasrak, el mukwikwi fal nuh ke ma pwacye el etaclah sel Philip. El siyuck in pacptaislac. El etwaclah muh Jisus Kraist el Wen nuhtin God.¹⁹

Tamuhlwel ac tahmtahel, mukwikwi lasr enenuh ahkkahlwemye ma kuht etwalah ac luti. Kuht enenuh ahkkahlwemye luhlahlfongi lasr ke ohiyacn moul lasr. Mwet luti wo emet oasr srihkasrak wo lal. Lutiyacn ma kuht moulkihn na pwacye kuh in ekuhllah insiyacn mwet kuht luti. Fin kuht kena mwet kuht luti, finne sucu kuh tiac, in engankihn ma suhmuhslah ac luti luhn mwet sap ac mwet pahluh ke lwen lasr, elos enenuh liye kuht engankihn ma inge. Ohinge, fin kuht kena elos in etuh lah Prestuhn Russell M. Nelson pa mwet pahluh, mwet liyactwen, ac mwet fwackyuck ke lwen lasr, elos enenuh liye kuht sralwack pahosr in ahkkweyacl ac etuh lah kuht ukwe mwe luti mokleyuck lal. Oacna fahk Macrike etwacyuck se, “Mukwiwi uh yohk liki kahs uh.”

Sahp kuhtuh suwohs ingena siyuck sifacna, “Elder Soares, nga oruh ma inge nohfohn ac ukwe ohiyac se inge sifacna ac oacna sucu se, tuhsruhk, kuhtuh sin kawuck kuh mwet nga luhngse fahsr liki Leum. Meac nga enenuh in oruh uh?” Nuh suwohs suc ingena puhla ahsor, ngal, ac sahp auli, nuhnak muhnahs etuh tuh elos tiacna tuhlac nuh pwacye ke srihpen Leum el etuh lah acn elos oasr we ac liyaclosyang. Esam, elos pa tuhlihk nahtuhl pac!

Upac in kahlwem srihpac nohfohn lah efuh mwet fahsr ke inkacnek sahyac. Ma wo e met kuht kuh in oruh pa in luhngse ac sruohkohlos, pruhe ke wo ohiyaclos, ac suk kahsruh luhn Leum in etuh ma kuht enenuh in fahk. Engan selos ke elos oruh wo; kawuck nuh selos ac liye ma wo elos oruh. Kuht in tiac fuhlweack kaclos tuh karihngihn kuhpahsr lasr. Nimet srahngwesr kuh nuhnuhnkuh ma elos oruh! Luhngse elos na! Puhpuhlyuck luhn wen suc tuhlac luti kuht tuh pacl se ma tuhlihk nahtuhsr acsmaklac, elos kena in fohlohk nuh lohm ah. Fin ma inge sikyak ke mwet kom luhngse, oruh tuh insiyom sesseslah ke luhngse, som kahsruhsr nuh yohrohlos, sruohkohlos in poum, ac ngokyac muhtahlos, oacna pahpah tuhmuhn wen suc tuhlac tuh oruh.²⁰

Ke sahflah, kampare in moul suwohs, oraclah srihkasrak wo se nuh selos ke ma kom luhlahlfongi, ac fahsr fototo nuh sin Mwet Lahngo lasr, Jisus Kraist. El etuh ac kahlwem ahsor ac ngal lom, ac El ac ahkinsewowoye srihke ac oaru lom nuh sin mwet kom luhngse fin tiac ke moul se inge, na moul se tohk. Esam, tamuhlwel ac tahmtahel, pacl nuhkwewa lah finsrak yohk srihpac nuh ke plwacn luhn wosasuc.

Nuh ke yac puhkantwen ke kuhlwacnsap ke Alu uh, nga liye mempucr luhlahlfongi suc orekma upac ac oaru in moulkihn ip yohk inge. Tuh sikyak ohinge nuh sin ninac lolacp se ngwac pahnglol “Mary.” Ke suhpwacr, Mary el fahsrwelihk liki mukul tuhmwacl. Ke pacl ingwacn, Mary akihlwen muh sulwaclah yohk emet lal ke sucu lal pa ma luhn nguhn. Kuh pruhe, ritiyacn ma suhmuhslah, lalo, ac alu ac tempuhl srwackna yohk srihpac nuh sel?

Mary el kwacna luhlahlfongi, ac ke pacl upac ingacn, el sulwaclah in sruok ma el etuh tari muh pwacye. El konwacack kuh ke “Sucu: Sie Mwe Fahkwack nuh fin Facluh,” ma, wi pucs ma wo sahyac, fahk lah, “oasr kunohkohn muhtahl se luhn pahpah ac ninac in tuhfahlah tuhlihk nahtuhlos ke luhngse ac suwohswohs” ac lotwelos in akihlen masap luhn God pacl nuhkwewa.²¹ El suk top sin Leum pacl nuhkwewa ac akacsruhi nuh sin tuhlihk ahkohsr nahtuhl ke toeni luhn sucu nuhkwewa. Eltahl kwacna sramsram ke wosasuc ac akacsruhi ma eltahl puhla ac luhlahlfongi laltahl sie sin sie.

Finne ahsor ma eltahl puhla, tuhlihk nahtuhl etwaclah in luhngse wosasuc luhn Kraist ac kena se in kuhlwacnsap ac akacsruhi nuh sin mwet sahyac. Tolu selos fohlohk liki mission oaru lalos, ac ma fuhsr emet el ingena kuhlwacnsap ke acn South America. Tuhlihk muhtwacn mahtuh nahtuhl, suc nga etuh, ingena pahyuckyak ac fokoko ke luhlahlfongi lal, akacsruhi, “Nga tiacna puhla oacna ninac kiyuck el sifacna tuhfahkuhtlac ke srihpen Leum El wi kuht pac lohm ah. Ke ninac kiyuck fahk luhlahlfongi lal ke El nuh sesr, kuht kais sie muhtwacwacack in som nuh Yohrohl ke kihsensiyuck lasr. Nga kuloh na pwacye el luti kuht ke wosasuc uh.”

Tamuhlwel ac tahmtahel, ninac wowo se inge tuh oraclah lohm sel in sie acn in lutlut ke nguhn. Oacna kihsen siyuck luhn mwet Ethiopia sac, Mary el siyuck sel sifacna pacl puhkantwen, “Tuhlihk nuhtihk ac etwaclah fuhkah fin wacngihn ninac in kololos?”

Kawuck wowo luhk ke wosasuc uh, nga fahkwack nuh suwohs lah ke kuht ke luhngse, ke oaru, ke kuh, ac ke inse pwacye suk in etwaclah wosasuc luhn Jisus Kraist ac luti sie sin sie ke srihpac pwacye ac ye kolyuck luhn Nguhn, mwe luti inge ac sahp ekuhllah insiyac ac mokle kena se in moul fal nuh ke ma pwacye luhn God.

Nga fahkwack luhlahlfongi lah Jisus Kraist pa Wen moul nuhtin God moul. El pa Mwet Molwelah, ac El moul. Nga etuh El kol alu Lal ke mwet pahluh, mwet liyactwen, ac mwet eis fwackyuck Lal. Nga oacyacpac fahkwack nuh suwohs muh God El moul, lah El luhngse kuht El luhngse kuht in fohlohk muhta Yohrohl—kuht kwewa. El lohng pruhe lasr. Nga fahkwack luhlahlfongi luhk ke ma pwacye inge ke ine muhtahl luhn Jisus Kraist, amen.