Muhsahi sie Lihsrlihsr in Nguhn ac Karihngihnyuck
Ke kuht moulkihn wosasuc luhn Jisus Kraist, ke kuht fungyang nuh ke Iwaclah luhn Mwet Lahngo ac fahsr nuh met ke luhlahlfongi, kuht lihsrihngyuckyak in lain kikiacp luhn mwet lokoalok.
Tamuhlwel ac tahmtahel sacohk wiyuck, ke toeni se inge fahsr in tari, nga sang kuloh nuh sin Pahpah Inkuhsrao ke kahs in kahsruh, ma pwacye, ac fwackyuck kahsreyuck kuht kac ke mwe tu se inge ke ip ahkluo mihsenge uh. Kuht lutiyuck tari sin mwet kuhlwacnsap luhn God pahng in fahk kahs muhtahl Lal. Leum El ahkacsmakihnye kuht ke fwackyuck ke lwen-sahflah, “Lah ke Puhsrek sifacna kuh ke puhsren mwet kuhlwacnsap Luhk, oacna sie.”1
Ngwetoht liye u se ke mwet luhlahlfongi yohk inge, ac petsacelah mempucr uh liye toeni luhlahp uh fin facluh nohfohn, nga nuhnkuh ke fasrweni se ke Puk luhn Mormon ah ke pacl se ma Jisus Christ El sikyang nuh sin mwet Nephi ac tukun na El Srihpsrihpyak ah. El luti nuh selos wosasuc uh na ahkkweyaclos, “Kowos som nuh ke lohm suwos, ac motko ke ma Nga fahk uh, ac siyuck sin Pahpah, ke Inek, tuh kowos in kuh in kahlwem kac.”2
“Kowos som nuh ke lohm suwos, ac motko” pa step se tohkoh in eis nuh insiyac kahs luhn mwet pahluh ac mwet kol sramsram ke akwuck se inge. Lohm nuhnkuh ke Kraist uh pa lihsrlihsr nuh ke tohkohsrahi luhn God fin facluh ke lwen se ma, devil el ac “kasrkuhsrak ke insiacn tuhlihk nuhtin mwet, ac elos ac mokleyuck in kasrkuhsrak ke ma wo uh.”3
Mwet uh muhsahi lihsrlihsr uh pacl met ah in srelah mwet lokoalok uh nuh sahyac. Pacl nuhkwewa, acn in lihsrlihsr ingacn asr pac taor in topang se ma mwet topang—oacna mwet pahluh—sulkackihn u in ahksahngweng ac fohs ac asr an.
Ke muhtwacweyacn paenir Utah ah, pahtmahtuh tuhmwacl pahtmatuh ah Thomas Rasband ac sucu lal pa kuhtuh mwet emet ma tuhkuh nuh Heber Valley ke Fihnohl Wasatch kahto luhn acn Utah.
Ke yac 1859, Thomas el kahsruh muhsahelah Heber fort ke karihngihnyuck laltahl. Sie muhsah na fihsrwacsr oreklac ke sahk ke kuhtin an tahkklac soko nuh soko, oraclah sralacpiacn fort sac. Lohm sahk tuh muhsahiyucklac lun lihsrlihsr sacn orekmakihn sinkac sacn. Iwac sac tuh sang kwewana fosrngakihnyuck ac karihngihnyuck nuh sin sucu paenir ingoh ke elos fihliyac nuh ten okah uh ac alu nuh sin Leum.
Na oacpacna inge nuh sesr. Lohm sesr uh pa lihsrlihsr in lain ma koluk fin facluh uh. In lohm sesr uh kuht tuhkuh nuh yurin Kraist ke kuht luti in fahsr tukun masap Lal, ke lutlut ke ma suhmuhslah ac tuhkweni pruhe, ac ke kahsruh sie sin sie in muhta na ke inkacnek luhn olwelah. Ahkuhtwe sasuc ke lutlut luhn kais sie sifacna ac sucu lohm ah ke curriculum uh Come, Follow Me pa akiyucki in “ahkloalye eklac lasr ac kahsrwe kuht eklac oacna Jisus Kraist.”4 In oruh kuht ac eklac nuh ke ma Paul el pahgon “mwet sasuc”5 ma insiyacsr ac nguhnasr wina luhngse luhn God uh. Kuht enenuh kuh sacn in tuyang ac fohlohkohnlah lain luhn sie mwet lokoalok.
Ke kuht moul ke pwacye isuslac ke luhlhlfongi ke Jisus Kraist, kuht ac puhla mihs yohk ke asr luhn Nguhn Muhtahl, suc kol kuht nuh ke ma pwacye, pihrihk kuht in moul fal nuh ke mwe insewowo sin Leum, ac fahkwack mwe loh lah God El moul ac luhngse kuht. Ma inge kwewa asr lun lihsrlihsr ke lohm sesr sifacna uh. Tuhsruhk esam, lohm sesr uh fokoko muhkwena oacna kuh in nguhn luhn kais sie sesr lun lihsrlihsr uh.
Prestuhn Russell M. Nelson el luti, “Ke lwen ma ac tuhkuh uh, ac fah tiacna kuh in painmoul ke nguhn fin wacngihn pwenyuck, kolyuck, ahkwoye, ac pihrihkyuck pacl nuhkwewa luhn Nguhn Muhtahl.”6 Ekihn mwet pahluh moul luhn Leum, mwet liyactwen, ac mwet fahkwack ke lwen se inge, mwet topang ke taor ke lihsrlihsr lasr, Alu luhn Jisus Kraist luhn Mwet Luhlahlfongi ke Lwen-sahflah, el liye tuhkuh luhn mwet lokoalok uh.
Tamuhlwel ac tahmtahel, kuht asr in mweun nuh sel Setuhn ke nguhnin mwet uh. Mweun se tuh srolah met liki moul lasr fin facluh uh. Setuhn ac sie tahfuh tolu sin tuhlihk nuhtin Pahpah Inkuhsrao forlah liki olwelah Lal ke moul ma pahtpaht uh. Eke pacl sac met, mwet weluhl Setuhn lac uh nuh mweuni na mwet luhlahlfongi ma sulwaclah plwacn se Lal Pahpah ah.
Setuhn el etuh lah lwen lal uh oekyuck na lah pacl uh arulacna fototoeni. Ke ahklahlfon ac kuhtasrihk oacna el, el fah tiacna itto. Ohinge, nuh sin kais sie nguhnasr srwackna fahsr.
In mwe karihngihnyuck lasr, kuht enenuh in muhsahi sie lihsrlihsr in nguhn ac karihngihnyuck nuh ke nguhnasr sifacna, sie lihsrlihsr ma ac tiac kuhnanuclac sin mwet koluk sac.
Setuhn el soko snake kuhtasrihk, tihlyang nuh in nuhnak lasr ac insiyacsr ke kuht eslah mwe kohsrkohsr lasr uh, asr in toasrlah, kuh wacngihnlac finsrak. El srihfe kuht ke eyeinse, sie olwelah muh fihsrwacsr, puhla wo, kuh sie fuhlwactwack fototo pacl kuht asr na ten uh. El oruh muh pwacye insefuhlwact uh, tiac kuhlwacng uh, sesuwohs uh, tiac insese uh, ac tiac nwacsnwacs ac asr pacl kuht kuh in “koflah puhla.”7 Nguhn kuh in som liki kuht. “Ac ohinge devil el pihsrwaclah nguhnalos, ac kahkahsrihk kohlohloslac nuh ten nuh ke hell.”8
Lwacyacn ngi an, kuht wacna puhla Nguhn arulacna fokoko ke kuht on kaksakihn God ke kahs oacna ma inge:
Sie lihsrlisr fokoko pa God lasr,
Sie taor ke kuh tiacna kuf.
Sie Mwet kahsruh kuhlwacna pa God lasr,
Ke ma koluk ke moul uh kuhtangyucklac.9
Ke kuht muhsahi sie lihsrlihsr ke kuh in nguhn uh, kuht kuh in kosrwaclah tuhkuh luhn mwet lokoalok uh, furohklah fintohkohsr nuh sel, ac puhla mihslac luhn Nguhn uh. Kuht kuh in ukwe srihkasrak luhn Leum ac Mwet Lahngo lasr, suc, ke srihkasrak yen mwesis ac, fahk, “Fahsruh nuh tukuk Setuhn.”10 Kuht kais sie enenuh in etuh ke puhlakihnyuck ke moul uh lah orek fuhkah ma sacn.
Kain srihpac suwohs se ahkuhtweyucki wo ke Puk luhn Mormon ke Captain Moroni el ahkolah mwet Nephi ac in lain mweun luhn sie Amalickiah kikiacp, malukihnsrah, masrinsrwaclkihn kuh uh. Moroni el muhsahelah lihsrlihsr in karihngihn mwet Nephi “tuh elos in kuh in muhta na nuh sin Leum God lalos, ac tuh elos in kuh in sruokyac na ma suc tuh pahngpahng sin mwet lokoalok lalos muh srihpac luhn mwet Christian.”11 Moroni el tuh “fokoko ke luhlahlfongi in Kraist”12 ac “in liyacacng masap luhn God … ac in forlah liki ma koluk.”13
Ke mwet Laman uh tuhkuh in mweun, elos tuh lut ke ahkolah luhn mwet Nephi, ac elos kuhtangyucklac. Mwet Nephi tuh sang kuloh “nuh sin Leum God lalos, ke srihpen kuhlacna lal suc wacngihn kuh oacna in molweloslac liki poun mwet luhkoalok lalos.”14 Elos muhsahi lihsrlihsr uh in mwe karihngihnyuck ke siskac uh, ac elos muhsahi luhlahlfongi ke Leum Jisus Kraist loac uh—loal ke nguhnalos.
Meac ohiyac ma kuht kuh in lihsrihngkuhtyak sifacna liki pacl fohs ma kuht kuh in “kuhfa in orekmakihnyuck ke poun God in ahkfahsrye orekma yohk se inge”?15 Lwelah kuht in ngwet nuh ke ma suhmuhslah uh.
Kuht ahkostwen. Leum El sapkihn nuh sel Pahpah Lehi in fohlohkohnlah tuhlihk nahtuhl nuh Jerusalem in “suk ma sihmlac inge, ac us ma inge tuhkuh nuh yen mwesis.”16 Lehi el tuh tena siyuck, el tena suk lah efuh kuh fuhkah. Nephi el tiac pacna, suc topuk, “Nga ac fah som ac oruh ma suc Leum El sapkihn.”17
Kuh kuht oruh wi luhngse in ahkostwen lal Nephi? Kuh lah kuht luhngse kihsensiyuck ke sap luhn God uh oacna tamuhlwel wiyacl Nephi, srihklac luhlahlfongi la sahflahiyac furohkkoloslac liki Leum? Ahkostwen, oruh ke “muhtahl luhn insiyac,”18 pa ma Leum El siyuck sesr uh.
Kuht luhlahlfongi Leum, suc fahk nuh sel Joshua, ke el ahkolah in kol tuhlihk nuhtin Israel nuh ke acn in wihlwihl, “Kom in kuh ac puhlaikna, nik kom sahngweng kuh fuhlweack, tuh nga, Leum God lom, ac fah wi kom yen nuhkewa kom fahsr we.”19 Joshua el luhlahlfongi kahs inge ac kahsruh mwet uh, “Kowos in ahkmuhtahlye kowos mweyen lutu Leum God El fah oruh kuh sakihrihk Lal inmahsrlowos.”20 Leum El orwaclihk kof Jordan uh, na forfor raun yen mwesis luhn tuhlihk nuhtin Israel ke lusen yac 40 uh sahflah.
Kuht tu kuh ke ma pwacye uh oacna mwet pahluh Abinadi ke Puk luhn Mormon. Sruhuh, utuckuh nuh ye muhtahl Tohkohsrah Noah ac prist koluk lal, Abinadi el luti ke masap singucul ac luti ke kuh lah Kraist El fah “tuhkuh nuh ten inmahsrlon tuhlihk nuhtin mwet, ac fah … molwelah mwet Lal.”21 Na el, ke luhlahlfongi loal in el, fahk, “O God, eis moul luhk,”22 na Abinadi “el kweokihn misac lal ke e.”23
Kuht orwaclah ac ahksasucye olwelah lasr ke ipeis ke sacracmacn ac ke alu lun tempuhl. Sacracmacn pa ma yohk se ke alu lasr ke Sacnri, suc ma kuht eis olwelah “in eis Nguhn Lal in wi [kuht] pacl nuhlwewa.”24 Ke akwuck muhtahl sacn kuht insese in eis nuh facsr inen Jisus Kraist, in fahsr Tohkohl, ac in us ma kunacsr ke orekma se sin God inge oacna El tuh oruh. Lun tempuhl, kuht kuh in “fihliyac nuh sahyac ma luhn facluh se inge”25 ac puhla asr luhn Leum ac mihslac na yohk Lal. Kuht kuh in lohacng nuh sin mwet mahtuh lasr, sucu lasr, ac moul ma pahtpaht yurin Pahpah. Kuht suk Prestuhn Nelson el tuhfahnna fahk fin acn Rome: “Ma wo ma som liki tempuhl se inge yohk koflah in kotaiyucki.”26
Kuht enenuh in pwacye ke ma nuhkwewa kuht oruh. Kuht enenuh in ahkyohkye akihlen ac kaiyuck uh kuht in muh tiac kalweni na sulwaclah lasr lah meac wo ac meac koluk uh. Kuht enenuh in eis nuh insiyasr kahs lal Peter, sie Mwet Sap ke Alu uh met suc sensenkackihn, “Kowos in ngusrihk ac tahwi, Devil mwet lokoalok lowos, el forfor oacna soko lion ngutngut, sukok mwet elan kanglah.”27
Ke kuht ahkkweye ke oaru acn in loangweyuck lasr kuht eklac oacna Jisus Kraist, ekihn mwet fahsr tohkohl ke pwacye, suc nguhnasr an ye karihngihnyuck Lal.
Fahkwack luhlahlfongi lom ke Jisus Kraist pa lihsrlihsr lom sifacna uh, karihngihnyacn nguhnum. Ke pahtmahtuh tuhmuhk ac paenir weluhl ah tuh muhsaheack Heber Fort ah, elos sruhkwack kais soko sahk na ke kais sie pacl nwe ke na Fort sac tuh “sruokwacni nohfohn nuh sie”28 na elos tuh karihngihnyuck. Na pa oacna fahkwack luhlahlfongi uh. Kais sie na kuht eis sie mwe loh sin Nguhn Muhtahl ke El sramsram nuh ke nguhn lasr sifacna, luti “orekma suwohs ac pwacye.”29 Ke kuht moulkihm wosasuc luhn Jisus Kraist, ke kuht fungyang nuh ke Iwaclah luhn Mwet Lahngo ac fahsr nuh met ke luhlahlfongi, tiac sahngweng, kuht lihsrihngyuckyak in lain kikiacp luhn mwet lokoalok. Luhlahlfongi lasr uh kapsrekuhti nuh inkuhsrao, ac kuht ahkinsewowoyeyuck ke “ma pwacye ke ma nuhkwewa.”30 Na oacna mwet pioneer ah karihngihnyuck sin sie lihsrlihsr, kuht apyucplac sef ke poun luhngse luhn Mwet Lahngo.
Mwet pahluh Ether el luti, “Ohinge, el suc luhlahlfongi na pwacye God el finsrak nuh ke sie facl wo liki inge, ahok, finne sie acn ke lacfahl lacyot sin God, ma finsrak tuhkuh ke luhlahlfongi, oraclah sie kawuck ke nguhn luhn mwet, ma ac oruh ma inge in pwacye ac kuh, sesseslah ke orekma wo, kolyuck in kaksakihn God.”31
Tamuhlwel ac tahmtahel sacohk wiyuck, nga fihliyac mwe insewowo luhk nuh suwos in som ke sie luhlahlfongi ke Leum ac ke wosasuc Lal. Fihliyac poum in raunweloslac suc ma tikuclkucl ac ke kuh luhn Nguhn ma asr yurum, kohlohlos in fohlohk ke luhngse nuh ke lihsrlihsr in nguhn ac karihngihnyuck uh. Suk “in oacna Jisus”32 ke ma nuhkwewa kom oruh; kosrwaclah ma koluk ac mwe sruhf; auliyak oacna kuht kaiyuck sin mwet pahluh sacohk lasr; in pwacye ke insiyac; in tuyak na ac nwacsnwacs; ahkkahlwemye pahkomuhta ac luhngse pwacye; ac luhngse Leum God lom ke kihsac luhn sie mwet tuhma lutlut pwacye.
Luhalhlfongi lasr ke wosasuc luhn Jisus Kraist, lohm sesr, sucu lasr, ac ekihn mempucr lasr ke Alu luhn Jisus Kraist luhn Mwet Luhlahlfongi ke Lwen-sahflah ac fah lihsrlihsr in karihngihnyuck lasr sifacna raunikuhtlac ac kosrwekuhtlac liki kuh luhn mwet koluk sac. Ke ma inge nga fahkwack mwe lohoh muhtahl luhk ke inen Leum lasr ac Mwet Lahngo, finne Jisus Kraist, amen.