Ahknwacsnwacsyeyucklac ke Auliyak

Auliyak uh muhtwacwacack sin Mwet Lahngo lasr, ac pa mwe engan se, tiac ma toasr se. Ke Christmas devotional Tisacmpuh tari ac, Prestuhn Nelson el luti: “Auliyak pwacye uh tiac ma sikyak pacl se na. Auliyak uh wacngihn sahflahiyacn sukohsohk la. Auliyak uh yohk srihpac nuh ke kapkapwack ac mihslac in mwe nuhnak, puhla wo, ac engan.”³

Kuhtuh sin mwe luti yohk ke auliyak uh oasr ke sramsram in luti lal Alma ke Puk luhn Mormon nuh sin mempucr ke Alu uh suc el ahkuhtweyac tohkohyang ke pacl se ma oasr ke “tiac arulacna luhlahlfongi,” “fuhlwactwack ke … fihlwacng,” ac fihliyac insiowos ke “mwe kahsruhp ac ma wacngihn srihpac luhn facluh” (Alma 7:6). Kais sie mempucr ke Alu fohlohkihnyuckyak se inge arulacna yohk ma lotwelah ke mwe luti ahkkweyeyuck luhn Alma.

Kuht muhtwacwacack ke luhlahlfongi kacn Jisus Kraist, mweyen “el pa suc ac tuhkuh in eislah ma koluk luhn facluh” (Alma 5:48). Kuht enenuh in auliyak mweyen, oacna Alma el luti ah, “kowos fin tiac auliyak kowos tiac kuh in usrui tohkohsrahi inkuhsrao” (Alma 5:51). Auliyak uh ip yohk srihpac ke plwacn luhn God. Mweyen mwet nuhkwewa fah koluk ke moul in ikoac lasr uh ac kuh in sisilac ye muhtuhn God, mwet se kuh in tiac “moliyucklac” fin el tiac auliyak (Alma 5:31; liye pac Helaman 12:22).

Ma se inge lutiyuck eke muhtwacwacack ah mwe. Leum El sapkihn nuh sel Adam, “Luti nuh sin tuhlihk nuhtum an, lah mwet nuhkwewa, acn nuhkwewa, enenuh in auliyak, kuh eltahl kuh in tiac usrui tohkohsrahi luhn God, tuh wacngihn sie ma fohkfohk kuh in ilyak we, kuh muhta yohrohl” (Moses 6:57). Kuht enenuh in auliyak ke ma koluk lasr nuhkwewa—mukwikwi lasr nuhkwewa kuh ohiyac suhfal ma fahsr liki masap luhn God. Wacngihn sie mwet sriyucklac. Ekuh se tari ah Prestuhn Nelson el suli kuht, “Tamuhlwel wiyuck, kuht kewa enenuh in auliyak.”⁴

In ahknwacsnwacsyeyuck ke auliyak, kuht enenuh fahsr liki ma koluk lasr ac taltal nuh sin Leum ac mwet nuhnuhnkuh Lal fin enenuh (liye Doctrine and Covenants 58:43). Alma el oacyacpac luti lah kuht enenuh in “ahkfahsrye orekma luhn suwohswohs” (Alma 5:35). Ma inge nuhkwewa oasr ke suli luhn ma suhmuhslah in tuhkuh nuh Kraist.

Kuht enenuh in ipeis ke kuhfa luhn Leum ke lwen Sabbath. Ke akwuck se ingacn kuht orwaclah olwelah ac eis mwe insewowo ma kahsrwe kuht kuhtanglah kewa ohiyac ac kena ma korsrekuhtlac kuht liki suwohswohs ma Mwet Lahngo El suli kuht in eis (liye Matthew 5:48; 3 Nephi 12:48). Ke kuht “lahfwekihn [kuht sifacna] ke ma koluk nuhkwewa, ac luhngse God ke [insiyacsr] kewa, nuhnak ac kuhiyac,” na sahp kuht ac “ahksuwohsyeyucklac ke Kraist” ac “ahkmuhtahlyeyucklac” ke kahklah luhn srah luhn Kraist, in “eklac muhtahl, tiac fohkfohk” (Moroni 10:32–33). Olwelah na wo se! Ma na usrnguck se! Ma na insewowo se!

Sie srihpac ke plwacn luhn God nuh ke moul in ikoac se inge pa in “ahkpwacyei” kuht “in liye lah [kuht] ac fah oruh ma nuhkwewa ma Leum God [lasr] fah sapkihn nuh [sesr]” (liye Abraham 3:25). Ke plwacn se inge, oasr kunohkohn lasr nuh sin God ac nuh sin mwet kuhlwacnsap Lal, ac kunohkohn se inge wi nuhnuhnkuh luhn facluh ac inkuhsrao kwewa.

Ke Alu luhn Leum, nuhnuhnkuh luhn mwet facluh nuh sin mempucr kuh mwet suc ke wi alu uh oreklac sin mwet kol suc suk kolyuck muhtahl. Kunohkohn laltahl in nuhnuhnkuh mwet suc suk in tuhkuh nuh Kraist in eis kuh luhn Iwaclah Lal ke inkacnek luhn akwuck nwe ke moul ma pahtpaht. Nuhnuhnkuh luhn mwet facluh fahk lah fin mwet se ahkolah nuh ke pacptais uh. Kuh mwet se inge suwohs nuh ke akwuck nuh ke tempuhl? Kuh mwet se ma inel itucklac liki puk nuhtin Alu uh auliyak fal nuh ke Iwaclah luhn Jisus Kraist in sifil akihlwenyuck ke pacptais?

Ke mwet nuhnuhnkuh kawihl pahngonyuck sin God ahkkweyelah mwet se nuh ke kapkapwack tok lal, pa nuh ke pacl wowo lal nuh tempuhl, tiac na akihlwenyac mwet se ingacn muh suwohs, ac el tiac eis nuhnakmuhnahs ke oacna sie ma koluk. Elder Spencer W. Kimball el luti lah tukun ma el pahgon “sahflah luhn mwe kaiyuck,” ke moul suhkawihl inge mwet se “enenuh in suk ac liyacacng eke pacl in auliyak sahflah inkuhsrao luhn God, ac el muhkwena kuh in sang nuhnak muhnahs.”⁵ Ac fin ohiyac ac kena koluk srwackna tiac auliyak kac nwe ke Nuhnuhnkuh Sahflah, mwet se ma tiac auliyak uh fah srwackna fohkfohk. Kunohkohn sahflah, wi ahknwacsnwacs sahflah tuhkuh sin auliyak, ma inmahsrosr ac God.

Nuhnuhnkuh se ma yohkna ahkuhtweyucki ke ma suhmuhslah uh pa Nuhnuhnkuh Sahflah ma sikyak tukun Sifil Moulyak (liye 2 Nephi 9:15). Puhs ma suhmuhslah fahk lah “kuht fah tu ye siah in nuhnuhnkuh luhn Kriast” (Met Rom 14:10; liye pac 2 Nephi 9:15; Mosiah 27:31) “in nuhnuhnkweyuck fal nuh ke orekma [ma] oreklac ke mahno ke moul kawihl” (Alma 5:15; liye pac Fwackyuck 20:12; Alma 41:3; 3 Nephi 26:4). Mwet nuhkwewa fah nuhnuhnkweyuck “fal nuh ke orekma lalos” (3 Nephi 27:15) ac “fal nuh ke kena luhn insiaclos” (Doctrine and Covenants 137:9; liye pac Alma 41:6).

Srihpac luhn Nuhnuhnkuh Sahflah uh pa in sulwaclah lah kuht eis ma Alma el ahkuhtweyac ke “eklac na yohk se inge ke insiowos” (liye Alma 5:14, 26), lah kuht eklac oacna mwet sasuc, ma “wacngihnlac kena la in oruh ma koluk, tuh in tahfwelah in oruh ma wo” (Mosiah 5:2). Mwet in nuhnuhnkuh se pa Mwet Lahngo lasr, Jisus Kraist (liye John 5:22; 2 Nephi 9:41). Tukun nuhnuhnkuh Lal kuht nuhkwewa fah fahkwack “lah nuhnuhnkuh lal nuhnuhnkweyuck” (Mosiah 16:1; liye pac Mosiah 27:31; Alma 12:15), ke srihpen etuh Lal (liye 2 Nephi 9:15, 20) sang etwacack suwohs Lal ke mukwikwi ac kena lasr, kewana ke suwohs kuh ma kuht auliyak kac kuh ma kuht soenna auliyak kuh ekuhllah.

Ma suhmuhslah ahkuhtweyac ahkfahsryeyacn Nuhnuhnkuh Sahflah Alma el luti lah nuhnuhnkuh luhn God lasr ngihsrwe lah ke pacl in Sifil Moulyak uh “ma nuhkwewa enenuh in fohlohkyak nuh ke ohiyac fal la” (Alma 41:2). Kalmac lah fin “orekma lalos fin wo ke moul se inge, ac kena luhn insiaclos wo, … ke lwen sahflah [elos fah] sifil fohlohkyak nuh ke ma wo” (Alma 41:3). Atac se pacna inge, “fin orekma lalos [kuh kena lalos] koluk elos fah sifil fohlohkihnyuckyak nuh ke ma koluk” (Alma 41:4–5liye pac Helaman 14:31). Ohinge, mwet pahluh Jacob el luti lah ke Nuhnuhnkuh Sahflah “elos suc suwohswohs fah srwackna suwohswohs, ac elos suc fohkfohk fah srwackna fohkfohk” (2 Nephi 9:16; liye pac Mormon 9:14; 1 Nephi 15:33). Pa inge ahkfahsrye se met liki kuht tu ke ma Moroni el pahngon “muhtuhn nien nuhnuhnkuh luhn Jehovah kuhlacna, Mwet Nuhnuhnkuh Ma Pahtpaht luhn kwewana mwet moul ac mwet misac.” (Moroni 10:34; liye pac 3 Nephi 27:16).

In karihngihn lah kuh in nwacsnwacs ye muhtwacn God, kuht in auliyak met liki Nuhnuhnkuh Sahflah (liye Mormon 3:22). Oacna ke Alma el fahk nuh sin tuhlihk koluk se nahtuhl ah, kuht tiac kuh in okanlah ma koluk lasr uh ye muhtuhn God, “ac kom fin tiac auliyak ma inge fah sang lain kom ke lwen sahflah” (Alma 39:8; ahkuhtweyac wo ituckyang). Iwaclah luhn Jisus Kraist use nuh sesr inkacnek soko fanna in eis enenuh nuh ke ahknwacsnwacsyeyucklac pa nuh ke auliyak, ac ke moul in mahno se inge pa pacl se in oruh. Ne ohinge lutiyuck kuht lah kuhtuh auliyak uh kuh in sikyak ke facluh luhn nguhn (liye Doctrine and Covenants 138:31, 33, 58), pa inge kuht tiac etuh nuh pwacye. Elder Melvin J. Ballard el luti: “Fihsrwacsr kuhtuh in kuhtanglah ac kuhlwacnsuhpuh Leum ke kewana ikoac ac nguhn tuhkweni nuh sie. Pac inge pacl se ma mwet uh upaclac fihsrwacsrsrwacsriyac ac welah ma uh. … Moul se inge pa pacl in auliyak.”⁶

Ke kuht auliyak, kuht eis ahkkweyeyuck luhn God tuh ma koluk lasr, weacng ohiyacsr ac kena lasr, fah ahknwacsnwacsyeyucklac ac nuhnuhnkuh pahkotwen sahflah lasr fah “tiac sifil esamyuck” (Doctrine and Covenants 58:42; liye pac Isaiah 1:18; Jeremaia 31:34; Hebrew 8:12; Alma 41:6; Helaman 14:18–19). Ahknwacsnwacsyeyucklac ke auliyak, kuht kuh in eis moul ma pahtpaht, suc Tohkohsrah Benjamin el ahkuhtweyac muh “in muhta yurun God ke sie ohiyac engan wacngihn sahflahiyac” (Mosiah 2:41; liye pac Doctrine and Covenants 14:7).

Ke fohnlah ke “plwacn luhn sifil fohlohkihnyuckyak” luhn God (Alma 41:2), Fohlohkyak fah sifil fohlohihnyuckyak “ma nuhkwewa … nuh ke ohiyac fal ac suwohs la” (Alma 40:23). Ma inge weacng ma nuhkwewa ke mahnosr ma suhfal ac eklac enenuh in fohlohkihnyuckyak in fas ke mahnosr, muhtwacwacack eke isuslac kuh ke elyah sikyak kuh misac.

Kuh fohlohkyak se inge ahksuwohsye kuht ke ma tiac muhtahl ke kena kuh pahlah in oruh ma se nuhkwewa lasr? Tiac kuh in sikyak ma sacn. Lutiyuck kuht lah kuht fah nuhnuhnkweyuck ke kena lasr oacyacpac mukwikwi lasr (liye Alma 41:5Doctrine and Covenants 137:9) ac lah finne ke nuhnak lasr fah lain kuht (liye Alma 12:4). Kuht enenuh in tiac “kotwaclah pacl in auliyak [lasr] uh” ne ke kuht misac (Alma 34:33), mweyen, Alma el luti, nguhn sepacna inge ma muhta in monuwos ke pacl se kowos som liki moul se inge—lah ma luhn God kuh devil—“fah oasr kuh la in muhta ke [mahnosr] ke facl ne tok ma pahtpaht sac” (Alma 34:34). Oasr kuh luhn Mwet Lahngo lasr ac soano kuht in ahknwacsnwacsye kuht liki ma koluk. Ingena pa pacl in suk kahsruh Lal in auliyak liki kena ac nuhnak sesuwohs kuh koluk lasr ac ahkolah in tu ye muhtuhn God ke Nuhnuhkuh Sahflah.

Kuhtanglah plwacn luhn God ac masap Lal nuhkwewa pa luhngse Lal nuh sesr kais sie, suc pa “luhngkihnyuck emet liki ma nuhkwewa … ac engankihnyuck emet nuh ke moul uh” (1 Nephi 11:22–23). Mwet pahluh Isaiah el ahkkweye finne mwet koluk lah ke elos “fohlohk nuh yurin Leum, … El fah sang pahkotwen … [ac] sa in nuhnakmuhnahs” (Isaiah 55:7). Alma el luti, “Liye, El suhpwacma sie mwe suli nuh sin mwet nuhkwewa, tuh paho pahkotwen ahsroeyucklac nuh selos” (Alma 5:33; liye pac 2 Nephi 26:25–33). Leum moulyak El fahk nuh sin mwet Nephi, “Liye, paho pahkotwen Luhk ahsroeyucklac nuh yuruwos, ac el suc fah tuhkuh, Nga fah eisacl” (3 Nephi 9:14). Ke ma inge ac mwe luti luhn ma suhmuhslah sahyac, kuht etuh lah Mwet Lahngo pahkotwen lasr El ikacslah pahol in eis mwet nuhkwewa fal nuh ke luhngse Lal ma El oakiyac in engankihn mwe insewowo yohk God El ahkolah nuh sin tuhlihk Nahtuhl.⁷

Ke srihpen plwacn luhn God ac Iwacluh luhn Jisus Kraist, nga fahkwack ke “kahlwem suwohs luhn finsrak” lah God El luhngse kuht ac kuht kuh in ahknwacsnwacsyeyucklac ke ohiyac tahkihnyucklac luhn auliyak. Uliyucklac nuh sesr lah “fin [kuht] ahkwot nuh met, mongo ke kahs luhn Kraist, ac muhtweng nuh ke sahflah, liye, ohinge Pahpah El fahk: Kowos fah eis moul ma pahtpaht” (2 Nephi 31:20). Lwelah kuht kewa in oruh, nga ngihsrwe ac pruhe ke inen Jisus Kraist, amen.