Ahkolah nuh ke Fohlohk luhn Leum

Ke wik tok uh, kuht ac ahkfuhlwactye Istuh. Sifil Moulyak uh ahkpwacyei kuh inkuhsrao Lal Jisus Kraist ac moul pwacye luhn Pahpah God. Okwaclah nuhnak lasr nuh sin Mwet Lahngo, ac kuht motko “Wacngihn sie oacna moul Lal ac ke kuh yohk Lal in iwaclah mwet uh.”¹ Nga finsrak kuht in nuhnkuh pac ke fohlohk Lal ke “El ac fah nuhnuhnkuh in kuh in Tohkohsrah luhn Tohkohsrah ac … Leum luhn Leum.”²

Kuhtuh pacl tari ah fin acn Buenos Aires, Argentina, nga wi toeni yurin mwet kol luhn alu puhs sahyac. Nga kuh in akihlen luhngse lalos nuh sin mwet nuhkwewa. Elos orekma in ahkfihsrwacrye kweok luhn mwet uh ac kahsruh mwet in muhtweng ke ma upac ac suhkahsruhp lalos. Nga motko ke orekma in kahsruh puhkantwen luhn Alu uh, wi pac u luhn alu puhkantwen muh wi toeni sac. Nga sruikihn kuhlwacng luhn mempucr luhn Alu luhn Jisus Kraist luhn Mwet Luhlahfongi Lal ke Lwen-Sahflah ma ahkpwacyei kuhlwacnsap la oacna Kraist.

Ke pacl sac, Nguhn Muhtahl fahkwack ma luo nuh sihk. Ma se emet, yohk srihpac orekma in karihngihn mwe enenuh in mahno luhn mwet uh ac enenuh in kalweni. Nga lut ke ma ahkluo, tuh kuhlwacna ac kahlwem. Ma se inge pa: yohk liki na kuhlwacnsap in luhngse, yohk srihpac kuht in ahkolah mwet luhn facluh ke Tuhkuh Ahkluo luhn Leum Jisus Kraist.

Ke El tuhkuh, ma upac ac ma sesuwohs ac tiac srihkweni muhkwena; tuh tui pac:

“Kosro wolf ac fah oacyacpac muhta wi sip fuhsr, ac kosro leopard fah wi nacni fuhsr uh oan, ac kaho fuhsr ac lion fuhsr ac tuhkweni mongo; ac sie tuhlihk srihsrihk ac fah kohlohlos. …

“Elos fah tiac ahkngalyeyuck kuh kuhnausyucklac ke finohl muhtahl nuhkwewa Luhk, tuh facluh fah sesseslah ke etwacack luhn Leum oacna ke kof uh afuhnlah meoa.”³

Suhkahsruhp ac kweok ac tiac srihkweni muhkwena; tuh wacngihnlac pac:

“Elos ac tui masrinsrwel, tiac enenuh mwe nihm; faht ah ac tiac ahkkahlwemyaclos, ac tiac pac folwack.

“Tuh sip fuhsr muh oasr ke tron ac fah kihtelos, ac koluhlos nuhke unohn moul ke kof: ac God fah Elah sronin muhtahlos.”⁴

Finne ngal ac ahsor ke misac uh ac fah wacngihnlac:

“Ke lwen sac ahwowo se ac tiac misac nwe ke el mahtuh; ac moul lal oacna yac luhn sahk soko;

“Ac ke el misac el ac tiac mutul,pa inge fin facluh, tuh el fah eklac ke sahr se luhn ahtron muhta, ac el ac fal, ac monglac lal in wolacna.”⁵

Oruh ahok, lwelah kuht in oruh ma nuhkwewa in ahkmuhlahlahye kweok ac ahsor ingena, ac lwelah kuht in sang insiyacsr in oaru in ahkolah nuh ke lwen sac muh ngal ac ma koluk uh tui, ke “Kraist El fah sifacna kol fin facluh; ac … facluh fah ahksasucyeyucklac ac eis wolacna luhn pacruhtais.”⁶ Pa inge lwen in molwelah ac nuhnuhnkuh. Pisap luhn Durham luhn Alu Anglican, Dr. N. T. Wright, ahkuhtweyac srihpen Iwelah luhn Kraist, Sifil Moulyak Lal, ac Nuhnuhnkuh in kuhtanglah ma sesuwohs ac ekuhllah in pwacye.

El fahk: “God El orwaclah lwen se muh facluh ac nuhnuhkweyuck in suwohs sin mwet se ma El sulwaclah—ac El use mwe ahkkweye nuh sin mwet nuhkwewa ke El ahkmoulyeack mwet sac liki misac. Ma pwacye kacl Jisus luhn Nazareth, ac yohkna ke sifil moulyak liki misac Lal, pa pwelucng se ke mwe ahkkweye muh facluh tiac falyang na. Tiac arlac elyah upac se; muh ke kuht oruh ma suwohs ingena uh ke kuht tiac osiyuck ke lohsr uh,srihke na in oakiyac lohm muh ac fah puhtatlac, kuh orwaclah sie stosah in wolac muh sucmuhsahlsahluh. Ke God El moulyak Jisus liki misac, pa inge ma yohk emet ke nuhnuhkuh pa sikyak ke pacl srihsrihk, ke fihtac se, fihtac se ke finsrak fuhlwactlacna. God El fahkwack, ke ohiyac kuhlacna, muh Jisus luhn Nazareth El pa Messiah se. … Ke ma tahfuhnkahs yohk ke pacl met ah, [Jisus] El sifacna eis nuhnuhnkuh koluk ac sesuwohs, in tuhkuh nuh acn muh akucliyucki ac oracni ma koluk nohfohn ac ma sesuwohs ke pacl met ah, in muhtweng ke ma okahrkahr, lohsr ingoh, lahma koluk, lah ma sesuwohs, ke el sifacna, ac in ahkfalye kuh la.”⁷

Ke nga wi toeni se fin acn Buenos Aires nga fahk piyacngah ah, Nguhn ahkkahlwemye nuh sihk muh Alu luhn Jisus Kraist luhn Mwet Luhlahlfongi ke Lwen-Sahflah eis kuh siena ac kunohkohn in ahksahfye ahkolah ke Tuhkuh Ahkluo luhn Leum; ahok, pa fohlohkihnyuckyak ke srihpac se inge. Kuh kom kuh in konwacack kuhtwena mwet muh kuh in wi pacl ingena uh ke palyeyucklac muh “wolacna luhn ohiyacn pacluh” muh God El plwacn in “oracni kewa ma nuhkwewa nuh sie ke Kraist”?⁸ Fin kowos tiac sokwack srihpac sefanna in oruh ma enenweyuck ke mwet moul ac mwet misac in ahkolah ke lwen sac; fin kowos tiac sokwack u se muh luhngse in sang pacl yohk ac mani puhs in oracni ac ahkolah mwet wuhlweacng ahkolah in eis Leum, na kowos fah tiac sokwack ke kuhtwena acn sahyac.

Ke El sramsram nuh sin Alu uh ke 1831, Leum El fahkwack:

“Ki luhn tohkohsrahi luhn God sang tari nuh sin mwet fin facluh, ac na wosasuc ac fah nwacklah sahflahiyacn facluh. …

“Pahng nuh sin Leum, tuh tohkohsrahi Lal in muh fahsr nuh met fin facluh, tuh mwet muhta fwac uh kuh in eis, ac in ahkolah nuh ke lwen in tuhkuh, ke Wen nuhtin Mwet fah tuhkuh inkuhsrao me, nuknukyang ke kahlwem luhn wolacna Lal, in ohsun ke tohkohsrahi luhn God fin facluh.”⁹

Meac kuht kuh in oruh ingena in ahkolah nuh ke lwen sac? Kuht kuh in ahkokuhtlac sifacne ke u se; kuht kuh in oracni mwet wuhlweacng luhn Leum; ac kuht kuh in ahkfalye olwelah luhn molwelah “oreklac nuh sin pahpah tuhmasr,” mwet mahtuh lasr.¹⁰ Ma nohfohn enenuh sikyak ke ip yohk se met liki Leum El ac sulpac tuhkuh.

Ma se met, ac yohk srihpac nuh ke fohlohk luhn Leum pa oasr luhn mwet fin facluh uh suc ahkolah in eisacl ke tuhkuh Lal. El tuh fahk muh elos suc oasr fin facluh ke lwen sac “ke mwet srihsrihk [nuh] mwet kuhlacna, … pa sesseslah ke etwacack luhn Leum, ac fah liye ahtron muhta nuh ke ahtron muhta, ac fah sruhkwack puhsrwaclos, ac ke puhsra sefanna tuhkweni onkihn on sasuc se, fahk: Leum El sifil pac tuhkuh us Zion. … Leum El tuh oracni ma nuhkwewa nuhke ma sefanna. Leum El us Zion nuh ten liki lucng. Leum El us Zion nuh lucng liki ten.”¹¹

Ke pacl met ah, God El us siti suwohswohs Zion nuh Sel sifacna.¹² Sahyacn ma inge, Zion sasuc se ac fah eis Leum ke El fohlohk ke lwen sahflah.¹³ Zion pa mwet ma nwacsnwacs insiyac, mwet muh insiyac sefanna ac insifac sefanna, moulkihn suwohswohs ac wacngihn mwet suhkahsruhp weluhlos.¹⁴ Mwet Pahluh Joseph Smith el fahk, “Kuht enenuh in muhsaheack Zion ke orekma yohk srihpac emet lasr.”¹⁵ Kuht muhsaheack Zion lun lohm sesr, ward lasr, pracns lasr, ac stek lasr ke tuhkweni, muhtahl in God, ac luhngse muhtahl.¹⁶

Kuht enenuh in akihlwen muh muhsahyak luhn Zion sikyak ke pacl upac—“lwen in ahngyahng, lwen inisisyak, lwen in pihsaclah, ke tuhng, ke ahsor, ac ke yoksrah; ac ke kosrwacni ma inge fah tuhkuh nuh muhtuhn facluh nohfohn, fahklah sin Leum.”¹⁷ Oruh, fahsrweni nuhke stek eklac “ke karihngihn, ac ke acn wo liki pahkah, ac liki ahngyahng ke ma inge ac fah nwacklah facluh nohfohn.”¹⁸

Oacna pacl met ah, kuht “toeni nuh sie ke pacl pucspucs, in lalo ac in pruhe, ac in sramsram sie nuh sin sie pac ke ohiyac wo luhn [nguhnasr]. Ac … in ipeis ke puhret ac [kof] in esam Leum Jisus.”¹⁹ Ke Prestuhn Russell M. Nelson el ahkuhtweyac ke toeni luhlahp ke Ohktohpa tari ah, “Srihpen mahtuh luhn Alu uh pa in kahsruh mempucr nuhkwewa in ahkyohkye luhlahlfongi lalos ke Leum lasr Jisus Kraist ac Iwaclah Lal, in kahsrwelos in orwaclah ac karihngihn olwelah lalos yurin God, ac in ahkkweye ac siliyac sucu lalos.”²⁰ Wi pac ma inge, el sramsram ke srihpen wuhlweacng luhn tempuhl, ke lwen Sahpuht, ac mongo lwen nuhkwewa ke wosasuc uh e lohm ah, tahpuhkyuck ke lutlut ke mwe luti luhn Alu uh. Kuht luhngse in etuh ke Leum, ac kuht ke etwacl.²¹

Srihpen orekma in muhsaheack Zion pa in oracni mwet wuhlweacng luhn Leum.²² “Kuht luhlahlfongi ke fahsrweni luhn Israel ac ke fohlohkyak luhn Sruf Singucul.”²³ Mwet nuhkwewa suc auliyak, luhlahlfongi ke Kraist, ac pacptais pa mwet wuhlweacng Lal.²⁴ Leum El sifacna palyei met liki Fohlohk Lal, muh wosasuc ac fah fahkwelihk fin facluh nohfohn²⁵ in fohlohkonwack mwet [Lal], ma wi mwet luhn Israel,”²⁶ ac na sahflah ac fah tuhkuh.”²⁷ Pahluh lal Jeremaia ahkfalyeyucklac:

“Ohinge, liye, lwen tuhkuh, fahk sin Leum, muh [ellos] ac tui in [fahk], Leum El moul, muh koltuhlihk nuhtin Israel liki acn Egypt;

“Tuhsruhk, Leum El moul, muh kol tuhlihk nuhtin Israel liki acn acir, ac liki acn nuhkwewa muh el suhpwacloslac; ac nga fah usaclos nuhke acn lalos muh nga sang nuh pahpah tuhmwelos.”²⁸

Prestuhn Nelson el kalweni in fahk lah “fahsrweni [luhn Israel] ah pa ma yohk srihpac emet fin facluh misenge. Wacngihn kuhtwena ma yohk oacna, wacngihn kuhtwena ma yohk srihpac oacna, wacngihn kuhtwena ma wolacna oacna. Ac fin kowos sulwaclah ... kowos kuh in wi ip yohk.”²⁹ Mwet Luhlahlfongi ke Lwen-Sahflah pa misineri pacl nuhkwewa. Mwet tausin siofok ma eis pahng in wi misin ke muhtwacwacackiyacn Fohlohkihnyuck luhn wosasuc; mwet tausin puhs kuhlwacnsap ingena. Ac, ke Elder Quentin L. Cook el tuhfahna luti, kuht nohfohn kuh in wi ke ohiyac fihsrwacsr ac pwacye, ke luhngse, suli mwet sahyac in wi kuht alu, muhtwacta lohm lasr, wi u lasr. Muhtwacwacackiyacn akacsruhi ke Puk luhn Mormon pa akucl se ma in muhtwacwacack oracni mwet uh.³⁰ Puk luhn Mormon sifacna pa mwe kahsruh in oracni ac ke etahwilac luhn mwet uh.

Ma yohk srihpac ke ahkolah ke Tuhkuh Ahkluo uh pa orekma in molwelah mwet misac lasr. Leum El olwelah in suhpwacma mwet pahluh Elijah met liki Tuhkuh Ahkluo, “lwen luhlahp ac ahksahngweng luhn Leum,”³¹ in “ahkkahlwemye … pristut” ac “ukwiyac nuhke insiyacn tuhlihk olwelah nuh sin pahpah.”³² Elijah el tuh tuhkuh oacna ke el olwelah. Lwen sac pa Eprel 3, 1836; acn sac pa Kirtland Tempuhl. Ke acn sac ac ke pacl sac, el tuh sang pristut muh olwelah, ki in molwelah mwet misac ac siliyac mukul, muhtwacn, ac sucu ke fihl nuhkwewa ne tok ma pahtpaht.³³ Fin ma inge wacngihnlac, srihpac luhn oreklac luhkuhn foslac, ac ke ma inge, facluh ac fah “kasrkuhsrak” kuh “koluklac.”³⁴

Ke toeni luhn mwet fuhsr met liki kihsaclah luhn Rome Italy Tempuhl, mukul fuhsr ac muhtwacn fuhsr sun siofok kuhtuh suc wi toeni sac ahkkahlwemye nuh sel Prestuhn Nelson ke kaht ma elos ahkolah ke inen mwet misac luhn sucu lalos. Elos ahkolah in utyak nuh lun tempuhl in pacptais ke mwet misac inge ke tempuhl sac ahkolah in ikacklah ah. Pacl na lut se inge, tuhsruhk srihkasrak se ke orekma pihsrpihsr in oakiyac Zion ke fihl omeet ah.

Ke kuht srihke in oaru in muhsaheack Zion, wi pac ip lasr in oracni elos ma sollac sin Leum ac molwelah luhn mwet misac, kuht enenuh in tui ac esam muh pa inge orekma luhn Leum ac El oruh orekma se inge. El pa Leum luhn imac in grape, ac kuht pa mwet kuhlwacnsap Lal. El suli kuht in orekma ke imac in grape ke kuh lasr in “pacl sahflah” ac El wi kuht orekma.³⁵ Sahp pwacye in fahk muh El lwelah kuht in weluhl orekma. Ke Paul el fahk, “Nga ukwiyac, Apollos el kihte; tuh God El sang yohk.”³⁶ El pa ahksaye orekma Lal ke pacl fal.³⁷ Kuht fin sang kuh suhfal lasr, finne—“ma srihsrihk,”—Leum El kuh in oruh ma wolacna.³⁸

Fihl in pacl wolacna ac sahflah se inge muhsaheack kais kuhtuh nuh ke pacl yohk srihpac lal—Zion fin facluh, oracni nuh ke ma sefanna ke Zion luhn inkuhsrao ke fohlohk wolacna luhn Mwet Lahngo. Moliyacn Alu luhn Jisus Kraist ahkolah—ac ahkoeyucklac—fin facluh nuh ke lwen sac. Ac na, ke Istuh se inge, lwelah kuht in ahkfuhlwactye in pwacye Sifil Moulyak lal Jisus Kraist ac ma nuhkwewa kac. Fohlohkoh lal uh tuhkuh in kol yac tausin ke mihslac, nuhnuhnkuh suwohs ac pwacye nuh sin nuhkwewa, moul kawihl luhn nuhkwewa suc fah moulkihn facluh se inge, ac olwelah luhn moul ma pahtpaht. Sifil moulyak Lal Kraist pa inge wuhlwelah muh wo ma nuhkwewa. Lwelah kuht in wi pac muhsahi Zion in ahksaye lwen sac. Ke inen Jisus Kraist, amen.