Suk Etwacack ke Nguhn

Tamuhlwel ac tahmtahel sacohk, Leum El kalweni in fahk nuh sesr in suk etwacack finne ke lutlut ac oacyacpac ke luhlahlfongi.¹ Kuht kuh in eis kahlwem ac etwacack tiac ke nuhnak luhn insifacsr muhkwena, tuhsruhk oacyacpac ke kolyuck luhn Nguhn Muhtahl.

Etwacack se pac inge tiac oasr ke moul luhk met.

Muhtwacn sacohk kiyuck, Irene, ac nga welah Alu uh ke yac 31 somlah ah ke kuht tuhfahna pahyuckyak ah. Kuht kwewa mahtuhlah fin acn Colombia, tuhsruhk mahlwem puh tukun kuht pahyuckyak ah, orekma luhk ah uskuhtlac in muhta fin acn Germany. Kuht arulacna fuhsr ac oasr finsrak wowo lasr; pa inge pacl in engan ac pwacr lasr.

Petsac

Tahmtahel ac Elder Held

Ke nga lohacng nuh ke orkema luhk, Irene el puhlakihn muh kuht fah eis pweng inkuhsrao me, finne el tiac etuh lah fuhkah kuh ngac. Na el muhtwacwacack in lwelah kain in mwet in utyak nuhke lohm sesr in kuhka puk ke etwacack, mwe ahknwacsnwacs, puk in orek mongo, kuhfa in orek mongo, ac ma sahyac, ke srihpen el tuhpan pweng sac.

Sie ekuh ah el fahk nuh sihk lah mukul fuhsr luo suc nukum wes ac towolwack sruhnguhl lasr ac el puhlakihn muh el enenuh in lwelah elos in utyak. Elos fahk muh elos ke sramsram nuh sel ke God tuhsruhk elos ac fohlohk ke nga oasr lohm ah pac. Kuh pa inge pweng se el tuhpan ah?

Elos muhtwacwacack in muhtwacta yohrosr, ac ke kolyuck lalos, kuht riti ma suhmuhslah ac kahlwemwack ke yohk srihpaciyac lah Jisus Kraist El Mwet Lahngo ac Mwet in Molwelah lasr. Te paht tohkoh na kuht auli lah kuht pacptaislac tari ke kuht ahwowo ah, suc tiac wuhlweacng fal se. Tuhsruhk, kuht fin sifilpac pacptais kalmac pac pa kuht ac wi mempucr luhn Alu sasuc se inge, oruh kuht enenuh in kahlwem ke ma nuhkwewa ke Alu uh.

Tuhsruhk kuht ac etuh fuhkah fin pwacye mwe luti luhn misineri ke Puk luhn Mormon, kacl Joseph Smith, ac ke plwacn in molwelah? Koacl, kuht kahlwem ke kahs luhn Leum muh kuht kuh in “etwaclos ke fahko lalos.”² Oruh, ke ohiyac wo, kuht muhtwacwacack in intei Alu uh ac suk fahko inge ke muhtuh nuhnak suwohs lasr. Meac kuht liye? Kuht liye:

• Mwet kuhlwacng ac engan ac sucu wowo suc kahlwem kac muh kuht enenuh in puhla engan ke moul se inge ac tiac kweok ac ahsor na.

• Sie alu ma wacngihn mwet kol ma moliyuck nuh se tuhsruhk sie alu ma mempucr an eis ma pakpucki kunaclos ac kunohkohn.

• Sie alu ma Jisus Kraist ac sucu an pa infulwen ma nuhkwewa, ma mempucr an lalo kais sie pacl ke mahlwem nuhkwewa ac sang mani in kahsruh mwet suhkahsruhp ac enenuh, ma liyac wowo uh ahkfahsryeyuck, in luti kuht in tiac ipeis ke ma koluk.

Oacyacpac:

• Kuht luhngse yohk srihpaciyacn kapkapwack luhn kais sie, ke lutlut, ke orekma upac ac sifacna kuh in kahsruh.

• Kuht etwaclah ke prokracm wolacna in kahsruh kasrpacn mwet uh.

• Ac kuht fwefwelac ke toeni luhlahp, weacng on kahto ac ip yohk wowo luhn nguhn ma akacsruhi kac we.

Liye nohfohn ma inge, kuht tiac kuh in konwacack ma koluk luhn Alu uh. Pwacye, kuht luhngse na pwacye ma nuhkwewa kuht liye ah. Tuhsruhk, kuht srwackna koflah sulaclah in pacptais ke srihpen kuht ke etuh ma nuhkwewa met liki kuht oruh.

Tuhsruhk, finne ke tuhpwek in sulaclah lasr, Leum El muhtwecng in ahkoekuhtlac, ac El kahsre kuht in liye ma pwacye ke nuhnak suwohs ac ke puhsra srihsrihk luhn Nguhn Muhtahl, ma sramsram yohkna nuh ke insiacsr.

Puhsra sac ac puhla sac tuhkuh nuh sesr sie ekuh ah, mahlwem 10 tukun kuht etwacack ke wosasuc, ke kuht riti ke Mosiah 18, “Ke kowos kena in … akacsruhi ke ma toasr luhn kais sie, … ac ahkenganyaclos suc enenuh in ahkenganyeyuck, … fin pa inge luhngse luhn insiowos, meac lain lowos in pacptaislac ke inen Leum?”³

Kahs inge ke Puk luhn Mormon ilyak nuh insiacsr and nguhnasr, ac kuht sa na puhlakihn ac etuh lah wacngihn srihpac kuht in tiac pacptaislac. Kuht akihlacnwack lah kena ma sramsramkihnyuck ke fuhs inge pa pac kena luhn insiacsr ac lah ma inge pa ma yohk srihpac emet uh. Ma inge yohk srihpac liki na kahlwem ke ma nuhkwewa ke srihpen fal tari etwacack lasr uh. Kuht kwacna muhngnguh poun Pahpah luhng Inkuhsrao ac etuh na pwacye lah El ac fahfahlacna in kol kuht.

Oruh, ke lwen sac, kuht pakiyac lwen se in pacptais, ac ke lwen sac tuhkuh kuht pacptaislac!

Petsac

Pacptais lal Elder ac Tahmtahel Held

Meac kuht etwaclah ke ma puhlakihnyuck sac?

Ma se met, kuht etwaclah na pwacye lah kuht kuh in luhlahlfongi ke Pahpah luhng Inkuhsrao, suc srihke pacl nuhkwewa in kahsre kuht in eklac nuh ke mwet El etuh muh kuht kuh in eklac oacna. Kuht ahkpwacyei ma pwacye wolacna ke kahs Lal ke El fahk: “Nga fah sang nuh sin tuhlihk nuhtin mwet ip nuh ke ip, luti nuh ke luti, kuhtuhsrihsrihk inge ac kuhtuhsrihsrihk ingoh; ac insewowo elos suc porongo luti Luhk, … tuh elos fah lotwelah lahlmwetmwet; tuh nuh sel suc eis Nga fah sang in yohk pac.”⁴

Ac ahkluo, kuht etwaclah muh, wi pac nuhnak suwohs lasr, siepac ip yohk in ahkyohkye etwacack lasr uh kuh in use kolyuck ac kahlwem nuh sesr. Pa inge puhsra mihs ac srihsrihk luhn Nguhn Muhtahl Lal ma sramsram nuh insiacsr ac nuhnak lasr uh pac.

Nga ke kapsra ip yohk se inge nuh ke kuhiyacn liye lasr. Pahpah tuhmasr Inkuhsrao El use nuh sesr ahtron muhta luo, tiac ma sefanna. Kuht kuh in liye wona ke ahtron muhta sefanna, tuhsruhk ahtron muhta luo kasre kuht in liye ke ohiyac wo sahyac. Ke ohiyac luo inge fahsrweni ke nuhnak lasr uh, ac kuh in oraclah ohiyac wo in liye ma raunikuhtlac.

Oacyacpac, utuckuh nuh sesr mwe etwacack luo, ke kuh luhn mahnosr ac nguhnasr. Nuhnak lasr uh oraclah ohiyac se ke puhla luhn mahnosr ac ke ohiyacn nuhnak lasr. Tuh ke mwe sang luhn Nguhn Muhtahl, Pahpah El use pac ohiyac ahkluo, ma yohk srihpac ac pwacye emet, ke srihpen ma se inge tuhkuh suwohsma na Yohrohl. Tuhsruhk, ke srihpen mahmah srihsrihk luhn Nguhn Muhtahl, mwet puhs tiac etuh ke kahsruh se sahyac inge.

Ke ohiyac luo inge fahsrweni ke nguhnasr, sie petsac fohnlah ahkkalwemye ohiyac pwacye luhn ma nuhkwewa. Pwacyena, ke kahsruh luhn Nguhn Muhtahl, kuhtuh “ohiyac pwacye,” uh liyeyuck muhkwena ke kahlwem luhn nuhnak lasr uh, kuh in motkoeyuck muh kikiacp kuh suhtuhuh. Esam kahs lal Moroni: “Ke kuh luhn Nguhn Muhtahl kowos kuh in etuh ma pwacye ke ma nuhkwewa.”⁵

Ke lusen yac 31 ma nga wi Alu uh, nga puhlakihn pacl puhs lah fin kuht orekmakihn muhkwena nuhnak suwohs lasr ac lahfwekihn kuh tiac lohacng nuh ke kahlwem luhn nguhn ma kuht kuh in eis ke mahmah ac kolyuck luhn Nguhn Muhtahl, ma oacna ke kuht srihke in liye ke atron muhta sefanna. Tuhsruhk kahs in nuhnak se, utuckuh “ahtron muhta luo” lasr. Kwewana ahtron muhtahsr kuh in kahsre kuht liye ma pwacye and fohnlah ke ma pwacye nuhkwewa ac ma nuhkwewa kuht puhlakihn ke moul lasr, oacyacpac kahlwem suwohs ac loal ke moul ac srihpac lasr oa tuhlihk nuhtin Pahpah tuhmasr Inkuhsrao suc moul.

Nga esamwack ke ma Prestuhn Nelson el luti nuh sesr ke yac se tari ah ke el fahk muh “ke lwen fwahsruh uh, tiac fihsrwacr in pain moullac ke wacngihn kolyuck, kohkoh, ahkwo, ac mokleyuck luhn Nguhn Muhtahl.”⁶

Nga etuh na pwacye muh:

• Oasr Pahpah luhng tuhmasr Inkuhsrao, ac kuht nuhkwewa insese in tuhkuh nuh facluh oa sie ip luhn plwacn muhtahl.

• Jisus El pa Kraist; El moul ac El pa Mwet Lahngo ac Mwet in Molwelah luhk.

• Nga etuh muh Joseph, suc sie mukul fuhsr in imac ac inse puhsisacl, tuh pahngyak in mwet pahluh kuh suc fohlohkohnwack ma se inge, pacl fohnlah luhn pacl uh, ke ki, kuh, ac wal nuhkwewa luhn pristut muhtahl luhn God.

• Puk luhn Mormon pa mwe loh ahkluo luhn Jisus Kraist ac lah sucu an kuh in tuhkweni ne tok ma pahtpaht.

• Leum lasr, Jisus Kraist, El kol Alu se inge, Alu fohlohkihnyuckyak Lal, sin mwet pahluh moul lasr, Prestuhn Russell M. Nelson, misenge.

Ma inge ac ma pwacye sacohk puhs sahyac eklac nuh ke akwuck nguhnnguhn ma God El kahsrweyuc in eklac oacna. Ac nga rahrahlac in tuhpan mwe luti sasuc ma El ke nga—ac kom—in eis ke kuht moulkihn moul wolacna se inge ac “etwaclah … finne ke lutlut ac oacyacpac ke luhlahlfongi.”

Nga etuh ma inge pwacye ac fahkwack ke ma inge ke inen Jisus Kraist, amen.